30/01/2026
Ninkan waxa la dhahaa Dr. Maryaano Barbasiid (Barbacid). Wuxuu ka tirsan yahay Xarunta Qaranka Isbayn ee Cilmibaadhista Kansarka. Waa saynisyahan reer Isbayn ah oo koox cilmibaadhayaal ah oo uu hoggaaminayaa ay soo bandhigtay wax noqon kara dawada nooc daran oo ka mid ah kansarka ganaca (pancreatic cancer).
Kooxdani waxay baadhitaankeeda u adeegsatay jiir qaba kansarka. Dabadeed waxay isticmaashay jid dawayneed oo cusub oo saddexjibbaaran (triple-drug therapy): Unuggii kansarka qabey ayaa saddex aag lagaga imanayaa, halkii awel jaho keli ah lagala dagaallami jiray, waxana la isugu darayaa saddex nooc oo bakhtiin ah si loo dhimo burada kansaraysan. Jiirkii lagu tijaabiyay ee kansarka ganaca oo weliba ku xumaaday qabey waxa lagu arkay in buradii ay aad u wiiqantay oo ay gaadhay heer aan khatar muuqata ku hayn. Intaas uun ma aha ee kolkii muddo ka dib la baadhay, laba-kaclayn lagu ma arag.
Kansarka ganacu, gaar ahaan noocan ku dhaca dhuun-ganaceedku (ductal adenocarcinoma), wuxuu ka mid yahay kansarrada ugu daran, maxaa yeelay hababka lagula tacaalo oo dhan ayuu u adkaystaa oo waa ka ugu dhego adag. Qaabkan ay kooxdu soo bandhigtayna wuxuu weerarayaa gaadhaandhigga kansarka, si uu isku mar u dhimo halistiisa iyo rogaalceliskiisaba.
Haddii la sii wado baadhitaankan, wuxuu jidka u bannaynayaa rejo weyn, wuxuuna mar kale ina xasuusinayaa muhiimadda ay leedahay in waqti, maalgelin iyo kalsooniba loo huro cilmibaadhisaha sayniska.
Tixraac:
A targeted combination therapy achieves effective pancreatic cancer regression and prevents tumor resistance. URL: https://doi.org/10.1073/pnas.2523039122 (2025).
X. Cabdicasiis Guudcadde
