26/10/2022
ကလေးထိန်းကြစို့
ကမ္ဘာမှာ အခက်ဆုံးတခုကတော့ ကလေးထိန်းတာပဲ။ ကလေးတွေဟာ တယောက်နဲ့တယောက် နည်းနည်းမှကို မတူဘူး။ ပုံသေနည်းတွေနဲ့ ထိန်းလို့ ဘယ်လိုမှကိုမရ။
ကလေးလေးက ချစ်ဖို့ကောင်းလိုက်တာလို့ ဘေးလူတွေက ပြောကြပါတယ်။ မိဘလုပ်တဲ့သူကတော့ အသက်ထက်ကို ပိုချစ်တယ်မဟုတ်လား။ ချစ်ဖို့ကောင်းတာရဲ့ တဘက်မှာ ဂျီကျတာ၊ ပြောဆိုဆုံးမလို့မရတာ၊ ညှိနှိုင်းရခက်လှတာ၊ အချိန်ဆုံးပူဆာနေတာ၊ ငိုလို့ မဆုံးနိုင်တာ စသည်ဖြင့် စိတ်ညစ်ဖို့ကောင်းတာတွေ တပုံတပင်ရှိနေတာပါ။ စိတ်တို၊ စိတ်ဆိုး၊ ဆူပူ၊ နာကျင်အောင် တုန့်ပြန်ပြုမူမိရင်လည်း၊ ကလေးရော မိဘပါ စိတ်ဆင်းရဲရတာ မဟုတ်လား။
ကလေးထိန်းနည်းနာလေးတွေ ကြည့်ရတာ ပြုံးချင်စရာပါ။ စမ်းကြည့်ရင်လည်း မဆိုးဘူးထင်တာပဲ။
၁။ ကလေးက အိပ်ရာထ နောက်ကျတယ်။ ပေကပ်အိပ်နေတယ်။ မသိချင်ယောင်ဆောင်၊မနှိုးပဲ၊ လွှတ်ထားလိုက်ပါ။ နောက်ကျတဲ့အရသာကို သူကိုယ်တိုင်သိပါစေ။
၂။ ကျောင်းစာတွေ မပီးဘူးမဟုတ်လား။ ဆူပူမနေပဲထားကြည့်ပါ။ ကျောင်းမှာ ဒဏ်ပေးတာ ခံကြည့်ပါစေ။
၃။ ဟင်းတွေ မကြိုက်ဘူးဆိုပီး ဂျီကျနေတဲ့အခါ၊ မစားချင်လည်း မစားနဲ့လေ၊ ဒါပဲရှိတယ်လို့ပြောပါ။ သူမစားဘူးလို့ရွေးချယ်ရင်၊ သင်သနားစိတ်ဝင်တော့မယ်။ စိတ်ခိုင်ခိုင်ထားပါ။ ဗိုက်ဆာတဲ့ အရသာကို သူသင်ကြားပါစေ။
၄။ အင်္ကျီလဲဖို့ ငြင်းဆန်နေတယ်ဆိုပါစို့။ ညစ်ပတ်တဲ့အဝတ်နဲ့ပဲဖြစ်ဖြစ်၊ အဆင်မပြေတဲ့ ဝတ်နဲ့ပဲဖြစ်ဖြစ် သွားခိုင်းလိုက်ပါ။ သူ့ဘာသူ ရှက်လာမှာ။
၅။ ဆူညံအော်ဟစ်၊ အကျယ်ကြီးအော်ငိုနေရင် အကြောင်းမယ်မယ်ရရရှိလားလို့ အရင်ကြည့်ပါ။ ဘာမှမဟုတ်ပဲ ဂျီကျနေတာဆိုရင် နားကြပ်ကလေးတတ်ပီး မကြားချင်ယောင်နေတာက ပိုကောင်းမှာပါ။
၆။ သုန်မှုန်ကောက်ချိတ်နေရင် ကြိုက်သလောက်သာ ကောက်ချိတ်ပါစေတော့။
၇။ ကလေးကို ကယ်တင်မယ့် ဆွေမျိုးသားချင်းတွေနဲ့ ကြိုတင်ညှိနှိုင်းပါ။ ကလေးကို တယောက်တပေါက် ထိန်းရင်ပိုဆိုးမှာ မဟုတ်လား။
၈။ ကိုယ့်ကို့ကိုယ် ဂရုစိုက်ပါ။ ကလေးကို ခဏဥပေက္ခာပြုထားပီး ကိုယ်ကြိုက်တာတွေလုပ်ပါ။ သီချင်းနားထောင်မလား၊ ရုပ်ရှင်ကြည့်မလား၊ အနားယူမလား၊ အိပ်မလား၊ သဘောပါပဲ။
၉။ ဒါမှ မဟုတ် ဘာမှ မလုပ်ဘဲ နေပါ။
အဓိကကတော့ တချို့သေးသေးလေးတွေကို သိပ်ပီး အရေးအရာမယူပဲ ဥပေက္ခာပြုဖို့ ကြိုးစားရတာပါ။ ဥပေက္ခာပြုရတာ တကယ်တော့ အရမ်းခက်ပါတယ်။ ဆုံးမလို့မရလို့၊ ညှိနှိုင်းလို့မရလို့၊ ဆိုးနေလို့ဆိုပေမယ့်၊ မျက်ရည်လည်ရွှဲနဲ့ တုန်ရီနေတဲ့ ကလေးလေးကို ဥပေက္ခာပြုပီး စိတ်အေးအေးထားဖို့ ဆုံးဖြတ်လုပ်ဆောင်ရတာ ဘယ်လိုလုပ်လွယ်မှာလဲ။ မလွယ်ပေမယ့် ထိရောက်တယ်လို့ မိဘ အများက ထောက်ခံကြတယ်။ စမ်းကြည့်ကြမလား။
