https://www.facebook.com/100970282087952/

Pharmacy Advance 019, Khartoum (2025)

12/08/2022

مواصلين معاكم في الفايتمينات❤

شاركونا في التعليقات اي معلومة بتعرفوها عن فايتمين أ و حابين نتكلم ليكم عن شنو المرة الجاية❤❤

14/07/2022

مواصلين معاكم في الفايتمينات❤

شاركونا اي معلومة بتعرفوها عن Vitamin C في الكومنتات👇🏽
و حابين نتكلم ليكم عن اي فايتمين المرة الجاية؟

09/07/2022

تتمنى لكم اسرة pharmacy advance عيد أضحى مبارك، و عساكم من عواده بأتم الصحة و العافية، جعلكم الله من الواقفين بجبل عرفات العام القادم❤❤❤

07/07/2022

بما أنو في تغير في الجو و داخلين من مناخ لي مناخ تاني و النزلات كترت حبت اتكلم عن التلات حبات و الاستخدام الغير رشيد فيها💁‍♀️.. أول شي قبل ما أبدأ التلات حبات ما علاج للنزلة ما علاج ليها ي ناااااس🙅‍♀️النزلة دي مرض فيروسي و التلات حبات بتعالج الالتهابات البكيرية يعني بإختصار ما ف اي علاقة بينهم لأ و انت لمن تستخدمها للنزلة بتساعد البكتيريا في أنها تتعرف على الدوا و بتخلق مقاومة ضدو و تاني لو جاتك عدوى بكتيرية الدوا الحصول ليها ليهو مقاومة من قبل البكتيريا دي ما حيكون نافع يعني باختصار انت حولت البكتيريا دي من كديسة عادي تضربها بعصا و تموت لي أسد العصاية القتلت الكديسة قبيل ما ح تنفع معاه و هنا بتظهر ليك مقاومة المضادات الحيوية.
الكلام دا ما بنطبق على التلات حبات بس على كل المضادات الحيوية يعني لمن يجيك وجع بطن و اسهال ما بتمشي تجيب ليك فلاجيل و تبلع ساي لانو حتحصل ليك مقاومة ضدو برضو و غير كدا انت لمن تبلعو ساي من غير وصفة طبية بتقتل البكتيريا النافعة القاعدة في معدتك و دا بدخلك في مشاكل تانية خاااالص.
باختصار ي عزيري☺️ ما تستخدم مضاد حيوي من غير وصفة طبية ح تقول لي أنا بمشي الصيدلية و الصيدلي بصرفو لي عادي ح أقول ليك ما أي صيدلي شغال في صيدلية صيدلي حقيقي في صيادلة التلاتة شهور إنت بس خليك واعي ما تبلع مضاد حيوي ساي. و لو جاتك عدوى بكتيرية و صرفو ليك مضاد حيوي كمل الجرعة كلها يعني ما تبلع ليك حبتين و تحس أنك كويس و تكسر حنك الباقي لا لا كدا غلط خليك زول واعي و كمل الجرعة للنهاية عشان ما تحصل ليك مقاومة بكتيرية و الدوا الكان ح يعالجك في البداية ح يكون من غير فايدة بالنسبة و تضطر تاخد علاج أغلى بكتيييير من العلاج الأول أو علاج مستورد عديل عشان يعالجك😔

13/06/2022

مواصلين معاكم في الفايتمينات❤
فيتامين "د"
هو شنو؟ بلقاو وين فوايدو شنو و هل ممكن يكون ضار؟؟
كل الاجوبة دي و اكتر هنا بصورة مبسطة و جميلة❤❤👇🏽

01/06/2022

للناس الما خشت كورس الاسعافات الاولية فااتكم والله🥺.
لحدي اسي اشتغلنا ٤ ايام و انجزنا فيها و التقدم كان ملحوظ و التيم منظم و بشتغل بي طريقة مهنية و الاجواء كانت لطيفة و اي حاجة❤.
اليوم الاول و التاني كانت ايام خفيفة عرفونا فيها على انواع الطوارئ الممكن تلاقيك و كيف نتعامل معاها من حالات الاختناق لحدي حالات الصدمات و انواعها و كيف نتعامل مع مرضى السكري و الضغط و الذبحات القلبية و كيف تنقذ زول من حالة الموت المؤقت (الموت الرجعي) و هنا بتحس روحك واحد من ملائكة الرحمة البقولوا عليهم ديلك🤣❤.
و كان في مشاركة و تفاعل من الطلبة و بقيموك حسب مشاركتك ، يعني الشغلة دي م ساي لو تقييمك م عالي و م كنت مستفيد م حتاخد شهادة🤣🤣، لانو الشهادة دي معتمدة و حتتعامل مع ارواح ناس بعدين فا لازم تكون مُسعف مؤهل.
و اليوم الثالث و الرابع هنا بدا شغل الأكشن🤣🔥...
اليوم الثالث كان اليوم بتاع كسر الحاجز بتاع التعامل مع الحقن و كونك تنطعن و تطعن💀 اخدنا عينات دم بسيطة من بعض و كدا يعني، و القاعة كانت مجهزة من ناحية فرشات و قلوفزات و قطن و تعقيم و الاحتياطات دي.
نجي لليوم الرابع الكان اكتر يوم حافل😂😭.
بداية اليوم كانت طبيعية التطبيق العملي كان عن الفراشات و ورونا بنتعامل معاها كيف و بتم استخدامها في ياتو حالات و اتدربنا عليها و كان شبيه باليوم القبليو بس اللهم انه بدل السرنجات(حقن) كانت فراشات، يلا فجأة كدا بعد انتهينا التيم الماسكنا ركب وش ، الطلبة قعدوا في اماكنهم و غيروا لينا الفرشات و جابوا قلوفزات جديدة و قطن جديد و ختوا قدام اي زول سرنجة من غير ما يقولوا اي حاجة، فجأة بدوا يكوركوا و خلقوا لينا حالة ضغط محاكاةً لحالات الطوارئ الحقيقية!😂😭😭 و شغلوا المؤقت على زمن محدود و يلا اي زول يشيل عينة دم من الجمبو😂😭😂😭، لكن الحاجة الكانت ملحوظة انه في خلال الضغط دا كلو اغلب الطلبة كانوا مركزين و الناس اشتغلت صح!، و ان كان هذا يدل على شيء فهو يدل على أن الكورس يؤتي ثماره❤.
و حاليا متحمسين نشوف المفاجئات الحيقدموها لينا التيم الظابط دا في الايام الجاية🤣🔥🔥🔥.
و بالنسبة للناس الفاتهم الاكشن دا كلو م تخافوا دا م حيكون آخر كورس حتكون في عدة كورسات و عن مختلف المواضيع و في مختلف الجامعات فا خلوكم قريبين من صفحة pharmacy_advance019 عشان تستغلوا الفرص الزي دي👌❤🔥🔥🔥.

31/05/2022

طبعا زي ما كلكم شايفين دي ايام تغير اجواء و الالتهابات كترت.
يلا ي جماعة م اي التهاب بياخدوا ليو مضاد حيوي م تاخدوا مضاد حيوي طوالي م تاخدوا مضاد حيوي طوالي م تاخدوا مضاد حيوي طوالي لانو الموضوع دا خطير و اذا استمريتوا كدا المضادات حتفقد فعاليتها و حنخش في ستين داهية😂😭😂😭😂😭.
زاتو مفهوم الالتهاب و النزلة دا مبهم شوية و الناس م فاهمنو الواحد بقول ليك عندي نزلة و هو عندو قحة🤦🚶.
يلا ي جماعة البجي مع تغير الاجواء دا عبارة عن التهاب وظيفي يعني ماف عدوى بكتيرية يعني ماف حاجة للمضاد الحيوي و لو خليتو براو بعد يومين او ٣ بروح.
و لو مضايقك خلااااص و م قادر تستحمل اوريكم تعملوا شنو😂😂...
اول شي اشربوا حاجات دافية و اخدوا مسكنات مثلا اذا كان في وجع حلق اخدوا الحلاوات الزي مثلا زاهي دي و اذا في رشح اخدوا فلوتاب و اذا كانت قحة مصحوبة بي بلغم اخد انتستين و كدا يعني...
طيب ناخد المضادات الحيوية متين🤔؟
بتاخدوها في حالة انو الحالة الالتهابية دي استمرت اكتر من ٣ ايام مهما كان شكلها او في حالة جات مصحوبة بي حمى من اليوم الاول او في حالة يكون في ألم في اللوز من اليوم الاول او اذا كان وجع حلق حاد مصحوب بي تكسير جسم و فتور من اليوم الاول ، و اذا كانت قحة جافة و بس و استمرت اكتر من ٣ ايام اخد مضاد حيوي و بس ، اما اذا كانت مصحوبة بي بلغم اخد معاو شراب القحة.
و علييييكم الله عليكم الله م تبدوا بالأموكلان ولا السيفيكزيم الموضوع م بحتاج😭😭😭، اخدوا الأموكسيسيلين العاااادي دا او أزيثرومايسين حيأدن الغرض باذن الله، في حالة م نفعن معاك حتى تاخد الأموكلان او السيفيكزيم.
و بس اخدوا المضادات الحيوية بي حذر و يستحسن يكتبها ليك دكتور عديل و كونوا بخير❤.

28/05/2022

لسة ما سجلت لكورس الاسعافات الأولية؟
لسة في فرصة🔥
الليلة اخر يوم للتسجيل
م تفوتو الفرصة🔥🔥

22/05/2022

ماشين وين كورساتنا و تعليمنا لسة مستمر🔥🔥

منصة كورسك علينا بالتعاون مع رابطة Pharmacy advance 019 تُعلن عن🥁🥁

*كورس الإسعافات الأولية و التمريض*
*Basic medical skills*

محتويات الكورس:
_اساسيات علم التمريض - العلامات الحيوية - التعقيم و التطهير
_قياس درجات الحرارة - التنفس و النبض
_طرق حقن الدواء و الفراشات و الدربات و أنواعها و كيفية تركيبها
_سحب عينات الدم
_الحقن العضلي و الوريدي و تحت الجلد
_الكسور
_الحروق
_الصدمات
_اللدغات و الصعقات الكهربائية
_الجروح و النزيف
_التسمم و التحسس
_الانعاش القلبي الرئوي
_حالات الطوارئ الأخرى

⭕مدة الكورس: 6 ايام
_ ابتداء من يوم الاحد 5/29
_يوميا عدا يومي الجمعة و السبت

⭕السعر
6,000 جنيه
(شاملة رسوم الشهادة)
⭕يحصل المتدرب على شهادة معتمدة

⭕ يمكن استخراج بطاقة مسعف برسوم إضافية ( 2,000 جنيه)

⭕ الموقع: جامعة السودان للعلوم و التكنولوجيا

⭕ يبدأ في تمام الساعة 1 ظهرا

⭕ للتسجيل و الإستفسار واتساب :
0963103588

20/05/2022

مهتم بصحتك؟!!
طيب رأيك شنو نعرف اكتر عن الفيتامينات البتعتبر من الحاجات المهمة جدا للصحة؟
و ورينا في التعليقات المرة الجاية عاوزنا نتكلم عن اي فيتامين بصورة مفصلة؟
عندك معلومة عن الفيتامينات عايز تشاركها؟ ياريت تنورونا❤

18/05/2022

السلام عليكم كيفكم ي صيادلة المستقبل😂❤.

و جيناكم بي جزء ثاني من انواع الزبائن💃🔥.

اول شخصية عندنا بحب اسميها "انجلينا جولي"😂😂 طبعا دي بتكون المكنة في مجتمع نسوان الحلة و غالبا بتكون مشاطة الحلة زاااتها🤣🤣، و اول ما تجي خاشة بتعرفها من بعيد لانو من كترة الكريمات و الفسخ و الجلخ وشها بكون قلب رمادي و خاشة الصيدلية و هي بتلوك في لبانة🤣🤣، و من اقوالها المأثورة ( الكريم دا ماف منو الماني؟) ، و النوع دا م عندي معاو مشكلة لانها لو لقت كريمها العايزاو بكرة بنات الحلة كلهم بجوك و حتغنى🤣🤣.

و الشخصية التانية اسمها "يااخ انا عاارف!"، دا نوع مستفززز لي ابعد الحدود بكون عارف هو عندو شنو لكن م عارف اسم الدواء شنو😭😭، و طبعا كزول سوداني م بقول ليك م عارف عايز شنو😂🤣، طلبو بكون على شكل ( عايز الكبسولات الصفر الصغاااار ديك اسمها ببدا بي "ازيثرو شنو كدا م عارف")، و في النهاية بعد تعب بتكتشف انو كان محتاج لي شراب قحة🤣🤣.

و في شخصية تانية بسميها "انا م عارف مالي"🤣،الزول دا شكيتو و طلباتو بتكون غريبة شديد، لانو هو فعلا م عارف هو مالو😂😭😂😭، شكيتو بتكون عاملة كدا ( ي دكتور انا من امبارح م قادر انوم لامة فيني سهراجة و م قادر اكل و عندي وجع نوايط الوجع بعمل "فو فو فو" كدا بجي و بروح)🤣🤣🤣، المشكلة النوع الزي دا بكون فعلا متجرس و م بتعرف تديو شنو لانو بربكك من كترة الاعراض الغريبة😭😭، و حتى كان اديتو دواء مرات م بقتنع لانو شايف روحو عيان اكتر من كدا🤣🤣، عشان كدا من البداية لمن يجيك زول م عارف هو مالو خليو يمش الدكتور عشان يعرف هو مالو🤣🤣🤣.

و بس ان شاء نكون خفيفين ظل عليكم و زي ما قلنا المرة الفاتت البوست دا للفكاهة بس م اكتر من كدا❤، و ي دكاترنا الاعزاء م تبقوا بخيلين ياااخ ارح ورونا في الكومنتات انواع الزبائن البجوكم انتو برضو ولا احكو قصة ظريفة حصلت ليكم ولا اي شي ياااخ يلا يلا😂🏃🏃🏃.

15/05/2022

لو سألتكم يعني شنو تداخل دوائي 🤔؟
ببساطة كدا 💁‍♀ يعني أنك لمن تستعمل نوعين مختلفين من الأدوية مع بعض و تحصل على نتيجة سيئة أو نتيجة غير مرغوب فيها تأخر فترة شفاءك مثلا لمن تستعمل المترونيدازول أو الفلاجيل مع الميبدازول المستخدم في علاج الأميبا (الدايدان) هنا حيصل تفاعل بينهم يؤدي لي ظاهرة تسمى ستيفن جوبز سندرم و هو ظهور بقع حمراء في الجلد قد يؤدي للوفاة😢، و ما ضروري انو يحصل تداخل دوائي بين الأدوية بس ممكن كمان يحصل بين الأدوية الأطعمة كمان.. مثلا لمن تأخد دواء علاج الملاريا مفروض أنك تبعد عن تناول القريب فروت بشكل نهائي لأنو القريب بزيد تركيز دواء الملاريا في جسمك و الكلام دا بدخلك في سمية يعني بحصل جسمك بسمم لانو تركيز الدواء في جسمك زاد عن الحد المسموح به. من التداخلات البتحصل برضو لمن تستخدم الفلاجيل و أنت سكران لأنو يحصل تفاعل بين الفلاجيل و الكحول ( الخمره أو المريسة)🍻 ممكن يؤدي للوفاة عادي 😳 فااالازم توقف الخمره طول فترة العلاج و بعد تلاتة أيام من إنتهاء فترة العلاج ما تتعاطى خمره.
طيب نجي للمهم أعمل شنو عشان ما أقع في خطر التداخل الدوائي دا؟؟
أولا 💁‍♀ما تستخدم أي دواء دون إستشارة الصيدلي أو الطبيب و ما تصرف أي دواء من غير روشتة عشرمية مرة 🤚✋.
لمن تجي تصرف أي دواء من الصيدلية ما تشيلو ساي و تمشي😒أسأل الصيدلي عن نوع الأطعمة المفترض ما تأخدها مع الدواء دا شنو و إذا كنت بتستخدم دواء تاني قول ليهو الحاجة دي عشان إذا في تداخل بينهم يوريك و ينصحك بشنو😌 ، و السؤال عن الحاجات دي من حقك يعني فا أسأل عادي عشان صحتك☺️🌹.

12/05/2022

السلام عليكم كيفكم ي صيادلة المستقبل😂❤

طبعا شغل الصيدلية بحتاج منك انك تتعامل مع مختلف انواع الزبائن و حتلاقوا ناس كتار بي شخصيات مختلفة و خلفيات مختلفة شديد و حبيت ادردش معاكم شوية عن انواع الشخصيات الممكن تجيكم.

اول شي في نوع بحب اسميو النوع "السوداني"، و التسمية دي م جات من فراغ لانكم كلكم عارفين انو شعبنا العظيم دا عامل روحو بعرف اي حاجة😂 ، يعني دا بجيك و بعمل ليك فيها انو صيدلي و بغالطك في الصغيرة و الكبيرة😂، و اغلب قناعاتهم جاية من انو الدواء دا نفع معاي زمان ولا نفع مع فلان داك، و من اقوالو المأثورة ( عندي ميلاريا قلبت تايفود ) 🤣🤣 ، يلا النوع دا مهما معطك و غالطك م تنصاع لي طلباتو نهائي😂، لانك انت كصيدلي من مسؤوليتك انك تصرف للمريض الدواء الصح عشان يتعالج و تحاول تتحملو و تفهمو زاتو لانك لو مشيتو ساي ممكن يضر نفسو و يضر غيرو.
النوع التاني اللي هو "الشكاي"😂، دا بحسسك انو امراض الدنيا دي كلها عندو و شكوتو و اعراضو البذكرها ليك بتكون كتيرة و مبالغ فيها😂، و من اقوالو المأثورة ( انا شاعر بي ميلاريا ) 🤣🤣، دا طوالي تحاول تقنعوا انو يمش يقابل دكتور اول لانك كصيدلي م مؤهل انك تشخص مرض و الدواء الحتديو ليو على حسب اوهامو ممكن يسبب ليو مضاعفات.
و في نوع اسمو "المستهبل"😂😭، و دا اكتر نوع معاط ممكن يلاقيك، لانو بحسسك انك بتكرهو و عايز تغشو و بتاع😂😭، و انواع الغش البتهموك بيو بتقسم لي نوعين :-
النوع الاول اسمو "انت م دكتور"😂😭😂😭، و دا غالبا ممكن برضو يتصنف تحت مظلة النوع "السوداني" 🤣🤣🤣دا يلا بحبطك و بحسسك انو قرايتك و جريك و تعب عمرك كلو م منو فايدة و لسلامتك النفسية اسفهو ساي😂😭.
و النوع التاني اسمو " انت عايز تاكل حقي"😂😭، و دائما حجتو بتكون انو الدواء دا الاسبوع الفات لقيتو بالسعر الفلاني ولا بقول ليك في الصيدلية التانية ديك لقيتو ارخص😂😭، دا برضو تحاول تتجاوزو زي النوع الاول لانك عارف انو انسان مستهبل😂😂.

و بما انو جات سيرة القروش و الماديات دي ، صح في ناس كتار مستهبلين و م عايزين يدفعوا ، لكن مرات في ناس فعلا الظروف بتكون ضاغطة عليهم في النهاية كلكم عارفين اوضاع البلد ، و المستهبل من المحتاج بكون ظاهر ، فزي ديل حاولوا ساعدوهم بانكم تختوا صناديق صدقة في الصيدلية او حتى ممكن تشتري ليو الدواء من مالك الخاص في النهاية دي مهنة انسانية و حاول كون سبب عشان ربنا يمنح بيو الناس نعمة العافية❤.
و ديل كانوا جزء بسيط شدييييد من انواع الزبائن و جبت ليكم الناس المعاطين من باب الفكاهة بس😂😂، لكن في ناس كتاار بكونوا فاهمين و زابطين و وناسين و بتحصل ليك معاهم مواقف مطرفة شديد😂😂.

و يلا ي الصيادلة الأعزاء م تقعدوا ساكتين ساي شاركونا معاكم اكتر انواع الزبائن البمروا عليكم تحت في الكومنتات او احكوا لينا مواقف حصلت معاهم ولا اي حاجة بس م تسكتوا ساي🏃🏃🏃.

08/05/2022

" نتيجة مسابقة حفظ سورة يوسف " ♥️🔥

إنه لمن فخرنا إعلان نتيجة المسابقة، التي تم الإعلان عن انتهائها مسبقاً. 🔥

_في المركز الأول :
1/ الحورية : شيماء محمد.
2/الحورية : وفاء يعقوب.

_ المركز الثاني :
1/ الحورية : غيداء مدثر.
2/الحورية : براءة عبد القادر.
3/ الحورية : إيمان كمال.

_ المركز الثالث :
الحورية : سواكن محمد.

_المركز الرابع :
الحورية : روان الشيخ.

_المركز الخامس :
الحورية : مهاد مصطفى.

كل التهاني والمباركات للمتفوقين 💕🔥.

# اللهم فقهنا جميعاََ في الدين، وعلمنا التأويل. 💕

02/05/2022

بسم الله الرحمن الرحيم

(لَّاخَيْرَ فِى كَثِيرٍۢ مِّن نَّجْوَىٰهُمْ إِلَّا مَنْ أَمَرَ بِصَدَقَةٍ أَوْ مَعْرُوفٍ أَوْ إِصْلَٰحٍ بَيْنَ ٱلنَّاسِ ۚ وَمَن يَفْعَلْ ذَٰلِكَ ٱبْتِغَآءَ مَرْضَاتِ ٱللَّهِ فَسَوْفَ نُؤْتِيهِ أَجْرًا عَظِيمًا)
تم اليوم وضمن مبادرة
توزيع كسوة العيد على عدد من الاسر المحتاجة
احساس جميل ان تكون سبب في سعادة اسرة
احساس جميل انك تشووف السعادة والفرحة في عيون الاطفال

نسأل الله القبول، وجزى الله كل من ساهم
.. وكل عام وانتم بخير ❤️🥀

28/04/2022

"ليلة القدر"

تعد من أفضل الليالي في رمضان وتكون في العشر الأواخر، وقد أنزل الله فيها القرآن، وسميت أيضاً بالليلة المباركة لكثرة الخير والبركات التي تتنزل على المؤمنين فيها؛ يقول الله تعالى: «حم وَالْكِتَابِ الْمُبِينِ إِنَّا أَنزَلْنَاهُ فِي لَيْلَةٍ مُّبَارَكَةٍ إِنَّا كُنَّا مُنذِرِينَ فِيهَا يُفْرَقُ كُلُّ أَمْرٍ حَكِيمٍ أَمْرًا مِّنْ عِندِنَا إِنَّا كُنَّا مُرْسِلِينَ رَحْمَةً مِّن رَّبِّكَ إِنَّهُ هُوَ السَّمِيعُ الْعَلِيمُ» [الدخان:1-6].

_سميت بليلة القدر لأن مقادير الخلائق تقدر فيها ((فيها يفرق كل أمر حكيم)) أي تقدر فيها مقادير الخلائق على مدى العام، فيكتب فيها الأحياء والأموات، والسعداء والأشقياء، وكل ما أراده الله تبارك وتعالى في تلك السنه.

_فضل ليلة القدر :

_ورد في القرآن الكريم قوله تعالى: «إِنَّا أَنزَلْنَاهُ فِي لَيْلَةِ الْقَدْرِ{1} وَمَا أَدْرَاكَ مَا لَيْلَةُ الْقَدْرِ{2} لَيْلَةُ الْقَدْرِ خَيْرٌ مِّنْ أَلْفِ شَهْرٍ» [القدر:1-3]، فبين الله تعالى أنها أفضل من ألف شهر، أي ما يقارب 83 عامًا، أي إن اغتنام ليلة القدر بالأعمال الصالحات، خير من عمل ألف شهر، وهذا فضل عظيم.

_وصح عن رسول الله صلى الله عليه وسلم أنه قال :((مَنْ قَامَ لَيْلَةَ الْقدْرِ إيماناً و إحْتِساباََ غُفِرَ له ما تَقدَّمَ مِنْ ذنْبَه))
وقيامها يكون ب :الصلاة والذكر والدعاء وقراءة القرآن وغير ذلك من وجوه الخير.

_فضل الله عز وجل ليلة القدر بأربعة أمور: نزول القرآن، ونزول الملائكة، وهي ذات القدر والمكانة الرفيعة، ونزول الروح ،ونزول السلام والطمأنينة.

_علامات ليلة القدر :
ذكر منها:
-قوة الإضاءة والنور في تلك الليلة.
- طمأنينة القلب.
-إنشراح صدر المسلم.
-الرياح تكون فيها ساكنه، والشمس تطلع في صبيحتها من غير شعاع.

_من الأقوال أو الأدعية : قال الرسول صلى الله عليه وسلم للسيدة عائشةَ رضي الله عنها لما سألته إن وافقَتْ ليلةَ القدرِ ما تقول فيها؟: «قُولِي: اللَّهُمَّ إِنَّكَ عَفُوٌّ تُحِبُّ الْعَفْوَ فَاعْفُ عَنِّي».

نسأل الله أن يبلغنا وإياكم هذه الليلة المباركة. ♥️

25/04/2022

هل ممكن أوقف سجاير من غير رجعة 🤔؟؟
أكيد طبعا😌 بتقدر توقف السجاير نهائي و ما ترجع ليها تاني🙅‍♀
عشان تعمل كدا لازم يكون عندك عزيمة قوية لأنو موضوع أنك توقف تدخين صعب شديد ،و نقص مادة النيكوتين فجأة ( المادة الموجودة في السجاير) بعد ما كان الجسم متعود علي وجودها بكميات كبيرة بسبب دوار و صداع و إعياء و الأرق ، و خلال الفترة الداير توقف فيها تدخين دي حاول بقدر الإمكان الإبعاد عن البيئة البتخليك ترجع تاني للسجاير، فحاول إبتعد عن أصحابك المدخنين ، و أبعد عن كل أنواع السجاير الفترة دي لأنو ممكن تمر بي لحظة ضعف و ترجع تاني تسجر😔 و لمن ترجع للتدخين كونو أنك تبدا في التخلي عن السجاير من جديد حاجة صعبة بالنسبة ليك😔😔.
ممكن برضو تشغل نفسك بي أي شي تاني في زمن السيجارة ممكن تضرب لي زول عزيز عليك مثلا😉 أو تتونس و تعقد مع أهلك أو أحضر مسلسلات ، مارس الرياضة أقرأ كتب ، ساعد أمك في المطبخ ، أخد ليك حمام سخن بساعدك تسترخي ،أعمل أي شي بخلي بالك مشغول من السجاير أو ما بخليك تمسك السجاير و تسجر . دا كلو عشان تشغل نفسك و تحاول تنسى حاجة إسمها سجاير.
الكلام دا كلو قلناهو ليه؟ عشان صحتك بتهمنا و صحة رئتيك و قلبك و أسنانك برضو بتهمنا لأنو التدخين بدمرهم ليك كلهم😔😔 و يؤدي إلى سرطان الرئة حمانا الله و إياكم ، و بصفر السنون و شوية شوية حتفقد سنونك و دا غير رائحة الفم الكريهه الطبيعي حتكون ملازماك 😔😔 قادر تتخيل حجم المشكلة 😔💔و غير كدا التدخين بضر الحواليك برضو عن طريق التدخين السلبي دا لما الناس الحواليك يستنشقو الدخان الطالع من السيجارة يعني إنت ما بتأذي نفسك و بس الأذى بمتد لعائلتك و الناس البتحبهم بطريقة غير مباشرة😔💔 ودا ممكن يكون أكبر دافع ليك عشان توقف تدخين و تبطل إدمان سجاير، و أكيد لمن إنت تنوي توقف تدخين كل الناس حتكون داعماك و مسانداك في الموضوع لأنو صحتك بالدنيا 🌹❤️.
-advance

21/04/2022

الفائزة بالمسابقة الفاتت
🥁🥁🥁
Awatif Hamad KabbaShi 🤩🤩🥳🥳 # مبروك عواطف إتواصلي مع إدارة الصفحة للحصول على الجائزة🔥🔥

*كيف انقص وزني في رمضان* ؟؟!!
طيب ي جماعة كلنا عارفين أنو صيام شهر رمضان من أركان الإسلام التي فرضها الله عز وجل على المسلمين حيث إنه يعتبر من الشهور التي تهذب الروح وتقرب المسلم إلى الله❤️،فضلا عن أن صيام رمضان له الكثير من الفوائد الصحية الرائعة التي تحمي الجسم من الأمراض وتعزز الصحة، من أهم الفوائد الصحية لصيام شهر رمضان..
شهر رمضان فرصة ممتازة لإنقاص الوزن والتخلص من السمنة ، بشرط ما نكتر من الأطعمة البتحتوي على الدهون 🍖🥩🍕 لكن للأسف معظم الناس في الإفطار بركزو على تناول المحشاي و المحمر و المشمر😔 ديل نوع وزني زاد شديد في رمضان😔 بسبب عدم تركيزهم على تناول السلطات و الفواكه.
الصيام بحافظ لينا على صحة القلب🫀 و بحسن أدائه و بحافظ لينا على صحة الشرايين نسبة لدور الصوم في التخلص من دهون الدم الضارة و تقليل الكولسترول في الجسم، و كمان التقليل من مشاكل ضعط الدم .
الصيام بعلاج لينا المشاكل الجهاز الهضي الصوم ممكن يكون فرصة للسيطرة على العديد من المشاكل التى تتعلق بالجهاز الهضمي ، فهو فرصة لراحة الجهاز الهضمي، و فرصة لتقليل إفرازات الجهاز الهضمي ، و المساعدة في الحفاظ على توازن السوائل في الجسم.
تخليص الجسم من الفضلات فمن فوائد الصيام الصحية و التغذوية أنه يخلص الجسم من المواد السامة ، و بعزز لينا صحة الكبد و المناعة ، و الوقاية من الإلتهابات.. خصوصا إذا كترنا من السلطات و الفواكه.

وبالعافية عليكم❤️❤️❤️.

Pharmacy Advance 019