Rana Samir - Clinical psychologist

07/09/2025

بما اني كنت اخصائية علاج ادمان لسنين
واتشرفت باني اعيش رحلات علاجية لناس شجاعه جدا محتاجة اعلق على حلقة ترند اليومين دول لمدمن متعافي مع اليوتيوبر كريم السيد
الحقيقة أنا بكتب ده وجوايا خوف من فكرة الترند المزيف على السوشيال ميديا اللي احنا بنشوفه كل يوم اللي بيبدأ بتمجيد مبالغ وبينتهي بتكسير مبالغ برضه فخليني اقول كام نقطة
اولا
الشاب الشجاع اللي قدر يظهر مع كريم السيد في شباب زيه كتير رحلتهم كانت شاقه ومتعبه ومليانه تفاصيل .. قد تبدو التفاصيل دي مشوقه لحد قاعد بيتفرج لكنها رحلة ممزوج فيها الحياة والموت مش مادة تشويق
ثانيا
لو احنا حابين نساعد فأعتقد اهم نقطة هي إدراك أن في مرض اسمه مرض الإدمان ده ممكن يواجهه اي شاب في أي مستوى ثقافي او اجتماعي.. المرض بيبدأ بتجربة وبيستمر في صورة عدم قدرة على التوقف عن استخدام المواد دي وهو بيكون متخيل أنه هيقدر يتوقف لما يحب والواقع بيكون تدهور رهيب في حياته.
وده مرض له علاج ويقدر الإنسان لو قرر قرار حقيقي أنه يستعيد حياته من خلال التزام بطريقة حياة جديدة
المشكلة اللي بتواجه كتير من الأهل بتكون تصور أنه دي شقاوة واستهتار وان الشخص في أيده يوقف لوحده
ثالثا
موضوع الإدمان تم مناقشته في مواد فنية كويسة جدا زي كتاب ربع جرام ومسلسل تحت السيطرة وأغنية مكي قطر الحياة.
الفن أو صناعة المحتوى ممكن تساعد أنها توصل معلومة ميقدرش يوصلها كتاب علمي للناس في البيوت..
لكن رجاءا الموضوع مش ترند زي الترندات اللي بنشوفها دي مسألة حياة أو موت مش محتاجين نفضل نتكلم عنه بتمجيد مبالغ فيه لحد م الراجل نفسه يتضغط في حياته ويبدأ الناس تزهق منه فنبدا رحلة العودة بالهجوم والتكسير في شخصه بلا أي معنى حقيقي في الطريقين ..
رابعا
مرض الإدمان مرض قاتل للشخص وأهله طوال فترة نشاطه ..
لكن مع التعافي الشخص فيه بيرجع لحياته وهو معاه خبرة عميقة جدا في الحياة وفي معرفته بنفسه.. فالحقيقة أنه وهو متعافي بيكون شخص مميز ورائع فعلا وهو بيبقى معاه أدواته للحفاظ على حياته فمش محتاج فزلكة من حد
واخيرا
محتاجين يكون عندنا وعي بالمرض والعلاج
نحترم تجربة الشخص ده وغيره لما نشوفه
نستوعب أنه عادي ويقدر يكون أكثر تميز كمان
بلا مبالغة
بلا مبالغة
بلا مبالغة

Send a message to learn more

02/06/2025

هناك ما هو داخل إطار مسئوليتك ويستحق منك الوقت والجهد، وهناك ما هو خارج نطاق حدودك ومسئوليتك ولا يستحق منك إهدار فيه الوقت والجهد

15/05/2025

التدخل المبكر في العلاج عامل مؤثر وإيجابي جدا في سرعة تحسن الأعراض، وتفادي التأثير السلبي على الإنسان. لكن في اسباب كتير بتخلي الشخص يتأخر في طلب العلاج بشجاعة

فقدان الأمل أو الشك في فعالية العلاج النفسي
الرغبة في السيطرة
ورفض الشعور بالحاجة للمساعدة
الأفكار المغلوطة عن العلاج النفسي
ارتفاع أسعار الخدمة العلاجية

وغيرهم... طلب العلاج ضرورة واحتياج مش رفاهية يمكن تأجيلها

04/03/2025

يقول عالم النفس جون بولبي، صاحب نظرية التعلق attachmnet theory: "ما لا يمكن توصيله إلى الأم لا يمكن توصيله إلى الذات".

بعبارة أخرى، عندما يتعلم الطفل أن مشاعره غير مرحب بها، فقد يكافح لفهم وقبول مشاعره الخاصة في وقت لاحق من الحياة. قد يكبر وهو يشعر بالانفصال - ليس فقط عن الآخرين ولكن عن نفسه أيضًا

12/09/2024

في مقاله تم نشرها في مجلة psychology today بتتكلم عن ان مع زيادة القلق والتوتر في الزمن الحالي على الكبار. وجدوا كمان أن أطفال العصر الحالي هم أكثر قلقاً وتوتر عن أي أطفال من عصور فاتت، وده لعده اسباب اشاروا لها زي

١. طلب النجاح الزائد في المدارس وبين الأباء لدرجة بتخلق تنافسية من سن صغير، بتغطي على عملية الاستمتاع بالتعلم او الاستكشاف وبتنقل الطفل لحالة خوف من الفشل
٢. عدوى القلق من الأباء. القلق هو الأكثر انتشارا بين البالغين. والقلق ممكن يتنقل للأطفال من خلال اختيارات وسلوكيات الأباء
٣. الجدول الممتلئة جدا. على الرغم من أهمية أشغال وقت الأطفال بحاجات مفيده زي الهوايات والرياضه. إلا أن حالة الجري طول اليوم عشان يلحقوا فقرات يومهم من أسباب القلق اللي بتغطي على الاستمتاع بالرحلة. والمقصود هنا التوازن مع مراعاة اوقات الراحه واللعب الحر
٤. زيادة اوقات الشاشات على حساب اللعب والتفاعل وجها لوجه
٥. واخيرا الحماية الزائده من الأباء اللي هدفها طول الوقت حماية الطفل من الألم. واللي بتكون انعكاسها عليه اعتماديه وشعور القلق والعجز وتعطيل لتطوره الطبيعي

ودي المقالة لو حد كان حابب يكملها

https://www.psychologytoday.com/us/blog/what-mentally-strong-people-dont-do/202408/10-reasons-todays-kids-are-more-anxious-than-ever

21/06/2024

" إن الله وملائكته يصلون على النبي يا أيها الذين آمنوا صلوا عليه وسلموا تسليما" اللهم صل وسلم وبارك على سيدنا محمد القائم بحدود الله؛ ماضاق أمر إلا فرجه الله.

ً

17/05/2024

بيفرق معانا جدا فكرة اننا نخطط لاجازتنا ونقضيها بشكل يفرق معانا.. الحياة اليومية خلال الأسبوع إيقاعها سريع جدا وبتستهلك من طاقتنا الجسدية والذهنية والنفسية.. وقدرتنا اننا نفصل شوية عشان نقدر نرجع هي قدرة بننميها وبندعمها..
تخطيطك لأجازتك مش رفاهية أو دلع ده وعي بنفسك وتقدير لاحتياجاتك.
في كتاب العادات السبع لأشخاص أكثر فعاليه لستيفن كوفي في فصل اسمه (اشحذ منشارك) بيتكلم عن فكرة التوازن وبيضرب المثال بنجار واقف في غابة بيقطع شجر لساعات طويلة هدفه انه يخلص كل شغله لكن اللي حصل انه تجاهل اوقات اكله ونومه وراحته. فبدأ تدريجيا كفاءته تقل وتركيزه يقل لدرجة تؤثر بالسلب عليه وعلى شغله..
وبيأكد ستيفن كوفي في الفصل ده أن حاجتنا لمراعاة نفسنا وأكلنا وأوقات راحتنا هو عنصر أساسي لإستمرار النجاح الشخصي ولتحسين جودة العمل

صباح الفل
جمعة مباركة 💐

19/01/2024

الطريقة التي تراعي بيها نفسك هي الطريقة التي تحصل عليها من الناس في معاملاتك بالمقابل!!

تعالوا نتأملها..
يعني لو أنت بتخبي مشاعرك احتياجاتك رعايتك الذاتيه ارضاء للآخرين.. الناس حواليك مش هيكونوا شايفينهم.. وبالتالي هيتعاملوا على أساس عدم وجودهم

والعكس أيضا صحيح..
تعبيرك عن مشاعرك واحتياجاتك والاعلان عن رعايتك لذاتك بيوصل للناس رسالة ايجابية في تعاملهم معاك وكمان في أحقيتهم بالتعامل بالمثل .

صباح الفل 💐

06/12/2023

يسكن الإنسان إلى من يفهمه، ولك أن تتخيل كم سيسكن الإنسان إلى نفسه حين يفهمها.
-جبران خليل جبران-

09/11/2023

أنت لست ضحية ولا يفترض أن تكن مضحي أو جاني
كل تلك المواقف التي مررت بها كان لها سبب ومعنى
بعضه داخلك وبعضه الآخر خارجك

"كُن مُستعد ومُتقبل للتعلم.. فانت لست دائمًا علي حق."

03/10/2023

بكل المزعج في اللي فات فأنت متقدرش تغيره
الحقيقة أنه خلاص عدى وفات
بكل الخوف من الجاي أنت متملكش ضماناته
لانه غايب بمعظم تفاصيله

أنت لا تملك غير تغيير انهارده
وانهارده مش هيتعاد تاني

30/09/2023

ناس كتير بتشتكي من مشاعر الغضب عند الكبار والصغار
الغضب هو مشاعر .. والمشاعر مفيهش حلوة ووحشة
لكن الأفعال الناتجه عن الغضب فيها حلوة ووحشة

أطفالنا في السنين الأولى معندهمش أدوات للتعامل مع الغضب
فالطبيعي بتاعهم بيكون الصريخ التكسير الدبدبه ودي بتكون لمرحلة
ولما يبدأ الطفل يوعى مهم نبدأ نسلمه شوية أدوات للتعامل مع غضبه
أدوات زي التشتيت.. الابتعاد عن الموقف.. الفضفضه.. الكتابة .. التعبير عن المشاعر دون تجريح.. وغيرهم
وكمان مهم نتكلم معاه زي" أنت حاسس بأيه دلوقتي؟" " أنت حاسس بغضب؟" " أيه اللي لو عملته ممكن يساعدك تكون أحسن؟

المشكلة بتكون لما الشخص يكبر وميبقى عنده أدوات للتعامل مع مشاعر الغضب فيقع في أفعال أو ياخد قرارات يرجع بعدها يندم عليها

طب أيه اللي بيحصل جوانا في حالة الغضب؟
اللي بيحصل أن جسمنا بيفرز هرمونات بتوصل للعقل على ان الشخص في حالة تهديد وتأهب فيدخل الجسم في حالة fight or flight يعني اما الهجوم او الهروب والحالتين مش بيكونوا أصلح أفعال ..

طيب والحل؟
في أدوات ومهارات كتير ممكن نطورها عشان نتعامل بشكل أفضل مع غضبنا.. واحده من أفضلهم انك "تبتعد" او "تعمل وقت مستقطع" time out.. الوقت ده بيساعدك تهدأ وجسمك يرجع لحالته الطبيعية وبالتالي يرجع يتولى الفص الجبهي في المخ مسئولية الحكم على الامور واعادة الحكم على الموقف أو القرار واتخاذ القرار المناسب

وفي أدوات تانية كتير زي ممارسة أي نشاط بدني ، الكتابة، الاتصال بشخص لمشاركة المشاعر.. وغيرهم