فراس جلو

06/12/2025

انت مشكلتك مو شلون تخسر وزن،
لانك تعرف الحل بالدايت والرياضة،

مشكلتك الحقيقية هي ليش مجاي تخسر وزن رغم معرفتك للحل او حتى بعد متباشر بالحل؟!!

ببساطة لان الدايت والرياضة رغم انها العتبة الاولى والاساسية الا انها تمثل 10% من خسارة الوزن،

الباقي فهم ووعي وخارطة طريق بنقطة بداية ونقطة نهاية،

اكيد حتى اكثر المحترفين بالدنيا ميكدر يبقى مستمر على الدايت والرياضة لان الموضع اساسا مو صحي.

26/11/2025

طلعت مو بس الدهون كلاوچية اكو شي ثاني بالجسم هم يشتغل ع الحبلين،

اذا تتذكرون هذا المنشور اللي بالصورة..
فطلع اكو مركب بالجسم هم عنده وجهين متناقضين بس هذا عظيم وفعله اعظم،

هذا المركب اسمه Interleukin-6 وطول عمرنا نعرفه
على انه مادة ترفع او تعلي الالتهابات حتى تنطي انذار للجهاز العصبي ان يحفز جهاز المناعة للدفاع عن الجسم،

والعلماء من زمان ملاحظين اثناء التمرين الجسم يفرز هذا المركب بنفس الطريقة والكمية لما يكون الجسم بي التهاب او عدوى،
بس معتقدين ان الموضوع طبيعي بسبب التلف العضلي وان هذا سلوكه الطبيعي،

بس بمرور الوقت وتحديدا بالالفينات لاحظو العلماء ان هذا المركب اثناء التمرين يشتغل عكس شغله الطبيعي تماما ويعمل كمايوكين،

واللي ميعرف شنو المايوكين او المايوكينات، فهي بروتينات وظيفتها
تقلل الاتهابات وتنظم السكر بالاضافة الى تعديل اشياء اخرى،

وحتى اختصرلكيها بمثال واضح، اذا عندك مقاومة انسولين او سكر،
فهذا المركب راح يضاعف الالتهاب،

بس اذا چنت رياضي حتى لو عندك مقاومة انسولين او سكر فهذا المركب راح يقلل من الالتهابهم لانه يعمل على توازن الكلوكوز وتنظيم السكر بالدم بسبب زيادة حساسية الانسولين،

وهسة اريد اسالك بشرفك وانت تقرا هذا الموضوع، متحس الرياضة دترزلك، متحسها تكلك فباي الاء ربكما تكذبان؟

09/09/2025

قد تعتقد مشكلتك بخسارة الوزن هي التطبيق والالتزام،
بينما المشكلة الحقيقية هي بمفهومك عن التطبيق والالتزام،

تعال ناخذ مثال قريب شوي،
حتى تجيب فلوس لازم تكعد الصبح تطلع للشغل، تبقى 8 ساعات يلا تحصل هاي الفلوس، صح؟

لا مو صح، لان اكو ناس تشتغل العصر او باليل، واكو ناس تشتغل اقل من 8 ساعات واكو ناس متطلع من البيت اصلا واكو ناس يشتغلون ساعة وحدة يعادل شغل شهر كامل لناس ثانية،

اذن المشكلة بمفهومنا عن التطبي والالتزام والطريق اللي نختاره،

البرنامج الصحي لازم هو يناسب حياتك مو حياتك تناسبه
مع اخذ مرحلة التأهيل او التأسيس بعين الاعتبار

يعني انت ما راح تصير مهندس اول ما تاخذ الشهادة، اكو شي اسمه التدريب الصيفي او المهني، وهذا يأهلك للتطبيق العملي، هاي هي مرحلة التأهيل.

05/09/2025

معقولة متكدر تشتغل على نفسك 60 يوم حتى تطور حياتك؟

اي معقولة بس راح انطيك الاسباب والحلول بحيث من باچر تبلش،

عقلك وجسمك يحتاجن بس 60 يوم حتى يتغيرن تغير جذري،
لان هاي هي المدة اللي يتبرمج بيها جسمك على بناء عادة ويبقى
يكررها بدون وعي وبسهولة بدون ميحسسك بعبء الالتزام،

واذا تراجع كل الاشياء اللي تسويها بسهولة حاليا، كلها چانت صعبة ومملة بالبداية،

زين هذا الحچي حلو ومحفز، بس شلون نبدي هي هاي المشكلة؟

راح انطيك حيلتين تخلي بدايتك قوية، بس قبلها لازم تعرف ليش البداية اساسا صعبة، وفهم المشكلة هو نص الحل،

البداية دائما صعبة لانها عملية مقاومة من الدماغ ضد التغيير لان الدماغ متعلم على الراحة والرتابة،

زين شنسوي؟، اولا تقشمر دماغك، بدل متحسسه ان هو عايش برفاهية، عيشه بازمه تخيل نفسك مريض او مهجر او مسجون،

هنا الدماغ راح يعيش الحالة كانها واقع ويبدي يحفز كل طاقتك في سبيل تخلص من هاي الازمة فتكدر انت هنا تشتغل بحافز قوي،

الشغلة الثانية "ورط نفسك" وهذا المبدا مرتبط بمبدا اخر بعلم النفس السلوكي اسمه النفور من الخسارة، ومعنها خوفك على ان ما تخسر المال والجهد اللي بذلته فراح تضطر تكمل مشوارك

فورط نفسك باشياء مرتبطة بهدفك، مثل اذا هدفك جسمك تشترك بنادي او برنامج صحي، واذا هدفك عمل، تشترك بورشة او كورس وهكذا، راح تلكي نفسك مكملهم بدون وعي بس حتى متخسر،

بس اهم شي اهم شي، ان تستغل هاي الطريقة بشكل كلش صح
لان هاي الطريقة نفسها مؤقته وبعد شهرين الدماغ يبدي يكشف اللعبة، اما اذا اشتغلت صح راح دماغك يفعل حافز الاكتشاف فيمدك بطاقة جديدة وتدخل بسايكل نمو وتطوير رهيب ينتهي بسلسلة انجازات تقلب حياتك للافضل.

02/09/2025

كل الاشياء اللي تحلم بيها موجودة بالامور اللي تتجنبها

ولان الامور اللي تتجنبها، تتجنبها غصبا عليك بسبب عقلك

راح تكدر تشتغل عليها بسهولة بس اذا عرفت شلون تخدع عقلك،
وهاي تصير بخطوتين بسيطة

01/09/2025

ابتداء من 1/1/2026 قررت سلطة الطيران بجميع انحاء العالم ان الاوزانهم 100 كيلو وفوك ينحسب نفرين ويتحاسب على تذكرتين مو تذكره واحده

يعني اذا وراك سفر براس السنة ووزنك فوك ال100 كيلو، لحك من هسة تحجز يمنا

27/02/2025

العقل البشري يحب ياخذ الفكره من الصورة،
اي بالطريقه الاسرع والاسهل لان ميحب التحليل،

يعني من تشوف ثنين يسولفون بالرياضة، واحد نحيف اورشيق والثاني عنده كرش، انت مراح تقارن وتحلل بالكلام، وانما تاخذ على الشكل الي شايفه، وتصدك الاكثر رشاقة بالاوعي،

لهذا شكل الجسم الرياضي دائما يعكس عليك صورة الشخص الذكي الملتزم المنضبط صاحب مسؤولية، خصوصا بالعمل، واي شي تكوله باي مجال، راح يكون اكثر مقبولية من البقية،

وهذا حسب تصنيف علم النفس اللي ينطي 55% من تاثيرنا بالمقابل هو من خلال لغة اجسادنا شكلا وتعبيرا

هالنمط من تفكير العقل، هو بالصورة الذهنية الاواعيه، يعني شي متكدر تتحكم بي،

وبالنسبة للرياضة مو بس تعدل شكل الجسم وانما تعمل على التحكم بايمائاته من خلال الثقة اللي تبنيها بداخلنا فتغير طبيعة سولكنا

08/12/2024

الرحمة لروح الشاب الراحل منتظر علي

بالعلم ماكو شي اسمه نوبة مفاجئة، كل شي له اسباب واشارات وعلامات تحذيرية ينبهنا عنها الجسم،

وطبعا ماكو علامة واضحة وصريحة وتصرخ اكثر من زيادة حجم وتغيير شكل الجسم "السمنه"

زيادة الوزن مو مجرد تغيير بشكل جسمك وانما هي اعراض واضحة وصريحة تدل على وجود خلل،

جيب لك اي احد معدي من يم جامعة طبية، وكله اكو واحد عمره صغير ومات فجاءة بس عنده سمنه،

راح يكلك: السمنه تاثر على وظائف اجهزة الجسم الحيوية
واولها القلب راح يحتاج يضخ كمية دم اكبر بسبب زيادة حجم الانسجة الدهنية، وطبعا هذا راح يعيق عمله الطبيعي

وارتفاع الدهون بالجسم يرفع الكولسترول الضار فيسبب ترسبات
بجدران الشرايين فيضيق حجمها ويعيق تدفق الدم للقلب،

وهذا يسبب اختلال بتخثر الدم وزيادة لزوجته، واللي بدوره يسبب جلطات،

هاي الجلطات اذا راحت للقلب فراح تسبب نوبة قلبية او سكته قلبية
واذا راحت للدماغ فتسبب سكته دماغية وتؤدي للوفاة،

هسة اكو واحد لازم ينبر ويكول اكو ناس ضعيفة وماتت بسكتات قلبية او دماغية راح اكله وارد، اما بسبب السمنه الداخلية، او بسبب الضغط العصبي،

فيا عمي ارحمو انفسكم وعوائلكم من هالمرض، ترى غدار وميرحم

20/10/2024

نتائجنا

11/10/2024

عنده جهاز عصبي
وجهاز هضمي
وجهاز دوران
وجهاز مناعي
وصحته زينه

وبدون استشارة بدون فحص بدون اعراض ظاهرة
يكلي اخذ مضادات اكسده، حتى انظف جسمي،

اجيبلك مكناسة فد مرة؟
زين وهاي اجهزة الجسم شنو شغلها؟
هو كل شي نشوفه نصدكه ونطبقه؟

اكبر خدمه تقدمها لنفسك بشكل مجاني، هي تعدل نومتك واكلك وتعلب رياضة

واذا عندك وعي صحي وما تريد تبخل على نفسك، افحص او اخذ استشارة او برنامج صحي من اي احد تثق بي، وقبلها سرچ

07/10/2024

22/09/2024

شهادة صديقنا ومشتركنا مرتضى