30/01/2026
ليه ٣ سنوات و ما مشى ليه؟
اثناء الدوام جاني مريض كان بعاني من حمى و استفراغ ليهم أكتر من أسبوع لم قرر يجي يقابل كانت حالته سيئة بسبب الفقد و الجفاف. بعد ما اتعملت ليه الإسعافات الأزمة و فحص و خلاص اخد علاجه اتكلمنا ربع ساعة عن أنه ليه ما جاء من بدري لحدي ما هو اقتنع ب أنه ما يكرر الحاجة دي و يكشف من بدري.
اثناء ما أنا بتكلم معاه لقيت المرافق مركز شديد في الحاجة دي بصورة أكتر من اللازم بس افتكرته من خوفه ع المريض و كدا.
اثناء ما هم طالعين أتكلم معاي المرافق قال لي أنا عندي ولدي يا دكتور ليه ٣ سنوات ما مشى و خايف بعد كلامك دا أنه أكون اتاخرت و ما يمشي تاني!
قعد و أخدت منه تاريخ الطفل المرضي و كان كلاتي:
- اتولد في البيت (NVD)
- ما بكى طوالي
- ما مشو بيه المستشفى طوالي
- رضع متأخر
- وأعراض تانية زي أنه ما بسمع كويس.
بس كل الأعراض الفوق دي كانت بتدل على شي واحد انه الطفل عنده شلل دماغي "cerebral palsy".
اسبابه كتيرة منها تعسر الولادة و نقصان الأكسجين زي ما حصل للطفل الفوق دا.
شرحت ليه الحاصل و حولته لاخصائية أطفال ممتازة
و الحمدلله أنه جاء في عمر ما متأخر شديد بداء العلاج الطبيعي و الولد اتحسن أحسن من الأول بكتير.
⭕ فكل العايز أقوله أنه:
- الطفل ما بعرف يشكي ف لم تلاحظ شي غريب طوالي امشي قابل بيه.
- حاول بقدر الإمكان أنه الولادة تكون في المستشفى حتى ولو طبيعية و بالخصوص للأم البكرية.
- الطفل عنده علامات مفروض يمشي في سن معين و يضحك في سن معين لو لحظت أي تأخير ف أي من الحاجات دي قابل أقرب دكتور.
- في الغالب كل شي بتلحق كل ما أتعرف من بدري ف خليك حريص على صحتك و صحت من تحب و اكشف بدري.
ح تلقى في التعليقات خطوات نمو و الطفل متين مفروض يضحك و متين يقعد و متين يمشي اقراها و احتفظ بيها عندك للزمن.
لو حسيت المنشور دا مفيد شاركه مع من تحب ❤️
