12/03/2026
رمضان المبارک اور ہماری صحت
رمضان المبارک کا آخری عشرہ شروع ہو چکا ہے۔ اس مقدس مہینے میں روزہ رکھنے کی وجہ سے انسان کی روزمرہ زندگی اور خوراک کے اوقات میں ایک نظم پیدا ہو جاتا ہے۔ کھانے کے اوقات محدود ہونے اور مقدار میں کمی کی وجہ سے جسم میں کئی مثبت تبدیلیاں آ سکتی ہیں۔
رمضان کے دوران اکثر لوگوں کو محسوس ہوتا ہے کہ معدے کے کچھ مسائل کم ہو جاتے ہیں، جسم ہلکا محسوس ہوتا ہے اور بعض اوقات وزن میں بھی کمی آ جاتی ہے۔ اس کی ایک بڑی وجہ یہ ہے کہ اس مہینے میں لوگ نسبتاً کم اور معیاری خوراک لینے کی کوشش کرتے ہیں۔
یہ ضروری ہے کہ رمضان میں آنے والی ان مثبت تبدیلیوں کو برقرار رکھا جائے۔ رمضان کے بعد بھی اپنی روزمرہ زندگی کے لیے ایسا متوازن اور صحت مند معمول اختیار کرنا چاہیے جس میں خوراک کی مقدار اور معیار دونوں کا خیال رکھا جائے، تاکہ وزن میں غیر ضروری اضافہ اور معدے کے مسائل دوبارہ پیدا نہ ہوں۔
اسی طرح وہ مریض جو ڈاکٹر کے مشورے کے مطابق ادویات استعمال کرتے ہیں، انہیں چاہیے کہ رمضان کے دوران بننے والی ترتیب کے بعد بھی اپنے معالج کی ہدایات کے مطابق ادویات اور صحت کے معمولات کو باقاعدگی سے جاری رکھیں۔
صحت مند عادات کو برقرار رکھنا ہی ایک بہتر اور متوازن زندگی کی بنیاد ہے۔
صحت مند عادات اپنائیں، صحت مند زندگی گزاریں۔
