10/04/2026
*رپورٹ / پریس ریلیز* :
گلیشیئر لیک آؤٹ برسٹ فلڈ (GLOF) کے ممکنہ خطرات کے پیشِ نظر، آج ڈسٹرکٹ ایڈمنسٹریشن کی جانب سے ضلع شگر کے علاقوں کایو، گلاب پور اور ڈوگورو باشہ میں موک ڈرل (Mock Exercise) کا انعقاد کیا گیا۔ اس موقع پر ریسکیو 1122 کی جانب سے ابتدائی احتیاطی تدابیر، فائر سیفٹی اور ہنگامی انخلا (Emergency Evacuation) کے حوالے سے عوام الناس کو آگاہی فراہم کی گئی۔
اس مشق کا مقصد مقامی آبادی کو ممکنہ ہنگامی صورتحال سے نمٹنے کے لیے تیار کرنا، بروقت ردعمل کو یقینی بنانا اور جان و مال کے تحفظ کو بہتر بنانا تھا۔ اس دوران ریسکیو اہلکاروں نے عوام کو GLOF کے خطرات، ابتدائی حفاظتی اقدامات، آگ سے بچاؤ کے اصولوں اور محفوظ مقامات تک فوری انخلا کے طریقہ کار سے آگاہ کیا۔
مقامی افراد نے اس مشق میں بھرپور شرکت کی اور ریسکیو ٹیم کے ساتھ مکمل تعاون کیا۔ اس طرح کی سرگرمیاں مستقبل میں ممکنہ آفات کے نقصانات کو کم کرنے میں اہم کردار ادا کرتی ہیں۔
اس موقع پر اسسٹنٹ کمشنر شگر، جناب فیصل گوندل صاحب نے بھی پروگرام میں شرکت کی اور عوام کو قدرتی آفات سے نمٹنے کے لیے پیشگی تیاری، احتیاطی تدابیر اور اداروں کے ساتھ تعاون کی اہمیت سے آگاہ کیا۔ انہوں نے کہا کہ اس قسم کی عملی مشقیں عوامی شعور بیدار کرنے میں انتہائی مؤثر ثابت ہوتی ہیں۔ *میڈیا سیل ریسکیو 1122 شگر*
