19/05/2025
♀️အမျိုးသမီးများ၏ ရန်သူအကြီးစား - သားဥအိမ်ကင်ဆာ (𝐎𝐯𝐚𝐫𝐢𝐚𝐧 𝐂𝐚𝐧𝐜𝐞𝐫)♀️
ဒီနေ့မှာတော့ အမျိုးသမီးတွေရဲ့ ရန်သူအကြီးစားကြီးဖြစ်တဲ့ သားဥအိမ်ကင်ဆာအကြောင်းကို တင်ဆက်ပေးသွားမှာဖြစ်ပါတယ်။ ဒီရန်သူကြီးက ကိုယ့်ဆီရောက်လာပြီဆိုရင်လည်း crush လေးလို mixed signals တွေပေးပြီး ရန်သူမှန်းမသိအောင်လည်း လုပ်တတ်ပါသေးတယ်။ ဒါကြောင့် ရန်သူအကြီးစားကြီးလို့ ပြောလို့ရနိုင်တာပေါ့ရှင်။ ဒါပေမယ့် ရန်သူအကြောင်းကို သိမှ ရန်သူကို အနိုင်ယူနိုင်မှာ မဟုတ်ပါလား။ အဲ့တာကြောင့်မို့ ဆက်လက် လေ့လာကြရအောင်ပါ။
❓ သားဥအိမ် (𝗢𝘃𝗮𝗿𝘆) ဆိုတာ ဘာလဲ ❓
အရင်ဆုံး သားဥအိမ်ဆိုတာကို အရင်ရှင်းပြချင်ပါတယ်။ အမျိုးသမီးတွေရဲ့ သားအိမ် တစ်ဖက်တစ်ချက်မှာ သားဥအိမ်တစ်လုံးစီ စုစုပေါင်း ၂လုံး ရှိပြီး estrogen, progesterone ဆိုတဲ့ hormone တွေကို ထုတ်ပေးပါတယ်။ အမျိုးသမီးတွေ ကလေးမွေးနိုင်ဖို့ သားဥကြွေတဲ့အလုပ်ကို လုပ်ပေးကြပါတယ်။ အပျိုဖော်ဝင်တဲ့အချိန် ခန္ဓာကိုယ်မှာ အပြောင်းအလဲတွေ ဖြစ်လာတာကလည်း estrogen ဟော်မုန်းကြောင့် ဖြစ်ပါတယ်။
❓ သားဥအိမ်ကင်ဆာ၏ သဘာဝ ❓
ဒီသားဥအိမ်မှာ ကင်ဆာဆဲလ်တွေ ပွားလာတဲ့ အခါ အဖုအကျိတ်လုံးတွေ ဖြစ်လာပါမယ်။ သားဥအိမ်မှာ ဖြစ်တဲ့ ကင်ဆာဆဲလ်တွေရဲ့ သဘာဝ ရွက်ကျပင်ပေါက်တာနဲ့ တူပါတယ်။ အဲဒီ့ ကင်ဆာဆဲလ်တွေက တစ်ခုနဲ့ တစ်ခု ပူးကပ်မှုအင်အား နည်းတာမို့ အလွယ်တကူ ကြွေကျပြီး ပွားချင်တိုင်း ပွားလေ့ရှိပါတယ်။ ဝမ်းဗိုက်ထဲက ရှိသမျှ ကလီစာအစုံမှာ အကာအရံ အမြှေးပါးလေး ပါပါတယ်။ ဒါပေမယ့် သားဥအိမ်မှာတော့ ဒီအမြှေးပါး မပါပါဘူး။ အဲ့တာကြောင့် မီးလောင်ရာ လေပင့်ဆိုသလို ကင်ဆာဆဲလ်တွေကို ပိုလို့တောင် အတားအဆီးမရှိ ပြန့်နိုင်စေပါတယ်။
မျိုးပွားအင်္ဂါကင်ဆာများထဲမှာ အသေအပျောက် အများဆုံးက သားဥအိမ်ကင်ဆာဖြစ်ပါတယ်။ သေဆုံးသည့်အရေအတွက်ချင်းနှိုင်းယှဉ်ကြမယ်ဆိုလျှင်တောင် ဒီကင်ဆာကြောင့် သေရတဲ့ အမျိုးသမီး အရေအတွက်က အခြားမျိုးပွားအင်္ဂါကင်ဆာတွေကြောင့် သေရတဲ့ အရေအတွက်ထက်ကို များပါတယ်။
❓ ဘယ်လိုလူတွေမှာ အဖြစ်များသလဲ ❓
• အသက် ၅၀နဲ့ ၇၀ကြား အမျိုးသမီးများမှာ အများဆုံးဖြစ်လေ့ရှိ
• အသက် ၃၅နှစ်အောက်တွေမှာ ဖြစ်တာ အတော်ရှား
• မိသားစုထဲမှာ သားဥအိမ်ကင်ဆာရောဂါရှင်ရှိသူ
• ကလေးနည်းနည်းပဲ မွေးတဲ့ အမျိုးသမီးတွေ
• ကိုယ်ဝန်မဆောင်ဖူးတဲ့သူတွေ
• အပျိုကြီးတွေမှာ
• ရာသီစောပေါ်တဲ့ အမျိုးသမီးတွေ
• သွေးဆုံးတာနောက်ကျတဲ့သူတွေ
• ကိုယ်ဝန်မဆောင်ဖူး၊ တစ်နည်း ကလေးမမွေးဖူးသူတွေ
• ကလေးရလာအောင် သားဥကြွေဆေး အများကြီး၊ အကြာကြီးပေးတဲ့ အမျိုးသမီးတွေမှာလည်း အဖြစ်များ
❓ ဘယ်လို ရောဂါလက္ခဏာတွေ ပြတတ်သလဲ ❓
• ကင်ဆာ အစပိုင်းမှာ ရောဂါလက္ခဏာပြလေ့မရှိ
• တစ်ဖြည်းဖြည်း ကြီးထွားလာပြီး အဖုအကျိတ်ကြီး ဖြစ်လာမှ မသေချာတဲ့လက္ခဏာတွေ ပြလေ့ရှိ (ဥပမာ ဗိုက်နာခြင်း၊ ဗိုက်အောင့်ခြင်း၊ အစာမကြေခြင်း၊ လေပွခြင်းဖြစ်တဲ့အခါမှာ ပြတတ်တဲ့ လက္ခဏာမျိုးများ)
• ကင်ဆာအလုံးအကျိတ်က ကြီးလာပြီး ဆီးအိမ်ကို ဖိထားရင် ဆီးခဏခဏ သွားချင်နိုင်ပြီး ဝမ်းအိမ်ကို ဖိရင်တော့ ဝမ်းခဏခဏ သွားချင်စေနိုင်
• သွေးဆုံးပြီးသူတွေမှာ သွေးပြန်ဆင်းတဲ့ လက္ခဏာ ပြလေ့ရှိ
ရောဂါကျွမ်းလာရင်တော့ အောက်ပါ လက္ခဏာများပြတတ်
၁. အစားအသောက်ပျက်ခြင်း
၂. ပျို့အန်ချင်ခြင်း
၃. အစာမကြေဘဲ လေပွတဲ့ လက္ခဏာများ
၄. ကိုယ်အလေးချိန် ကျခြင်း
၅. ဗိုက်ပူလာပြီး ရေဖျဉ်းစွဲတယ်လို့ ခေါ်ကြတဲ့ ဗိုက်ထဲမှာ ရေတွေနဲ့ ပြည့်ပြီး တင်းကားလာခြင်း
ဒီလိုရောဂါလက္ခဏာတွေ ပြလာပြီဆိုရင်တော့ ဆေးရုံ၊ဆေးခန်း အမြန်ဆုံး သွားသင့်ပါတယ်။ တစ်ခု သတိချပ်ရမှာက ဝါဝါမြင်တိုင်း ရွှေမဟုတ်ဆိုသလိုပဲ ဗိုက်ထဲမှာ အဖု၊အကျိတ်တွေ့တိုင်းလည်း ကင်ဆာမဟုတ်ပါ။ ဒါပေမယ့်လည်း ပုံမှန်မဟုတ်ဘဲ ဖောင်းလာမယ်၊ အလုံးအကျိတ်တွေ စမ်းမိမယ်ဆိုရင်တော့ လုံခြုံရေး မပေါ့ဆသင့်ပါဘူး။
❓ ဘယ်လိုကာကွယ်ကြမလဲ ❓
• သားဥမကြွေစေပြီး ဟော်မုန်းနှစ်မျိုးပါတဲ့ ပဋိသန္ဓေတားဆေး(သားဆက်ခြားဆေး) သောက်ခြင်း (သားဥအိမ်ကင်ဆာ ဖြစ်နိုင်ချေ လေးဆလောက် ပိုနည်း)
• အိမ်ထောင်ပြု၊ ကလေးယူတာကလည်း တားဆီးနိုင်တဲ့ နည်းလမ်းတွေထဲ ပါတယ်လို့ ဆိုနိုင်
ဒီလောက်ဆိုရင်တော့ သားဥအိမ်ကင်ဆာအကြောင်းကို စာဖတ်သူ သိသင့်သလောက် သိပြီလို့ ထင်ပါတယ်။ သားဥအိမ်ကင်ဆာဟာ အန္တရာယ်များလွန်းတာမို့ အမျိုးသမီးတိုင်း ဒီရန်သူအကြီးစားကြီးကို မတွေ့ဆုံရဘဲနဲ့ အကယ်၍ တွေ့ဆုံရပါကလည်း ကျော်လွှားနိုင်ပါစေလို့ ဆုတောင်းပေးလိုက်ရပါတယ်ရှင်။ 🌸✨
