15/12/2025
ඔබත් විභාගවලට බයයිද?
විභාගය ලංවෙද්දි ඔයාටත් දහඩිය දානවාද?
ඔයාගේ ජීවිත කාලයේ ඔයත් විභාග ගණනාවකට මුහුණ දීල තියෙනවා නේද? විභාගයට සූදානම් වන ඔයාට, දවසින් දවස විභාගය ලංවෙද්දී ඇතිවෙන හැඟීම මතකද? ඔයාගේ අත්ලටත් එක්ක දහඩිය දැම්මාද? පාඩම් කරපු දේවල් එකක්වත් මතක නෑ වගේ දැනුනද? ඒත් විභාගයට මුහුණ දුන්න ඔයාට පාඩම් කළ දේවල් අමතක වුනාද? සමහරෙක්ට නම් ඔව්. සමහරෙක්ට නෑ. එහෙම වෙන්නේ ඇයි? අද මම ඔයාලට කියන්න හදන්නේ එදිනෙදා ජීවිතයේදී අපිට මුහුණ දෙන්න සිදුවන එවැනි අස්වාභාවික මානසික තත්ත්වයක් ගැන.
කුඩාවියේ සිට අපිට නොයෙක් විශේෂ අවස්ථාවලට මුහුණ දෙන්න සිදුවෙනවා. පුද්ගලානුබද්ධව එකිනෙකාට වෙනස් වූත් විවිධ වූත් අවස්ථාවලට අපි මුහුණ දෙනවා. උදාහරණ විදියට කුඩා වියේදී පාසලේ උදේ රැස්වීමේ කතාවක් සිදු කිරීම, පාසලේ සමිතියේදී ගායනයක් ඉදිරිපත් කිරීම, විශ්වවිද්යාලයේදී විවිධ න්යායාත්මක හා ප්රායෝගික ඉදිරිපත්කරීම්, රැකියා ස්ථානයේ, ආගමික ස්ථානවල, විවිධ පොදු වැඩ කටයුතුවල දී මෙන්ම අධ්යාපන ක්ෂේත්රයේ විවිධ කඩඉම් පසු කිරිමේදී ඔබට සහ මට විවිධ වූ ඉදිරිපත් කිරීම් කරන්නට හා ඒවාට මුහුණ දෙන්නට සිදුවෙනවා. මෙහිදී ඇතැම් අය එම අවස්ථාවලට සාර්ථකව මුහුණ දෙද්දී තවත් අයෙක් ඒවා නිසා මානසිකව මහත් පීඩාවට පත්ව එම අවස්ථාවන්ගෙන් පැන යන්නට උත්සාහ කරනවා. අද මම කතා කරන්නේ එම අවස්ථා මග හරිමින් කටයුතු කරන්න උත්සාහ කරන අය පිළිබඳවයි.
විභාගයකට හෝ වේවා ඉදිරිපත් කිරීමකට හෝ වේවා ඔබ මුහුණ දීමට සිටින විට පෙර දිනයේ හෝ ආසන්න දිනවල ඔබට දැනෙන හැඟීම මොන වගේද? ඔබට එම අවස්ථාවට මුහුණ දීමට බයක් ඇති වෙනවාද? ඔබට එම අවස්ථාව මගහරින්න සිතෙනවාද? මෙවැනි ව්යාකූල මානසික ස්වභාවයක් ඔබටත් අතිවනවාද? එසේනම් ඔබ ඒ පිළිබඳව සැළකිළිමත් විය යුතුයි. මෙවැනි මානසික අස්වාභාවික තත්ත්වයන් මනෝවිද්යාවේදී අපි හදුන්වන්නේ කාංසාව නොහොත් ඇන්සයිටි නමින්. ඔබ යම් දෙයකට මුහුණ දීමට ඇති බය, තැතිගැන්ම ඇති වන්නේ මෙම ඇන්සයිටි නම් වූ මානසික තත්ත්වය නිසාවෙනි.
ඔයාටත් විශේෂිත අවස්ථාවන්ට මුහුණ දෙන්න වනවිට මෙන්න මේ කියන කායික රෝග ලක්ෂණ තියෙනවාද?
1 හෘද ස්පන්දනය වේගවත් වීම
2 පපුවේ වේදනාව
3 මල බද්ධය ඇතිවීම
4 බඩ දැවිල්ල, බඩ රිදීම, බඩ පිපීම
5 කෑම අරුචිය
6 හුස්ම ගැනීමේ අපහසුව
7 මළ බද්ධය
8 අධික දහදිය දැමීම
9 ඔක්කාරය
10 මස්පිඩු වේදනාව
11 මුත්රා කරන වාර ගණන වැඩි වීම
12 හිසරදය හා කරකැවිල්ල
මේ කියන ලක්ෂණවලට අමතරව ඔයාට...
1 හිත සන්සුන්ව තියාගන්න අපහසු වීම
2 දැඩි ලෙස කලබල වීම
3 අවධානය යොමු කිරීමේ අපහසුතාවය
4 ඉක්මනින් තරහා යාම
5 සංවේදීතාවය වැඩිවීම
6 විවිධ මනකල්පිතයන්ගෙන් යුක්ත වීම
7 සිතේ ඒකාග්රතාවය නැති වීම
මෙවැනි අස්වාභාවික කායික සහ මානසික ලක්ෂණ මධ්යස්ථව හෝ උග්ර ලෙස තියෙනවාද? එසේ නම් ඒ කාංසාව නොහොත් ඇන්සයිටි තත්ත්වයක් විය හැකියි. එවිට යම් කටයුත්තකට මුහුණ දීමට බයක්, සාංකාවක්, තැතිගැම්මක් වැනි තත්ත්වයන් ඔබට ඇතිවිය හැකියි. ඒ නිසාවෙන් ඔබ ජීවිතයේ විශේෂිත අවස්ථාවන්වලට දැඩි ලෙස බියවීම, උදාහරණ ලෙස විභාගයකදී පාඩම් කළ දේ අමතක වීම, ඔබේ ශරීරයෙන් දහඩිය ගැලීම අවස්ථාවෙන් පළා යාම වැනි අස්වාභාවික තත්ත්වයන් හා මනෝභාවයන් ඇතිවෙන්න පුලුවන්.
මෙම කාංසාව නොහොත් ඇන්සයිටි තත්ත්වයන්ගේන් මිදෙන්නේ කොහොමද?
අද සමාජයේ බොහෝ දෙනා අතර මෙම ඇන්සයිටි ලක්ෂණ බහුලව දකින්න පුලුවන්. නමුත් මෙම තත්ත්වය එතරම් භයානක තත්ත්වයක් නොවන අතර තමාගේ චර්යාවන් තුළින්ම ඒවා මගහරවා ගන්න පුලුවන්. හොඳ නින්දක් ලබා ගැනීම, ව්යායාම කිරීම, සමබල ආහාරවේලක් ලබා ගැනීම, සංයම අභ්යාසවල යෙදීම ආදී චර්යාවන්තුළින් මනස නිරෝගී වෙනවා. විශේෂයෙන්ම මනෝ උපදේශනය වෙත යොමුවීමතුළින් මෙම තත්ත්වය මගහරවා ගැනීමට හැකි වෙනවා. සාමාන්ය තත්ත්වයට එහා ගිය අසාමාන්ය රෝග ලක්ෂණයන් පෙන්වන්නේ නම් ඔබ වහා අදාළ වෛද්යවරයකු වෙත ප්රතිකාර සඳහා යොමුවිය යුතුයි.
ඉතින්, ඔයා දැනටමත් මේ කියන අසාමාන්යතාවන්ගෙන් යුතුව මහත් මානසික පීඩාවන්ට පත් අයෙක් නම් ඔබ, ඔබේ දෛනික චර්යා රටාව වෙනස්කර ගැනීමට කටයුතු කළ යුතු අතරම වැඩි උපදෙස් ලබා ගැනීම සඳහා පළපුරුදු මනෝ උපදේශකවරයෙක් හෝ උපදේශකවරියක් වෙත යොමුවන්න.
මේ වගේ වැදගත් තොරතුරු දැනගන්න අපගේ facebook පිටුව Follow කරලා අපිත් එක්ක දිගටම ඉන්න.
තවත් කෙනෙකුට දැනගන්න share කරන්න.
