27/09/2025
ခါးနာခြင်းအကြောင်းသိကောင်းစရာ
(ဖတ်ရန်ကြာချိန် ၃ မိနစ် )
ခါးနာခြင်းဝေဒနာမှာ အဖြစ်များလှသည်။ ခါးနာခြင်းဝေဒနာနှင့်ပတ်သက်ပြီး အမှတ်မှားနိုင်သော မေးခွန်းများနှင့် အချက်အလက်မှန် များကို အားလုံးသိရှိနားလည်နိုင်စေဖို့ ရေးသားတင်ဆက်လိုက်ရပါသည်။
(၁) လေ့ကျင့်ခန်းလုပ်တာ ခါးနာစေသလား။
ကျွမ်းကျင်သော ကာယကုသမှုပညာရှင်၏ လမ်းညွှန်မှုဖြင့် လေ့ကျင့်ခန်းလုပ်လျှင် ခါးကြွက်သားများသန်စွမ်းပြီး ခါးနာသက်သာစေနိုင်ပါသည်။ ခါးအရိုးအဆစ်နှင့် ကြွက်သားများ သန်စွမ်းပါက ခါးရိုးကို ပိုမိုတည်ငြိမ်စေသည်။ ဒေါက်တာ ဘူဇန်နော့စကာ၏ အဆိုအရ ခါးဆစ်ပြားဖောင်းနေခြင်းကိုပင် ကာယကုသမှုပညာရှင်နှင့် လေ့ကျင့်ခန်းလုပ်ပြီး သက်သာစေနိုင်သည်။
(၂) ခါးဆစ်ပြားကျွံလျှင် ခွဲစိတ်မှ ရမည်လား
ကျောရိုးတစ်ခုနှင့်တစ်ခု ကြားက ခါးဆစ်ပြားများက ကျောရိုးတလျှောက်ဖိအားများကို လျှော့ချခုခံ ပေးသည်။ ပြင်ပအလွှာများ အားနည်းသော ခါးဆစ်ပြားများတွင် စုတ်ပြဲခြင်း၊ ကျွံခြင်း ဖြစ်တတ်သည်။ ခါးဆစ်ပြားအလယ်မှ အရည်ပျစ်များ ထွက်ကုန်သဖြင့် အနီးမှ အာရုံကြောများကို ဆွပြီး ခါးနှင့်ခြေထောက်နာတတ်သည်။ ခါးဆစ်ပြားကျွံခြင်း၏ ၉၀%ကို အနားယူခြင်း၊ ဆေးဖြင့်ကုသခြင်းနှင့် ကာယကုသခြင်းများဖြင့် ကုသပျောက်ကင်းနိုင်သည်။
(၃) ကျောရိုးခွဲစိတ် ဆရာဝန်နှင့် ပြလျှင် ခွဲရတော့ မှာလား
ကျောရိုးခွဲစိတ် ဆရာဝန်များက လိုအပ်သော လူနာ၊ လိုအပ်သော ရောဂါ အနေအထားများတွင်သာ ခွဲစိတ်ကြပါသည်။
(၄) ခါဆစ်ပြားဖောင်းတာ တခြား ရောဂါရှိနေလို့လား
အရွယ်ရလာခြင်းကြောင့် ခါးဆစ်ပြားဖောင်းလာတတ်သည်။ ဒေါက်တာ ဘူဇန်နော့စကာက "တဖြည်းဖြည်း ပါးလာပြီး လေလျော့လာတတ်သော ကားတာယာများနှင့် ခါးဆစ်ပြားများက ပုံစံတူသည်"ဟုဆိုသည်။ ကားတာယာကိုလဲ၍ရသော်လည်း ခါးဆစ်ပြားများကို မလဲနိုင်ပေ။ထို့ကြောင့် အသက်ကြီးလာလျှင် အရပ် ပိုတိုလာတတ်သည်။ သို့သော် လူတစ်ချို့တွင်သာ နာကျင်မှုခံစားရတတ်သည်။
(၅) သံလိုက်ဓာတ်မှန်(MRI) က ခါးနာခြင်း၏ အကြောင်းရင်းကို အမြဲပြသလား
MRI က သံလိုက်စက်ကွင်းနှင့် ရေဒီယိုလှိုင်းများ အသုံးပြုကာ ခန္ဓာကိုယ်တွင်းအဂ်ါများ တစ်ရှူးများ၏ ပုံရိပ်ကို အသေးစိတ်ပုံဖော်ပေးသည်။ MRI ဖြင့် ခါးဆစ်ပြားစုတ်ပြဲခြင်း၊ ကျွံခြင်းနှင့် အာရုံကြောများပိခြင်းကို သိနိုင်သည်။ အားနည်းသော ကြွက်သားများ နှင့် အချို့ ရောဂါများကိုမူ မသိနိုင်ပါ။ MRI တွင် တစ်ခါတစ်ရံ အသက်အရွယ်ကြောင့် ပုံမှန်ပြောင်းလဲခြင်းများကို ရောဂါဟု အမြင်မှားနိုင်သည်။
(၆) အိပ်ရာထက် နားခြင်းက ခါးနာခြင်းအတွက် အကောင်းဆုံးလား
ဒေါက်တာ ဘူဇန်နော့စကာ၏ အဆိုအရ"ခါးနာခြင်းအတွက်အကောင်းဆုံးမှာ ညင်သာသော လေ့ကျင့်ခန်းဖြစ်သည်"ဟု ဆိုသည်။ ဥပမာ-လမ်းလျှောက်ခြင်းသည် ထိုင်သော ကိုယ်နေဟန်ထားကို ပြောင်းလဲပြီး သဘာဝအတိုင်း တည့်မတ်သော ကိုယ်နေပုံကို ဖြစ်စေသည်။ ပေါ့ပေါ့ပါးပါး ညင်သာစွာ အကြောဆန့်ခြင်းကလည်း ခါးနာခြင်းကို သက်သာစေသည်။ တစ်ဦးချင်း ကိုက်ညီသော လေ့ကျင့်ခန်းကိုမူ ကျွမ်းကျင်သော ကာယကုသမှုပညာရှင်ကသာ ကြီးကြပ်ရွေးချယ်ပြီး လေ့ကျင့်ပေးသင့်သည်။
(၇) ကျောရိုးပေါင်းစပ်ခွဲစိတ်မှုလုပ်လျှင် ထပ်ခွဲရတတ်သလား
ဒေါက်တာ ဘူဇန်နော့စကာ၏ အဆိုအရ "မှန်ကန်သော ရောဂါ အကြောင်းရင်းကြောင့် ကျောရိုးပေါင်းစပ်ခွဲစိတ်မှုလုပ်လျှင် ထပ်မံ ခွဲစိတ်ရမှု ရှားပါသည်"ဟုဆိုသည်။
(၈) အာရုံကြောပိလို့ ခါးအရမ်းနာတာလား
တစ်ခါတစ်ရံတော့ အာရုံကြောပိလို့ ခါးအရမ်းနာတာ မှန်ပါသည်။ ကျောရိုးထဲက အာရုံကြောများကို ဆွနေလျှင် (သို့) ဖိထားလျှင် ပေါင်ကြော တလျှောက် နှင့် ခြေထောက်နာကျင်မှု ဖြစ်စေနိုင်သည်။
"ကျန်းမာသုတမျှဝေကြမယ် "စာရှုသူများ ခါးနာခြင်း ဒုက္ခ ကင်းဝေးပြီး ကျန်းမာကြပါစေ
Ref: Cleverland clinic website
