13/12/2023
كان في بالي انو قصة النزوح أو بالاصح ال forced displacement دي عبارة عن خطوة واحدة … انو تشيل البتقدر عليهو زي مابقولوا و تهرب أو تشوف ليك مكان امن … لكن اكتشفت انو الموضوع دا مراحل …
امكن جزء من المراحل دي الناس اتخطتها ، لكن برضوا مهم انو نكون واعين بي انو جزء كبير منها لسع نحن بنمر بيها حاليا …
طيب … في 5 مراحل في عملية التهجير بالقوة حصلت لينا كسودانين ، وكل مرحلة عندها اثارها النفسية … في المراحل الاولي ح احاول امشي فيها سريع … لانو تقريبا الناس عارفنا ومرات بيها ….
مرحلة ماقبل التهجير بالقوة Pre-Displacement/Pre-Migration
دي المرحلة في بداية الحرب ما بدت … ببساطة انو مافي امان و الضرب حولينا و الكلام الحصل دا كلو … و هنا بنبداء التفكير في الهروب لي مكان امن … لانو ببساطة يبقي ماعندنا خيار منطقي غير كدا … طبعا الحاجة دي بتعتمد علي عوامل كثيرة منها حدة النزاع و القدرة المالية للشخص وحاجات تانية كثيرة …
مرحلة الهروب والبحث عن الامان Flight/Escape
طيب في المرحلة دي كنا خلاص بدينا نستف الشنط و الناس قررت تطلع ، هو الحقيقة ماكان في وقت تستيف لي ناس كثيرة ، بس لكن عشان الفهم يقع …
أهم نقطة في المرحلة دي هو الشعور بالخطر من التنقل في حد نفسوا ،ودا كان واحد من اسباب ال truma لعدد كبير من الناس … انا بتكلم عن المرحلة من أول ما الناس طلعت من البيت لحدي ما وصلت الاقاليم … أو المدن الامنة جنب الخرطوم ، أو حتي لي الناس القدرتا تطلع دول تانية من أول الحرب .
مرحلة الاقامة الموقتة Transit and Temporary Asylum
دي هنا وقت ما الناس مشت قعدت مع اهلها ، و الناس اطمنت شوية و اخذت نفسها … والمرحلة دي مؤقتة عند ناس كثار ، عادتا لانو الاوضاع المعيشية مابتسمح انو الزول يقعد كثير ، فبيبداء بالتفكير في مرحلة اللجوء لي دولة يقدر يعيش فيها و بلغتنا كدا مايتقل علي اهلوا و كمان يقدر يمشي حياتوا ….
ما بالضرورة المرحلة دي تكون في السودان … ممكن تكون في اي بلد مجاور ، وما بالضرورة كمان انوا تكون سكنت مع اهلك في الفترة المؤقتة دي ، ممكن تكون سكنت براك أو أجرت أو كدا …. الفكرة في إنو دا بالنسبة ليك اقامة مؤقتة و انت جواك عارف انو لسع في خطوات تاني عشان تعملها ، عشان توفر حياة أفضل ليك ولاسرتك .
برضوا ما بل الضرورة انو تكون المرحلة دي في اقامة مؤقتة ؟! ممكن تتحول لي اقامة دائمة ……. اذا الزول ارتاح لي التواجد في المنطقة و شعر انو ممكن يقدر يتاقلم و يشتغل و يعيش اولادوا زي ما يقولوا …
مرحلة طلب اللجوء Arrival and Asylum Seeking
هنا دي مرحلة الاقامات و طلب اللجوء و كل الاجرات دي ، وطبعا دي في حد نفسها عوامل مرهقة في مرحلة الناس عايشة مرحلة ضعف وهشاشة نفسية كبيرة ، لانو معظم الناس تحت ضغط مالي و تحت ظروف انسانية واجتماعية صعبة ..
مرحلة الاقامة الدائمة و طويلة المدي Long-Term Integration/Permanent Settlement
في المرحلة دي خلاص ، الزول بكون امورو وضحت الي حد ما ، و قدر يمتص الصدمة دي و بعيش حياة ممكن نقول مقبولة بالنسبة ليهو في البلد الجديد .. حتي ممكن انو يكون آخذ اقامة أو لجوء ….
بالرغم من انو المرحلة دي الي حد ما بكون في نوع من الاطنمئنان والاستتقرار ، لكن يظهر تحديات جديدة ؟!!! زي مشاكل الهوية والتغير في الثقافة و تربية الأولاد و التحديات الجديدة دي …
في كل مرحلة من المراحل دي ، ممكن اي واحد مننا يتعرض لواحظ من الاضطرابات النفسية المتعلقة بالحروب ، وهم 3 مهم جدا نعرفهم …
اضطراب مابعد الصدمة
الاكتئاب
اضطرابات القلق
بالنسبة لينا كمواطنين … لقوا نفسهم فجأة تحت الظروف دي ، لازم نتفهم انوا الموضوع نفسيا مرهق جدا ، ولازم نخت في بالنا أهمية الدعم الاجتماعي و الروحانيات و التطور الذاتي ك اساس في التاقلم مع الظروف دي …
