23/02/2026
حليبك عمل للطفل يرقان؟👇
في ثلاثة أنواع شائعة من اليرقان عند حديثي الولادة:
👶🏻اليرقان الفيزيولوجي (الطبيعي)
بيظهر بأول أيام الحياة بسبب نضج الكبد غير الكامل، شائع جدًا ومؤقت وما بيخوّف طول ما إن الطفل بصحة جيدة.
هون الرضاعة الطبيعية تُشجَّع ولا تُوقَف🙏🏻 ليش؟
لان حليبك رح يساعد طفلك يتخلص من اليرقان بشكل افضل.
👶🏻Breastfeeding Jaundice (يرقان قلة المدخول)
بيصير إذا الطفل ما عم يحصل على كمية حليب كافية، يترافق مع عوارض قلة كمية الحليب او مشاكل بنقل الحليب، يعني السبب مش “نوع الحليب” بل قلته.
هون العلاج انو نصحح مشاكل الرضاعة الطبيعية، استشارية الرضاعة بتحدد وين الخلل وبتساعدك تاخذي الاجراءات المناسبة بدون الحاجة لايقاف الرضاعة.
👶🏻يرقان حليب الأم
بيظهر بعد الأسبوع الأول، والطفل يكون عم يرضع منيح وعم يزيد وزن.
بهالحالة بعض مكونات حليب الأم قد تزيد إعادة امتصاص البيليروبين ( المادة الصفرا) من الأمعاء ولكن هالحالة نادرة وغالبة حميدة وكمان ما بتستدعي ايقاف الرضاعة.
✔️ كل حالة يرقان بتستدعي فحص دقيق للطفل حتى نلغي احتمال اسباب مرضيّة.
اذن حسب الارشادات والتوصيات لا يوجد داعٍ طبي روتيني لإيقاف الرضاعة الطبيعية في حالات اليرقان. وأي ايقاف مؤقت بيستدعي انك تتبعي اجراءات حتى تحافظي على انتاج الحليب بهالفترة وترجعي للرضاعة الحصرية بسهولة.
نسبة الامهات اللي وقفوا رضاعة او قل الادرار عندهن بسبب تخفيف او ايقاف الرضاعة المؤقتة فعلا كبيرة لذلك احصلي على الدعم المهني الصحيح من قبل استشاريات الرضاعة حتى تقدري تقطعي هالمرحلة بسلاسة.
انا هبة👋🏻 قابلة قانونية واستشارية رضاعة معتمدة😊
