02/04/2025
“ငလျင်လှုပ်ခတ်မှုများဖြစ်နေသော ဒေသများတွင် ART ဆေးကို နေ့စဉ် သောက်သုံးနေသူများ သိရှိရမည့် အချက်များ “
၁. မိမိ သောက်နေတဲ့ ART ဆေးတွဲကို သိရှိထားဖို့ ကြိုးစားပါ။ မသိရင် ဆေးဘူး ပတ်ပတ်လည်ကို ဖုန်းနဲ့ ဓာတ်ပုံရိုက်ပြီး သိမ်းထားပါ။
၂. ဆေးထုတ်စာအုပ် မျက်နှာဖုံးကနေ အတွင်းနောက်ဆုံးစာမျက်နှာအထိ ဓာတ်ပုံရိုက်ပြီး ဖုန်းထဲ သိမ်းထားပါ။ စာသားတွေကို သေသေချာချာ ဖတ်လို့ရအောင် အလင်းရောင်ကောင်းတဲ့နေရာမှာ ရိုက်ပါ။ မှုန်ဝါးနေတာ ရှိရင် အသစ် ထပ်ရိုက်ထားပါ။
၃. ဖြစ်နိုင်ရင် ဆေးဘူးနဲ့ ဆေးထုတ်စာအုပ်ပုံတွေကို ယုံကြည်ရသူ တစ်ဦးဦးဆီသို့ Messenger ကနေ ပို့ထားပြီး သူ့ဆီမှာလည်း သိမ်းထားခိုင်းပါ။
၄. မိမိ လက်ထဲမှာ ရှိတဲ့ ဆေးကို ချွေတာပြီး ရက်ခြားသောက်တာ၊ တစ်ခြမ်းချိုးသောက်တာ လုံးဝ မလုပ်ရပါဘူး။ ဒီလိုလုပ်ရင် ဆေးယဉ်ပါးမှု ဖြစ်ပေါ်စေပါတယ်။
၅. လက်ထဲမှာ ရှိတဲ့ ဆေးကုန်သည်အထိ ဆရာဝန်/ ဆရာမ ညွှန်ကြားထားသည့်အတိုင်း နေ့စဉ် သောက်သုံးရမှာဖြစ်ပါတယ်။
၆. ဆေးမကုန်ခင်ကတည်းက သတိထားပြီး ဆေးထုတ်နိုင်ဖို့ ကြိုးစားပါ။
၇. မိမိပုံမှန်ဆေးကုသမှုခံယူနေတဲ့နေရာကနေ အခြားဒေသတစ်ခုခုကို အကြောင်းအမျိုးမျိုးကြောင့် ရောက်ရှိနေမယ်ဆိုရင် ART ဆေးဆက်လက်ထုတ်ယူသောက်သုံးနိုင်ဖို့အတွက် အကူအညီ ပေးနိုင်တဲ့ နေရာများနဲ့ ချိတ်ဆက်ပါ။
အကူအညီ လိုအပ်ပါက တိုင်ပင်ဖော် Hotline ဖုန်းနံပါတ်တွေကို ဆက်သွယ်ပြီး အကူအညီရယူနိုင်ပါတယ်။
📱09 943 211 414, 09 944 321 919,
📱09 406 911 919, 09 457 119 191
📱 09 797 211 414, 09 797 211 919
