https://www.facebook.com/104908034891452/

Ramona’s Channel, Mingalar Street, Yangon (2025)

04/12/2025

💖 You are not behind ….

🙍🏻‍♀️ ကျွန်မတို့အားလုံးဟာ တစ်ခါတလေကျရင် "ငါ နောက်ကျနေပြီလား" "သူငယ်ချင်းတွေက ဒီထက်ပို အောင်မြင်နေပြီ" "ငါ့ဘဝက ဘာမှ မဖြစ်သေးဘူး" စတဲ့ အတွေးတွေ ဝင်ရောက်လာတတ်ပါတယ်။ အထူးသဖြင့် ဒီလို ခေတ်ကာလမှာ Social Media တွေကနေတစ်ဆင့် သူများတွေရဲ့ ကြီးမားတဲ့ အောင်မြင်မှုတွေကို မြင်နေရတဲ့အခါ ကိုယ့်ကိုယ်ကိုယ် နှိုင်းယှဉ်မိပြီး စိတ်အားငယ်မိတတ်ကြပါတယ်။

🕰️ ပထမဆုံး နားလည်ထားရမယ့် အချက်ကတော့ ဘဝဆိုတာ ပြိုင်ပွဲတစ်ခု မဟုတ်ပါဘူး။ အောင်မြင်မှု၊ ပျော်ရွှင်မှုနဲ့ Healing ဆိုတာလည်း သတ်မှတ်ထားတဲ့ အချိန်ဇယား နဲ့ လိုက်နာစရာ မလိုပါဘူး။
🤷🏻‍♀️ အသက် (၂၅) နှစ်မှာ အိမ်ထောင်ပြုရမယ်
🤷🏻‍♀️ အသက် (၃၀) မှာ မန်နေဂျာ ဖြစ်ရမယ်
🤷🏻‍♀️ ဘယ်အချိန်မှာ ဘာဖြစ်ရမယ်
👉🏻 ဒီလို စည်းမျဉ်းတွေဟာ လူမှုပတ်ဝန်းကျင်က သတ်မှတ်ထားတာတွေသာ ဖြစ်ပြီး ကျွန်မတို့ရဲ့ နှလုံးသား က သတ်မှတ်ထားတာ မဟုတ်ပါဘူး။

🎀 ကျွန်မတို့ရဲ့ ဘဝခရီးက တစ်ယောက်နဲ့တစ်ယောက် မတူပါဘူး။
🌷 တချို့ပန်းတွေက နွေဦးမှာ ပွင့်ပြီး တချို့ပန်းတွေက မိုးရေစက်လေးတွေအောက်မှာ ပွင့်တယ်၊ တချို့ပန်းတွေကတော့ ဆောင်းဦးမှသာ ပွင့်ကြသလိုပေါ့။ ကျွန်မတို့ရဲ့ ပန်းပွင့်ချိန်ဟာလည်း အခြားသူတွေနဲ့ ကွာခြားနိုင်ပါတယ်။
👉🏻 အခုအချိန်မှာ ကြုံတွေ့နေရတဲ့ စိန်ခေါ်မှုတွေရှိနေရင်လည်း ကိုယ်ခံစားနေရတဲ့ စိတ်ဒဏ်ရာတွေကို ကုစားနေရတဲ့အချိန်တွေဟာ အချည်းနှီး မဟုတ်ပါဘူး။ တကယ်တော့ အဲဒီလို ခက်ခဲတဲ့ အချိန်တွေဟာ ပိုပြီး strong ဖြစ်ဖို့အတွက် လိုအပ်တဲ့ ပြင်ဆင်ချိန်တစ်ခုပါပဲ။
🦋 လိပ်ပြာ မဖြစ်သေးတဲ့ ဘောက်ဖတ်ကောင်လေးလိုပဲ အသွင်ပြောင်းလဲဖို့ မြင့်မြင့်ကို ပျံသန်းဖို့ကို အချိန်ယူလုပ်ဆောင်နေတာပါ။

⭐️ ကိုယ့်ရဲ့ ခရီးလမ်းဟာ ကိုယ့်အတွက်ပဲ ဖြစ်တယ်။ ဘယ်သူ့နောက်မှ ကျန်ရစ်နေတာ မဟုတ်ဘူး။ အခု ရှိသင့်တဲ့ နေရာအတိအကျမှာ ရောက်နေပြီး ကိုယ့်အတွက် အကောင်းဆုံး ဖြစ်မယ့် အချိန်ကို ရောက်တဲ့အခါ အရာအားလုံး အဆင်ပြေသွားလိမ့်မယ်ဆိုတာ ယုံကြည်လိုက်ပါ။ လမ်းပျောက်နေတယ်လို့ ခံစားရရင်တောင်မှ အဲ့ဒီ ခံစားချက်ကနေ သင်ယူစရာတစ်ခုခု ရှိနေလို့ ဖြစ်နိုင်ပါတယ်။

✨ ဒါကြောင့် နောက်မကျပါဘူး … ရှိသင့်တဲ့ နေရာမှာ ရောက်နေတာပါနော်

With much love ❤️
Ramona

03/12/2025

ဒီနေ့မှာတော့ လုပ်ငန်းခွင်မှာ အောင်မြင်မှုနဲ့ ရေရှည်တည်တံ့တဲ့ ဆက်ဆံရေးတွေ တည်ဆောက်ရာမှာ မရှိမဖြစ်လိုအပ်တဲ့ Emotional Intelligence - EQ အကြောင်း မျှဝေပေးချင်ပါတယ်။ EQ ဟာ လူမှုဆက်ဆံရေးနဲ့ စီမံခန့်ခွဲမှုမှာဆိုရင် အဓိကသော့ချက်တစ်ခုပဲ ဖြစ်ပါတယ်။

👑 ခေါင်းဆောင်ကောင်းတစ်ယောက်ဖြစ်ဖို့ဆိုတာ အမိန့်ပေးတာ ဒါမှမဟုတ် နည်းလမ်းတွေ မဟာဗျူဟာတွေ ချမှတ်တာထက် ပိုပါတယ်။ ကိုယ့်ရဲ့ Team မှာရှိတဲ့ လူတွေရဲ့ စိတ်ခံစားချက်ကို နားလည်ပြီး လမ်းညွှန်ပေးနိုင်ဖို့ လိုအပ်ပါတယ်။ EQ မြင့်မားတဲ့ခေါင်းဆောင်တစ်ဦးဟာ ~

✔️ ကိုယ့်ကိုယ်ကိုယ် သိရှိနားလည်ခြင်း (Self-Awareness)
ကိုယ့်ရဲ့ ခံစားချက်တွေနဲ့ စိတ်ခံစားချက်တွေက သူများအပေါ် ဘယ်လို သက်ရောက်မှုရှိတယ်ဆိုတာ သိပါတယ်။ ဒါကြောင့် စိန်ခေါ်မှုတွေကြုံလာတဲ့အခါ စိတ်တည်ငြိမ်စွာနဲ့ တုံ့ပြန် နိုင်ပြီး၊ အဖွဲ့အစည်းရဲ့ ယဉ်ကျေးမှုကို ကျန်းမာအောင် ထိန်းသိမ်းပေးနိုင်ပါတယ်။

✔️ စိတ်ကို ထိန်းညှိနိုင်ခြင်း (Self-Regulation)
အလုပ်ဖိအားများတဲ့ အခြေအနေ ဒါမှမဟုတ် အမှားတစ်ခုခုဖြစ်တဲ့အခါ စိတ်လှုပ်ရှားမှုကို မဖော်ပြဘဲ၊ အေးဆေးတည်ငြိမ်စွာ အဖြေရှာနိုင်ပါတယ်။ ဒါက အဖွဲ့သားတွေအတွက် စိတ်ချရတဲ့ ပုံစံကောင်း (Role Model) ဖြစ်စေပါတယ်။

✔️ စာနာနားလည်မှု (Empathy)
အဖွဲ့သားတစ်ဦးချင်းစီရဲ့ ခံစားချက် စိုးရိမ်ပူပန်မှုနဲ့ လိုအပ်ချက်တွေကို နားလည်ပေးနိုင်ပါတယ်။ စာနာမှုကနေတစ်ဆင့် ယုံကြည်မှုနဲ့ သစ္စာရှိမှုကို တည်ဆောက် ပေးပြီး အဖွဲ့အစည်းရဲ့ စွမ်းဆောင်ရည်ကို တိုးတက်စေပါတယ်။

💡 EQ မြင့်တဲ့ ခေါင်းဆောင်တစ်ယောက်ဟာ ပြဿနာတစ်ခုဖြစ်တဲ့အခါ "ဘယ်သူမှားတာလဲ" လို့ မမေးဘဲ "ဒီပြဿနာကို ဘယ်လိုဖြေရှင်းပြီး နောက်တစ်ခါ ဘယ်လိုကာကွယ်နိုင်မလဲ" လို့သာ မေးမြန်းပါတယ်။

💼 Client Relations မှာဆိုရင် Client နဲ့ ဆက်ဆံရာမှာ EQ ဟာ ရောင်းအားတိုးမြှင့်တာနဲ့
ရေရှည် ကိုယ့်ရဲ့ဖောက်သည်ဖြစ်လာစေဖို့အတွက် အဓိက အကျိုးသက်ရောက်မှု ရှိပါတယ်။

✔️ စိုးရိမ်မှုကို နားလည်ပေးခြင်း
Client တွေဟာ ပစ္စည်း ဒါမှမဟုတ် ဝန်ဆောင်မှုကို ဝယ်တာထက် သူတို့ရဲ့ ပြဿနာကို ဖြေရှင်းပေးနိုင်မယ့် စိတ်ချရမှုကို လိုချင်တာပါ။ EQ မြင့်တဲ့ ဝန်ထမ်းဟာ ဖောက်သည်တစ်ဦးက စိတ်ဆိုးနေတယ် ဆိုရင်၊ သူတို့ရဲ့ အသံနေအသံထားနဲ့ ခံစားချက်ကို ဖမ်းမိ နိုင်ပါတယ်။ "နားလည်ပါတယ်။ ဒီပြဿနာအတွက် စိတ်အနှောင့်အယှက် ဖြစ်ရတာကို ကျွန်တော်/ကျွန်မတို့ ဝမ်းနည်းပါတယ်" လို့ စာနာမှုနဲ့ စတင်တာက ပြေလည်မှုရဖို့ ပထမဆုံး ခြေလှမ်းပါပဲ။

✔️ ထိရောက်သော ဆက်သွယ်ပြောဆိုခြင်း (Effective Communication)
EQ ဟာ Client ရဲ့ မေးခွန်းတွေကို ဖြေကြားတာအပြင် Client က ဘာကို တကယ် လိုအပ်နေလဲ ဆိုတာကို မေးခွန်းမေးမြန်းပြီး သိရှိအောင် လုပ်ဆောင်နိုင်ပါတယ်။ Client ရဲ့ စိုးရိမ်ပူပန်မှုတွေကို အာရုံစိုက် နားထောင်တာ (Active Listening) ဟာ ယုံကြည်မှု တိုးစေပါတယ်။ ခံစားချက်ကို အခြေခံပြီး ဆုံးဖြတ်ချက်ချတတ်တဲ့ Client တွေကို နွေးထွေးတဲ့ စကားလုံးတွေနဲ့ ချဉ်းကပ်ပြီး အချက်အလက်ကို အဓိကထားတဲ့ Client တွေကို တိကျတဲ့ အချက်အလက်တွေနဲ့ တုံ့ပြန်တာမျိုးတွေက ရေရှည် ဆက်ဆံရေးကို ပိုပြီး အကျိုးရှိစေပါတယ်။

✔️ အပြုသဘောဆောင်သော ပတ်ဝန်းကျင် ဖန်တီးခြင်း
Client တစ်ဦးဟာ ကုမ္ပဏီနဲ့ ဆက်သွယ်တဲ့အခါတိုင်း လေးစားခံရတယ်၊ နားလည်မှု ပေးခံရတယ်လို့ ခံစားရရင် သူဟာ ရေရှည် Client ကောင်းတစ်ဦး ဖြစ်လာနိုင်ပါတယ်။ EQ က ဒီလို ကောင်းမွန်တဲ့ အတွေ့အကြုံ (Positive Experience) ကို ပေးစွမ်းနိုင်ဖို့အတွက် လိုအပ်ပါတယ်။

🌟 ခေါင်းဆောင်မှုပဲဖြစ်ဖြစ်၊ Client နဲ့ ဆက်ဆံရေးပဲ ဖြစ်ဖြစ် EQ ဟာ Technical Skills တွေထက် ပိုပြီး အရေးပါလာပါတယ်။ ကိုယ့်ရဲ့ စိတ်ခံစားချက်ကို နားလည်ခြင်းနဲ့ သူတစ်ပါးရဲ့ စိတ်ခံစားချက်ကို စာနာနားလည်ခြင်းအားဖြင့် လုပ်ငန်းခွင်မှာ ပိုမိုကောင်းမွန်တဲ့ ရလဒ်တွေနဲ့ ခိုင်မာတဲ့ ဆက်ဆံရေးတွေကို တည်ဆောက်နိုင်မှာပါ။

✨ နောက်ထပ်လည်း ဒီလို EQ အကြောင်းအရာလေးတွေ မျှဝေပေးသွားပါဦးမယ်နော်။ စောင့်မျှော်ပေးကြပါဦး။

With much love ❤️
Ramona

30/11/2025

🌬️ Healing Power of Slow Exhalations

🍃 စိတ်ဖိစီးမှုတွေ၊ စိုးရိမ်ပူပန်မှုတွေ များလာတဲ့အခါ ကျွန်မတို့ရဲ့ အသက်ရှူနှုန်းတွေ မြန်လာတာဟာ ကျွန်မတို့ရဲ့ ကိုယ်ခန္ဓာကို အရေးပေါ် အခြေအနေ Fight or Flight အဖြစ် သတ်မှတ်ထားပြီး စိတ်ဖိစီးမှုကို ဖြစ်စေတဲ့ Nervous System ကို နှိုးဆွပေးလိုက်တာဖြစ်ပါတယ်။

🍃 ဒီနေရာမှာ ဖြည်းညှင်းစွာ အသက်ရှူထုတ်ခြင်းက အရေးပါတဲ့အကြောင်းလေး မျှဝေပေးချင်ပါတယ်။ ကျွန်မတို့ဟာ အသက်ရှူသွင်းတဲ့အချိန်ထက် ရှူထုတ်တဲ့အချိန်ကို ပိုပြီး ဖြည်းညှင်းစွာ ရှည်ကြာစွာ လုပ်လိုက်တဲ့အခါ ခန္ဓာကိုယ်ရဲ့ စိတ်ကိုငြိမ်သက်အောင် ထိန်းညှိပေးတဲ့ အာရုံကြောတွေကို သတိပေးလိုက်သလို ဖြစ်သွားပါတယ်။ ဒါဟာ ကိုယ်ခန္ဓာကို "အန္တရာယ် ကင်းရှင်းပြီ" လို့ ပြောလိုက်တာနဲ့ အတူတူပါပဲ။

🌬️ ဖြည်းဖြည်းချင်း ရှူထုတ်ခြင်းဟာ ခန္ဓာကိုယ်ကို ငြိမ်သက်စေရုံသာမကဘဲ
✅ Cortisol (စိတ်ဖိစီးမှုဟော်မုန်း) ထွက်ရှိမှုကို လျှော့ချပေးပြီး စိတ်ဖိစီးမှုကို သိသိသာသာ လျော့စေပါတယ်။
✅ စိုးရိမ်ပူပန်ခြင်း (Anxiety) ကို ချက်ချင်း လျှော့ချပေးနိုင်ပြီး စိတ်ခံစားချက်ကို တည်ငြိမ်စေပါတယ်။
✅ အိပ်ရာမဝင်ခင် လေ့ကျင့်ပါက စိတ်ကို အလွယ်တကူ အနားယူစေပြီး နှစ်နှစ်ခြိုက်ခြိုက် အိပ်ပျော်စေဖို့ ကူညီပေးပါတယ်။

🧘🏻‍♀️ သက်သောင့်သက်သာ ထိုင်ပါ ဒါမှမဟုတ် လှဲလျောင်းပါ။ ပခုံးတွေကို ဖြေလျော့ပြီး ကိုယ့်ရဲ့ အသက်ရှူသွင်းတာလေးကို စတင် အာရုံစိုက်ပါ။
🧘🏻‍♀️ နှာခေါင်းကနေ လေကို ၄ စက္ကန့်တိတိ ဖြည်းဖြည်းချင်း ရှူသွင်းပါ။ ၁...၂...၃...၄ … ဝမ်းဗိုက်ထဲအထိ လေတွေ ပြည့်သွားပါစေ။
🧘🏻‍♀️ နှုတ်ခမ်းကို လေမှုတ်ထုတ်သလို အနည်းငယ် ချွန်ပြီး ရှူသွင်းချိန်ထက် ပိုရှည်တဲ့ ၆ စက္ကန့်တိတိ ဖြည်းဖြည်းချင်း လေကို ရှူထုတ်ပါ။ ၁...၂...၃...၄...၅...၆ … စိတ်ထဲက တင်းမာမှုတွေကို ပါ လိုက်ပါသွားပါစေ။
🧘🏻‍♀️ ဒီ ၄ စက္ကန့် ရှူသွင်း၊ ၆ စက္ကန့် ရှူထုတ်ခြင်းကို ၃ မိနစ်မှ ၅ မိနစ်ခန့် ထပ်ခါထပ်ခါ ဆက်တိုက် ပြုလုပ်ပါ။

👉🏻 သတိထားရမှာက ရှူထုတ်တဲ့အချိန် ရှည်ကြာလေ စိတ်ငြိမ်သက်မှု ပိုရရှိလေ ဖြစ်ပါတယ်။ ဒီနည်းလမ်းကို မအိပ်ခင် ဒါမှမဟုတ် စိတ်ဖိစီးမှု များနေတဲ့အခါတိုင်း သုံးနိုင်ပါတယ်။

🌬️ ဒီ Breathing အလေ့အကျင့်လေးဟာ ဘယ်လိုနေရာမှာမဆို ဘယ်အချိန်မှာမဆို လွယ်လွယ်ကူကူ လုပ်လို့ရပါတယ်။ ဖြည်းညှင်းစွာ ရှူထုတ်ခြင်းရဲ့ စွမ်းအားကို ယုံကြည်စွာ လေ့ကျင့်ကြည့်ဖို့ တိုက်တွန်းချင်ပါတယ်။ စိတ်ငြိမ်သက်မှုကို ပေးစွမ်းနိုင်တဲ့ အခြား ရိုးရှင်းတဲ့ အသက်ရှူနည်းလမ်းတွေကိုလည်း အလျင်းသင့်သလို မျှဝေပေးသွားပါဦးမယ်ရှင်။

🤗 Page လေးကို Like and Follow လုပ်ထားဖို့မမေ့နဲ့နော် ✨

With much love ❤️
Ramona

29/11/2025

🙏🏻 Mindfulness ကို Gratitude နဲ့ စတင်ပါ …

🧘🏻‍♀️ Mindfulness ဆိုတာ "အခု...ဒီနေရာ...ဒီအချိန်" မှာ ကိုယ့်ရဲ့ အတွေး၊ ခံစားချက်၊ ခန္ဓာကိုယ်နဲ့ ပတ်ဝန်းကျင်က အဖြစ်အပျက်တွေကို မှန်ကန်စွာ သိရှိမှတ်သားနေခြင်းကို ဆိုလိုပါတယ်။ Mindfulness ကို စတင်လေ့ကျင့်တဲ့အခါမှာ အကောင်းဆုံး အခြေခံတစ်ခုကတော့ ကျေးဇူးတရားပွါးများတာ (Gratitude) ပါပဲ။

👉🏻 ဘာလို့လဲဆိုတော့...

✔️ စိတ်ရဲ့ အာရုံကို ပြောင်းလဲပေးနိုင်လို့ပါ
ကျွန်မတို့ရဲ့ စိတ်ဟာ အဆိုးမြင်တဲ့အရာ၊ ချို့တဲ့တဲ့အရာ၊ မရှိတဲ့အရာတွေကို အလိုလို အာရုံစိုက်တတ်ပါတယ်။ ကျေးဇူးတင်ခြင်းဟာ ဒီအာရုံကို ရှိနေတဲ့အရာ၊ ကောင်းမွန်တဲ့အရာတွေဆီ လှည့်ပေးလိုက်တဲ့အတွက် စိတ်ရဲ့ အမြင်ကို ချက်ချင်း ပြောင်းလဲသွားစေပါတယ်။

✔️ လက်ရှိကို တန်ဖိုးထားစေလို့ပါ
သေးငယ်တဲ့အရာတွေကို ကျေးဇူးတင်တတ်လာတဲ့အခါ ကျွန်မတို့ဟာ အနာဂတ်ရဲ့ လိုချင်တပ်မက်မှုတွေနဲ့ အတိတ်ရဲ့ နောင်တတွေထဲမှာ မျောပါမနေတော့ဘဲ လက်ရှိ အခိုက်အတန့်ကို တန်ဖိုးထားတတ်လာပါတယ်။

🙏🏻 ကျေးဇူးတရားပွါးများတယ်ဆိုတာ ကျွန်မအရင် post တွေမှာ မျှဝေခဲ့သလိုပဲ ကြီးမားတဲ့ကိစ္စတွေ၊ ငွေကြေးတွေ၊ အောင်မြင်မှုအတွက်မှ ပြောတာ မဟုတ်ပါဘူး။ ကျွန်မတို့ ပတ်ဝန်းကျင်မှာ နေ့စဉ် ကြုံတွေ့နေရတဲ့ သေးငယ်တဲ့ အခိုက်အတန့်လေးတွေအတွက်ကိုလည်း အမြဲသတိပြုမိပြီး ကျေးဇူးတင်နိုင်ပါတယ်။

🔹 နိုးထချိန်မှာ ဒီမနက်မှာ အသက်ရှင်လျက် နိုးထလာနိုင်ခဲ့လို့ ကျေးဇူးတင်ပါ။
🔹 ရေအေးအေးလေးတစ်ခွက် သောက်လိုက်ရတဲ့အခါ ခန္ဓာကိုယ်တစ်ခုလုံး လန်းဆန်းသွားတာကို အာရုံပြုပါ။ ဒီရေအတွက် ကျေးဇူးတင်ပါ။
🔹ကိုယ့်ခြေထောက်တွေက ကိုယ့်ကို သွားချင်တဲ့နေရာကို သယ်ဆောင်ပေးနေတာအတွက် ကျေးဇူးတင်ပါ။
🔹 ကိုယ့်ကို ချစ်ခင်စောင့်ရှောက်တဲ့ မိသားစု၊ သူငယ်ချင်းတွေ ရှိနေတာအတွက် ကျေးဇူးတင်ပါ။

🧘🏻‍♀️ Mindfulness ဆိုတာ ကြီးကျယ်ခမ်းနားတဲ့ အလေ့အကျင့် မဟုတ်ပါဘူး။ ကျေးဇူးတင်ခြင်း ဆိုတဲ့ နှလုံးသားကနေ စတင်ပြီး နေ့စဉ်ဘဝရဲ့ ရိုးရှင်းတဲ့ အခိုက်အတန့်လေးတွေမှာ တည်ရှိနေခြင်းသာ ဖြစ်ပါတယ်နော်။ ဒီအကြောင်းလေးကို ဖတ်ပြီး စိတ်ချမ်းသာရမယ်လို့လည်း မျှော်လင့်ပါတယ်။ ကိုယ့်ရဲ့ ခံစားချက်လေးတွေကို ဝေမျှချင်တယ်ဆိုရင်လည်း comment မှာ ပြောပြပေးခဲ့ပါဦးနော်။

🕉️ ကိုယ့်ရဲ့ အသက်ရှူသွင်း ရှူထုတ်တာလေးတွေကို သတိပြုပါ။ စိတ်အေးချမ်းသွားပါစေ။
🕉️ ကျေးဇူးတင်ခြင်းကနေ ရရှိလာတဲ့ နွေးထွေးတဲ့ ပျော်ရွှင်တဲ့ စိတ်ခံစားချက်ကို ခံစားရင်း ဘဝမှာ ငြိမ်းချမ်းမှုတွေ ပြည့်စုံပါစေ။

With much love ❤️
Ramona

27/11/2025

သေးငယ်တဲ့ အခိုက်အတန့်လေးတွေမှာ ကျေနပ်ရောင့်ရဲဖို့ … 🧘🏻‍♀️

ဒီနေ့မှာတော့ Yoga Philosophy ရဲ့ အရေးကြီးတဲ့ အစိတ်အပိုင်းတစ်ခုဖြစ်တဲ့ သန္တောသ (Santosha) ဆိုတဲ့ ကျေနပ်ရောင့်ရဲခြင်း အကြောင်းကို မျှဝေပေးချင်ပါတယ်။ ယောဂရဲ့ ကျင့်စဉ်လမ်းညွှန်ချက် Yammas နဲ့ Niyammas တွေထဲက Niyama ၅-ပါးထဲမှာ သန္တောသဟာ ဒုတိယမြောက် ကျင့်စဉ်ပါ။ အလွယ်ဆုံးပြောရရင် ကိုယ့်ဘဝမှာ လက်ရှိရှိနေတဲ့ အရာတွေနဲ့ ပတ်သက်ပြီး စိတ်ကျေနပ်မှုရှိနေခြင်းကို ဆိုလိုတာပါ။ အပြင်ပန်းကနေ ရရှိလာမယ့် ပျော်ရွှင်မှုတွေ အောင်မြင်မှုကြီးတွေကို လိုက်ရှာနေတာထက် “အခု...ဒီနေရာ...ဒီအချိန်” မှာ ကိုယ့်မှာ ရှိနေတဲ့ အရာလေးတွေ ကိုယ်တွေ့ကြုံနေရတဲ့ အခြေအနေလေးတွေအပေါ် ကျေနပ်ရောင့်ရဲပြီး စိတ်ကို အေးချမ်းစွာထားနိုင်ခြင်းပါပဲ။

👉🏻 တကယ်တော့ သန္တောသဆိုတာ တောထွက်မှ တောင်ကြီးအောက်မှာထိုင်ပြီး တရားထိုင်မှ ရတာမျိုး မဟုတ်ပါဘူး။ ကျွန်မတို့ရဲ့ နေ့စဉ်ဘဝထဲက သေးငယ်တဲ့ အခိုက်အတန့်လေးတွေမှာ အပြည့်အဝ ရှိနေတာကို မြင်အောင် ကြည့်တတ်ဖို့ပဲ လိုတာပါ။

💫 မနက်ခင်းသောက်ဖြစ်တဲ့ ကော်ဖီလေးရဲ့ အနံ့နဲ့ အရသာကို အပြည့်အဝ ခံစားကြည့်ပါ။
💫 ကိုယ်ချစ်ရတဲ့သူတွေရဲ့ အပြုံး ဒါမှမဟုတ် နွေးထွေးတဲ့ စကားတစ်ခုကို ကြားလိုက်ရတဲ့အခါ ရရှိတဲ့ စိတ်ချမ်းမြေ့မှုကို သတိပြုမိပါ။
💫 မိုးစက်လေးတွေ ပြတင်းပေါက်ကို တိုက်ခတ်နေတဲ့ မြင်ကွင်းတွေ၊ နေရောင်ခြည်နွေးနွေးလေး ကိုယ်ပေါ်ကျရောက်လာတဲ့ ခံစားချက်လေးတွေကို တန်ဖိုးထားကြည့်ပါ။
💫 ကိုယ့်ခန္ဓာကိုယ်က နေ့စဉ် လုပ်ငန်းဆောင်တာတွေကို ကျန်းကျန်းမာမာ လုပ်ဆောင်နိုင်တာကို ကျေးဇူးတင်ပါ။

👉🏻 ဒီလို "ရှိနေခြင်း" တွေကို သတိပြုမိတဲ့အခါ ကျွန်မတို့ရဲ့ စိတ်ဟာ "မရှိသေးခြင်း" တွေအပေါ် အာရုံစိုက်ပြီး ပူပန်နေရတဲ့ ဝန်ထုပ်ဝန်ပိုးတွေကနေ လွတ်မြောက်သွားပါတယ်။ ဒါဟာ ရိုးရှင်းပေမယ့် စွမ်းအားကြီးတဲ့ ကျေနပ်ရောင့်ရဲခြင်းပါပဲ။

⭐️ သန္တောသရဲ့ အဓိကအကျိုးကျေးဇူးကတော့ ကျွန်မတို့ရဲ့ အတ္တက ဖန်တီးထားတဲ့ မပြည့်စုံနိုင်တဲ့ လိုချင်တပ်မက်မှု လောဘတွေကို ဖြေလျော့ပေးနိုင်တာပါပဲ။ "ဒါလေး ရရင်တော့ ပျော်ရမှာပဲ" "ဒီလို ဖြစ်ရင်တော့ စိတ်ချမ်းသာမှာပဲ" ဆိုတဲ့ အတွေးတွေဟာ ဘယ်တော့မှ မပြီးဆုံးပါဘူး။ တစ်ခုရရင် နောက်တစ်ခု လိုချင်ပြန်တာပါပဲ။ သန္တောသဟာ ဒီလို ပြေးလွှားနေရတဲ့ လိုအင်ဆန္ဒတွေရဲ့ အပြေးပြိုင်ပွဲကနေ ခေတ္တရပ်နားခွင့် ပေးလိုက်တာနဲ့ တူပါတယ်။ လက်ရှိ အခြေအနေကို ပွေ့ဖက်လိုက်ပြီး "ဟုတ်ပြီ၊ အခု ငါ့ဘဝက ဒီလိုပဲ … ဒါပေမယ့် ဒီအထဲမှာ ကောင်းမွန်တဲ့ အရာတွေ ရှိနေတယ်" လို့ လက်ခံလိုက်တာပါ။ ဒီလို သေးငယ်တဲ့ အလေ့အကျင့်လေးတွေ စိတ်နေသဘောထားတွေက စိတ်ကို ငြိမ်းချမ်းစေပြီး ကိုယ့်မှာရှိတဲ့ အရာတွေဟာ တကယ်တော့ လုံလောက်နေပြီဆိုတဲ့ ခံစားချက်ကို ပေးစွမ်းနိုင်ပါတယ်။

👉🏻 ဒါကြောင့်မို့လို့ ဒီနေ့ကစပြီး ကြီးမားတဲ့ပျော်ရွှင်မှုကို လိုက်ရှာမနေဘဲ သေးငယ်တဲ့ နေ့စဉ် အခိုက်အတန့်လေးတွေမှာ စိတ်ကို ငြိမ်သက်စွာထားပြီး ကျေနပ်ရောင့်ရဲခြင်း သန္တောသကို ရှာဖွေကြည့်ရအောင်နော်။
🕉️ အဲ့ဒီမှာပဲ ကိုယ့်ရဲ့ စစ်မှန်တဲ့ ငြိမ်းချမ်းမှုနဲ့ ပျော်ရွှင်မှုဟာ ပုန်းအောင်းနေတာကို တွေ့ရပါလိမ့်မယ်။

With much love ❤️
Ramona

26/11/2025

🫂 ခံစားချက်ကလေးကို Judge မလုပ်ဘဲ နားလည်နိုင်ဖို့ ✨

Inside Out ဆိုတဲ့ ကာတွန်းကားလေးကြည့်ဖူးရင် သိကြမှာပါ။ ကျွန်မတို့ တစ်ယောက်စီတိုင်းရဲ့ အတွင်းထဲမှာလေ အင်မတန်ကို နူးညံ့တဲ့ ခံစားချက်လေးတွေဟာ ကလေးလေးတွေလိုပဲ ရှင်သန်နေပါတယ်။

🤗 ပျော်ရွှင်ရင် ခုန်ပေါက်နေတဲ့ကလေး
😭 ဖိစီးမှုများလာရင် ငိုချလိုက်တတ်တဲ့ကလေး
🫥 လေးလံလွန်းတဲ့ ခံစားချက်တွေ ရှိလာရင်တော့ ထွက်ပြေးပုန်းအောင်းချင်တဲ့ ကလေး အစရှိသဖြင့်ပေါ့။

💟 ဒီလို နူးညံ့တဲ့ အတွင်းစိတ်ကလေး(Inner Child) ရဲ့ အသံကို စတင်နားထောင်တတ်ရာကနေပဲ Emotional Intelligence ဆိုတာ စတင်လာတာပါ။

💟 မကြာခဏဆိုသလို ကိုယ်ဘာခံစားနေရမှန်းတောင် သေချာမသိသေးခင်မှာ ကျွန်မတို့ဟာ ကိုယ့်ကိုယ်ကို စတင်ပြီး "Judge" လုပ်မိ အပြစ်တင်မိကြပါတယ်။
🤷🏻‍♀️ "ငါ ဘာလို့ ဒီလို ဖြစ်နေရတာလဲ?"
🤷🏻‍♀️ "ငါ ဒီလို ခံစားလို့ မဖြစ်ဘူး"
🤷🏻‍♀️ "ဒီခံစားချက်က မှားနေတယ်"
ဒီလို အပြစ်တင်လိုက်တာနဲ့ပဲ ကျွန်မတို့ရဲ့ Inner Child လေးဟာ ကြောက်လန့်ပြီး တိတ်ဆိတ်စွာပဲ ပုန်းကွယ်သွားပါတော့တယ်။

💡 ဒါပေမယ့် ကျွန်မတို့ ခဏရပ်ပြီး ဘယ်လို အပြစ်တင်မှုမှ မပါဘဲ နူးညံ့တဲ့ စိတ်ထားနဲ့ နားလည်မှုရှိရှိ နားထောင်လိုက်တဲ့အခါမှာ အဲ့ဒီ Inner Child လေးဟာ …
🙍🏻‍♀️ "ကြောက်နေတာ"
🙍🏻‍♀️ "မောပန်းနေတာ"
🙍🏻‍♀️ "ပစ်ပယ်ထားတယ်လို့ ခံစားလိုက်ရတာ"
🙍🏻‍♀️ "ချစ်ခြင်းမေတ္တာ နွေးထွေးမှုလေးတွေ လိုအပ်နေတာ" အစရှိသဖြင့် စတင်ပြီး စကားပြော ဆက်သွယ်လာပါတယ်။

👉🏻 ကျွန်မတို့ နားလည်ရမှာတစ်ခုက Emotional Intelligence ဆိုတာ ကိုယ့်ကိုယ်ကိုယ် မှန်ကန်တဲ့ခံစားချက်မျိုး ခံစားရအောင်ဆိုပြီး အတင်းအကြပ် အမိန့်ပေးတာ မဟုတ်ပါဘူး။ ကိုယ့်နှလုံးသားက ဘာတွေ ပြောပြဖို့ ကြိုးစားနေတာလဲဆိုတာ နားလည်ဖို့ လေ့လာတာ ဖြစ်ပါတယ်။ အဲ့ဒီအတွက် လုပ်နိုင်မယ့် နည်းလမ်းလေးတွေကို မျှဝေပေးချင်ပါတယ်။

💛 Self-awareness (ကိုယ်တိုင်သိရှိမှု) - ကိုယ့်အတွင်းစိတ်ကလေးရဲ့ အသံကိုသေချာဂရုတစိုက်နားထောင်ပါ။
🧡 Self-compassion (ကိုယ့်ကိုယ်ကိုယ် ကရုဏာရှိခြင်း) - "အဆင်ပြေပါတယ်၊ ဒီလို ခံစားရတာကို နားလည်ပါတယ်" လို့ ကိုယ့်ကိုယ်ကို ပြန်ပြောပါ။
💛 Non-judgment (အပြစ်မတင်ခြင်း) - ခံစားချက်တွေဟာ “မှားတယ်/ မှန်တယ်”ဆိုတာ ဆိုတာမရှိပါဘူး။ ခံစားရတဲ့အတိုင်း လက်ခံပါ။
🧡 Inner Safety (စိတ်လုံခြုံခြင်း) - ကိုယ့်ရဲ့ စိတ်ခံစားမှုတွေ မြင်သာအောင် ထွက်ပေါ်လာဖို့ စိတ်ထဲမှာ လုံခြုံတဲ့ နေရာတစ်ခု ဖန်တီးပေးပါ။

🫂 ဒါကြောင့် ခံစားချက်ကလေးကို Judge မလုပ်ဘဲ နားလည်နိုင်ဖို့ဆိုရင် ….
✨ ခံစားချက်မှန်သမျှကို အာရုံစိုက်ကြည့်ပါ။
✨ နာမည် မတပ်လိုက်ပါနဲ့။
✨ အတင်း တွန်းထုတ် မပစ်ပါနဲ့။
✨ နူးညံ့စွာ လက်ခံ ထွေးပွေ့ပေးလိုက်ပါ။

With much love ❤️
Ramona

25/11/2025

☀️ဒီမနက်ခင်းလေးမှာ ဘယ်လိုမျိုး ခံစားချက်တွေနဲ့ နိုးထခဲ့လဲရှင်?

☀️ ကျွန်မတို့တွေဟာ ရုန်းကန်ရင်း ရှင်သန်နေကြရတဲ့သူတွေမို့ ပိတ်ရက် မနက်ခင်းလေးတွေမှာတော့ သာယာအေးဆေးပြီး … ရုံးဖွင့်ရက်မနက်ခင်းတွေကတော့ မပြီးပြတ်သေးတဲ့အလုပ်တွေအကြောင်းတွေးရင်း အသစ်အသစ် လုပ်ရမယ့်အလုပ်တွေရဲ့ ဖိအားတွေကို ပူပန်ရင်းနဲ့ စတင်တတ်ကြတယ်နော်။

အဲ့ဒီ ဖိအားတွေကို ခဏလေး ဘေးချထားပြီး ကိုယ့်ရဲ့စိတ်ဝိညာဉ်လေးကို ပြန်လည်အားဖြည့်ပေးမယ့် Slow Morning လေးတစ်ခုကို ကျွန်မနဲ့ အတူတူ ဖန်တီးကြည့်ရအောင်လား? 🤩

☀️ Slow Morning ဆိုတာ အချိန်ကို နှေးကွေးအောင် လုပ်တာမျိုး မဟုတ်ပါဘူး။
ကိုယ်နဲ့ ကိုယ့်ပတ်ဝန်းကျင်ကြားမှာရှိတဲ့ ဆက်သွယ်မှုတွေ၊ ကိုယ်လုပ်နေတဲ့ လုပ်ရပ်တွေတိုင်းကို တန်ဖိုးထားပြီး သတိရှိရှိနဲ့ ခံစားကြည့်တာပါ။ မနက်ခင်းကို စိတ်ကူးနဲ့ ပန်းချီဆွဲသလို လှပစွာ ပုံဖော်ဖို့ ကျွန်မလုပ်ဖြစ်နေကျ နည်းလမ်းလေးတွေ မျှဝေပေးပါမယ်နော်။

🌻 ခန္ဓာကိုယ်ကို သတိရှိရှိ နိုးထစေခြင်း
အိပ်ရာက ချက်ချင်းထမယ့်အစား မိနစ်အနည်းငယ်လောက် အိပ်ရာထဲမှာပဲ အသက်ရှူသွင်းရှူထုတ် ဖြည်းဖြည်းလေး လုပ်ကြည့်ပါ။ အိပ်ရာပေါ်ကမဆင်းခင် ခေါင်းကနေ ခြေဖျားအထိ ကြွက်သားတွေ ပြန်လည် နိုးထလာအောင် သတိလေးနဲ့ ဆန့်ထုတ်ကြည့်ပါ။

🪟 ပြတင်းပေါက်ဖွင့်ပြီး အာရုံခံစားပါ
အိပ်ရာက ထတာနဲ့ အခန်းထဲကို သဘာဝအလင်းရောင် ဝင်လာအောင် ပြတင်းပေါက် ဒါမှမဟုတ် လိုက်ကာကို ဖွင့်လိုက်ပါ။ နေရောင်ခြည်နွေးနွေးလေး ကိုယ့်မျက်နှာပေါ် ကျရောက်လာတဲ့ ခံစားချက်ကို ငြိမ်သက်စွာ ခံစားကြည့်ပါ။ မနက်ခင်းလေကောင်းလေသန့်ကို အဆုတ်ထဲအထိ နက်နက်ရှိုင်းရှိုင်း ရှူသွင်းလိုက်ပါ။ အဲ့ဒီလေရဲ့ အေးမြလန်းဆန်းမှုကို သတိပြုပါ။

🎶 စိတ်ငြိမ်စေမယ့် အသံကို နားထောင်ခြင်း
မနက်ခင်းသတင်းတွေ၊ စိတ်လှုပ်ရှားစရာ ဆူညံတဲ့ ဂီတတွေကို ရှောင်ပါ။ တိတ်ဆိတ်ခြင်းကို ခံစားပါ ဒါမှမဟုတ် သဘာဝအသံ (ငှက်သံ၊ လေတိုက်သံ) တွေကိုပဲ စိတ်ထဲမှာ ထည့်သွင်း နားထောင်ကြည့်ပါ။ တကယ်လို့ သီချင်းဖွင့်ချင်ရင်လည်း တူရိယာသံသက်သက် (Instrumental) ဒါမှမဟုတ် Meditation Music လိုမျိုး စိတ်ကို ပေါ့ပါးစေမယ့် သံစဉ်တွေကိုပဲ ရွေးချယ် နားဆင်ပါ။

✏️ အတွေးတွေကို လွှတ်ချခြင်း
ကိုယ့်ရဲ့အတွေးတွေ၊ ဒီနေ့အတွက် ကျေးဇူးတင်ရတဲ့ အချက် ဒါမှမဟုတ် စိုးရိမ်ပူပန်မှုတွေကို စာရွက်ပေါ်မှာ ချရေးလိုက်ပါ။ ဒီလိုချရေးလိုက်ခြင်းအားဖြင့် အဲဒီအတွေးတွေဟာ ခေါင်းထဲမှာပဲ မရှိတော့ဘဲ လွတ်မြောက်သွားသလို ခံစားရစေပါတယ်။ ဘယ်အရာမှ စီစဉ်ပြီးသားဖြစ်နေဖို့ မလိုပါဘူး။ စိတ်ထဲရှိတာကို အမှားအမှန် ခွဲခြားခြင်းမရှိဘဲ ရေးချလိုက်ပါ။ ၅ မိနစ်လောက်ပဲ အချိန်ပေးရင် လုံလောက်ပါတယ်။

☕️ ပထမဆုံး အခိုက်အတန့်လေးတွေကို ရည်ရွယ်ချက်ရှိရှိ ဖန်တီးခြင်း
ရေချိုးတဲ့အခါမှာ အလျင်စလို မချိုးဘဲ အထိအတွေ့အာရုံခံစားကြည့်ပါ။ တစ်နေ့တာလုံး ကိုယ့်ရဲ့ ကိုယ်ခန္ဓာကို အကောင်းဆုံး ထောက်ပံ့ပေးနိုင်မယ့် သက်တောင့်သက်သာအဖြစ်ဆုံး အဝတ်အစားကို အသိစိတ်နဲ့ ရွေးချယ်ပါ။ ကိုယ်စားတဲ့ မနက်စာ ဒါမှမဟုတ် သောက်လိုက်တဲ့ ကော်ဖီတစ်ငုံရဲ့ အနံ့ အရသာလေးတွေကို သေချာခံစားစီးမျောကြည့်ပါ။

💖 ဒီလိုမျိုး မနက်ခင်းတိုင်းမှာ အလျင်လိုမှုတွေအစား ပစ္စုပ္ပန်တည့်တည့်မှာ တည်ရှိနေခြင်းကို ရွေးချယ်ကြည့်လိုက်ပါနော်။ ကျွန်မတို့ကို ထွေးပွေ့ပေးတဲ့၊ စိတ်ကို ငြိမ်သက်စေတဲ့၊ ကိုယ့်ဆီကို ကိုယ် ပြန်လည်ရောက်ရှိစေတဲ့ မနက်ခင်းမျိုးတွေ ဖြစ်ပါစေလို့ ဆုတောင်းပေးလိုက်ပါတယ်ရှင်။ ✨

☀️ Slow Morning လေး ဖြတ်သန်းကြည့်ပြီး ကိုယ်ရရှိတဲ့ အေးချမ်းမှုလေးတွေအကြောင်းလေးကိုလည်း ပြန်လည် ဝေမျှပေးခဲ့ပါဦးနော် ✨

With much love ❤️
Ramona

24/11/2025

Mini Stretches for Anxiety

ဒီနေ့မှာတော့ စိုးရိမ်ပူပန်မှု (Anxiety) ကို လျှော့ချနိုင်ဖို့ ဘယ်နေရာ ဘယ်အချိန်မဆို လုပ်ဆောင်နိုင်တဲ့ လွယ်ကူရိုးရှင်းပြီး စိတ်ကို တည်ငြိမ်စေမယ့် နည်းလမ်းလေးတွေကို မျှဝေပေးချင်ပါတယ်။

🔶 Shoulder Roll Release
• ရှူသွင်းပြီး ပခုံးကို အပေါ်သို့ မြှောက်ပါ။
• ရှူထုတ်ပြီး ပခုံးကို နောက်ဘက်ဆီ လှိမ့်ချပါ။
• နွေးထွေးတဲ့ နေရောင်ခြည်လိုပဲ ပုခုံးကတင်းမာမှုတွေ အရည်ပျော်ကျသွားတာကို ခံစားလိုက်ပါ။

🔶 Neck Stretch
• ဦးခေါင်းကို မတ်မတ်ထားရာကနေ နားတစ်ဖက်ကို ပခုံးဆီကို ဖြည်းဖြည်းချင်း ချပေးလိုက်ပါ။
• တဖြည်းဖြည်းချင်း အသက်ရှူပါ။
• အသက်ရှူထုတ်လိုက်တိုင်းမှာ ပုခုံးနဲ့ လည်ပင်းမှာရှိနေတဲ့ တင်းအားတွေ လျော့ပါးသွားပါစေ။

🔶 Heart-Opening Chest Stretch
• လက်ချောင်းတွေကို ကျောအနောက်မှာ ချိတ်ပြီး ရင်ဘတ်ကို ညင်သာစွာ ဆန့်ထုတ်ပြီးဖွင့်ပါ။
• ကိုယ့်ရဲ့ နှလုံးသားရှိရာ ရင်ဘတ်ကို ဖွင့်ရင်း
ကိုယ့်ကိုယ်ကို ပြန်ပြောပါ “ငါ လုံခြုံတယ် ငါ ဒီမှာရှိနေတယ်”။

🔶 Forward Fold
• တင်ပါးဆုံမှစပြီး ခါးကို ဆန့်ထုတ်ကာ ခန္ဓာကိုယ် အပေါ်ပိုင်းကို အရှေ့ကို မှောက်ချပါ။
• ပုံမှန်လေး သတိကပ်ရင်း အသက်ရှူသွင်း ရှူထုတ်ပါ။
• ကိုယ့်ကို စိုးရိမ်ပူပန်စေတဲ့ အတွေးတွေ ကြမ်းပြင်ဆီကို စီးကျသွားပါစေ။

🧡 ဒီလို Stretching လေးတွေက ရိုးရှင်းပေမယ့် စိုးရိမ်ပူပန်မှုတွေ အရမ်းများပြီး စိတ်နဲ့ကိုယ် မကပ်နိုင်တဲ့အချိန်တွေမှာ ကိုယ့်ကိုယ်ကိုယ် ပစ္စုပ္ပန်ဆီ ပြန်လာဖို့၊ မတည်မငြိမ်ဖြစ်နေတဲ့စိတ်ရဲ့အရှိန်ကို လျှော့လိုက်ဖို့နဲ့ ငြိမ်းချမ်းမှုက မဝေးဘူးဆိုတာ ကိုယ့်ရဲ့ခန္ဓာကိုယ်နဲ့ နှလုံးသားကို သတိပေးပါလိမ့်မယ်။

ဒါကြောင့် Anxiety တွေ ဝင်လာတိုင်း ~
✨ သတိရှိရှိ အသက်ရှူသွင်း ရှူထုတ်ပါ။
✨ ကိုယ့်ရဲ့ အတွေးတွေထဲက ဆူညံသံတွေကို ထုတ်ပစ်လိုက်ပါ။
✨ အရာအားလုံး အဆင်ပြေသွားမှာပါ။

With much love ❤️
Ramona

23/11/2025

💖 ကိုယ့်ကိုယ်ကိုယ် ချစ်တတ်ဖို့ အဟိံသနဲ့ လမ်းစဖော်ကြမယ် (Ahimsa: A Path to Self-Love)

ဒီတစ်ခါမှာ Yoga Philosophy ထဲက အကြောင်းအရာလေးတစ်ခုကို မျှဝေပေးချင်ပါတယ်။ အဲ့ဒါကတော့ ယောဂရဲ့ အခြေခံမူတွေထဲကတစ်ခုဖြစ်တဲ့ အဟိံသ (Ahimsa) ပဲ ဖြစ်ပါတယ်။ အဟိံသဆိုတာကို ကြားဖူးရင် “အကြမ်းမဖက်ခြင်း” လို့ပဲ အလွယ်တကူ မှတ်မိကြပါတယ်။ တခြားသူတွေကို အကြမ်းမဖက်သလို ကြင်နာမှုကိုရွေးချယ်ပြီး ဆက်ဆံသလိုမျိုး ကိုယ့်ကိုယ်ကိုယ်လည်း ဆက်ဆံဖို့ လိုအပ်တယ်ဆိုတာလေးကို ပြောပြချင်ပါတယ်။

✨ စဉ်းစားကြည့်ပါနော် ... ကျွန်မတို့ဟာ ကိုယ်အရမ်းချစ်ရတဲ့ သူငယ်ချင်းတစ်ယောက် စိတ်ဓာတ်ကျနေရင် ဒါမှမဟုတ် အမှားတစ်ခုခု လုပ်မိလို့ ကိုယ့်ဆီလာရင် ကိုယ်ဘယ်လိုပြောမှာလဲ?
🌱 "ရပါတယ် ဘယ်သူမဆို မှားတတ်တာပဲ သင်ခန်းစာယူပြီး ရှေ့ဆက်သွားရအောင်နော်" ဒီလို အားပေးတဲ့ ကြင်နာတဲ့ စကားလုံးလေးတွေနဲ့ နွေးထွေးစွာ ပွေ့ဖက်ပြီး နားလည်ပေးမှာပေါ့။
ဟုတ်တယ်နော် … ဒါပေမယ့် ကိုယ်ကိုယ်တိုင်ကျတော့ အမှားလုပ်မိရင်၊ ဒါမှမဟုတ် စိတ်ဓာတ်ကျနေရင် ဘယ်လိုလုပ်မိတတ်လဲ?
🍂 "ငါဟာ ဒီလောက်တောင် ညံ့ရတာလား", "ဒီလောက်လေးတောင် မလုပ်နိုင်ဘူးလား" စသဖြင့် ကိုယ့်ကိုယ်ကိုယ် အပြစ်တင်ပြောဆို ဒဏ်ပေးမိတတ်ကြတယ်။

👉🏻 ဒီလို ကိုယ့်ကိုယ်ကိုယ် အပြစ်တင်နေတာဟာ ကိုယ့်ရဲ့ အတွင်းစိတ်ကို အကြမ်းဖက်နေတာနဲ့ အတူတူပါပဲ။ အဟိံသ (အကြမ်းမဖက်ခြင်း) ဆိုတာ အပြင်လူကို မထိခိုက်ဖို့တင် မဟုတ်ဘဲ ကိုယ့်ရဲ့ စိတ်နဲ့ ခန္ဓာကိုပါ မေတ္တာနဲ့ ဆက်ဆံဖို့ ပထမဆုံး လိုအပ်တာပါ။

🤩 ဒါဆိုရင် ကိုယ်ချစ်တဲ့သူတွေကို ဂရုစိုက်သလို ကိုယ့်ကိုယ်ကိုယ် ဂရုစိုက်ဖို့ချစ်ခင်ဖို့အတွက် ရိုးရှင်းပြီး ထိရောက်တဲ့ ဒီအချက်လေးတွေကို စတင်ကျင့်သုံးကြည့်ဖို့ မျှဝေပေးချင်ပါတယ်

🔸 နူးညံ့တဲ့ စကားလုံးလေးတွေကို ရွေးချယ်ပြောဆိုပါ
ကိုယ့်စိတ်ထဲမှာ ကိုယ့်ကိုယ်ကိုယ် ဝေဖန်တဲ့ စကားတွေ ပေါ်လာရင် ခဏလေး ရပ်လိုက်ပါ။ ပြီးရင် ကိုယ်ချစ်ရတဲ့ သူငယ်ချင်းတစ်ယောက်ကို ပြောပေးမယ့် စကားလုံးမျိုးနဲ့ ပြန်အစားထိုးပြီး ကိုယ့်ကိုယ်ကိုယ် ပြောကြည့်ပါ။ နူးညံ့ပြီး နားလည်မှုရှိတဲ့ အတွေးတွေက ကိုယ့်စိတ်ကို အေးချမ်းစေပါတယ်။

🔸 ကိုယ့်ရဲ့ခန္ဓာကို ချစ်ခင်လေးစားပါ
ယောဂကျင့်တဲ့အခါပဲဖြစ်ဖြစ်၊ အားကစားလုပ်တဲ့အခါပဲဖြစ်ဖြစ်၊ အလုပ်တွေလုပ်တဲ့အခါပဲဖြစ်ဖြစ် နာကျင်သည်အထိ အတင်းမလုပ်ပါနဲ့။ ကိုယ်ခန္ဓာက နားဖို့ လိုအပ်နေတယ်ဆိုရင် အပြစ်မတင်ဘဲ အနားပေးပါ။ ကောင်းမွန်တဲ့ အာဟာရရှိမယ့် အစားအသောက်တွေကို ရွေးချယ်ပြီး အချိန်မှန် စားပေးပါ။ ဒါဟာလည်း ကိုယ့်ကိုယ်ကိုယ် အကြမ်းမဖက်ဘဲ ချစ်ခင်တာပါပဲ။

🔸 Boundaries သတ်မှတ်ပါ
ကိုယ့်ကို ပင်ပန်းစေမယ့်၊ စိတ်ဖိစီးစေမယ့် အရာတွေကို "No" လို့ ယဉ်ယဉ်ကျေးကျေး ငြင်းဆိုရဲတဲ့ သတ္တိကို မွေးမြူပါ။ ကိုယ့်ရဲ့ စိတ်ငြိမ်းချမ်းမှုကို ကာကွယ်ခြင်းဟာလည်း ကိုယ့်ကိုယ်ကိုယ် ချစ်ခင်ခြင်းရဲ့ အစိတ်အပိုင်းတစ်ခုပါ။

💖 ကိုယ်ချစ်တဲ့သူအပေါ် ဆက်ဆံသလို ကိုယ့်ကိုယ်ကိုယ် ပြန်ဆက်ဆံတဲ့အခါ ကိုယ့်ရင်ထဲမှာ တကယ့် ငြိမ်းချမ်းမှု စတင်ပါတယ်။ ကိုယ်စိတ်က နူးညံ့ပြီး ငြိမ်းချမ်းနေတဲ့အခါမှသာ အဲ့ဒီ မေတ္တာနဲ့ ကရုဏာတရားဟာ ပတ်ဝန်းကျင်ကို အလိုအလျောက် ပျံ့နှံ့သွားမှာပါ။ ဒါဟာ ယောဂက လမ်းညွှန်ပေးတဲ့ အဟိံသရဲ့ ငြိမ်းချမ်းတဲ့ မေတ္တာစက်ဝန်းလေးပဲ ဖြစ်ပါတယ်။

🥰 ဒီနေ့ကစပြီး ကိုယ့်ရဲ့ အကောင်းဆုံးသူငယ်ချင်းတစ်ယောက်လို ကိုယ့်ကိုယ်ကိုယ် ချစ်ခင်စွာ ဆက်ဆံကြည့်ရအောင်နော်။

With much love ❤️
Ramona

22/11/2025

စိုးရိမ်ပူပန်ခြင်း (Anxiety) ဆိုတာဘာလဲ?
စိုးရိမ်ပူပန်မှုဆိုတာ ကြောက်ရွံ့မှု၊ စိုးရိမ်မှု၊ မတည်မငြိမ်ဖြစ်မှုတို့နဲ့ ဆက်စပ်နေတဲ့ စိတ်ခံစားချက်တစ်ခုဖြစ်ပါတယ်။ စိန်ခေါ်မှုတွေ၊ အရေးကြီးတဲ့ အဖြစ်အပျက်တွေ ဥပမာ- စာမေးပွဲဖြေတာ၊ အင်တာဗျူးဖြေတာ ဒါမှမဟုတ် အပြောင်းအလဲတစ်ခုခုအတွက် ဆုံးဖြတ်ချက်ချတာတွေနဲ့ ရင်ဆိုင်ရတဲ့အခါမှာ ခံစားရလေ့ရှိပါတယ်။ တချို့အခြေအနေတွေမှာ စိုးရိမ်ပူပန်မှုက ကျွန်မတို့ကို သတိရှိစေပြီး ကိုယ်ရင်ဆိုင်ရမယ့် အခြေအနေကို ကောင်းကောင်းပြင်ဆင်နိုင်ဖို့ အထောက်အကူပြုပါတယ်။ ဒါပေမယ့် စိုးရိမ်ပူပန်တဲ့ခံစားမှုတွေက ပြင်းထန်လွန်းပြီး မကြာခဏဆိုသလို ဖြစ်ပေါ်နေမယ်ဆိုရင် Anxiety Disorder ရဲ့ လက္ခဏာဖြစ်နိုင်ပြီး နေ့စဉ်ဘဝကို ထိခိုက်စေနိုင်ပါတယ်။

🧐 စိုးရိမ်ပူပန်မှုဟာ စိတ်ထဲမှာသာမက ခန္ဓာကိုယ်မှာပါ ထင်ရှားတဲ့ လက္ခဏာတွေကို ပြသနိုင်ပါတယ်။

👉🏻 ရုပ်ပိုင်းဆိုင်ရာ လက္ခဏာတွေမှာဆိုရင် ~
🔸ရင်တုန်ခြင်း၊ နှလုံးခုန်မြန်ခြင်း
🔸 အသက်ရှူရခက်ခဲခြင်း၊ အသက်ရှူမဝခြင်း
🔸 ချွေးထွက်များခြင်း
🔸 ကြွက်သားများ တင်းမာခြင်း ကိုက်ခဲခြင်း
🔸 မူးဝေခြင်း၊ ခေါင်းမူးခြင်း
🔸 အစာခြေစနစ်ဆိုင်ရာ ပြဿနာများဖြစ်ခြင်း (ဗိုက်နာခြင်း၊ ဝမ်းလျှောခြင်း)
🔸 အိပ်မပျော်ခြင်း

👉🏻 စိတ်ပိုင်းဆိုင်ရာ လက္ခဏာတွေမှာဆိုရင် ~
🔸 မကြာခဏ စိုးရိမ်ပူပန်နေခြင်း ဒါမှမဟုတ် အတွေးတွေကို ထိန်းချုပ်ရခက်ခြင်း
🔸 အာရုံစူးစိုက်ရန် ခက်ခဲခြင်း
🔸 စိတ်တိုလွယ်ခြင်း ဒါမှမဟုတ် ဂဏာမငြိမ်ဖြစ်ခြင်း
🔸 မကောင်းတာတွေ ဖြစ်လာမယ်လို့ပဲ အမြဲတမ်း တွေးထင်နေခြင်း
🔸 အခြေအနေတွေ၊ လူတွေ၊ နေရာတွေကို ရှောင်ရှားလိုစိတ် များပြားလာခြင်း

💡စိုးရိမ်ပူပန်မှုကို လျှော့ချဖို့အတွက် နည်းလမ်းလေးတွေ ရှိပါတယ်။ အဲ့ဒါတွေကတော့ ~
🔷 အသက်ရှူလေ့ကျင့်ခန်းများပြုလုပ်ခြင်း - နက်ရှိုင်းစွာ အသက်ရှူခြင်းက ခန္ဓာကိုယ်ရဲ့ တင်းမာမှုကို လျော့ချပေးပြီး စိတ်ကို ငြိမ်သက်စေပါတယ်။
🔷 တရားထိုင်ခြင်း - ပစ္စုပ္ပန်အချိန်ကို အာရုံစိုက်ခြင်းအားဖြင့် အတိတ်က စိုးရိမ်မှုတွေ ဒါမှမဟုတ် အနာဂတ်အတွက် ပူပန်မှုတွေကို လျှော့ချပေးနိုင်ပါတယ်။
🔷 ပုံမှန် ကိုယ်လက်လှုပ်ရှားမှုပြုလုပ်ခြင်း - လေ့ကျင့်ခန်းလုပ်ခြင်းက စိတ်ခံစားမှုကို ကောင်းစေတဲ့ ဟော်မုန်း (Endorphins) တွေကို ထွက်စေပြီး စိတ်ဖိစီးမှုကို လျှော့ချပေးနိုင်ပါတယ်။
🔷 လုံလောက်စွာ အိပ်စက်ခြင်း - ကောင်းစွာ အိပ်စက်အနားယူတာက စိတ်ပိုင်းဆိုင်ရာ ခံနိုင်ရည်အားကို တိုးတက်စေပါတယ်။
🔷 ကျန်းမာရေးနဲ့ ညီညွတ်စွာ စားသောက်ခြင်း - ကဖိန်းဓာတ်၊ သကြားနဲ့ အရက်ကို လျှော့ချလိုက်ရင် စိုးရိမ်ပူပန်မှုကို ဖြစ်စေတဲ့ အာရုံကြောလှုံ့ဆော်မှုတွေကို လျှော့ချပေးနိုင်ပါတယ်။
🔷 Social Support ရှိခြင်း - ယုံကြည်ရတဲ့ သူငယ်ချင်း၊ မိသားစုနဲ့ စကားပြောဆို ဆွေးနွေးတာတွေကလည်း စိတ်ရဲ့လွတ်လပ်ပေါ့ပါးမှုကို ခံစားရစေနိုင်ပါတယ်။
🔷 Professional Help ရယူခြင်း - တကယ်လို့ စိုးရိမ်ပူပန်မှုခံစားရတာတွေက ကိုယ့်ရဲ့ နေ့စဉ်ဘဝကို သိသိသာသာ ထိခိုက်လာပြီဆိုရင် စိတ်ကျန်းမာရေး ပညာရှင် (ဥပမာ- Psychologist ဒါမှမဟုတ် Psychiatrist) နဲ့ တိုင်ပင်ဆွေးနွေးသင့်ပါတယ်။

📌 စိုးရိမ်ပူပန်မှု ခံစားရတာဟာ ပုံမှန်ဖြစ်ပြီး အကူအညီရယူဖို့ ဝန်မလေးသင့်ပါဘူး။ ကိုယ့်ကိုယ်ကိုယ် ဂရုစိုက်ပြီး သင့်လျော်တဲ့ နည်းလမ်းတွေနဲ့ ထိန်းချုပ်ရင်း အေးချမ်းတဲ့ ဘဝကို ရရှိနိုင်ပါတယ်နော်။

🌱 စိုးရိမ်ပူပန်မှု လျှော့ချဖို့အတွက် အထောက်အကူဖြစ်စေမယ့် Stretching နည်းလမ်းလေးတွေကိုလည်း နောက်ပို့စ်လေးမှာ မျှဝေပေးသွားပါမယ်နော်။

With much love ❤️
Ramona

20/11/2025

Emotional Intelligence: The Foundation of EQ

စိတ်ခံစားမှုဆိုင်ရာ ဉာဏ်ရည် (EI) ဆိုတာ "ခံစားတတ်တဲ့သူ" ဒါမှမဟုတ် "နူးညံ့သိမ်မွေ့တဲ့သူ" ဖြစ်ရုံသက်သက်တော့ မဟုတ်ပါဘူးနော်။ ဒါဟာ ကိုယ့်ကိုယ်ကိုယ် နားလည်ပုံ၊ တခြားသူတွေနဲ့ ချိတ်ဆက်ပုံ၊ ပြီးတော့ စိတ်လိုက်မာန်ပါ မဟုတ်ဘဲ ရှင်းလင်းပြတ်သားတဲ့ အတွေးနဲ့ ဆုံးဖြတ်ချက်တွေ ချမှတ်တဲ့နေရာမှာ အခြေခံကျတဲ့ စွမ်းရည်တစ်ခု ဖြစ်ပါတယ်။ EI ဟာ EQ ရဲ့ အခြေခံအုတ်မြစ် ဖြစ်ပါတယ်။ ကျွန်မတို့ရဲ့ ဆက်သွယ်ပြောဆိုပုံ၊ ဖိအားတွေကို ကိုင်တွယ်ပုံ၊ ဆက်ဆံရေးတွေနဲ့ အလုပ်လုပ်ရာမှာ ကိုယ့်ရဲ့ပုံရိပ်ကို ပုံဖော်နိုင်ပေးတဲ့ အရေးကြီးတဲ့ စွမ်းရည်တစ်ခုပေါ့။

🏛️ ဒီ EI - EQ နယ်ပယ်ရဲ့ ရှေ့ဆောင်လမ်းပြတစ်ဦးဖြစ်တဲ့ Daniel Goleman က EQ ကို အဆင့်ဆင့် တည်ဆောက်ထားတဲ့ အဓိက အပိုင်း (၄) ပိုင်း ခွဲခြားပြထားပါတယ်။

1️⃣ ကိုယ့်ကိုယ်ကိုယ် သိရှိနားလည်မှု (Self-Awareness)
ကိုယ့်ကိုယ်ကိုယ် သိရှိနားလည်ဖို့ဟာ အခြေခံအကျဆုံး အစိတ်အပိုင်းပါပဲ။ ကိုယ့်ရဲ့ စိတ်ခံစားမှုတွေ၊ စိတ်အခြေအနေတွေ၊ တွန်းအားတွေနဲ့ ဒီအရာတွေက တခြားသူတွေကို ဘယ်လို သက်ရောက်မှုရှိလဲ ဆိုတာကို သိပြီး နားလည်နိုင်တဲ့ စွမ်းရည်ဖြစ်ပါတယ်။ ကိုယ့်ကိုယ်ကိုယ် ကောင်းမွန်စွာ သိရှိသူတွေမှာ ပါဝင်တဲ့ အချက်တွေကတော့ -
▪️ စိတ်ခံစားမှုအသိ - ဘာလို့ ဒီလို ခံစားနေရတာလဲဆိုတာ သိတာ
▪️ တိကျတဲ့ ကိုယ့်ကိုယ်ကိုယ် အကဲဖြတ်မှု - ကိုယ့်ရဲ့ အားသာချက်နဲ့ အားနည်းချက်တွေကို လက်ခံသိရှိတာ
▪️ မိမိကိုယ်ကို ယုံကြည်မှု - ကိုယ့်တန်ဖိုးနဲ့ စွမ်းဆောင်ရည်အပေါ် ယုံကြည်ချက် ခိုင်မာတာ တို့ဖြစ်ပါတယ်။

2️⃣ ကိုယ့်ကိုယ်ကိုယ် ထိန်းချုပ်နိုင်မှု (Self-Management)
ကိုယ့်ခံစားချက်ကို သိပြီဆိုရင် နောက်တစ်ဆင့်က ထိန်းချုပ်ဖို့ပါပဲ။ ဒီအပိုင်းက ဖျက်ဆီးတတ်တဲ့ စိတ်ခံစားမှုတွေနဲ့ တွန်းအားတွေကို ထိန်းချုပ်တာ ဒါမှမဟုတ် လမ်းကြောင်းပြောင်းတာအပြင် ပြောင်းလဲနေတဲ့ အခြေအနေတွေကို လိုက်လျောညီထွေဖြစ်အောင် နေထိုင်နိုင်တဲ့ အရည်အချင်းဖြစ်ပါတယ်။ အဓိက အရည်အသွေးတွေကတော့ -
▪️ ယုံကြည်ရမှု နဲ့ တာဝန်သိစိတ် - ရိုးသားမှုရှိပြီး တာဝန်ယူမှု တာဝန်ခံမှုရှိတာ
▪️ လိုက်လျောညီထွေရှိမှု - အပြောင်းအလဲတွေကို ပြောင်းလွယ်ပြင်လွယ် တုံ့ပြန်နိုင်တာ
▪️ ဦးဆောင်မှုယူတတ်ခြင်း - အခွင့်အလမ်းတွေပေါ်မှာ လုပ်ဆောင်ဖို့ အသင့်ရှိတာ
▪️ အကောင်းမြင်စိတ် - ဖြစ်ရပ်တွေရဲ့ နောက်ကွယ်က အကျိုးအကြောင်းကို မြင်တတ်ပြီး သင်ခန်းစာယူတတ်တာ အကောင်းဖက်ကို ဆွဲလှည့်တွေးနိုင်တာတွေ ဖြစ်ပါတယ်။

3️⃣ လူမှုရေးအသိ (Social Awareness)
ဒီအပိုင်းမှာတော့ အာရုံစိုက်မှုက ကိုယ့်ဆီကနေ အပြင်ဘက်ကို ရောက်သွားပါပြီ။ ဒါဟာ တခြားသူတွေရဲ့ စိတ်ခံစားမှုတွေ၊ လိုအပ်ချက်တွေနဲ့ စိုးရိမ်ပူပန်မှုတွေကို နားလည်နိုင်တဲ့ အရည်အချင်းဖြစ်ပြီး၊ သူတို့ရဲ့ စိတ်ခံစားမှုဆိုင်ရာ အချက်ပြမှုတွေကို ဖမ်းယူနိုင်ပြီး နားလည်နိုင်တဲ့ စွမ်းရည်ဖြစ်ပါတယ်။ ဒီအထဲမှာ ပါဝင်တာတွေကတော့ -
▪️ စာနာစိတ် (Empathy) - တခြားသူတွေရဲ့ ခံစားချက်နဲ့ ရှုထောင့်ကို ခံစားပေးပြီး သူတို့ရဲ့ စိုးရိမ်မှုတွေကို စိတ်ပါဝင်စားစွာ နားထောင်ပေးတာ
▪️ အကဲခတ်မှု - အဖွဲ့အစည်း/ လုပ်ငန်းခွင်ရဲ့ အခြေအနေ၊ အာဏာဆက်ဆံရေးတွေကို နားလည်တာ
▪️ ဝန်ဆောင်မှုစိတ်ဓာတ် - တစ်ဖက်လူရဲ့ လိုအပ်ချက်တွေကို နားလည်သိရှိပြီး ဖြည့်ဆည်းပေးတာ တို့ ဖြစ်ပါတယ်။

4️⃣ ဆက်ဆံရေး စီမံခန့်ခွဲမှု (Relationship Management)
နောက်ဆုံးနဲ့ အထင်ရှားဆုံးအပိုင်းကတော့ ရှေ့က အပိုင်းသုံးပိုင်းကနေ ရရှိတဲ့ အသိပညာတွေကို ထိရောက်တဲ့ အပြန်အလှန် ဆက်ဆံရေးမှာ အသုံးပြုတာပါပဲ။ ပဋိပက္ခတွေကို စီမံခန့်ခွဲရင်းနဲ့ တခြားသူတွေကို လွှမ်းမိုးဖို့၊ လှုံ့ဆော်ဖို့နဲ့ ဖွံ့ဖြိုးတိုးတက်အောင် ကူညီပေးနိုင်တဲ့ စွမ်းရည်ပဲ ဖြစ်ပါတယ်။ ခေါင်းဆောင်မှုနဲ့ အဖွဲ့လိုက်လုပ်ဆောင်မှုတွေအတွက် ဒီအရည်အချင်းက အရမ်းအရေးကြီးပါတယ်။ အဲ့ဒါတွေကတော့ -
▪️ လွှမ်းမိုးနိုင်စွမ်း - ထိရောက်တဲ့ စည်းရုံးရေးနည်းလမ်းတွေကို အသုံးပြုတာ
▪️ ပဋိပက္ခ စီမံခန့်ခွဲမှု - သဘောထားကွဲလွဲမှုတွေကို ညှိနှိုင်းဖြေရှင်းတာ
▪️ ခေါင်းဆောင်မှု - အဖွဲ့အစည်းနဲ့ လူတွေကို စိတ်ဓာတ်တက်ကြွစေပြီး လမ်းညွှန်ပေးတာ
▪️ အဖွဲ့လိုက် လုပ်ဆောင်ခြင်းနှင့် ပူးပေါင်းဆောင်ရွက်ခြင်း - အဖွဲ့လိုက် ပန်းတိုင်တွေအတွက် ပူးပေါင်းဆောင်ရွက်ပြီး အကျိုးဖြစ်ထွန်းစေတာတွေ ဖြစ်ပါတယ်။

🌱 EQ ဟာ IQ ထက် အလုပ်စွမ်းဆောင်ရည်နဲ့ ခေါင်းဆောင်မှု စွမ်းရည်ကို ပိုပြီး ခန့်မှန်းနိုင်တယ်လို့ သုတေသနတွေက ဆိုကြပါတယ်။ EQ မြင့်မားသူတွေဟာ အဖွဲ့လိုက် လုပ်ဆောင်ရာမှာ၊ တခြားသူတွေကို လှုံ့ဆော်ရာမှာနဲ့ အလုပ်ခွင်ဖိအားတွေကို ကိုင်တွယ်ဖြေရှင်းရာမှာ ပိုကောင်းပါတယ်။ EQ မြင့်မားတဲ့သူတွေက ကိုယ်တွင်းက စိတ်ခံစားမှု အခြေအနေတွေကို နားလည်ပြီး ထိန်းချုပ်ခြင်းအားဖြင့် စိတ်ဖိစီးမှု၊ စိုးရိမ်ပူပန်မှုနဲ့ ဖိအားတွေကို ပိုမိုကောင်းမွန်စွာ ရင်ဆိုင်နိုင်ပြီး စိတ်ပိုင်းဆိုင်ရာ ခံနိုင်ရည်အားနဲ့ ဘဝကျေနပ်မှု ပိုရရှိကြလေ့ရှိပါတယ်။
ဆိုတော့... ပြောရရင် စိတ်ခံစားမှုဆိုင်ရာ ဉာဏ်ရည်ဟာ ကျွန်မတို့ရဲ့ နေ့စဉ်ဘဝမှာ လည်ပတ်နေတဲ့ စနစ် (Operating System) တစ်ခုလိုပါပဲ။ ဒါပေမယ့် တစ်ခုသိရမှာက EI / EQ ဆိုတာ မွေးရာပါ အရည်အချင်းမဟုတ်ဘဲ လေ့လာသင်ယူနိုင်တဲ့ စွမ်းရည်တွေဖြစ်ပြီးတိုးတက်အောင် လုပ်ဆောင်လိုက်တဲ့အခါ
လူတစ်ယောက်ရဲ့ လူမှု စီးပွါး ပညာရေး စတဲ့ ကဏ္ဍတိုင်းမှာ ပိုမိုကြီးမားတဲ့ အခွင့်အရေးတံခါးတွေကို ဖွင့်ပေးနိုင်မှာပါ 🤩

နောက်ထပ်လည်း EI - EQ အကြောင်း ဗဟုသုတရစရာတွေ ဆက်လက်မျှဝေပေးသွားဦးမှာဖြစ်လို့ စောင့်မျှော်ပေးကြပါဦးနော် 🤩

With much love ❤️
Ramona

13/11/2025

ယောဂလေ့ကျင့်မှုတွေထဲက သင်ယူခဲ့ရတဲ့ အရာလေးတစ်ခု - ကိုယ်ခံစားရတာတွေကို စီးမျောခွင့်ပြုလိုက်ပါ

🪶 တစ်ခါတလေမှာ ကျွန်မတို့လုပ်နိုင်တဲ့ တစ်ခုတည်းသောအရာက ဖြစ်ပျက်သမျှအရာအားလုံးကို လိုက်ပြီး ထိန်းချုပ်ထားဖို့ ကြိုးစားနေတာကို ရပ်လိုက်ပြီး ကိုယ့်ကိုယ်ကိုယ် ခံစားခွင့်ပေးလိုက်ဖို့ပါပဲ။

🧘🏻‍♀️ ဖျာပေါ်မှာ ယောဂလေ့ကျင့်စဉ်မှာ မသက်မသာဖြစ်မှုကို အသက်ရှူရင်း ကျော်ဖြတ်ဖို့၊ တင်းမာနေတဲ့နေရာတွေကို လျှော့ချဖို့နဲ့ ခန္ဓာကိုယ် တုန်ယင်နေချိန်မှာတောင် ပစ္စုပ္ပန်မှာ တည်ရှိနေဖို့ ကျွန်မတို့ သင်ယူရပါတယ်။ ဖျာပေါ်ကနေ ဆင်းသွားတဲ့အခါ ဘဝကလည်း ကျွန်မတို့ကို ဒီလိုလုပ်ဖို့ တောင်းဆိုပါတယ်။ ကျွန်မတို့ရဲ့ ပျော်ရွှင်မှု၊ ဝမ်းနည်းမှု၊ ရှုပ်ထွေးမှု၊ ငြိမ်းချမ်းမှု ဘယ်အရာမဆို ခံစားမှုတိုင်းကို ကိုယ့်အတွင်းမှာ ပိတ်မိမနေစေဘဲ ကိုယ့်ကိုဖြတ်သန်း စီးမျောခွင့်ပေးလိုက်ဖို့ကို နားလည်လက်ခံလာရပါတယ်။

🧘🏻‍♀️ ယောဂက စိတ်ခံစားမှုတွေဟာ ရွေ့လျားနေတဲ့ စွမ်းအင် ဖြစ်တယ်ဆိုတာကို အမြဲ သတိပေးပါတယ်။ ကျွန်မတို့ ခုခံလေ ပိုပြီး နာကျင်ရလေပါပဲ။ ဒါပေမယ့် ကိုယ့်နှလုံးသားကို ဖွင့်ဖို့အတွက် ကိုယ့်ရဲ့အသက်ရှူတာလေးကို လမ်းညွှန်ခွင့်ပေးလိုက်တဲ့အခါမှာ ကျွန်မတို့ စတင်ပြီးတော့ လွှတ်ချတတ်လာပါတယ်။ ညင်သာစွာ တဖြည်းဖြည်းချင်းလွှတ်ချရင်း နောက်ဆုံးမှာတော့ အပြည့်အဝပေါ့။

🍃 ဒါကြောင့် အရာအားလုံးကို လိုက်ထိန်းချုပ်ဖို့ကြိုးစားမယ့်အစား လက်ရှိမှာ ကိုယ်ခံစားရတာတွေကို ခံစားမှုအတိုင်း စီးမျောခွင့်ပေးလိုက်ပါ။ လှုပ်ရှားပါ၊ အသက်ရှူပါ၊ ငိုပါ၊ ရယ်ပါ … ကိုယ့်ရဲ့ခန္ဓာကိုယ်က လိုအပ်နေတာ တောင်းဆိုနေတာတွေကို လုပ်ပေးပါ။ အသက်ရှူရင်း ကိုယ့်ခံစားချက်တွေအတိုင်း စီးမျောရင်း လေးလံစေတဲ့အရာတွေကို လွှတ်ချရင်း ကိုယ့်ကိုယ်ကိုယ်ဆီ ပြန်လည်ရောက်ရှိပါစေ။

With much love ❤️
Ramona

Ramona’s Channel

04/12/2025

03/12/2025

30/11/2025

29/11/2025

27/11/2025

26/11/2025

25/11/2025

24/11/2025

23/11/2025

22/11/2025

20/11/2025

13/11/2025

Address

Opening Hours

Website

Alerts

Contact The Practice

Shortcuts

Share

Category