Chhungkaw Nun (2025)

07/12/2022

MOVIES HMANGIN KRISMAS MALSAWMNA I DAWNG TLANG ANG U.

Kristiante k*t zinga k*t ropui ber Christmas (KRISMAS) chu kan thleng leh dawn ta. Chhungkaw tin inbuatsaih dan erawh a inang lo mai thei.
Chhungkaw tam tak chuan he hun awmzia tilang thei Krismas movie en hovin chhungkuaah awmze nei takin hun an hmang mek.

Tun hnai a chhuak Kristian movies (tun picture kan tarlan) te chuan Kristian ringtute nunah mai nilo, ring lo mite nunah thleng a tha lam zawngin nghawng nasa tak a nei a ni. Athente chu Theaters ah a zawn mai theih a, a then chu Streaming Platform ah a en theih bawk ang.

Movies awmze nei tak hmanga in Chhungkaw nuna Pathian ropuina a lan theih nan, duhsakna nen ka rawn tar lang a ni e.

10/11/2021

FATE’N MI THIL AN RUKIN

I fate’n pawisa emaw, hmun dang atanga infiamna toys an lo hawn ruk palh hi thil awm thei a ni. Chu chu sual a ni tih pawh an la hrelo a ni mai thei. An hriat phak tawk chu “an duhna” hi a ni tawp mai. Chu an duhna rilru control thei tura chakna an la tlakchham em avanga ru an ni, tih chu rilru zau taka kan hriatthiampui a, chu mizia chu an mahni nen ngeia kan chin fel a pawimawh a ni. Hetianga hriat loh hlana thil lak ruk an hman hian, an puitlin hunah ruk an rawn ru ang tihna erawh a ni hauh lo.

Hetianga kan fate’n thil an ruk hian nu leh pa-te kan zak a, kan thin a rim em em bawk a. Thinrim avanga k*tthlak, naupang vuak leh velh aiin, ENGVANG NGE LE? “Why”, “ENGTIN NGE” hma kan lak ang a, kan inzirtir ang le? tih hi naupang hmakhaw tan a tha zawk a ni.

ENGVANGA RU NGE AN NIH LE?

• A chunga kan sawi tawh angin, an duhna rilru an la control theih rih loh vang.

• An neih ngai loh thil thar an neih chu, thiante hnena intihtheih an duh vang.

• A awh em vang.

• A duhzawng nu leh pa’ten kan lei sak loh vang.

• A duhzawng leina tur pawisa a neih loh ang bawkin, nu leh pate’n an lei sak theih loh vang.

• Tuna kan ziah loh a chhan leh vang tam tak a la awm thei bawk ang. Chu a chhan leh avangte chu nu leh pate’n ngun taka kan ngaihtuah a ngai bawk.

Naupangin hmun dang atanga thil an ruk chu nu leh pate hian chawi a tul pawhin chawi ngama, mawhphurhna kan lak hi a pawimawh em em a ni. Chu kan thiltih chu naupang pawhin an hre ngei ngei tur a ni. Chu an thil ruk a vanga nu leh pate sen zat hu nena inmilin in lam hna kan thawh tir thiam pawh a pawimawh em em a ni. Entir nan, In chhung tih thianghlim, thleng sil leh a dangte. Chutianga hremna kan pek chu an thil ruk vang a nih thu leh nakin a ti tawh lo tura ngun taka kan zirtir chu thil pawimawh tak a ni.

NAUPANGIN THIL AN RUKIN ENGTIN NGE KAN TIH ANG!

* Thil ruk i duh loh zia lantir la, hetiang thil reng reng i ngaihdam theih loh thu hrilh ang che.

* Engvanga ru nge a nih tih zawt rawh. Tunhma in thil a ru ngai leh ngai loh zawt rawh. Vawi engzah nge thil a ruk tawh zawt rawh. Mahse, vin tak leh thimrim hmel pu in zawt suh ang che. Amah ngaihnep hmel pu pawhin zawt suh ang che. Thutak leh hmangaihna lantir chungin zawt ang che.

* Thil ruk that loh zia hrilh la, hring nuna nungchang mawi a pawimawh zia hrilh uluk hle ang che.

* A thiltih chu amah ngeiin mawhphurhna la ngam turin hrilh rawh. A thil ruk chu a lakna ngaiah amah ngei dah tir leh rawh. Chu mi hunah chuan nangmah ngei pawihin i zui a ngai a ni. Fata tihsual a nih avangin nu leh pa pawhin mawhphurhna lian tak kan nei a ni tih hriat a tha.

* A chunga beiseina leh rinna i nghah chu, chu a thiltih chuan engemaw chen a tichhia a ni tih hriattir bawk rawh. Tunhma anga a chunga rinna leh beiseina nei tur chuan, hun engemaw chen enthlak a ngaih thu hrilh bawk rawh.

Ref : www.familyeducation.com

I duh chuan i “Save” in I “Share” thei. Mahse, Copy leh Paste nena hmun danga post lo hram turin ka ngei a che u.

28/10/2021

I FATE THUSAWI NGUN TAKIN NGAIHTHLAK SAK RAWH

I fate thusawi kha ngun takin ngaihthlak sak thin ang che. “Naupang thusawi mai mai” tiin ngaihthah miah suh ang che aw. Naupangin i hnena thu an rawn thlen kha i tan chuan ho hle mahse, naupang tan chuan a pawimawh em em a ni. An naupan laia thusawi i ngaihthlak sak lo a nih chuan, an puitlin huna thil pawimawh tak tak sawi tur an neih pawhin an hrilh tawh bik lovang che.

Engvang nge tih chuan, an naupan laia an tan thil pawimawh tih em em, i hnena an rawn sawi nang puitling tawh tana ho em em si kha i lo ngaihsak loh avangin, an puitlin hnuah “Ka nu leh pa hi hrilh mah i la, min ngaihsak leh dawn chuang lo” tiin an hrilh tawh lo mai ang che.
A tawpna a buai tur chu nangmah tho tho kha i ni ang.

26/10/2021

NU LEH PA-TE HNENA LEHKHATHAWN

To/ Ka Nu leh Pa duhtak,

Chhungkaw hlim leh in tana fa rotling, ka tana nu leh pa rohlu in lo nih beiseina nen lehkha nena ziaka duhthusam ka rawn sawi hi, min lo ngaih pawimawh sak hram turin a hmasa in ka rawn ngen a che u. He lehkha ka rawn ziahna chhan ber chu, nangni nena kan inkar leh kan nitin indawrna a lo that zel a, chhungkaw hlim tak kan lo nih theih nan a ka ngaihdan rawn sawi lanna a ni ber e. A hnuai a mite hi ka duhdan leh ngaihdan chu a ni.

1. Ka duhzawng a piang min tihsak tum suh u. K*t khap khat lek ka dil min tihhlawhtlin sak chuan, hlam khat lai ka beisei phah fo thin. Ka duh tak tak leh mamawh tak tak ni lo thil thlengin ka dil phah fo thin che u loh nan.

2. Aw key sang tak leh vin takin min hau hram suh ang che u. Chutianga min tih chuan, ka ngaihsanna che u leh in chunga ka rinna che u a tlahniam thei a nia. Chu mai bakah kei pawhin ka hriat loh hlanin in tihdan ka lo zira, vin taka mi biak ka lo thiam phah leh thin. Vin taka mi ka biakin in hnen atanga ka zir a ni tih in hre lovin, min hauh phah nan in hmang leh ngei dawn si a.

3. Thupek khauh tak leh tawngkam vin takin min tir hram suh ang che u. Ti tura min duh chu aw nem tak leh tha takin min tir mai u la, kei paw'n hlim takin ka ti ve zel mai ang.

4. Ka chunga in thutiam hlen ngei ngei tum hram ang che u. In thutiam theihnghilh mai mai suh ang che u. A chhan chu in thutiamah beiseina lian tak ka neih vang a ni.

5. Mi dangte nen min tehkhin hram suh ang che u. Mi dangte aia thiam lo leh tling lo zawk anga min sawi hian, ka rilru a na a, mahni inrin tawkna ka neih tlem phah dawn a ni. Mi dangte aia thiam leh tha zawk ang pawhin min sawi hek suh u, mi dangte hriat a tan a mawi lo mai ni lovin, ka nunah chapo rukna chi in tuh tih in hriat ka duh bawk a ni.

6. A pawimawh viau loh chuan thil pakhat ka zawh hmain, thil dang min tir hram suh ang che u. Ka rilru a buai hma em em a, tih tur bik hre lovin ka awm phah thin.

7. Ka tan tih harsa tak anga a lan vang ngawtin thil engkim hi min tihsak suh ang che u. Mahni inrin tawkna ka lo neih ve theih nan, ka tih theih tur awm a piang chu min tih tir rawh u. Chuti loh chuan, mi hmaah engmah thiam lovin ka awm palh ang.

8. In sumdawnna vang emaw, in hna dang vang emaw ka hmaah dawt sawi hram suh ang che u. Ka hnena dawt sawi ni lo mah u la, dawt in sawi tih ka hriat chuan i chunga ka rinna leh innghah ngamna a tlem phah sawt ang.

9. Thil in tihsual chang pawhin "ka ti sual a ni" tia huai taka in sawi ngam ka beisei. Chutianga nun puitling tak chu in hnen atanga zir ka duh a ni.

10. Engemaw harsatna ka thawh changa in hnena thu ka thlenin, in tan a hau viau pawh a ni mai thei. Mahse, ngun takin min ngaihthlak sak u la, min hriatthiam pui u la, a tul chuan min tanpui u la, hmangaih takin min hrilfiah u la, harsatna chhel taka tuar thei tura chakna ka lo neih theih nan min fuih bawk ang che u.

11. Ka nu leh pa in nihna chu ka hriain ka zah em em ang che u. Mahse, in thian tha anga min kawm ka beisei a ni. Nu leh pa leh fate thian anga inkawm loh tur tih a awm chungin ka hre lo.

12. Nangmahni pawhin in tih duh loh leh in tih ngam loh thil chu, naupang ka nih avang ngawt a ti ngam turin min ring suh u la, in tih duh loh leh sawi ngam loh thil ti turin min tir hek suh u. Entirnan:- Thenawmte hnena thil va dil, mite hnena leiba va dil tih ang vel. Kei pawh ka zak thiam ve tho a ni a, tih min hriat ka beisei.

In fa duhtak,

——————————————————————-
Thu ziak hrang hrang a mi lakkhawm a ni.
By:- Victor Zika

25/10/2021

INHMANGAIH TAWNNA (Mahni, Thian leh Chhungkua ah)

Kan hringnun-ah hian nitina thlah miah lova kan vawn tlat tur thil panga a awm a, chungte chu,
1. Chhungkua (Family)
2. Friend (Thian)
3. Health (Hriselna)
4. Spirit (Nuna)
5. Work (Hna)

Hemi thil pangate hi kan vuan rei tial tial a, number 1- 4 chu darthlalang no (Glass) ang maiin kan rawn hmu ta a, Number 5 na hna erawh Ball angin kan hmu ve thung a ni.

Hemi nitin a kan vawn tlat tur thil panga zing atanga 1-4 Chhungkua, Thian, Hriselna leh Nunna (Glass) ang hi kan tih tlak palh vaih chuan a keih ngei ngei ang. Chu mi keh tawh hnu chu remkhawmin han char tha leh mah i la, ngai a awh tawh miah lovang. Chu mai bakah kan chhar hmaih a awm chuan, rah fuh palh a hlauh awm em em bawk a ni. Hemi pali Chhungkua, Thian, Hriselna leh Nunna hi kan tih tlak palh vaih chuan, khawvelah engmah rengin a ai an awh zo dawn lo a ni.

Mahse, Number 5 na, Hna erawh titla palh mah la, i k*t chhungah a ngai te in a rawn awm leh tho ang. Kan nitin hna hi pawimawh viau angin lang mahse, kan tihtlak palh pawhin a keh dawn lova, a ngai bawkin kan k*t chhungah a awm leh dawn a ni. Hna hi hmun khatah remchang lo mahse, hmun dangah a aia remchang zawk hi kan hmu fo a ni.

Hna hi nitin kan nunah kan eizawnna a ni a a pawimawh ngei mai. Mahse, hmun khatah hna chan mahla, hmun dangah i hmu leh tho ang.

Mahse, Chhungkua, Thian, Hriselna leh Nuna erawh vawi khat i tih tlak vaih chuan damchhung inchhiarna a ni dawn a ni.

“Lalpa Chhungkua, Thian, Hriselna, Nunna leh nitin thawh tur hna min pe a ka lawm e. Ngaih pawimawh zawktur min hrilh zel la, ngawih pawimawh dan kawng min zirtir la, he ka nuna thil pawimawh tak tak pangate nena inhmangaih tawn dan nitin min zirtir ang che”
Amen.

Note:- He thu hi, Coca Cola CEO Brain Dyson in a, Georgia, Tech Confferience-a a thusawi nghahchhana ka rawn ziah leh lehlin a ni e. By:- Victor Zika

25/10/2021

RAH THA I SENG DUH CHUAN, CHI THA TUH ANG CHE

Sermonna leh engemaw thusawihona reng rengah pawh hian “I nu leh I pa chawimawi rawh, zah rawh, hmangaih rawh, enkawl rawh, adt.” hi chu hriat tur a tam ngei mai. “In fa, naupangte chu hmangaihna nen enkawl rawh, i hun hlu tak pe rawh, unconditional love nen hmangaih rawh” tih sermon leh sawihona erawh hriat tur a awm zeuh zeuh chauh niin a lang. Ka hre sual a ni mai thei le, ka beng hriatna leh ka chhiarna atanga ka sawina mai a ni e.

“Your child will follow your example, not you advice” “I fa hian i zirtirna ni lovin, i tihdan zawk kha a rawn zui dawn a ni”. Kan ka leh thusawina ah chuan, I nu leh I pa chawimawi rawh, hriatthiamna zau tak nen enkawl rawh, nu leh pa zah thiam hi malsawmna a ni, tiin kan in zirtir fo thin. A dik. Sawisel tur ka nei lo. Mahse, belh tur erawh ka nei tlat a ni. Chu chu, “Nu leh pate zirtir hmasa phawt lova fate in zirtir zawk hi, a fuh ber lo a ni” tiin ka sawi duh ve tlat mai.

Nu le Pa, mahni aia upate ka zirtir ni lovin ka sawi hmuh duh zawk mai a ni. Kan lo upa tial tial a, kan fate thinrim leh beidawng khawpa zirtir ngailo tura nu leh pa hriatthiamna nun, thinlung taka hmangaihna nena enkawl tura a hranpa taka zirtir ngeilo tur kawng ka hriat ka rawn sawi ve duh lawk a ni. Chu kawng chu, nu leh pa kan rawn nih atanga kan zawh leh zawm ¬¬¬tan tur kawng hlawk tak si, harsa tak si a ni.

Eng ang kawng nge ni ta le? Fanaute hi keimahni nu leh pate hian thinlung tak leh hmangaihna famkim nen i enkawl hmasa phawt ang u. Bank takngial ah pawh kan pawisa dahsa lo chu kan la chhuak thei bik hlei nem! Keini nu leh pa te hi kan lo upa tial tial a, kan that lai, kan fate naupan laia an hnena zirtir tur ang kan zirtir loh thilte, kan pek tur kan pek loh thilte, kan fate an nih mai a vangin i beisei lo bawk ang u. Beisei kan duh chuan, kan thatlai, kan fate naupan lai hian thahnemngai takin i zirtir bawk ang u. Kan upat hun, kan tar huna kan fate’n duat tak leh hmangaih taka min enkawl kan beisei chuan, kan thatlai, kan fate naupan lai hian chumi kawng zawh tur chuan i zirtir hmasa zawk ang u. Kan tar hun a an hun hlu tak min pek kan beisei dawn a nih chuan, tuna an naupan lai hian keimahni zawk hian kan hun hlu tak hi i pe hmasa zawk ang u. Kan tar huna tawngkam thlum taka min biaka, min enkawl kan beisei chuan, thuna an naupan lai atang hian tawngkam mawi leh thlum tak hmangin i enkawl hmasa zawk ang u. Kan tar at hnu a rilru sei leh zaidam taka min enkawl kan beisei chuan, tuna an naupan lai hian rilru sei tak leh zaidam takin i enkawl hmasa zawk ang u. Kan tar at hnu a kan sawi ngai kan sawi kan sawite dawh thei taka an ngaihthlak theih nan, an naupan lai an thusawi ngai an sawi an sawite hi hlim tak leh dawhthei takin i ngiahthlak hmasak zawk ang u hmiang. Kan fate thinlung, taksa leh thlarau hmasawnna leh thanlenna kawng ngaihsak lova, chhungkaw mamawh tan hna ka thawk a lawm, pawisa ka zawng a lawm ti a, an rilru mamawh kan ngaihthah a nih chuan, kan tar huna “ka hman lo ka nu leh pate mamawh leina leh enkawlna atan sum leh pai ka zawng a lawm, an mamawhna leh appointment ka kalpui hman lo, zanriah ka eipui hman lo, an thusawi ngaithlakna hun ka nei lo,” tia an sawi loh nan tun an naupan lai atang hian hmangaihna nen i zirtir ang u. Kan zirtir lo a nih chuan, a chuanga kan tarlan kan chunga an rilru put hmang turte tuar thei turin i inbuatsaih sa ang u. Eng kawng nge i thlan zawk ang le. An naupan laia taima leh hah taka enkawl a, i tar hnu a hmangaihna nena an enkawl che nge i duh a, an naupan laia i duh dan dan a i khawsak a, i tar huna nangmah pawh ngihsak lo a, i fate duh duh a an khawsak tur kawng nge i thlan zawk ang le? “You reap what you sow" I tuh angin i seng dawn a ni.

Naupangte hringnunah hian nu leh pate hmangaihna leh nu leh pate nena hlim taka hun hman hi a pawimawh em em a ni. Chuvangin fate tana hun hranpa leh hun hlimawm nei thei tura ruahmanna kan siam hi a pawimawh em em a ni. Naupangte hnenah “ka hna thawh ni chu, …… chu mi ni atanga ….. chu mi ni thleng a ni a, ka hun awl neih chu…. chu mi ni atanga …… chu mi ni thleng a ni ang. Chu ka hun awl neih chu nangmahni nena hlim taka hun hman ka duh a ni” tia fiah taka kan hrilh hi a tha a ni. Chhungkaw mamawh tan hna thawk mah i la, kan nuna pawimawh ber chu an mahni an nih thu kan hrilh leh hriattir fo hi a tha a ni. Hmangaihna nen dawhthei taka kan hrilhfiah chuan, naupang mah nise an hrethiam ve em em bawk a ni.

An hnena i thutiam reng reng hlen tlat tum ang che. Chu mi hmunah chuan, chu mi niah ka kalpui ang che i tih chuan, kalpui theih ngei ngei tum ang che. Engemaw remchan lohna avanga i kalpui thei dawn lo a nih chuan, a chhan leh avang chiangkuang leh fel takin hrilh thin ang che. A chhan leh avang i hrilh chuan naupang mah nise an hrethiam em em a ni. I thutiam anga i thih sak theih loh avangin, “min hrethiam rawh, min ngaidam rawh, Sorry” tiin hrilh la, an hriatthiam che mai bakah an ring tial tial zawk ang che.

Nu leh Pa te’n kan fate hi hmangaihna leh kawng dik kawhhmuh chung zela kan zirtir chuan, nu leh pate kan lo tar hunah chuan “I nu leh pate hi min chawimawi rawh, min hmangaih rawh, mi zah rawh, min enkawl rawh, min chawm rawh, hun min pe rawh,” tia a hranpa taka kan hrilh a ngai tawh lovang. A chhan leh avang chu, kan that lai, an naupan laia kan lo zirtir vang a ni. Biak In leh sakhuana atanga an zirtir vang, thenawm khawvengte hrilh leh fuih vang, ni lovin an naupan lai atanga hmangaihna leh dawhtheihna nena kan lo enkawlna rah chuan, kan tar hnuah an thinlung chhung tak tak atanga hmangaihna leh dawhtheihna nen min enkawl zawk dawn a ni. Chuti chuan an fate hun a lo thlen pawhin “I nu leh pa hmangaih rawh, enkawl rawh” tia zirtir ngai lovin, an naupan laia hmangaihna leh dawhtheihna nen kan zirtir chu an nunah an vawng ang a, an fate tan ro angin an hnutchhiah tawh dawn a ni. Naupan laia hmangaihna leh dawhtheina nena enkawl si lova, an puitlin huna an chunga beiseina neih san viau hi, mahni chi tuh loh rah seng tum ang lek a ni. Chuvangin, “I nu leh I pa hi min chawimawi, min zah, min enkawl rawh” tih ngai lovin kan fate kan enkawl dan hi fimkhur hmasa zawk i la, kan tar hun nun kawng kan insiam sa a ni mai dawn a ni. Nu leh pa, pi leh pute’n he nun hi an la hmang lo a nih chua, nangmah atangin hman nghal tum ang chu.

By:- Victor Zika

24/10/2021

CHHANGCHHIAT LAIA IN HNAWK LEH K*M 20 HNUA AN HRIATRENG TUR

Kan in lah hnawk reng mai. Hmuntin leh bang tinrengah pen leh color nen an ziak hnawk nuk mai bawk. Kan inchhung khaw hnawina lam a piangah a hnawkin a ipik thlak tak zet a ni. Mahse, kan chhungkaw nunah kan inhmangaih tawmin kan hlim tak zet a ni.

Tun atanga k*m 20 hnuah chuan, kan fate chuan kan in hnawk leh bal tak takte kha an hrechang tawh dawn lo a ni. An hriat reng tur zawka chu, chhungkua inhmangaih tawna hlim taka hun kan lo hman thin zawk kha a ni ang.

23/10/2021

PHONE NIH KA DUH
Zirtirtu nu chuan zanriah an ei zawhin, school naupangte assignment chu endik turin dawhkan lamah a kal phei a. An pa erawh a tihdan pangngai ang bawkin an nu bula thuin phone nen Games a khel vel a ni.

Zirtirtu nu chu school naupangte assignment a endik mek laiin, bianga mittui lung zawih zawih chungin an pa lam chu a pan phei ta a. An pa pawh chuan thlaphan hmel takin, “Thiani i tha maw? Engnge ni ta le?” tiin a zawt a.

An nu chuan “Ka school naupangte hnenah in rilrua awm a piang in duh dan danin essay rawn ziak rawh u” ka ti a.

An pa chuan, “chu chu engnge tah na tur awma” tiin a zawt a.

An nu chuan, “a tawpna ber ka endik assignment rawn ziaktu thuziah hian ka rilru a khawih em a, tap lo thei ka ni lo” a ti a.

An pa chuan, “Engnge a ziah a” tiin a zawt a.

An nu chuan “A thuziah ka rawn chhiar ang a, ngun deuhin lo ngaithla rawh aw” a ti a.

Chu school naupang thuziah chu a hnuaia mi ang hi a ni.

“Phone nih ka va duh tak em! ka nu leh ka pa phone ngei ni thei i la ka va duh tak em” Ka nu leh pa hian phone hi a hmangaih tak zet a ni. Chu an phone chu an duhin an ngaihsak em em a, kei an fa ngei ai pawh hian an ngaihsakin hun a pe tam fe zawk a ni. Ka pa office atanga hah taka a rawn haw chang pawh hian a phone tan chuan hun a nei tam em em a, mahse kei a fapa tan erawh hun min pe thei lo a ni. Engti khawpa an buai lai pawhin an phone a rawn rik tawh chuan hmanhmawh em em in an va vuan nghal a. Mahse, kei an fapa in an buai laia ka tah changin emaw, ka mamawh ngawih ngawih leh ka tana thil pawimawh em em min tihsak tura tanpui ka va dil erawh chuan, min ngaihsak leh lawi bawk si lo. Phone nena hlim taka hun hmang reng si hian, kei an fapa nen erawh hlim takin hun an hmang khat khawp mai. Phone atangin midangte an tanpui a, idea tha tak tak an pe thin a, an tanpuina leh idea tha tak tak mamawh ngawih ngawih an fapa erawh min hrechang thin si lo. Phone atangin tawngkam thlum takin mi an be thin a, kei erawh chuan tawngkam thlum dawna hnekin zilhna leh thununna bak ka dawng ve ngai lo. Phone rawn be tu tawng fiah lo tak chu hriat theih talh tumin uluk leh ngun takin an ngaithla thin a, kei an fapa tawng erawh min hriat sak leh duh lawi si lo.

Chuvangin phone nih ka duh a ni, ka nu leh pa phone ngei nih ka duh a ni.

An nu (Zirtirtu nu) in school naupang lehkha ziah a chhiar zawh hnu chuan, an pa chuan rilru nuam lo tak hmel puin, “chu naupang chu a va khawngaih thlak ve! tu fa nge a nih a? tunge a hming?” tiin a zawt a.

An nu (Zirtirtu nu) chuan “tu dangmah a ni lo ve, kan fapa ngei a ni e” tiin a chhang.

________________________________________________

Khawvel a thil changkang tak tak leh phone thar tha tak tak rawn chhuak tharte hi chhungkaw tana malsawmna leh inbiakpawh tawnna tha zawk thlentu lo ni se, thinlung, taksa leh thlarau indawr tawnna tichhetu lo ni l*l suh se.

“Ngai the fanaute hi LALPA laka kan ro chan an ni” tih hre reng chungin Family First tia rawngbawlna ropui taka hlawhtlinna neitu ni turin duhsakna ka hlan a che.
____________________________________________________

I hlawkpui a midangte tana malsawmna nih i duh chuah, he thuziak hi min lo Share dak turin kan ngen che a ni.

Copy/ Paste nena post chhawng lo hram turin kan ngen bawk a che u.

Chhungkaw Nun

07/12/2022

10/11/2021

28/10/2021

26/10/2021

25/10/2021

25/10/2021

24/10/2021

23/10/2021

Address

Website

Alerts

Shortcuts

Share