14/10/2025
सेतो छडी सुरक्षा दिवस २०२५:
सेतो छडी सुरक्षा दिवस, दृष्टिविहीन व्यक्तिहरूका लागि स्वतन्त्रताको प्रतीकका रूपमा सेतो छडीको महत्त्वबारे चेतना जगाउन मनाइने वार्षिक दिवस हो। यस दिवसले दृष्टिविहीन व्यक्तिहरूको अधिकार, सुरक्षित पैदल यात्राको आवश्यकता, र सबैका लागि पहुँच र सम्मानको महत्त्वमा जोड दिन्छ। यस अवसरले समाजमा दृष्टिविहीन व्यक्तिहरूले सामना गर्नु पर्ने चुनौतीहरूबारे जनतालाई सचेत गराउने र समावेशी वातावरण प्रवर्द्धन गर्ने उद्देश्य राख्दछ।
> सेतो छडी सुरक्षा दिवस २०२५ कहिले मनाइन्छ?
सेतो छडी सुरक्षा दिवस हरेक वर्ष अक्टोबर १५ तारिकमा मनाइन्छ, जसले व्यक्ति, संस्था, र समुदायहरूलाई दृष्टि सम्बन्धी अपाङ्गता भएका व्यक्तिहरूको अधिकारका लागि चेतना जगाउन र वकालत गर्न एकसाथ आउन प्रेरित गर्दछ।
>सेतो छडी सुरक्षा दिवस २०२५ सँग कसरी संलग्न हुने?
सेतो छडी सुरक्षा दिवस मनाउने क्रममा, तपाइँ विभिन्न तरिकाले सहभागी हुनसक्नु हुन्छ। यस दिनले तपाईंलाई दृष्टिविहीन व्यक्तिहरूका अधिकारका लागि आवाज उठाउने उत्कृष्ट अवसर प्रदान गर्छ।
केही अर्थपूर्ण तरिकाहरू यस प्रकार छन्:
१. सेतो छडीको बारेमा जान्नुहोस्:
सेतो छडी, दृष्टिविहीन व्यक्तिहरूको स्वावलम्बन, सुरक्षित आवागमन तथा गमनशीलताका लागि अत्यावश्यक उपकरण हो। यसको महत्त्वका बारेमा आफैँ पनि बुझ्नुहोस् र अरूलाई पनि बताउनुहोस्।
२. सुरक्षित पैदल यात्राको अभ्यास गर्नुहोस्:
हिँड्दा वा सवारीसाधन चलाउँदा सेतो छडी प्रयोग गर्ने व्यक्तिहरूको बारेमा सचेत रहनुहोस् र उनीहरूलाई प्राथमिकता दिनुहोस्।
३. पहुँचका लागि पैरवी तथा वकालत गर्नुहोस्:
सर्वसुलभ र सुरक्षित सडक, सडक पेटी, र पहुँचयुक्त सार्वजनिक स्थानहरूको निर्माणका लागि आवाज उठाउनुहोस्।
४. दृष्टिविहीन सम्बन्धी संस्थाहरूलाई सहयोग गर्नुहोस्:
दृष्टिविहीन व्यक्तिहरूका लागि सेवा, तालिम, र स्रोतहरू प्रदान गर्ने संस्थाहरूलाई सहयोग गर्नुहोस्। साथै, दृष्टिविहीन व्यक्तिहरूको सुरक्षित आवागमनका लागि सेतो छडी वितरणमा सहकार्य गर्नुहोस्।
५. स्वयंसेवक बन्नुहोस्:
आफ्नो समय, सीप, र स्रोत प्रयोग गरेर समुदायमा दृष्टिविहीन व्यक्तिहरूलाई सहयोग गर्न स्वयंसेवकको रूपमा सहभागी हुनुहोस्।
६. जनचेतनामूलक कार्यक्रमहरूमा सहभागी हुनुहोस्:
स्थानीय स्तरमा सेतो छडी सुरक्षा दिवसका कार्यक्रम, कार्यशाला, वा जनचेतना अभियानहरूमा सहभागी भई दृष्टिविहीन व्यक्तिहरूका अधिकार र सुरक्षाबारे सन्देश फैलाउनुहोस्।
सेतो छडी सुरक्षा दिवसको इतिहास:
अमेरिकी राष्ट्रपति लिन्डन बी. जोनसन ले सेतो छडीलाई दृष्टिविहीन व्यक्तिहरूको स्वतन्त्रताको प्रतीकका रूपमा औपचारिक मान्यता दिने घोषणा पत्रमा हस्ताक्षर गरेपछि, पहिलो पटक सन् १९६४ अक्टोबर १५ मा संयुक्त राज्य अमेरिकामा सेतो छडी सुरक्षा दिवस मनाइयो।
नेपालमा भने, अपाङ्गता भएका व्यक्तिहरूको अन्तर्राष्ट्रिय वर्ष सन् १९८१ देखि सेतो छडीको प्रयोग सुरु भयो। यस दिवसको उद्देश्य दृष्टिविहीन व्यक्तिहरूका अधिकार, स्वावलम्बन, स्वतन्त्र र सुरक्षित गमशीलताबारे चेतना जगाउनु हो।
