26/10/2025
#الحرارة عند الاطفال .. 🛑مهم جدا ‼️‼️
- الحرارة الطبيعية من 36.5 ل 37.5 ..
#الحرارة تقاس بالمقياس مش باللمس ...
- لو عندك مقياس حرارة رقمي خليه تحت الابط لين يدير صوت و الرقم واللي يطلع زيد عليه 0.5 درجة
- ولو عندك مقياس حرارة زئبقي خليه من دقيقين ل3 دقايق
والرقم اللي يطلع عندك زيد عليه 0.5 درجة
- يعني لو الرقم طلع 37.5 معناها درجة حرارته 38 ..
#باهي قست الحرارة ولقيتها مرتفعة شن ندير ..
#اول شي دير تقييم بروحك للطفل ... لو لقيت حاجة من هادم معناها الطفل يبي دكتور طول ..
1- لو الطفل اقل من 3 شهور وعنده حرارة طول للدكتور ..
2 - لو الطفل مدروخ وعنده مشاكل عصبية او عنده اعراض تانية زي الدهشة او الجفاف والاسهال الحاد والترجيع الحاد طول للدكتور ..
#ولو ماعنداش الحاجات هادم حتدير النصايح ..
1 - نقص الحوايج .. وحطيه في مكان بارد ..
- حتقولي ماهو يرعش ويقول غطوني ببطانية ؟
يرعش لانه لما تركب الحرارة حتصير حاجتين ..
#الجسم يدفع بالدم للاعضاء الداخلية زي القلب والدماغ وينقص الدم ع الاطراف ..
#وفي نفس الوقت الجسم يفتح المسامات باش يبي يتبرد فيقعدو الاطراف مصقعة ..
#بمجرد ماتدير كمادات وتنزل الحرارة حيتوزع الدم ويوصل حتى للاطراف فتتنحى الرعشة اللي يسمو فيها العزايز (قفايف)
2 - نعطيه سوايل باردة باش يبرد حتى من داخل ولانه جسمه يفقد ف سوايل بالعرق ..
3 - دير دوش ربع ساعة من رقبته لعند رجليه ... او حطه في بانيو امية .. ( ماتحطش امية ع الراس )
- وبعد يطلع خفف حوايجه وديرله كمادات حوالين الرقبة وتحت الابطين وبين الرجلين ..وماتحطش ع الراس لانه مافيش فايدة ..
#المية متاع الدوش حتكون كالتالي ..
- لو صيف .. المية تكون من الشيشمة طول ...
- لو شتي المية نخليها لين تولي فاترة ...
#الادوية اللي مفروض نستعملوها ..
#لو الطفل اقل من 6 شهور ..
- حنستعملو البنادول ..
شروبو كل 6 ساعات .. او زربوط كل 6 ساعات .. ( ماتستعملهمش مع بعض ) ..
يعني نعطي مرة زربوط ومرة شروبو .. ولو عنده اسهال مانعطيش زرابيط لانه حيزيد الاسهال ..
#لو عمره اكتر من 6 شهور ..
ممكن نستعمل بدل البنادول .. شروبو البروفين ..
وهدا ينعطى كل 8 ساعات واوقات نزيدو نخلوه حتى كل 6 ساعات ..
بس لو طفلك عنده حساسية صدر .. البروفين ممنوع ..لانه يسكر الصدر ..لدلك حتستعمل البنادول ..
#لو طفلك اكتر من سنة نفس الشي ..بنادول او بروفين
#نصائح مهمة جدا ..
- راهو الزربوط تقريبا يبي 10 دقايق باش يخدم ..
- والشروبو ياخد من 40 ل 45 دقيقة باش يخدم.
- شروبو الفولتارين .. راهو مش خافض حرارة .. هو صح يخفف الحرارة لكن يخفف فيها لانه يخدم كمضاد للالتهاب مش كخافض حرارة ..
والافضل ماتعطيشي الا باستشارة طبيب لانه يهيج الصدر حتى هو وممنوع ف الحساسية ..
#لو الحرارة ف 39 وطالع ... راهو خافض الحرارة مايشتغلش اساسا ..ولازم دوش طول ..
منقول
د.زياد عبدالله ..
