ᴍᴏᴇ ᴛʜᴀᴜᴋ ᴋʏᴀʟ ғᴀᴍɪʟʏ ᴄʟɪɴɪᴄ, Wat Nong Pa Krang (2025)

07/11/2025

ဆောင်းတွင်းရောက်ပြီ၊ အအေးပိုလာပြီဆိုတော့ (၈.၁၂.၂၀၁၉)တုန်းက ဆောင်းပါးကို ပြန်တင်ပေးလိုက်ပါတယ်။ ဆောင်းတွင်းဆိုပေမယ့် ပူတဲ့နေရာက သူတွေကတော့ ကျော်သွားကြပါ။

#ဆောင်းရာသီတွင်_ကြုံတွေ့ရတတ်သော_ကျန်းမာရေးပြဿနာများ

ယခုရက်ပိုင်းအတွင်း မြန်မာတစ်နိုင်ငံလုံးအတိုင်းအတာဖြင့် အအေးပိုလာသည်ကို အားလုံး သတိထားမိကြမည်ထင်ပါသည်။
အအေးဒဏ်နှင့်အတူ တွဲပါလာတတ်ပြီး အဖြစ်များတတ်သော ကျန်းမာရေး ပြဿနာများကို သိရှိထားခြင်းကလည်း မိမိတို့၏ ကျန်းမာရေးအတွက် အထောက်အကူပြုနိုင်မည်ဖြစ်ရာ ယခုကဲ့သို့ ရေးသားဖော်ပြလိုက်ရပါသည်။

(၁) ပန်းနာရင်ကျပ်ရောဂါ

ပန်းနာရင်ကျပ်ရောဂါ ရှိသူများအဖို့ ဆောင်းရာသီ၏ အအေးဓာတ်က မနှစ်မြို့စရာဖြစ်သည်။ ရှူသွင်းလိုက်သော လေအေးက ရင်ကျပ်ရောဂါ၏ အဓိက လက္ခဏာဖြစ်သော ရွှီသံ မည်ခြင်း၊ အသက်ရှုကျပ်ခြင်းတို့ကို ပိုမိုဆိုးရွားစေ၍ဖြစ်သည်။ ရင်ကျပ်ရောဂါသည်များအဖို့ ဆရာဝန်ညွှန်ကြားထားသော ဆေးများကို ပုံမှန်သောက်သုံးပေးသင့်သည်။ ရင်ချောင်စေသာ ရှူဆေးကိရိယာမျိုးကို မပြတ်အောင် ဆောင်ထားသင့်သည်။

(၂) လည်ချောင်းနာခြင်း

လည်ချောင်းနာခြင်းသည် ဆောင်းရာသီတွင် ကြုံတွေ့ရလေ့ရှိသော ကျန်းမာရေး ပြဿနာများအနက် တစ်ခုဖြစ်သည်။ များသောအားဖြင့် ဗိုင်းရပ်စ်ပိုးများကြောင့် အဖြစ်များသည်။ အပူချိန် အပြောင်းအလဲများဖြစ်သော ရုတ်တရက် အအေးပိုလာခြင်း၊ နွေးထွေးစွာ မဝတ်ဆင်ဘဲ အပြင်ထွက်ခြင်းနှင့် အအေးမိခြင်းတို့ကြောင့်လည်း ဖြစ်နိုင်သည်။ ပုံမှန်အိမ်သုံးဆေးဝါးများကို ဆောင်ထားနိုင်ပြီး လိုအပ်လျှင် ဆရာဝန်နှင့်ပြသ၍ ကုသမှု ခံယူနိုင်သည်။

(၃) တုပ်ကွေးရောဂါ

သေဆုံးမှုအထိ ဖြစ်စေနိုင်သော တုပ်ကွေးရောဂါသည် ဗိုင်းရပ်စ်ပိုးကြောင့်ဖြစ်ပြီး ဆောင်းရာသီတွင် အဖြစ်များသည်။ လက္ခဏာများမှာ ဖျားခြင်း၊ နှာချေခြင်း၊ချောင်းဆိုးခြင်းနှင့် အသက်ရှုရခက်ခြင်း တို့ပင်ဖြစ်သည်။ သာမာန်အအေးမိ လက္ခဏာများနှင့် ခွဲခြားနိုင်ရန် ခက်ခဲတတ်ပြီး အသက်ရှုရခက်ခဲပါက ဆရာဝန်နှင့် ဆောလျင်စွာ ပြသသင့်သည်။ တုပ်ကွေးရောဂါကာကွယ်ဆေးကိုလည်း ကြိုတင်ထိုးနှံထားသင့်သည်။

(၄) အဆစ်အမြစ်နာကျင်ခြင်း

အဆစ်ရောင်ရောဂါရှိသူများအဖို့ ၎င်းတို့၏ အဆစ်များ ပိုမိုတောင့်တင်းခြင်း၊ ပိုမိုနာကျင်ခြင်းတို့ကို ဆောင်းရာသီတွင် ပိုမိုကြုံတွေ့ရတတ်သည်။ အေးသောရာသီဥတုကြောင့် အဆစ်တွင်ပြောင်းလဲမှုများရှိနိုင်ကြောင်း ခိုင်မာသော အထောက်အထားများမရှိသေးသော်လည်း အေးသော အချိန်တွင် အဆစ်များ ပိုမိုနာကျင်လေ့ရှိကြသည်ကား အမှန်ပင်ဖြစ်သည်။
နာကျင်မှု သက်သာစေရန် ဆရာဝန်ညွှန်ကြားချက်အတိုင်း ဆေးကို စနစ်တကျ သောက်သုံးသင့်သည်။

(၅) အသားပက်ခြင်း၊ အသားအရေခြောက်သွေ့ခြင်း

အသားပက်ခြင်း၊ အသားအရေခြောက်သွေ့ခြင်းကလည်း ဖြစ်လေ့ရှိသော ကျန်းမာရေးပြဿနာတစ်ခုပင်ဖြစ်ပြီး ဆောင်းရာသီတွင် ပိုဆိုးစေသည်။ အလှဆီ သို့မဟုတ် လိုးရှင်းတစ်မျိုးမျိုးကို လိမ်းထားနိုင်သည်။ လိမ်းရန်အကောင်းဆုံးအချိန်မှာ ရေချိုးပြီးကာစနှင့် ညအိပ်ရာဝင်ခါနီးအချိန်ဖြစ်သည်။

(၆)နှလုံးအမောဖောက်ခြင်း

နှလုံးရောဂါရှိသူများအဖို့ ဆောင်းရာသီသည် သတိထားရမည့် ကာလဖြစ်သည်။ အေးသောရာသီဥတုသည် သွေးပေါင်ချိန်ကို တိုးစေပြီး နှလုံးအပေါ်တွင် သက်ရောက်မှုကိုဖြစ်စေသည်။ အအေးဒဏ်ကို အံတုနိုင်ရန်အတွက် ခန္ဓာကိုယ်အပူချိန်ကို ထိန်းညှိပေးရာတွင် နှလုံးသည် အလုပ်ကို ပိုလုပ်ပေးရသေးသည်။ ထိုအခါ ရုတ်တရက် အသက်ရှူကျပ်ခြင်း၊ ရင်ဘတ်အောင့်ခြင်း၊ မောခြင်း ကဲ့သို့သော လက္ခဏာများကို ခံစားရနိုင်ပြီး အချိန်မီကုသမှု မခံယူနိုင်လျှင် အသက်အန္တရာယ်ဆုံးပါးသည်အထိ ဖြစ်စေနိုင်သည်။ ဆရာဝန်ညွှန်ကြားထားသော ဆေးဝါးများကို စနစ်တကျ ပုံမှန်သောက်သုံးရန် လိုအပ်ပြီး ရက်ချိန်းမှန်မှန် ပြသင့်သော ကာလဖြစ်သည်။

သို့ဖြစ်ပါ၍ ဖော်ပြပါ ကျန်းမာရေးပြဿနာများအား မကြုံတွေ့ရစေရေး အေးသော ဆောင်းရာသီကာလတွင် နွေးထွေးစွာ ဝတ်စားဆင်ယင်ကြပါရန်၊ အပြင်ထွက်လျှင် ဦးထုပ်၊ ခြေစွပ် လက်စွပ်၊ နှာခေါင်းစည်းတို့ကို ဝတ်ဆင်ကြပါရန်၊ အပူပေးစက်၊ ရေနွေးအိတ်တို့ကို ဆောင်ထားကြပါရန်နှင့် ရောဂါ ဝေဒနာတစ်ခုခု ခံစားရပါက ဆရာဝန်နှင့် ဆောလျင်စွာ တိုင်ပင်ဆွေးနွေးကြပါရန် တိုက်တွန်းရေးသားလိုက်ရပါသည်။

ဒေါက်တာပြည့်ဖြိုးကျော်

06/11/2025

သွေးတိုးရောဂါနဲ့ ပတ်သက်လို့ (၁၇.၇.၂၀၁၉)တုန်းက တင်ထားဖူးတာလေးကို ပြန်တင်ပေးလိုက်ပါတယ်။

#သွေးမကြာခဏတိုးနေပြီဆိုလျှင်သတိထားပါ

လူကြီးပိုင်းအရွယ်များနှင့်လူလတ်ပိုင်းအရွယ်များတွင် အခါအားလျော်စွာ ခေါင်းမူးတတ်ကြသည်။

"ခေါင်းမူးလိုက်တာ ကျွန်မသွေးတိုးနေပြီထင်တယ်"
ဟူ၍လည်းကောင်း၊
"ခေါင်းမူးလိုက်တာ ကျွန်မသွေးပေါင်ချိန်ကျနေပြီထင်တယ်" ဟူ၍တစ်ဖုံ ပြောတတ်ကြပါသည်။

မည်သို့ပင်ဆိုစေကာမူ လူအများစုသည်ခေါင်းမူးသည်နှင့်သွေးပေါင်ချိန်နှင့်ပတ်သက်၍ ပြေးမြင်တတ်ကြသည်။ ဤသည်မှာ ကောင်းမွန်သော တွေးထင်မှုဟုပင် ဆိုရမည်ဖြစ်ပါသည်။

သွေးပေါင်ချိန်ဆိုတာဘာလဲ ❓

သွေးပေါင်ချိန်ဆိုသည်မှာ သွေးလည်ပတ်မှုစနစ်ကြီးအတွင်းမှ သွေးဖိအားကိုတိုင်းတာခြင်းဟု အဓိပ္ပာယ်ရပါသည်။ သွေးပမာဏအနည်းအများကို ဆိုလိုခြင်းမဟုတ်ပါ။
သွေးပေါင်ချိန်တွင် အပေါ်သွေးနှင့် အောက်သွေးဟူ၍ရှိသည်။ အပေါ်သွေးဆိုသည်မှာ နှလုံးမှညှစ်လိုက်သည့်အချိန်တွင် ရောက်ရှိသွားသော အမြင့်ဆုံးသွေးပေါင်ချိန်ဖြစ်ပြီး အောက်သွေးဆိုသည်မှာ နှလုံးမှတစ်ကြိမ်ညှစ်အပြီး နောက်တစ်ကြိမ်မညှစ်မီ အနိမ့်ဆုံးရောက်ရှိသွားသောသွေးပေါင်ချိန်ကိုဆိုလိုပါသည်။ World Health Organization( WHO)မှသတ်မှတ်ထားသောသွေးပေါင်ချိန်အတိုင်းအတာများကိုဖော်ပြပေးလိုက်ပါသည်။

ကျန်းမာသောသွေးပေါင်ချိန်အတိုင်းအတာ

အပေါ်သွေး120mmHgနှင့်အောက်သွေး 80mmHg အောက်လျော့နည်းလျှင်ပုံမှန်သွေးပေါင်ချိန်ဟူ၍သတ်မှတ်ပါသည်။

အနည်းငယ်တက်သောသွေးပေါင်အတိုင်းအတာ

အပေါ်သွေး120mmHgမှ130mmHgအထိနှင့်အောက်သွေး80mmHgအောက်ဆိုလျှင် အနည်းငယ်တက်နေပြီဟုယူဆရမည်ဖြစ်ပါသည်။ ပုံမှန်လေ့ကျင့်ခန်းလုပ်ဆောင်ရန်နှင့် ကျန်းမာရေးနှင့်မညီညွတ်သော အစားအစာများကို ရှောင်ကြဉ်ရန်ဂရုပြုရမည်ဖြစ်သည်။

သွေးတိုးရောဂါ အဆင့်များ

အပေါ်သွေး 130-139mmHg နှင့် အောက်သွေး 80-89mmHg ကြားရှိနေလျှင် သွေးတိုးရောဂါဖြစ်ရန်များနေပြီဖြစ်သည်။ သွေးတိုးရောဂါအဆင့် (၁)ဟုသတ်မှတ်နိုင်သည်။ သွေးပေါင်ကိုမကြာခဏတိုင်းကြည့်ရန်လိုအပ်ပြီး ဆရာဝန်နှင့်တိုင်ပင်ဆွေးနွေးရန်လိုအပ်သည်။

အပေါ်သွေး 140mmHg နှင့် အောက်သွေး 90mmHg ထက်များနေပြီဆိုလျှင် သွေးတိုးရောဂါအဆင့် (၂)ဟုသတ်မှတ်ရမည်ဖြစ်ပြီး ဆရာဝန်နှင့် မဖြစ်မနေ တိုင်ပင်ဆွေးနွေးရန်လိုအပ်လာပြီဖြစ်သည်။

အပေါ်သွေး 180mmHg နှင့် အောက်သွေး 120mmHg ထက်များနေပြီဆိုလျှင် သွေးတိုးရောဂါအရေးပေါ်အခြေအနေဖြစ်နေပြီဟု သတ်မှတ်ရမည်ဖြစ်ပြီး အရေးပေါ်ဆေးရုံတက်ကုသမှုခံယူရန်လိုအပ်ပါသည်။ သွေးတိုးကြောင့် နှလုံး၊ ကျောက်ကပ်စသည့် ကိုယ်တွင်းအင်္ဂါများ ထိခိုက်နိုင်ပြီး ဦးနှောက်သွေးကြောပေါက်၊ လေဖြတ်နိုင်ခြေရှိကြောင်း သတိပြုရမည်ဖြစ်ပါသည်။

သွေးတိုးရောဂါဖြစ်စေနိုင်သော အချက်များ

မျိုးရိုးကြောင့်သော်လည်းကောင်း၊ ကျန်းမာရေးနှင့်မညီညွတ်သော နေထိုင်စားသောက်မှုပုံစံများကြောင့်သော်လည်းကောင်း သွေးတိုးရောဂါဖြစ်စေနိုင်ပါသည်။

သွေးတိုးရောဂါမဖြစ်အောင် ဘယ်လိုကာကွယ်ကြမလဲ ❓

သွေးတိုးရောဂါမဖြစ်ရန် သွေးတိုးရောဂါဖြစ်စေနိုင်သော အငန်အလွန်အကျွံစားသုံးခြင်း၊ ဆေးလိပ်နှင့်အရက်သောက်သုံးခြင်တို့ကို ရှောင်ကြဉ်ရန်လိုအပ်ပြီး အဝလွန်နေသူများအဖို့ ကိုယ်အလးချိန်လျှော့ချခြင်း၊ ကိုယ်လက်လေ့ကျင့်ခန်းများ ပုံမှန်ပြုလုပ်ခြင်းတို့ဖြင့် ကာကွယ်နိုင်ပါသည်။ သွေးပေါင်ချိန် ပုံမှန်ထက်များနေသူများအဖို့ စောစီးစွာ ဆရာဝန်နှင့် တိုင်ပင်ဆွေးနွေးခြင်းဖြင့် သွေးတိုးရောဂါကို ထိန်းညှိပေးရန်လိုအပ်ပါသည်။

သွေးထိန်းဆေးကို ဘယ်လိုသောက်ကြမလဲ ❓

သွေးထိန်းဆေးကို ဆရာဝန်ညွှန်ကြားချက်အတိုင်း အတိအကျလိုက်နာ၍ အမြဲမပြတ် သောက်သုံးရပါမည်။ သွေးပေါင်တက်သည်ထင်မှသောက်သုံးခြင်း၊ ခေါင်းမူးမှ သောက်ခြင်း၊ သောက်လိုက်မသောက်လိုက်ပြုလုပ်ခြင်းတို့ကို ရှောင်ကြဉ်ရပါမည်။

"ကျွန်မက သွေးပေါင်ပဲကျတတ်တာ အရင်သွေးတိုးမရှိဘူး"ဟုပြောတတ်သူများ၊ "ကျွန်မက သွေးတိုးရှိတယ် ဒါပေမယ့် အစားမှားမှတိုးတယ်"ဟုပြောတတ်သူများ၊ "ကျွန်တော်က သွေးတိုးမှ သွေးကျဆေး တစ်လုံးလောက်သောက်လိုက်တယ်" ဟုပြောတတ်သူများအနေဖြင့် သွေးတိုးရောဂါအကြောင်းသိရှိပြီး ကျန်းမာလှပသော ဘဝများကို ပိုင်ဆိုင်နိုင်ကြပါစေကြောင်း တိုက်တွန်းရေးသားလိုက်ရပါသည်။

ဒေါက်တာပြည့်ဖြိုးကျော်

05/11/2025

ဒီလိုသွေးပေါင်ချိန်မျိုးကို ကျွန်တော်အရမ်းကြောက်တယ်။

Digital မို့လို့ မှားတတ်ပါတယ်ဆိုပြီး နားခိုင်းပြီးမှ ပြန်ချိန်ကြည့်တယ်။ ထပ်ပြီးတော့ Manual နဲ့ပါ တိုင်းကြည့်တယ်။ ဒီအတိုင်းပါပဲ။ သွေးပေါင်ချိန်က အရမ်းတက်နေတယ်။
ကျွန်တော်ကတော့ ဖြစ်လာနိုင်တဲ့အခြေအနေတွေကို သိလို့ ကြောက်တယ်။ လူနာကတော့ မကြောက်ဘူး။

ကျွန်တော်က ဒီသွေးပေါင်ချိန်က အရေးပေါ်အခြေအနေဖြစ်ကြောင်းရှင်းပြပေမယ့် လူနာက ခြေထောက်တွေ ညောင်းကိုက်နေတာကလွဲပြီး ဘာမှမဖြစ်တော့ မယုံဘူး။ ဆေးရုံတက်သင့်ကြောင်း ရှင်းပြပေမယ့် လက်မခံဘူး။

အရင်ကလည်း အဲ့လိုတိုးဖူးတယ်တဲ့၊ တခါတလေ အပေါ်သွေး ၃၀၀ လောက်ကို ရောက်တာတဲ့။ အဖော်ပါလာတဲ့ သူ့သမီးကပါ ဖြည့်စွက်ပြီး ဝင်ပြောပြတာ။

ဆရာ့အနေနဲ့ ဘာမှ စိတ်မပူနဲ့။
ပေးသင့်ပေးထိုက်တဲ့ ဆေးသာပေးလိုက်ပါဆိုတဲ့သဘောပေါ့။

တခါတလေကျတော့လည်း စာတွေသာ ရေးနေတာ မဖတ်ကြရင် ဘာမှမထူးဘူးလို့ပဲ တွေးမိတော့တယ်။ ဖတ်တဲ့သူတွေကလည်း ကျန်းမာရေးလိုက်စားတဲ့သူတွေ၊ ကျန်းမာရေးဗဟုသုတ အထိုက်အလျောက်ရှိထားတဲ့ သူတွေပဲ ဖတ်ကြတာ။

ဘာမှမဖြစ်ရင်တော့ ဘာမှမဖြစ်ဘူးပေါ့ဗျာ။

04/11/2025

အသက် (၉၀)နှစ်အရွယ် အဖိုးအား သူ၏ ဆေးစစ်ချက်အဖြေများနှင့်ပတ်သက်၍ ဆရာဝန်က ရှင်းပြနေသည်။

"ဒီနှစ်အတွက် ဆေးစစ်ချက်အဖြေတွေလည်း အကုန်ကောင်းတယ် အဖိုး"
"ဒီအသက်အရွယ်အထိ အခုလိုကျန်းမာအောင်နေနိုင်တာကို ချီးကျူးပါရစေ"
"ဘယ်လိုမျိုး အနေအထိုင်အစားအသောက် ဆင်ခြင်ခဲ့ရသလဲ"

"ဆင်ခြင်ရတယ်တော့လည်း မဟုတ်ပါဘူး ဆရာရယ်"

"မဟုတ်မှလွဲရော ဘုရားသခင်က အဖိုးကို ချစ်တယ်ထင်တယ်"

"ဆရာပြောမှပဲ သတိထားမိတယ်
တခါတလေ ထူးဆန်းတာတွေ ကြုံရတယ်"

"ဘယ်လိုမျိုးလဲအဖိုးရဲ့ ပြောပြပါဦး"

ဆရာဝန်လည်း လွန်စွာ စိတ်ဝင်စားသွားတော့သည်။

"ညဖက် အဖိုးအပေါ့အပါးထသွားတဲ့အခါမျိုးပေါ့
အိမ်သာတံခါးပဲ ဖွင့်ရသေးတယ်
မီးက အလိုလိုလင်းလာတာ
ပြီးတာနဲ့ အလိုလို ပြန်မှိတ်သွားတယ်
မထူးဆန်းဘူးလား"

သည်အခါတွင် အဖိုးနှင့် အတူပါလာသော အဖိုး၏ ဇနီးဖြစ်သူက ဝင်ပြောတော့သည်။

"ဟာ ဒီအဖိုးကြီး
ရေခဲသေတ္တာထဲ သေးပေါက်ထားပြန်ပြီပေါ့"

#ဘာသာပြန်ဆေးလောကဟာသများ (၃၃)

03/11/2025

မနေ့ကပြောတဲ့ လက်အခြေအနေကို Finger Clubbing (တင်းပုတ်လက်) လို့ခေါ်ပါတယ်။
လက်ထိပ်လေးတွေက ကြီးသွားပါတယ်၊ လုံးသွားပါတယ်။ လက်သည်းခွံတွေက ခုံးသွားပါတယ်။
(ပုံကိုကြည့်ပါ။)
ဒီလိုပုံစံ ဖြစ်နေတယ်ဆိုရင် ရောဂါတခုခုရဲ့ လက္ခဏာလို့မှတ်ရမှာပါ။

ဖြစ်ရတဲ့ အသေးစိတ် theory ကကျတော့ အပြင်လူတွေအတွက် ရှုပ်ထွေးနိုင်ပါတယ်။
ဒီလိုပုံစံဖြစ်နေရင် ဘယ်လိုရောဂါတွေကြောင့် ဖြစ်နေနိုင်သလဲဆိုတာကိုပဲ ပြောသွားပါမယ်။
ဖြစ်စေတဲ့အကြောင်းအရင်းခံကို ရှာဖွေကုသရမှာဖြစ်ပါတယ်။

ဖြစ်စေနိုင်တဲ့ရောဂါတွေကလည်း အများကြီးရှိပါတယ်။
သွေးတွင်းအောက်စီဂျင်ပမာဏ ကြာရှည်စွာ လျော့နည်းခြင်းကလည်း ဒီလိုလက္ခဏာကို ဖြစ်စေပါတယ်။
အဖြစ်များတာတွေကို ပြောရမယ်ဆိုရင်

အဆုတ်ရောဂါတွေက ထိပ်ဆုံးကပါ။

အဆုတ်ကင်ဆာ၊ အဆုတ်ပြည်တည်နာ၊ နာတာရှည် အဆုတ်ပိုးဝင်ခြင်းရောဂါတွေ ပါဝင်ပါတယ်။

ဒီနောက်မှာတော့ နှလုံးရောဂါတွေက နေရာယူထားပါတယ်။
မွေးရာပါ နှလုံးရောဂါ၊ နှလုံးပိုးဝင်ခြင်း(Infective Endocarditis) စတာတွေ ပါဝင်ပါတယ်။

တခြားရောဂါတွေထဲမှာတော့ အသည်းခြောက်ရောဂါ၊ အူလမ်းကြောင်းဆိုင်ရာရောဂါတွေ၊ တခြားကင်ဆာရောဂါတွေအပြင် အဖြစ်နည်းတဲ့ ရောဂါတွေအများကြီး ရှိပါသေးတယ်။

Finger Clubbing က မွေးရာပါလည်းရှိတတ်ပါတယ်။ Congenital Clubbing Syndrome လို့ ခေါ်ပါတယ်။ ရှားတော့ရှားပါတယ်။ မနေ့ကပြတဲ့ပုံက မွေးရာပါလူနာရဲ့ ပုံပါ။ မွေးရာပါက အန္တရာယ်မရှိတတ်ပါဘူး။

လိုရင်းတိုရှင်း

02/11/2025

ဒီလိုလက်ပုံစံက ဘာကြောင့်ဖြစ်နိုင်လဲ ❓

(Edited ဒီလူနာကတော့ မွေးရာပါဖြစ်ပါတယ်။ ကျန်းမာရေးအားလုံးကောင်းပါတယ်။
ဘာရောဂါကြောင့်မှမဟုတ်ပါ။
ဆိုလိုချင်တာက မွေးရာပါမဟုတ်ဘဲ ဒီလိုပုံစံမျိုးဖြစ်လာတာက ဘယ်လိုရောဂါတွေနဲ့ ဆက်စပ်နေမယ်ထင်ပါသလဲ)

02/11/2025

#ကျွန်တော်စုဆောင်းထားသော_ကျန်းမာရေးလက်ကမ်းစာစောင်များ (၁၄)

"ဥတုဘောဇန သင်္ဂဟကျမ်းလာ
ကျန်းမာစေကြောင်း နည်းလမ်းကောင်းများ"

01/11/2025

Facebook က ရဖူးတဲ့ ပထမဦးဆုံးပိုက်ဆံက
အရင်လက ရပါတယ်။
မြန်မာငွေနဲ့ဆို ၁၇၅၀၀၀ ပါပဲ။

ဒါနဲ့ ဒီပစ္စည်းလေးကို ဝယ်လိုက်ပါတယ်။
စစ်ရှောင်စဉ်ကတည်းက မရှိတော့တာကို အခုမှ ပြန်ဝယ်ဖြစ်သွားတာပါ။
မရှိမဖြစ်လိုအပ်တဲ့ နားကြည့်ကိရိယာပါ။

လူကြီးမင်းတို့ပေးတဲ့ လက်ဆောင်ဆိုရင်လည်း
မမှားပါဘူး။
အားလုံးကို ကျေးဇူးတင်ပါတယ်။

31/10/2025

တပတ်အတွင်း ဝမ်း (၃)ခါအောက်သာ သွားတယ်ဆိုရင် ဝမ်းချုပ်နေပြီလို့ သတ်မှတ်နိုင်ပါတယ်။
ဝမ်းချုပ်ခြင်းက ဖြစ်လေ့ရှိပါတယ်။ အသက်ကြီးတဲ့သူတွေမှာဆိုရင် ဝမ်းပိုချုပ်တတ်ပါတယ်။
ဒါကြောင့် ဝမ်းချုပ်တိုင်း စိတ်ပူစရာမဟုတ်ပေမယ့် ဝမ်းချုပ်တာက အမြဲတမ်းလိုလိုဖြစ်နေတယ်၊ ဝမ်းချုပ်တာအပြင်ကို ပိန်လာတယ်၊ သွေးအားနည်းတယ်၊ ဝမ်းထဲသွေးပါတယ်ဆိုရင်တော့ သတိထားရပါမယ်။ ရောဂါတခုခုကြောင့်များဖြစ်နေမလား စဉ်းစားဖို့လိုပါတယ်။
လိုအပ်သလို ရောဂါရှာဖွေသင့်ပါတယ်။

ရေများများသောက်ပေးခြင်းက ဝမ်းချုပ်တာကို သက်သာစေပါတယ်။ တရက်ကို ရေ (၈)ခွက်ကနေ (၁၀)ခွက်အထိ သောက်ပေးခြင်းက ဝမ်းချုပ်တာကို သက်သာစေတဲ့အပြင် ဝမ်းမချုပ်အောင်ပါ ကာကွယ်ပေးနိုင်ပါတယ်။

အမျှင်ဓာတ်များတဲ့ အစားအစာတွေ၊ အသီးအနှံတွေ၊ အရွက်တွေက ဝမ်းမှန်စေပါတယ်။

ဝမ်းချုပ်ခဲ့ရင် OTC ဝမ်းပျော့ဆေး တခုခု သောက်လို့ရပါတယ်။
Bisacodyl, Lactulose, MOM စတာတွေက ဈေးကွက်ထဲမှာ ဝယ်ရလွယ်ပါတယ်။
ရေရှည်စွဲသောက်တာ မဟုတ်ဘူးဆိုရင်တော့ အများစုက ဘေးကင်းပါတယ်။
OTC ဆေးဖြစ်တဲ့အတွက် ဆေးမှာပါတဲ့ အညွှန်းအတိုင်း သောက်လို့ရပါတယ်။
(၆) နှစ်အောက်ကလေးတွေကိုတော့ ဆရာဝန်ညွှန်ကြားချက်မပါဘဲ ဝမ်းပျော့ဆေးမတိုက်သင့်ပါဘူး။ ကိုယ်ဝန်ဆောင်မိခင်တွေလည်း မိမိသဘောနဲ့ မသောက်သင့်ပါဘူး။

လိုရင်းတိုရှင်း

30/10/2025

လူနာတွေပိုက်ဆံရှင်းရင် မေးတတ်ကြတယ်။

"ဆေးဖိုးဘယ်လောက်ကျသလဲ" တဲ့။
ဒီလိုမေးတာ မပြည့်စုံပါဘူး။

"ဆေးဖိုးဝါးခ ဘယ်လောက်ကျသလဲ" လို့မေးမှသာ ပြည့်စုံပါတယ်။

မဟုတ်ရင် ပိုက်ဆံကောက်တဲ့သူက ဆေးဖိုးက ဘယ်လောက်ပါ၊ ဆရာ့ ဝါးခက ဘယ်လောက်ပါလို့ ပြန်ဖြေနေရမှာပါ။

29/10/2025

#သွားနှင့်ခံတွင်းဆေးခန်းတခုတွင်ဖြစ်သည်။

"ဆရာရေ သွားတချောင်းနုတ်ရင်
ဘယ်လောက်ကျ မလဲ"

"၅၀၀၀၀ ပါ"

"ထုံဆေးမလိုဘူးဆရာ
၄၀၀၀၀ ပဲထားလိုက်"

လူနာက ဈေးလာဆစ်နေလေသည်။

ဆရာဝန်လည်း
"သည်လူနာ အတော်သတ္တိကောင်းပါလား" ဟု စိတ်ထဲတွေးလျက်

"ရပါတယ်" ဟု ဖြေလိုက်လေသည်။

လူနာလည်း လွန်စွာ ကျေနပ်သွားဟန်ဖြင့်

"မိန်းမရေ ဝင်လို့ရပြီတဲ့ ဆရာက" ဟူ၍ အော်ပြောလိုက်လေတော့သည်။

#ဘာသာပြန်ဆေးလောကဟာသများ (၃၂)

28/10/2025

#ဆေးနဲ့ဓာတ်မတည့်တာထဲမှာ ပါရာစီတမောနဲ့ မတည့်တာက အတော်လေးကို ကသိကအောက်ဖြစ်စေပါတယ်။

ပါရာစီတမောဆိုတာ ဖျားနာကိုက်ခဲခြင်းအတွက် ဘေးထွက်ဆိုးကျိုးအနည်းဆုံး အခြေခံ ဆေးဝါးမဟုတ်လား။

ကျွန်တော့်လူနာတယောက်ဆိုရင် ပါရာစီတမောနဲ့မတည့်ဘူး။ ဒိုင်ကလိုထိုးဆေးနဲ့လည်းမတည့်ဘူး။ ဒါကသူကြုံဖူးလို့ သိထားတာတွေ။ တခြား NSAIDs အနွယ်ဝင် အကိုက်အခဲပျောက်ဆေးတွေကိုတော့ တည့်မတည့် သူမသိသေးဘူး။
အဲ့ဒီတော့သူက အကြောင်းတခုခုကြောင့် ဖျားနာကိုက်ခဲပြီဆိုရင် အဖျားကျဆေး၊ အကိုက်အခဲပျောက်ဆေး ထည့်မသောက်ရဘူး။ ကြိတ်မှိတ်ပြီး ခံနေရတာပေါ့။

ဒီတခေါက်သူဖျားလို့ ဆေးခန်းရောက်လာတယ်။
လိုအပ်တာတွေ မေးမြန်းစမ်းသပ်ပြီးတော့ ဆေးပေးတာပေါ့။ သူကပြောတယ်။

"ဆရာရေ တခြား အကိုက်အခဲပျောက်ဆေးတခုခု ထည့်ညွှန်ပေးကြည့်ပါလားဆရာ"
"အဖျားတက်လာတဲ့အချိန် ကိုက်ခဲတာကို မခံစားနိုင်တော့လို့ပါ"
"သောက်ကြည့်လို့ မတည့်ရင်လည်း ရပ်လိုက်တာပေါ့" တဲ့။

ဒီလိုနဲ့ အကိုက်အခဲပျောက်ဆေးတွေထဲက ဘေးထွက်ဆိုးကျိုးနည်းတဲ့ Ibuprofen ကို 200mg လောက်ပဲ စမ်းညွှန်ပေးကြည့်လိုက်တယ်။

နောက် ၂နာရီလောက်နေတော့ ပြန်ရောက်လာတယ်။ အင်ပြင်တွေထလို့။ ဒါလည်းမတည့်ပြန်ဘူးပေါ့။ ဒီလိုနဲ့ ဒီတခေါက်လည်း အကိုက်အခဲသက်သာစေတဲ့ဆေးမပါဘဲ သူ ဖြတ်သန်းရပြန်ဦးမယ်ပေါ့။

သူက ပြောတယ်။

"ဖျားမှာကို အရမ်းကြောက်တာပဲ" တဲ့။

စာဖတ်သူတွေထဲမှာကော ဘယ်လိုဆေးတွေနဲ့ ဓာတ်မတည့်တာတွေကြုံဖူးလဲ။ ကြုံဖူးရင် ရေးသွားလို့ရပါတယ်။ ဗဟုသုတရတာပေါ့။

(ပုံကတော့ AI နဲ့ ထုတ်ထားတဲ့ပုံပါ)

Monday	08:00 - 14:00
	16:00 - 18:30
Tuesday	08:00 - 14:00
	16:00 - 18:30
Wednesday	08:00 - 14:00
	16:00 - 18:30
Thursday	08:00 - 14:00
	16:00 - 18:30
Friday	08:00 - 14:00
	16:00 - 18:30
Saturday	08:00 - 14:00
	16:00 - 18:30
Sunday	08:00 - 14:00
	16:00 - 18:30

ᴍᴏᴇ ᴛʜᴀᴜᴋ ᴋʏᴀʟ ғᴀᴍɪʟʏ ᴄʟɪɴɪᴄ

07/11/2025

06/11/2025

05/11/2025

04/11/2025

03/11/2025

02/11/2025

02/11/2025

01/11/2025

31/10/2025

30/10/2025

29/10/2025

28/10/2025

Address

Opening Hours

Telephone

Website

Alerts

Contact The Practice

Shortcuts

Share

Moe Thauk Kyal Family Clinic