05/02/2026
📍ХОРТ ХАВДАР БА СЭТГЭЛЗҮЙ
Хорт хавдрын онош сонсох мөчөөс эхлэн хүний амьдрал зөвхөн биемахбодийн төдийгүй сэтгэлзүйн гүн хямралтай нүүр тулгардаг. Айдас, тодорхойгүй байдал, уур, гуниг, ганцаардал зэрэг мэдрэмжүүд давхцаж, заримдаа эмчилгээ өөрөө бус харин дотоод тэсвэр хамгийн том тэмцэл болдог. Гэсэн ч хавдрын тусламж үйлчилгээний явцад сэтгэл зүйг орхигдуулах нь элбэг.
Сэтгэлзүйн дэмжлэг авах нь юуны өмнө сэтгэл гутрал, сэтгэл түгшилт, сэтгэлийн гэмтлийн дараах стрессийн эмгэг PTSD, сэтгэл хөдлөлийн туйлдлыг бууруулах чухал нөлөөтэй. Сэтгэлзүйн хямралууд нь эмчилгээний явцад хүндрэлийг нэмэгдүүлж, найдвар, урам зоригийг сулруулдаг. Харин сэтгэл зүйг анхаарснаар хүн өөрийн мэдрэмжийг ойлгож, айдсаа нэрлэж, тэсвэрлэх чадвараа сэргээж чаддаг.
Мөн сэтгэлзүйн дэмжлэг нь эмчилгээний үр дүнд эерэгээр нөлөөлдөг. Судалгаагаар сэтгэл санаа тогтвортой, дэмжлэгтэй эмчлүүлэгчид эмчилгээг илүү тогтмол дагаж, эмчтэйгээ илүү сайн харилцаж, биеийн өөрчлөлтөнд илүү уян хатан ханддаг нь тогтоогдсон. Өөрөөр хэлбэл, сэтгэлзүйг анхаарах нь “дагалдах зүйл” биш, харин эмчилгээний нэг хэсэг юм.
Хавдартай хүний сэтгэлзүйг анхаарах нь зөвхөн тухайн хүнд бус, гэр бүл, ойр дотны хүмүүст ч эерэг нөлөөтэй. Илүү ойлголцолтой харилцаа үүсч, буруутгал багасч, хамтдаа энэ замыг туулах чадвар нэмэгддэг. Сэтгэлзүйн дэмжлэг нь “би ганцаараа биш” гэсэн мэдрэмжийг төрүүлж, ганцаардлыг багасгадаг.
Эцэст нь, сэтгэл зүйг анхаарах нь хүнийг зөвхөн амьд үлдэхэд бус, амьдралаа утгатайгаар үргэлжлүүлэхэд тусалдаг. Хавдартай байсан ч хүн өөрийн үнэ цэн, хүсэл мөрөөдөл, харилцаагаа мэдэрч, амьдралын чанараа хадгалах боломжийг олгодог.
Хорт хавдрын үед сэтгэлзүйн дэмжлэг авах нь сул дорой байдал биш.
Энэ бол өөрийгөө хамгаалж, эдгэрэл рүү нэг алхам ойртох зоригтой сонголт юм.
