13/03/2026
صحت کارڈ کے زیر انتظام ائی سی یو کا مرکزی مربوط نظام۔ پریس ریلز۔۔۔
صوبائی وزیر صحت خیبر پختونخوا خلیق الرحمان کی زیر صدارت صحت کارڈ پلس پروگرام کے تحت ہسپتالوں میں انتہائی نگہداشت یونٹس (آئی سی یو) کے مرکزی مربوطہ نظام کے حوالے سے ایک اہم اجلاس منعقد ہوا۔ اجلاس میں سیکرٹری صحت **شاہد اللہ خان**، سی ای او ایس ایچ پی آئی، ڈویژنل ہیڈ اسٹیٹ لائف، ریجنل چیف، زونل ہیڈ، پی ایم او اسٹیٹ لائف کے نمائندگان، پشاور کے میڈیکل ٹیچنگ انسٹی ٹیوشنز (ایم ٹی آئیز) کے حکام اور خیبر پختونخوا ہیلتھ کیئر کمیشن کے نمائندوں نے شرکت کی۔
اجلاس کے دوران ڈویژنل ہیڈ اسٹیٹ لائف کی جانب سے آئی سی یو بیڈ انٹیگریشن سسٹم کے حوالے سے تفصیلی بریفنگ دی گئی۔ شرکاء کو اس جدید نظام کا عملی مظاہرہ بھی پیش کیا گیا جس میں پینل ہسپتالوں میں آئی سی یو بیڈز کی دستیابی کو ریئل ٹائم میں دکھایا گیا۔ بریفنگ میں بتایا گیا کہ اس نظام کے تحت تمام پینل ہسپتال مریض کو ریفر کرنے سے پہلے دیگر پینل ہسپتالوں میں آئی سی یو بیڈز کی موجودہ دستیابی دیکھ سکیں گے جس سے مریضوں کو بروقت اور مناسب ہسپتال میں منتقل کرنا ممکن ہوگا۔
اجلاس کو مزید آگاہ کیا گیا کہ یہ نظام سرکاری اور نجی دونوں پینل ہسپتالوں کے لیے انتہائی مؤثر ثابت ہوگا اور اس کے ذریعے مریضوں کے علاج و معالجے کے عمل کو زیادہ بہتر انداز میں منظم کیا جا سکے گا۔ اسٹیٹ لائف کے ساتھ مؤثر رابطہ کاری کے ذریعے آئی سی یو سہولیات کے بہتر استعمال کو یقینی بنایا جائے گا۔ اجلاس میں یہ بھی بتایا گیا کہ آئی سی یو علاج کے پیکج ریٹس کو پینل ہسپتالوں کے ساتھ دوبارہ مذاکرات کے بعد از سر نو طے کیا گیا ہے تاکہ مریضوں کو مزید بہتر سہولیات فراہم کی جا سکیں۔
اجلاس کے اختتام پر صوبائی وزیر صحت خلیق الرحمان نے ہدایت کی کہ اس انٹیگریشن ماڈل کو جلد از جلد پشاور کے تمام پینل ہسپتالوں میں نافذ کیا جائے تاکہ مریضوں کو بروقت علاج کی سہولت فراہم کی جا سکے اور ہسپتالوں کے درمیان بہتر رابطہ کاری کو فروغ دیا جا سکے۔
اس موقع پر صوبائی وزیر صحت خلیق الرحمان نے کہا کہ یہ منصوبہ ابتدائی طور پر پشاور ریجن کے بڑے ہسپتالوں میں شروع کیا جا رہا ہے اور جلد ہی اسے دیگر بڑے ہسپتالوں تک بھی توسیع دی جائے گی تاکہ صحت کی سہولیات کو مربوط، منظم اور پیشہ ورانہ انداز میں عوام تک پہنچایا جا سکے۔ انہوں نے کہا کہ حکومت صحت کے شعبے میں جدید نظام متعارف کروا کر عوام کو معیاری اور بروقت طبی سہولیات فراہم کرنے کے لیے عملی اقدامات جاری رکھے ہوئے ہے۔
