17/09/2022
📌 نصائح عامة
⏺️ ما تصونيش على شي واحد أكثر من جوج مرات حتال ثلاثة.. إلا ماجاوبكش راه إما عندو شي عذر وغادي يعاود يعيط عليك من بعد.. أو ماباغيش يرد عليك وخلاك تفهم راسك
⏺️ إلا سلفك شي واحد شي حاجة (فلوس، حوايج، مواعن... ) ردها له قبل مايسولك عليها ويقدر يتحرج ويحشم يطلبها منك.. وماتخليهش يبدا يقلب عليك وتعطل عليه حتى يدير لك الشوهة بين عباد الله خلي شويا دالاحترام لراسك
⏺️ إلا عرض عليك شي واحد لدارو ماتبقاش تدور عينيك فالدار وتلاحظ التفاصيل وتعلق على كل حاجة.. ماتعيبش الماكلة ولو بالضحك وإلا ماعجباتكش ماتشكرها ما تعيبها.. كول وشكرهم على حسن الضيافة وماتگلسش حتى مايبقى عندكم ماتقولو الله يرحم من زار وخفف..
⏺️ ماتبقاش تسول الناس أسئلة محرجة وسخيفة بحال (علاش ماتزوجتيش؟ واش كاري ولا شاري؟ فين غادي؟...) هادشي كامل بعيد عليك وماعندو باش يفيدك
⏺️ تقبل الآراء ديال الناس كيفما كانت مختلفة عليك وعلى الغالبية وإلا كانت آراء شاذة ومرفوضة حاول ديما تقنعو بالعقل والحجج ماشي بالرفض والاقصاء والسبان
⏺️ ماتكونش عالة على الناس وتحاول تعيش على حسابهم.. دير قيمة لراسك وماتقبلش الفابور.. وإلا أصر شي واحد يخلص عليك شي حاجة حاول تردها له فأقرب وقت وعيش بعزك وماتخلي حد يمن عليك أو يشريك
⏺️ تعود تشكر الناس وابتسم فوجههم وحييهم.. ماشي نفاقا ولكن باش تنشر طاقة إيجابية فالمحيط ديالك وتكون فال خير عليهم وتدير بوصية الرسول صلى الله عليه وسلم (أفشوا السلام واطعموا الطعام وصلوا والناس نيام تدخلوا الجنة بسلام)
⏺️ فاش تكون لابس كاسكيطة أو نظاظر ديال الشمش وتلاقى مع شي واحد كتعرفو حيدهم عاد سلم عليه.. هادي علامة على الاحترام والترحيب
⏺️ إلا وراك شي واحد شي تصويرة فتيلفونو ما تبقاش تقلب له فالتصاور لي عندو.. يمكن عندو أسرار أو صور ماباغي حتى واحد يشوفهم.. احترم الخصوصية ديال الناس
⏺️ ماتنصحش شي واحد قدام الناس.. راك كتفضحو وكتقلل منو بهاد الطريقة.. وكتخليه يكرهك ويدير عكس النصيحة ديالك ضد فيك.. من الأفضل النصيحة تكون على انفراد وبالتي هي أحسن
⏺️ ماتكونش فضولي ومن الأفضل ماتعطيش نصائح واقتراحات لأي واحد حتى يطلبها منك
⏺️ ماتفتخرش بداكشي لي عطاك الله من فلوس أو صحة أو مواهب قدام لي كيفتقد لها.. مثلا عندك فلوس ماتهضرش عليها قدام الفقراء عطي من لي عطاك الله.. عندك الصحة ماتبينهاش قدام المرضى والمعوقين عاونهم وقضي لهم الغرض ورحم الضعف ديالهم
⏺️ إلا مشيتي تزور شي واحد ماتستعملش التلفون ديالك إلا باش تجاوب على شي مكالمة مهمة ومن الأحسن دير له الفيبرور
⏺️ المواطن الصالح فالمجتمع ديالنا هو لي كيعطي أسبقية للمرأة الحامل وذوي الاحتياجات الخاصة.. ويحمي الدراري الصغار من الانحراف وينصحهم.. ويحترم
👈 هادشي كامل غير فإطار ذكر فإن الذكرى تنفع المؤمنين ♥️
