Medical Teaching Institution Bannu, Bannu Township, Bannu (2025)

30/09/2025

خلیفہ گلنواز ہسپتال بنوں کے سیکیورٹی اسٹاف کو اعلیٰ کارکردگی پر تعریفی اسناد سے نوازا گیا

ایم ٹی آئی بنوں کے تدریسی ہسپتال خلیفہ گلنواز ہسپتال بنوں کے سیکیورٹی اسٹاف، جو ہسپتال میں اسٹاف اور مریضوں کی جان و مال کے تحفظ کے ساتھ ساتھ خدمتِ خلق کے جذبے سے بھی خدمات انجام دے رہے ہیں، کی حوصلہ افزائی کے لیے آج ہاسپٹل ڈائریکٹر کے دفتر میں ایک تقریب منعقد کی گئی۔

تقریب کے دوران ہاسپٹل ڈائریکٹر، اسسٹنٹ پروفیسر ڈاکٹر نیک محمد خان نے سیکیورٹی ڈیپارٹمنٹ کے سیکیورٹی افسر لائق الرحمن، سیکیورٹی سپروائزرز اور تمام سیکیورٹی اسٹاف کو بہترین کارکردگی پر تعریفی اسناد سے نوازا۔ اس موقع پر ڈی ایم ایس ایڈمن، کامران خان نے بھی سیکیورٹی گارڈز میں تعریفی اسناد تقسیم کیں۔

تقریب میں اس بات کا اعتراف کیا گیا کہ سیکیورٹی افسر کی زیر نگرانی سیکیورٹی گارڈز اور سپروائزرز نے اپنی ذمہ داریوں کو احسن طریقے سے نبھایا اور ہسپتال کے امن و امان اور نظم و ضبط کو برقرار رکھنے میں کلیدی کردار ادا کیا۔

اس موقع پر خطاب کرتے ہوئے ہاسپٹل ڈائریکٹر ڈاکٹر نیک محمد خان نے کہا کہ ادارے کے اندر ہر شعبے کی کامیابی میں عملے کی محنت اور لگن شامل ہے، اور بہترین کارکردگی دکھانے والوں کی حوصلہ افزائی ادارے کی روایت ہے۔ مستقبل میں بھی اس طرح کی پہچان اور حوصلہ افزائی کا سلسلہ جاری رہے گا تاکہ ملازمین مزید جذبے اور اخلاص کے ساتھ اپنی ذمہ داریاں ادا کریں۔

30/09/2025

آج ڈین بنوں میڈیکل کالج پروفیسر ڈاکٹر شبیر حسین اور پروفیسر ڈاکٹر محمد ندیم خان نے ڈسٹرکٹ ہیڈ کوارٹر ہسپتال اور ویمن اینڈ چلڈرن ہسپتال بنوں کے مختلف شعبہ جات کا تفصیلی معائنہ کیا۔ اس دورے کا مقصد ہسپتال کے ان ڈیپارٹمنٹس کا جائزہ لینا تھا جو مستقبل میں کالج آف فزیشنز اینڈ سرجنز پاکستان (CPSP) کی جانب سے ایف سی پی ایس اور ایم سی پی ایس ٹریننگ کے لیے ایکریڈیشن کے عمل میں شامل کیے جائیں گے۔

ٹیم نے اے، این،ٹی،میڈیسن اور پیڈز شعبہ جات کا دورہ کیا اور وہاں موجود سہولیات، تربیتی ماحول، مریضوں کی تعداد اور تعلیمی سرگرمیوں کا باریک بینی سے جائزہ لیا۔

اس موقع پر ڈین بنوں میڈیکل کالج پروفیسر ڈاکٹر شبیر حسین نے کہا کہ بنوں میں پوسٹ گریجویٹ ٹریننگ کے آغاز سے مقامی طلباء اور نوجوان ڈاکٹروں کو بڑے شہروں کا رخ نہیں کرنا پڑے گا بلکہ انہیں اپنے ہی علاقے میں جدید اور معیاری تربیت ملے گی۔ ان کا کہنا تھا کہ اس اقدام سے نہ صرف تعلیم و تحقیق کے معیار میں اضافہ ہوگا بلکہ مریضوں کو بھی بہتر اور زیادہ تربیت یافتہ ڈاکٹروں کی خدمات دستیاب ہوں گی۔

انہوں نے کہا کہ اس سے قبل بنوں خلیفہ گلنواز ہسپتال کے پانچ شعبہ جات کالج آف فزیشنز اینڈ سرجنز پاکستان (CPSP) کے ساتھ Recognised تسلیم شدہ کئے اور وہاں ایف سی پی ایس ٹریننگ کامیابی سے جاری ہے۔ اب ادارہ اس موضوع کو یعنی پوسٹ گریجویٹ ٹریننگ کو مزید وسعت دینا چاہتے ہیں۔

اس وزٹ کو مستقبل قریب میں ہونے والے CPSP کے آفیشل ایکریڈیشن وزٹ کی تیاری کے طور پر دیکھا جا رہا ہے CPSP کی منظوری کے بعد بنوں میں میڈیکل ایجوکیشن اور ہسپتالوں کی کارکردگی میں ایک نمایاں بہتری آئے گی جو پورے جنوبی خیبرپختونخوا کے لیے ایک سنگِ میل ثابت ہوگی.

29/09/2025

ایم ٹی آئی بنوں میں عالمی یومِ قلب کی مناسبت سے آگاہی واک کا انعقاد

29 ستمبر کو دنیا بھر کی طرح ایم ٹی آئی بنوں میں بھی دل کے امراض کا عالمی دن منایا گیا۔ یہ دن پاکستان ہائیپر ٹینشن لیگ اور پاکستان کارڈیک سوسائٹی بنوں چیپٹر کے اشتراک سے منایا گیا، جس کا بنیادی مقصد عوام میں دل کی بیماریوں سے متعلق آگاہی پیدا کرنا اور ان کے بچاؤ کے لیے احتیاطی تدابیر اپنانے پر زور دینا تھا۔

اس سلسلے میں خلیفہ گلنواز ہسپتال بنوں کے شعبہ کارڈیالوجی کے زیرِاہتمام ایک آگاہی واک کا انعقاد کیا گیا جس میں مختلف مکاتبِ فکر سے تعلق رکھنے والے افراد نے شرکت کی۔ واک کے شرکاء کو دل کی بیماریوں کی وجوہات، علامات اور ان سے بچاؤ کے طریقوں کے بارے میں آگاہ کیا گیا۔

تقریب سے خطاب کرتے ہوئے کوآرڈینیٹر پاکستان ہائیپر ٹینشن لیگ بنوں اور کوآرڈینیٹر پاکستان کارڈیک سوسائٹی بنوں، پروفیسر ڈاکٹر محمد ندیم نے کہا کہ دل کے امراض دنیا بھر میں اموات کی بڑی وجوہات میں شامل ہیں، تاہم اگر عوام صحت مند طرزِ زندگی اپنائیں، باقاعدگی سے ورزش کریں، متوازن غذا کھائیں اور تمباکو نوشی سے پرہیز کریں تو دل کی بیماریوں میں نمایاں کمی لائی جا سکتی ہے۔ انہوں نے کہا کہ اس دن کو منانے کا مقصد یہی ہے کہ لوگوں کو دل کے امراض سے بچاؤ کے لیے احتیاطی اقدامات کے بارے میں زیادہ سے زیادہ آگاہ کیا جائے۔

اس موقع پر میڈیکل ڈائریکٹر ایم ٹی آئی بنوں اسسٹنٹ پروفیسر ڈاکٹر فرمان اللہ وزیر اور اسسٹنٹ پروفیسر ڈاکٹر خالد نسیم بھی موجود تھے جنہوں نے دل کی بیماریوں سے بچاؤ اور صحت مند طرزِ زندگی کے حوالے سے اپنے خیالات کا اظہار کیا۔

ایم ٹی آئی بنوں کی انتظامیہ نے اس عزم کا اعادہ کیا کہ ادارہ مستقبل میں بھی اس نوعیت کی آگاہی مہمات اور پروگرامز کا انعقاد کرتا رہے گا تاکہ عوام کو بہتر صحت کی سہولیات کے ساتھ ساتھ صحت کے حوالے سے ضروری معلومات بھی فراہم کی جا سکیں۔

29/09/2025

خلیفہ گلنواز ہسپتال میں بچے کی جان بچالی گئی

خلیفہ گلنواز ہسپتال بنوں میں ایک 10 سالہ بچے کو لایا گیا جس کی خوراک کی نالی میں ریموٹ کی بیٹری (ڈسک بیٹری) دو روز سے پھنس ہوئی تھی۔ ہسپتال کے ماہر گیسٹروانٹیرولوجسٹ ڈاکٹر طاہراللہ نے جدید اینڈوسکوپی مشین کے ذریعے کامیابی سے بیٹری نکال لی گئی اور بچے کی جان بچالی گئی

ایم ٹی آئی بنوں کے ہسپتال جدید سہولیات سے آراستہ ہوتے جا رہے ہیں اور مریضوں کو وہ علاج معالجہ اب ان کی دہلیز پر فراہم کیا جا رہا ہے جو پہلے پشاور منتقل کرنے کے بعد ہی ممکن ہوتا تھا۔

ان شاء اللہ ادارے کی یہ ترقی اور جدید سہولیات کی فراہمی کا سلسلہ اسی طرح جاری رہے گا، اور عوام کو مزید معیاری خدمات فراہم کی جاتی رہیں گی۔
۔۔۔

27/09/2025

وضاحتی بیان
سوشل میڈیا پر کچھ فیک اکاؤنٹس کے ذریعے بے بنیاد اور من گھڑت الزامات لگائے جا رہے ہیں جن کا مقصد عوام کو گمراہ کرنا اور ادارے کی ساکھ کو نقصان پہنچانا ہے۔ ہم واضح طور پر کہنا چاہتے ہیں کہ یہ تمام الزامات جھوٹ اور بے بنیاد ہیں۔

بورڈ آف گورنرز اورایم ٹی آئی بنوں انتظامیہ روزِ اول سے ایک منظم ویژن کے تحت صرف اور صرف عوامی مفاد میں فیصلے اور اقدامات کر رہی ہے۔

ڈی ایچ کیو ہسپتال بنوں سے خلیفہ گلنواز ہسپتال بنوں منتقل کی جانے والی C-Arm مشین بھی کسی ذاتی مفاد کے لیے نہیں بلکہ عوامی مفاد کے لیے منتقل کی گئی ہے۔ اس کے باوجود DHQ ہسپتال کو کسی صورت نظر انداز نہیں کیا گیا۔ ہاسپٹل ڈائریکٹر اسسٹنٹ پروفیسر ڈاکٹر نیک محمد خان اور فنانس ڈیپارٹمنٹ کی کاوشوں سے ڈی ایچ کیو ہسپتال کے لیے بھی C-Arm مشین کو عطیہ کے طور پر فراہم کرنے کا انتظام کیا جا رہا ہے۔

سوشل میڈیا پر پرانی مشین کی خریداری کا الزام بھی بے بنیاد ہے۔ درحقیقت یہ جدید جاپانی مشینری عطیہ کے طور پر فراہم کی جا رہی ہے جو ڈی ایچ کیو ہسپتال میں نصب کی جائے گی۔

واضح رہے کہ ایم ٹی آئی بنوں کے تینوں ہسپتال ایک ہی چھت کے نیچے ایک ہی مقصد کے لیے کام کر رہے ہیں، اور وہ مقصد ہے عوام الناس خصوصاً مریضوں کو بہترین طبی سہولیات فراہم کرنا۔

مزید یہ کہ ایم ٹی آئی بنوں میں کسی بھی مشینری یا سامان کی خریداری کسی ایک فرد یا افسر کے ذاتی فیصلے پر نہیں کی جاتی بلکہ یہ عمل باضابطہ طور پر پراکیورمنٹ کمیٹی اور آڈٹ طریقہ کار کے تحت مکمل کیا جاتا ہے۔

ہم عوام سے اپیل کرتے ہیں کہ سوشل میڈیا پر پھیلائے گئے اس طرح کے گمراہ کن پروپیگنڈے پر کان نہ دھریں۔ ایم ٹی آئی بنوں، بورڈ آف گورنرز کی نگرانی میں، عوام کو معیاری علاج اور جدید سہولیات فراہم کرنے کے لیے اپنی کوششیں جاری رکھے گا۔

ابھی حال ہی میں اینڈوسکوپ مشین نصب کی گئی ہے، اور بہت جلد خلیفہ گلنواز ہسپتال می ایم آر آئی جبکہ ڈی ایچ کیو ہسپتال میں سی ٹی سکین بھی دستیاب ہوگا۔

25/09/2025

زنانہ ہسپتال بنوں کے اسٹاف کیلئے جدید ہاسٹل کا قیام ، ہاسٹل کا باقاعدہ افتتاح کردیا گیا

میڈیکل ڈائریکٹر ڈاکٹر فرمان اللہ خان وزیر نے آج وومن اینڈ چلڈرن ہسپتال بنوں کے ڈاکٹرز اور نرسنگ اسٹاف کے لیے ایک جدید اور سہولیات سے آراستہ ہاسٹل کا افتتاح کیا اس موقع پر
ایچ ڈی ڈاکٹر واحد گل، اے ایم ڈی ڈاکٹر فرحان اللہ شاہ کے علاوہ شہر کے معروف سیاسی و سماجی رہنما اقبال جدون، سید طاہر شاہ اور نزیر زمان نے خصوصی شرکت کی۔
۔
اس منصوبے کا مقصد ٹی ایم اوز، ایم اوز، ہاؤس آفیسرز اور میل نرسز کو درپیش طویل عرصہ سے جاری رہائشی مسائل کا دیرپا اور معیاری حل فراہم کرنا ہے۔

ہاسٹل میں ڈاکٹروں اور اسٹاف کے لیے 24 گھنٹے بجلی، جدید فائبر آپٹک انٹرنیٹ، صاف و کشادہ کمرے اور پینے کے صاف پانی جیسی سہولیات فراہم کی گئی ہیں، جس سے رہائشی ماحول میں نمایاں بہتری آئے گی اور عملہ مریضوں کو مزید بہتر اور مؤثر خدمات فراہم کر سکے گا۔

یہ منصوبہ بنیادی طور پر ڈی ایم ایس زنانہ ہسپتال ڈاکٹر آدم اللہ کی قائدانہ صلاحیتوں، وژن اور انتھک محنت کا نتیجہ ہے۔ ڈاکٹر آدم اللہ نے مسئلے کی سنگینی کو بروقت سمجھا اور عملی اقدامات کے ذریعے ایک دیرپا حل فراہم کیا۔ ان کی کاوشوں نے نہ صرف ہسپتال اسٹاف کی فلاح و بہبود کو یقینی بنایا بلکہ ادارہ جاتی ترقی کے عمل کو بھی نئی سمت دی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

25/09/2025

ایم ٹی آئی بنوں کے وفد کی صوبائی اسمبلی خیبرپختونخوا میں پبلک اکاؤنٹس کمیٹی کے اجلاس میں شرکت ،

ہاسپٹل ڈائریکٹر اسسٹنٹ پروفیسر ڈاکٹر نیک محمد اور ڈائریکٹر فنانس وقاص خان پر مشتمل وفد نے صوبائی اسمبلی میں منعقدہ پبلک اکاؤنٹس کمیٹی کے اجلاس میں شرکت کی۔ اجلاس کی صدارت اسپیکر صوبائی اسمبلی نے کی، جس میں سیکرٹری ہیلتھ خیبرپختونخوا سمیت متعلقہ حکام بھی موجود تھے۔

اجلاس کے دوران ایم ٹی آئی بنوں کے ہسپتالوں میں نئی پالیسیوں کے نفاذ، جاری ترقیاتی منصوبوں، فنڈز کی فراہمی اور نئے بلاک کی تکمیل کے لیے مالی وسائل کی ضرورت جیسے اہم امور پر تفصیلی بریفنگ دی گئی۔ وفد نے کمیٹی کو درپیش چیلنجز اور مستقبل کی ضروریات سے بھی آگاہ کیا۔

اس موقع پر اسپیکر صوبائی اسمبلی اور سیکرٹری ہیلتھ خیبرپختونخوا نے ایم ٹی آئی بنوں کے مسائل کے حل اور فنڈز کی فراہمی کے لیے ہر ممکن تعاون کی یقین دہانی کرائی۔

23/09/2025

ہاسپٹل ڈائریکٹر ڈاکٹر نیک محمد خان کا خلیفہ گلنواز ہسپتال بنوں کے مختلف شعبہ جات کا دورہ

ہاسپٹل ڈائریکٹر ایم ٹی آئی بنوں ڈاکٹر نیک محمد خان نے خلیفہ گلنواز ہسپتال بنوں کے مختلف شعبہ جات کا تفصیلی دورہ کیا۔ اس موقع پر انہوں نے طبی سہولیات، علاج و معالجے کے معیار، اور جاری ترقیاتی کاموں کا بغور جائزہ لیا۔

ڈاکٹر نیک محمد خان نے سب سے پہلے داخل مریضوں کے وارڈز کا معائنہ کیا جہاں انہوں نے مریضوں اور تیمارداروں سے براہ راست ملاقات کر کے علاج و نگہداشت کے حوالے سے اُن کے تاثرات معلوم کیے۔ انہوں نے ڈاکٹرز اور پیرامیڈیکل اسٹاف کو ہدایت کی کہ مریضوں کے ساتھ خوش اخلاقی اور ذمہ داری سے پیش آئیں اور علاج کے عمل میں کسی قسم کی کوتاہی نہ برتی جائے۔

اس موقع پر ڈی ایم ایس ایڈمن ڈاکٹر کامران خان بھی ان کے ہمراہ تھے

بعد ازاں انہوں نے شعبہ ریڈیالوجی خصوصاً سی ٹی سکین یونٹ کا دورہ کیا اور جدید مشینری کے استعمال اور اس کی فعالیت کے بارے میں معلومات حاصل کیں۔ انہوں نے اس بات پر زور دیا کہ ریڈیالوجی اور تشخیصی سہولیات ہسپتال کے اہم ترین حصے ہیں اور ان کی کارکردگی بہتر بنانے کے لیے مسلسل نگرانی اور بروقت دیکھ بھال نہایت ضروری ہے۔

ہاسپٹل ڈائریکٹر نے ہاسٹلوں کا بھی معائنہ کیا اور زیرِ تعلیم و زیرِ تربیت ڈاکٹروں اور اسٹاف کو فراہم سہولیات کا جائزہ لیا۔ انہوں نے کہا کہ بہتر رہائشی ماحول اسٹاف کی کارکردگی کو براہِ راست متاثر کرتا ہے، اس لیے اس شعبے پر خصوصی توجہ دی جائے۔

اسی دوران ڈاکٹر نیک محمد خان نے ہسپتال میں جاری تعمیراتی منصوبوں کا تفصیلی جائزہ لیا اور متعلقہ عملے کو ہدایت کی کہ منصوبے بروقت اور معیاری انداز میں مکمل کیے جائیں تاکہ مریضوں اور عوام کو زیادہ سے زیادہ سہولتیں فراہم کی جا سکیں۔

ہاسپٹل ڈائریکٹر نے دورے کے موقع پر کہا کہ
ایم ٹی آئی بنوں ہسپتال نہ صرف بنوں بلکہ پورے خطے کے لیے ایک مرکزی علاج گاہ کی حیثیت رکھتے ہیں ۔ ہمارا مقصد اس ادارے کو جدید سہولیات سے آراستہ کرنا اور اسے عوام کے لیے ایک مثالی ہسپتال بنانا ہے۔ مریضوں کو سہولت فراہم کرنا ہماری اولین ترجیح ہے، اور اس کے لیے ہم ہر ممکن اقدام جاری رکھیں گے۔

22/09/2025

خلیفہ گلنواز ہسپتال بنوں میں نیا اینڈوسکوپی مشین نصب

خلیفہ گلنواز ہسپتال بنوں میں جدید اینڈوسکوپی مشین نصب کر دی گئی ہے اور اس پر پہلا کیس کامیابی کے ساتھ مکمل کر لیا گیا ہے۔ گزشتہ 9 ماہ سے پرانی مشین خراب ہونے کے باعث یہ سہولت معطل تھی۔

اس مشین کے ذریعے اب خوراک کی نالی ، معدے، بڑی آنت اور جگر سمیت دیگر امراض کی تشخیص اور علاج کیا جائے گا مزید برآں، ان شاءاللہ آئندہ چند روز میں ای آر سی پی (ERCP) کی سہولت کا بھی آغاز کیا جا رہا ہے، جو خطے کے عوام کے لیے ایک انقلابی اقدام ثابت ہوگا۔

اس موقع پر ہاسپٹل ڈائریکٹر اسسٹنٹ پروفیسر ڈاکٹر نیک محمد خان، میڈیکل ڈائریکٹر اسسٹنٹ پروفیسر ڈاکٹر فرمان اللہ وزیر اور ڈی ایم ایس ڈاکٹر کامران خان بھی موجود تھے۔ گیسٹرونٹولوجسٹ ڈاکٹر طاہر اللہ خان نے نئی مشین کے حوالے سے بریفنگ دی۔

ہاسپٹل ڈائریکٹر ڈاکٹر نیک محمد خان اور میڈیکل ڈائریکٹر اسسٹنٹ پروفیسر ڈاکٹر فرمان اللہ وزیر کا کہنا تھا کہ ایم ٹی آئی بنوں ہسپتالوں میں عوام الناس کو جدید اور معیاری طبی سہولیات فراہم کرنے کے لیے ترجیحی بنیادوں پر کام کیا جا رہا ہے۔ ان انقلابی اقدامات سے مریضوں کو ہر قسم کا معیاری علاج مقامی سطح پر دستیاب ہوگا اور کسی کو بنوں سے باہر جانے کی ضرورت پیش نہیں آئے گی

21/09/2025

چیئرمین بی او جی ایم ٹی آئی بنوں پروفیسر ڈاکٹر فرمان اللہ وزیر کا عوام الناس کے نام اہم پیغام

20/09/2025

چیئرمین بورڈ آف گورنرز ایم ٹی آئی بنوں کا ڈسٹرکٹ ہیڈ کوارٹر ہسپتال کا دورہ

چیئرمین بورڈ آف گورنرز ایم ٹی آئی بنوں، پروفیسر ڈاکٹر فرمان اللہ خان وزیر نے ڈسٹرکٹ ہیڈ کوارٹر ہسپتال بنوں کا تفصیلی دورہ کیا۔ اس موقع پر ڈین بنوں میڈیکل کالج پروفیسر ڈاکٹر شبیر حسین ،ہاسپٹل ڈائریکٹر اسسٹنٹ پروفیسر ڈاکٹر نیک محمد خان اور میڈیکل ڈائریکٹر اسسٹنٹ پروفیسر ڈاکٹر فرمان اللہ وزیر بھی موجود تھے۔

انہوں نے ہسپتال کے مختلف شعبہ جات بشمول ایمرجنسی ڈیپارٹمنٹ، وارڈز اور جاری تعمیراتی منصوبوں خصوصاً ٹراما سنٹر کا جائزہ لیا۔ ایڈیشنل ہاسپٹل ڈائریکٹر، ڈاکٹر بسم اللہ خان نے انہیں ہسپتال کی موجودہ صورتحال، سہولیات اور مستقبل کے منصوبوں کے بارے میں تفصیلی بریفنگ دی۔

چیئرمین پروفیسر ڈاکٹر فرمان اللہ وزیر نے اس موقع پر کہا کہ ڈسٹرکٹ ہیڈ کوارٹر ہسپتال بنوں خطے کے عوام کے لیے ریڑھ کی ہڈی کی حیثیت رکھتا ہے۔ مریضوں کو بہتر سہولیات فراہم کرنے کے لیے ہر ممکن اقدامات کیے جا رہے ہیں۔ انہوں نے کہا کہ ایمرجنسی اور دیگر شعبہ جات میں بہتری لانے کے ساتھ ساتھ جاری تعمیراتی منصوبے عوام کو معیاری صحت کی سہولیات مہیا کرنے میں اہم سنگ میل ثابت ہوں گے۔

چیئرمین نے مزید کہا کہ ایم ٹی آئی نظام کے تحت ہسپتالوں میں بہتری اور جدید سہولیات کی فراہمی اولین ترجیح ہے اور عملے کی کارکردگی کو مزید بہتر بنانے کے لیے اقدامات جاری رہیں گے۔

20/09/2025

چیئرمین بورڈ آف گورنرز ایم ٹی آئی بنوں پروفیسر ڈاکٹر فرمان اللہ خان وزیر کا خلیفہ گلنواز ہسپتال کا دورہ، آئی بی پی وارڈ کا افتتاح

چیئرمین بورڈ آف گورنرز میڈیکل ٹیچنگ انسٹیٹیوشنز (ایم ٹی آئی) بنوں، پروفیسر ڈاکٹر فرمان اللہ خان وزیر نے آج خلیفہ گلنواز ہسپتال بنوں کا دورہ کیا اور وہاں نئے تعمیر شدہ آئی بی پی میل وارڈ کا افتتاح کیا۔ یہ وارڈ 16 بیڈز پر مشتمل ہے، جس کے قیام سے مریضوں کو مزید معیاری طبی سہولیات میسر آئیں گی۔

دورے کے دوران چیئرمین پروفیسر ڈاکٹر فرمان اللہ خان وزیر نے آئی بی پی وارڈ کے علاوہ ہسپتال کے دیگر وارڈز، آئی سی یو، سی سی یو اور دیگر اہم شعبہ جات میں بھی انتظامات کا تفصیلی جائزہ لیا۔

اس موقع پر ڈین بنوں میڈیکل کالج پروفیسر ڈاکٹر شبیر حسین، ہاسپٹل ڈائریکٹر اسسٹنٹ پروفیسر ڈاکٹر نیک محمد خان، میڈیکل ڈائریکٹر اسسٹنٹ پروفیسر ڈاکٹر فرمان اللہ وزیر، ڈائریکٹر نرسنگ عبد الرحمٰن ، ڈائریکٹر فنانس وقاص خان ،آئی بی پی منیجر علی اکبر خان ،مختلف شعبہ جات کے سربراہان اور افسران بھی موجود تھے۔

چیئرمین بورڈ آف گورنرز نے اس موقع پر گفتگو کرتے ہوئے کہا کہ مریض ہمارا سب سے اہم اسٹیک ہولڈر ہے۔ اللہ تعالیٰ نے ہمیں یہ بڑی ذمہ داری دی ہے کہ ہم دکھی انسانیت کی خدمت کریں اور مریضوں کو معیاری صحت کی سہولیات فراہم کرکے ان کا اعتماد بحال کریں۔ قلیل عرصے میں ایم ٹی آئی بنوں میں بہت سے اصلاحی اقدامات کیے گئے جن کے مثبت نتائج سامنے آئے اور علاج معالجے کے معیار میں بہتری آئی ہے۔

انہوں نے مزید کہا کہ طب ایک مقدس اور انبیائی پیشہ ہے، جس کی بنیاد خدمتِ انسانیت پر ہے۔ ڈاکٹر اور مریض کے درمیان ایک خاص تعلق ہوتا ہے جو اعتماد اور خدمت کے جذبے سے جڑا ہے۔ ادارے کے عملے کو اسی مقصد کے لیے معاوضہ دیا جاتا ہے تاکہ وہ اپنی پیشہ ورانہ ذمہ داریاں بخوبی ادا کریں۔

انہوں نے آئی بی پی کے تحت شام کے اوقات میں خدمات کو ادارے کے لیے ایک اہم پیش رفت قرار دیتے ہوئے کہا کہ آئی بی پی کے تحت ڈاکٹرز کو ادارہ جاتی کلینک میں خدمات سرانجام دینے کا موقع ملا ہے، جس سے نہ صرف عوام کو معیاری اور سہل علاج فراہم ہو رہا ہے بلکہ ہسپتالوں کی مالی حالت بھی بہتر ہوئی ہے۔ یہ اقدام مریضوں اور ادارے، دونوں کے لیے فائدہ مند ثابت ہو رہا ہے۔

چیئرمین پروفیسر ڈاکٹر فرمان اللہ خان وزیر نے اس عزم کا اظہار کیا کہ مریضوں کی خدمت اور ہسپتالوں میں مزید بہتری کے لیے کوششیں جاری رہیں گی تاکہ بنوں کے عوام کو بہترین طبی سہولیات فراہم کی جاسکیں۔

Medical Teaching Institution Bannu

30/09/2025

30/09/2025

29/09/2025

29/09/2025

27/09/2025

25/09/2025

25/09/2025

23/09/2025

22/09/2025

21/09/2025

20/09/2025

20/09/2025

Address

Telephone

Website

Alerts

Contact The Practice

Shortcuts

Share

Category