12/12/2025
Project Bloom Hopes පළමුවන අදියර - මැදගොඩ
ව්යසනයකට මුහුණ දුන්නට පස්සේ සාමාන්ය ජීවිතයට ආයෙත් එකතු වෙන එක ශාරීරිකව වගේම මානසිකවත් සිදුවෙන්න ඕනි දෙයක්. ඒත් ඒ මුහුණ දුන්නු ව්යසනය එක්ක, එකපාරම මනස යථා තත්ත්වයට පත් කරගන්න අපහසු වෙන්න පුළුවන්. ඒ තත්ත්වේ එක්ක ඇතිවෙච්ච බය, පීඩනය, අවිනිශ්චිත භාවය, අනාරක්ෂිත බව එක්ක, ආයෙත් බලාපොරොත්තුවක් ඇති කරගන්න, ඒ වෙනුවෙන් වැඩ කරන්න, බයක්, චකිතයක් වගේම කාලයක් ගත වෙන්නත් පුළුවන්.
මේ වගේ තත්ත්වයකට මුහුණ දුන්නු, ලොකු කුඩා ඕනෑම කෙනෙක්ට මනෝවිද්යාත්මක ප්රථමධාර, මනෝ සමාජයීය සහාය, මනෝ උපදේශනය සහ චිකිත්සාවන් එක් එක් මට්ටමින් අවශ්ය වන්නේ, නැවතත් තමන්ගේ එදිනෙදා ජීවිතයට, සාමාන්ය සමාජයට එකතුවීමට, බලාපොරොත්තු නැවතත් ගොඩනගා ගැනීමට අවශ්ය මග පෙන්වීමක් වශයෙනුයි.
කුඩා සහ යොවුන් දරුවන්ගේ මානසික සෞඛ්යය ගොඩනැගීම සඳහාත්, ඔවුන්ගේ බලාපොරොත්තු, හීන කොයිතරම් නම් වටිනවාද, ඒ හීන සැබෑ කරගන්නට ඔවුන් සතුව කොයිතරම් නම් දක්ෂතා තියෙනවාද යන්න නැවතත් මතක් කර දෙමින්, ඊට අවශ්ය දිරිගැන්වීම ලබාදීමට, Sound Minds ආයතනයේ නිර්මාතෘ ළමා මනෝවිද්යාඥ, බීනුකා වික්රමතුංග මහත්මිය විසින් හඳුන්වා දුන් ව්යාපෘතිය තමයි Bloom Hopes කියන්නෙ.
මේ ව්යාපෘතියේ සහාය අත්යවශ්ය කණ්ඩායම් සහ ප්රදේශ හඳුනාගෙන, ඒ කණ්ඩායම් වෙත අපව යොමු කරමින් සහාය වන්නේ, ජාතික ළමාරක්ෂණ දෙපාර්තමේන්තුවේ( National Child Protection Authority)අප ආදරණීය නිලධාරි මහත්ම මහත්මීන් පිරිසයි.
හැම දරුවෙක්ටම, තමන්ගේ මනස සැහැල්ලු කරගැනීමට උදව්වෙන, පුංචි සතුටු මල්ලක් හදාගන්න, අපේ Sound Minds පවුලෙ අම්මල, තාත්තලා, සායනික පුහුණුව ලබන විශ්වවිද්යාල ශිෂ්ය ශිෂ්යාවන්, යහළු මිත්රාදීන් අපිට විශාල සහයක් දැක්වුවා.
සහය අවශ්ය කණ්ඩායම් කරා යන්න, අපේ කණ්ඩායමේ සාමාජික සාමාජිකාවන් 30 කට වැඩි ප්රමාණයක් සූදානමින් ඉන්නවා.
ඒ විදියට ඊයේ දවසේ අපේ කණ්ඩායම මුලින්ම ගියේ, පුත්තලම් දිස්ත්රික්කයේ තියන මැදගොඩ කියන පුංචි ගමට. අපේ සහය අවශ්ය වුණු දරුවෝ එකසිය පනහක් පමණ සමඟ ඊයේ දවසේ සතුට ආදරේ බෙදාගෙන, ඔවුන්ගේ හීන ආයෙත් මතක් කරලා, ඔවුන්ව දිරි ගන්වන්න අපිට පුළුවන් වුණා.
සතියක් පුරාවට, චිත්ර ඇඳලා, ආදරය පිරුණ පුංචි සටහනකුත් ලියලා, හැම දරුවෙක්ටම සතුට පිරුණු පාර්සලයක් ගානෙත් හදාගෙන, මේ දරුවන් වෙනුවෙන් කරන්න වැඩසටහන සඳහා හොඳ පුහුණුවකුත් ලබලා, ඊයේ උදේ පාන්දරම ඔය ඔක්කොම බඩු ටිකත් උස්සගෙන, මේ දරුවෝ ටික හොයාගෙන ගියපු සාමාජිකයින් 16 දෙනකුගෙන් යුත් Bloom Hopes කණ්ඩායමත්, පිටිපස්සෙන් ඉඳලා සහය වුණු ඉතුරු සාමාජිකයින් ටිකත් නිසයි මේ ව්යාපෘතිය, මේ තරමටම සාර්ථක වුණේ. අපේ කණ්ඩායමට බොහොමත්ම ස්තූතියි🙏 ඔයාලා තමයි අපේ ලොකුම ශක්තිය සහ ආශිර්වාදය.
ඊයේ දවසේ අපේ කණ්ඩායම සහය වුණේ දරුවෝ එකසිය පනහකට විතරක්ම නෙමෙයි. ඇත්තටම Bloom Hopes කණ්ඩායමේ සහාය ලැබුණේ, අපේ රටේ අනාගතයට. අපේ රටේ අනාගතයට වීරයෝ එකසිය පනස් දෙනෙක් බිහිකරන්න, ඔවුන්ගේ හීන මතක් කරල දෙන වැඩෙයි අපි කරේ.
මේ වැඩේට වචනයකින් හෝ සහාය වෙච්ච හැම කෙනෙක්ටම බොහොම ස්තූතියි.❤️🙏
Damitha Amarasena Udeshi Tharuka Fernando, Salma, Chathurini Upeksha Rashmi, Hiruni, Chami, Rashmini, Abhiman, Vihara, Shakya, Swasha, Shevon, Shahen, Taveesha, Sanduni ❤️
