21/09/2025
स्वामी ईश्वर समर्पण बोधिसत्व स्वामी आनन्द अरुणकै कारण जीवनमा नयाँ दिशा भेटियो भन्नु हुन्छ। उहाँ गुरु बिनाको जीवन व्यर्थ हुने ठान्नुहुन्छ। उहाँको नाम जस्तै उहाँले आफ्नो सम्पूर्ण अस्तित्व गुरु चरणमा समर्पण गर्नुभयो। गुरुका वचनलाई आदेशको रूपमा लिनुभयो। र, साधनामा गुरु–अनुग्रहलाई आधार बनाउनु भयो।
उहाँको भावना न त अन्धविश्वासमा आधारित छ, न त फगत बाह्य आराधनामा। उहाँको भक्ति आत्मिक निकटता, प्रेम र श्रद्धामा आधारित छ। गुरु कार्यलाई अघि बढाउनु नै गुरुप्रतिको सच्चा प्रेम हो भन्ने बुझाइका साथ उहाँ निरन्तर गुरुदेवले देखाएको ध्यान–मार्ग, प्रेम र करुणाको शिक्षा फैलाउन समर्पित हुनुहुन्छ। यसर्थ स्वामी ईश्वर समर्पणको गुरु प्रतिको भावना श्रद्धा, प्रेम, समर्पण र कृतज्ञताको पूर्ण संगम हो। जुन शिष्यत्वको उच्चतम आदर्श हो भन्ने हामी ठान्छौं।
