19/12/2025
ဆီးချိုရောဂါစဖြစ်ပြီဆိုလျှင်
- စိတ်ဓာတ်ကျဖို့မလိုသလို အရမ်းလည်းကြောက်ဖို့လည်းမလိုအပ်ပါဘူး
- ဒါပေမယ့် အရင်လို မဆင်မခြင် နေလို့တော့ မရပါဘူး
ဆီးချိုဖြစ်ရင် ဘာမှ မစားရတော့ပဲ နေရတာမဟုတ်ပါဘူး
- အပိုဆောင်း သကြား ၊ အချိုရည် ၊ ကိန်မုန့်အချို စတာတွေပဲ သေချာ ဆင်ခြင်ရတာပါ
- စားနေကြ ထမင်းက စားလို့ရပါတယ် (ပမာဏ လျှော့စားရတာပါ)
- အသားစားလို့ရပါတယ်
- အသီးအနှံလည်း စားလို့ရပါတယ်၊ ဟင်းသီးဟင်းရွက်များများစားရပါတယ်
- ရေ ပုံမှန်သောက်ဖို့ လိုအပ်ပါတယ် (ရေသောက်များလို့ ဆီးသွားများတာမဟုတ်ပဲ ဆီးချိုထိန်းနိုင်ရင် ဆီးပုံမှန် ပမာဏ သွားပါလိမ့်မယ်)
- အရက် ဆေးလိပ်ကတော့ ဖြတ်ရပါမယ်
- ထိုင်ချည်းနေတာ မလုပ်သင့်ပဲ ၊ လှုပ်လှုပ်ရှားရှားနေပါ - လမ်းလျှောက်ပါ
ကျန်းမာရေးဗဟုသုတ တိုးပြီး
သက်ရှည်ကျန်းမာ စိတ်ချမ်းသာကြပါစေ
Dr. ဘုန်းစည်သူလွင်
#ဆီးချိုဖြစ်တာစသိတော့အချိုတွေဖြတ်ဆီးချိုဆန်တွေစား_ချိုတာဆိုဘာမှမစားတာ
#ဒီလိုနဲ့ကြာလာတော့လည်းမထူးပါဘူး_ဆေးသောက်နေတာပဲ
#သေကာမှသေရောပြန်စားတော့မယ်
ကျွန်တော်တို့ တတွေအများစုက ရောဂါတစ်ခုစဖြစ်ပြီ ဆိုလျှင် အလွန်တရာကိုစိုးရိမ်ကြောက်ရွံ့ပြီး ရောဂါရှိသူတွေဆီမှာ အကြီးအကျယ် လိုက်စုံစမ်း စာတွေလျှောက်ဖတ်နဲ့ အစပိုင်းမှာ ဝုန်းဒိုင်းကြဲတတ်ကြပါတယ်
အဲ့လိုနဲ့ ၄-၅-၆ လ လောက်လည်း ကြာရော တဖြည်းဖြည်း နဲ့ ဟိုဟာလေး နည်းနည်း ဒီဟာလေး နည်းနည်း တိုးတိုးလုပ်ရာကနေ ယခင်လို နေချင်သလိုနေတဲ့ပုံစံ ပြန်ဖြစ်သွားတတ်ကြပါတယ်
ဆီးချိုရောဂါ စသိတာနဲ့
👉 အစားလုံးဝ ဖြတ်ပစ်ကြပါတယ်
👉 ညနေစာ မစားကြတော့ပါဘူး
👉 ဆီးချိုဆန်ဆိုတာတွေ ချက်စားကြပါတယ်
👉 ဟင်းကိုလည်း အဖြူထည်ပဲ စားပါတော့တယ် (တချို့ဆို ရေလုံပြုတ်ကို ဆားတောင် မထည့်ပဲ စားကြတာပါ)
👉 ချိုတာဆိုလို့ အချိုရည် မုန့်အချိုမပြောနဲ့ အသီးတောင်မစားတော့ပါဘူး
👉 မနက်အစောကြီးတွေထပြီး လမ်းထလျှောက်ကြပါတယ်
ဆီးချိုရောဂါက ဆေးလည်း စသောက်နေတာမို့ အနေအထိုင်ရုတ်တရက်ပြင်လိုက်တာနဲ့ ဆီးချိုထိန်းသိမ်းမှု အရမ်းကောင်းသွားပါတယ်
ဒါပေမယ့် ၃-၄ လ ကြာတဲ့အခါ (တချို့ဆို အဲ့လောက်တောင် မခံတတ်ပါဘူး)
အလှူရောက်လို့ ငြင်းမရလို့ အချိုပွဲထဲက ရွှေကြည်လေး ၊ ကျောက်ကျောလေးစားလိုက်မိတယ် ဆီးချိုလေးကတော့ ၂၀၀ ကျော်သွားတယ် ဒါပေမယ့် ဆေးသောက်လိုက်တာပဲ ပြန်ကျမှာပါ ဆိုတာကနေ တဖြည်းဖြည်း ပြန်စားလာကြတာ (ဆီးချိုထိန်းသိမ်းမှုညံ့တော့) ဆီးချိုဆေးတွေ တိုးရင်း တိုးရင်း နဲ့ ဆေး ၅ မျိုးလောက် သောက်ကြရပါရော
ဆီးချိုဖြစ်ရင် အစားရှောင်ရတယ် ဆိုပြီး စိတ်ညစ်ကြသလို
😰 ကြာလာရင် Insulin ထိုးရတယ်
😰 ကျောက်ကပ်ပျက်တယ် ဆိုပြီး ကြောက်ကြပေမယ့် လနဲ့နှစ်နဲ့ချီပြီး အခြေအနေက ဆိုးမလာတော့ မကြောက်ကြတော့ပဲ စားလည်းဖြစ်တာမှ မဟုတ်တာဆိုပြီး ပြန်စားကြတဲ့သူတွေရှိသလို
😰 စသိထဲကိုက သေကာမှ သေရော စားမယ် ဆိုတဲ့ အုပ်စုကလည်း ရှိပါတယ်
__________
✳️ ဆီးချိုရောဂါမှာ ကျောက်ကပ်ပျက်တယ် ဆိုတာ ဝုန်းခနဲ ကျောက်ကပ်တမ်းဆေးရတာမျိုးမဟုတ်ပါဘူး တဖြည်းဖြည်း နဲ့ ပျက်ပျက်လာတာ ပါ - ဆီးချိုထိန်းသိမ်းမှုမကောင်းလေ မြန်မြန်ပျက်လေပေါ့
ဆီးချိုမှာ ကျောက်ကပ်ပျက်တာပဲ လူသိများကြပေမယ့်
✳️ ဆီးချို သေချာမထိန်းရင်
- နှလုံးသွေးကြောပိတ်တာ
- လေဖြတ်တာ
- ခြေလက်တွေအနာဖြစ်ပြီး ဖြတ်တောက်ရတာ
- မျက်စိကွယ်တာ စသဖြင့် ကြောက်စရာတွေ အများကြီး ဖြစ်တတ်ပါတယ်
_________
ဆိုတော့ကာ
ကျန်းမာရေးနဲ့ညီညွတ်အောင်_ရေရှည်လည်း_အဆင်ပြေရအောင်_ဘယ်လိုလုပ်ကြမလဲ ⁉️
1. ခန္ဓာကိုယ် ပျက်စီးမှုမဖြစ်ရအောင် Glucose ဖြစ်စေတဲ့ အစာတွေလျှော့စားတာတွေပါ။
2. နည်းနည်းပဲ ထွက်တဲ့ Insulin ရဲ့ စကားကို နားမထောင်တာကို နားထောင်အောင်လုပ်တာ (Insulin resistance ဖြစ်နေတာကို)
___________
သွေးထဲမှာ Glucose က မရှိတာမဟုတ်ဘူး ၊ #မသုံးနိုင်တာပါ။
အဲ့ဒါကို ဆာလို့ ဆိုပြီး ထပ်ခါ ထပ်ခါ စားနေခြင်းဟာ သွေးတွင်း Glucose တရားလွန်တက်ပြီး ဆီးချိုဆိပ်တက်ပြီး အသက်အန္တရာယ်ကြီးပါတယ် (သေတတ်ပါတယ်)
#ဆီးချိုဆန်စားရမလား ⁉️
👉 ကဆီဓာတ်နည်းတဲ့ အရသာမရှိတဲ့ ရေရှည်လည်းစားနိုင်မှာ မဟုတ်တဲ့ ဆီးချိုဆန် ကို စားဖို့ ကျွန်တော်ဆို #အားမပေးပါဘူး။
✔️ #စားနေကြ_ဆန်ပဲ စားပါ။ #ပမာဏ_လျှော့စားပါ
လျှော့စားရင် ဗိုက်ပိုဆာ မှာပေါ့
ဟုတ်ပါတယ် *ဗိုက်မဆာရအောင် ဗိုက်လည်းပြည့်ပြီး ခန္ဓာကိုယ်တစ်ခုလုံးရဲ့ ကျန်းမာရေးသာမက အူမကြီးရဲ့ ကျန်းမာရေးပါကောင်းစေတဲ့ (Vitamins တွေအစုံပါဝင်တဲ့) ဟင်းသီးဟင်းရွက်တွေ ကြိုက်သလောက် တဝ စားပါ။
✔️ အသား ကြိုက်နှစ်သက်ရာစားပါ (အဆီနည်းတဲ့အသားစားပါ)
ဝက်သားကအဆီများလွန်းတော့ ရှောင်သင့်ပါတယ်။
- အမဲသား၊ ဆိတ်သား၊ ကြက်သား စားလို့ရပါတယ် (အသားစားလို့ ဆီးချို အရမ်းမတက်ပါဘူး)
- ငါးကတော့ စားဖို့ အသင့်တော်ဆုံးပါ (ဆီးချိုရောဂါရှင်တွေက သွေးတွင်းအဆီတက်တဲ့အတွက် Omega-3 ပါဝင်တဲ့ ငါးစားခြင်းက သွေးတွင်းအဆီ ကျစေပါတယ်)
✔️ အဆီကတော့ လျှော့စားရပါမယ်။ (ဆီးချိုသမားတွေ Keto Diet စားခြင်းဟာ Diabetes Ketoacidosis ဆိုတဲ့ ဆီးချိုဆိပ်တက်တာဖြစ်စေပြီး သေတတ်ပါတယ်)
- Low fat diary product (အဆီလျှော့/ထုတ်ထားတဲ့ နို့/နို့ထွက်ပစ္စည်း စားလို့ရပါတယ်)
- ဟင်းချက်ရာမှာ အသုံးသင့်ဆုံးဆီက ပဲဆီ ပဲဖြစ်ပါတယ်
✔️ အပေါ်မှာတော့ ပြောပြီးသားပါ၊
Vitamins တွေအစုံပါဝင်တဲ့ ဟင်းသီးဟင်းရွက်တွေ ကြိုက်သလောက် တဝ စားပါ။
ကြော်စားရင် ဆီ ပါတော့ ၊ ကြော်စားတာထက်စာရင်
ဟင်းချိုလုပ် သောက်သောက်၊ ပြုတ်စားစား၊ ရေစင်အောင်ဆေးပြီး အစိမ်းပဲ စားစား ကြိုက်သလောက်စားပါ။
အရွက်စားရင် ဝမ်းမချုပ်တဲ့အတွက် အူမကြီးကင်ဆာအပါအဝင် အူမကြီးရောဂါတွေကို ကာကွယ်ပေးပါတယ်။
✔️ ပဲအမျိုးမျိုး စားလို့ရပါတယ် (အသားဓာတ်ရတာပေါ့)
✔️ အသီးအမျိုးမျိုး စားလို့ရပါတယ် (ချိုတဲ့ အသီးတွေကတော့ တဝ မစားပါနဲ့ ၊ အနည်းငယ်စားရင်ရပါတယ်)
❌ သွေးတွင်း Glucose တွေ ရုတ်တရက်မြင့်တက်စေတဲ့
- အချိုရည်၊ Energy drink၊ Bubble Tea၊ Coffee စတာတွေရှောင်ရပါမယ်
- Cake မုန့် အချိုတွေရှောင်ရပါမယ်
- အာလူးကြော်၊ ဘာဂါ၊ စတာတွေလည်းရှောင်ရပါမယ်
- ဆေးလိပ် လုံးဝ ဖြတ်ရပါမယ် (ဆီးချိုဝေဒနာရှင်ဟာ သွေးတိုး၊ နှလုံးရောဂါ အဖြစ်လွယ်လို့ သူများသောက်တာတောင် အနံ့ခံလို့မရပါဘူး)
- အရက်မသောက်ရပါဘူး
✴️ ကြိုက်တဲ့ အစားတွေ တရားလွန်စားတာ မလုပ်ရပါဘူး
✳️ စားချိန်သောက်ချိန်မှန်ရပါမယ်
✴️ ဆီးချို တက်နေလို့ဆိုပြီး ဒီတစ်နပ် မစားတော့ဘူး ဆိုတာ မလုပ်ရပါဘူး (ဆေးသောက်နေတဲ့ လူနာတွေမှာ ပိုပြီး အရေးကြီးပါတယ်)
___________
2. နည်းနည်းပဲ ထွက်တဲ့ Insulin ရဲ့ စကားကို နားမထောင်တာကို နားထောင်အောင်လုပ်တာ
ခန္ဓာကိုယ်လှုပ်ရှားမှု နည်းတဲ့အတွက် Cells တွေက Insulin resistance ဖြစ်နေတတ်ပါတယ်။
ကိုယ်လက်လှုပ်ရှားမှု လေ့ကျင့်ခန်းပြုလုပ်ခြင်းဟာ နည်းနည်းပဲ ထွက်တဲ့ Insulin ကို ခန္ဓာကိုယ်က အသုံးပြုနိုင်တဲ့အတွက်
အပြင်းအထန်မဟုတ်တဲ့ #လေ့ကျင့်ခန်းလုပ်ပါ။
" #လမ်းလျှောက်ပါ "
- တစ်နေ့ နာရီဝက်လောက်တော့ လျှောက်သင့်ပါတယ်
- ခြေတစ်လှမ်းကဋေတစ်သန်း နှုန်းနဲ့တော့ မလုပ်ပါနဲ့ သွက်သွက်လျှောက်ပါ (လမ်းစလျှောက်ပြီး ၁၀ မိနစ်လောက်ဆို ချွေးထွက်လာမှ အဆင်ပြေပါတယ်)
- လမ်းလျှောက်ပြီး မောလို့ဆိုပြီး အချိုရည် (လုံးဝ) လုံးဝ မသောက်ရပါဘူး
- ရေသောက်ပါ (ကြိုက်သလောက်သောက်ပါ)
"အန်တီက ဒူးနာလို့ လေ့ကျင့်ခန်း မလုပ်နိုင်ပါဘူးသားရယ်"
အန်တီ ဝ ဝ ချစ်စရာကြီးတွေ အကြောင်းပြနေကြ စကားပါ
ဒူးနာတာက ဝ လို့ပါ ၊ ဝ တာက မလှုပ်ရှားပဲ အစားချည်းစားနေလို့ပါ။
အဲ့ဒါကို ဒူးနာလို့ မလှုပ်ရှားရင် ပို ဝပြီး ပိုနာပါမယ်။
လမ်းမလျှောက်နိုင်ရင် လုပ်လို့ရတဲ့ နေရာလှုပ်ပါ။ လက်လှုပ်လို့ရတဲ့ လေ့ကျင့်ခန်းတွေ You Tube မှာရှာကြည့်ပြီး လိုက်လုပ်လို့ရပါတယ်။
ကျန်းမာရေးပညာပေးဆောင်းပါးတွေက ပြည်စုံအောင်ရေးရတဲ့အတွက် ရှည်ပါတယ် (ဖတ်ရတာကြာပါတယ်) အချိန်ပေးရသလောက်အကျိုးရှိကြပါစေ
(Photo credit; PharmacyLibrary)
ကျန်းမာရေးဗဟုသုတတိုးပြီး
သက်ရှည်ကျန်းမာ စိတ်ချမ်းသာကြပါစေ
ဆေးကုသခြင်း ကျန်းမာရေးစစ်ဆေးခြင်း စတဲ့ ကျန်းမာရေးစောင့်ရှောက်ခြင်းတွေအတွက် သွားလာရလွယ်ကူတဲ့ မြို့လယ်ခေါင်မှာရှိတဲ့ စျေးနှုန်းသင့်တင့်တဲ့ မေခလာအထူးကုဆေးခန်းမှာ အထွေထွေရောဂါအထူးကုဆရာဝန်ကြီးများနှင့် ပြသလို့ရပါတယ်
#မေခလာအထူးကုဆေးခန်း
ကြိုတင်ရက်ချိန်းယူရန်နှင့် စုံစမ်းရန် ➡️
☎️ 018375222, 018387721, 09886600300
📮 အမှတ် ၃၂၇၊ရွှေဘုံသာလမ်း(အပေါ်ဘလောက်)၊ပန်းပဲတန်းမြို့နယ်၊ရန်ကုန်မြို့။
