15/10/2025
"We accidentally mentored by a billionaire."
Ang plano lang talaga namin noong araw na ’yon ay pumunta sa opisina ng bagong business partner namin para kunin ang mga produkto.
Walang expectations, walang plano makipag-meeting—kuha lang, tapos uwi.
Pero hindi namin akalain na magiging isa pala iyon sa mga pinakabihirang karanasan sa buhay namin.
Pagdating namin sa opisina, sinabi ng business partner namin na magpa-picture daw kami sa owner ng company—na isa palang bilyonaryo. Wala lang sa amin noon, simpleng courtesy lang. Pero sa elevator pa lang, napansin na namin ang kakaiba.
Hindi kasi kasya ang pito sa elevator, kaya ang ginawa ng owner, kami muna ang pinasakay niya at siya mismo ang naglakad paakyat sa hagdan.
Isang simpleng kilos, pero napakalalim ng mensahe—ang tunay na mayaman, hindi kailangang ipagyabang ang yaman niya.
Pagpasok namin sa opisina niya, tinanong niya kami kung ano ang pakay namin.
Sa tono ng boses niya, alam kong hindi pa niya alam na business partner na kami. Pero kahit gano’n, in-entertain pa rin niya kami nang buong respeto, na parang parte na kami ng kumpanya niya.
Hanggang sa hindi namin namalayan—mahigit isang oras na pala siyang nagme-mentor sa amin.
Hindi siya nagtuturo gaya ng sa classroom.
Parang simpleng kwentuhan lang, pero bawat salita may laman, may bigat, may karanasan.
At eto ang tatlo na pinaka-tumatak sa akin sa mga sinabi niya:
Awareness.
Sabi niya, “Kung kaya kong turuan ang isang 14 years old kumita, mas lalo na kayong mga negosyante.” Doon ko narealize na minsan, hindi kakulangan ng talento o oportunidad ang dahilan kung bakit hindi tayo umaasenso—kulang lang tayo sa kamalayan. Awareness na posible pala. Na kaya pala natin.
Humility.
Maraming tao ang iniisip na kapag ikaw na ang boss o kumikita na nang malaki ang negosyo mo, pwede ka nang mag-relax. Pero sabi niya, mali ’yon. Dapat mas masipag, mas magaling, at mas consistent ka pa kaysa sa mga kasama mo. Dahil kung gaano ka kagaling bilang lider, ’yon din ang magiging bilis ng pag-angat ng negosyo mo.
Partnership.
Ito ang pinaka tumagos sa amin. Dahil sa negosyo namin ngayon—buy and sell—madalas naming problema ang kakulangan ng supply kapag lumalakas ang demand. Ang sabi niya, “Ang tamang partner, hindi ka iniiwan kapag lumalago ka.” Kung hindi kayang tugunan ng partner mo ang demand, ibig sabihin hindi siya handa sa scalability o kulang ang production niya.
Dagdag pa niya, kapag ang mga customer mo o affiliates mo ay dumidiretso na sa supplier mo, hindi ka protektado. Ang tunay na partnership ay may sistema—isang sistema na parehong nagpo-protekta at nagpapalago sa lahat ng kasali. ’Yan daw ang dahilan kung bakit lumalaki ang malalaking kumpanya: may tamang sistema, hindi lang produkto.
Isang oras lang iyon, pero para kaming dumaan sa crash course ng real business life.
Pumunta lang kami para kumuha ng produkto, pero umuwi kami na may bagong pananaw sa negosyo at sa buhay.
Minsan, hindi negosyo ang ipinapunta sa’yo ng Dios—kundi ang aral na magpapayaman sa isip mo bago sa bulsa mo.
