https://www.facebook.com/114138538249141/

Tabitha Outreach, 12 Christiaan Street, Birchleigh North (2025)

05/12/2025

https://youtu.be/C1itKzwJE4g?si=BsrD9qMGF-AzPE6c – Yesterday, Today, Forever
Lees 1 Joh 5.
Koue vleis en slaai – dis nou nie my ding nie. Maar daar is 2 keer per jaar wat ek nie my koue vleis en slaai misloop nie. Die een is ons familie se tradisionele Kersete – heerlike skaapboud, beefroast, gammon, hoender en allerhande lekker slaaie. Die ander een is die CAD Kempton Park se jaarlikse afsluiting – altyd ook lekker koue vleisies en slaaie, en dis net altyd anders as om dit self by die huis te maak! So min soos wat ek van koue vleis en slaai hou, so mal is ek oor die CAD afsluiting. Elke jaar dieselfde, en elke jaar geniet ek dit net meer as die vorige jaar – maak nie sin nie, maar dit is nou maar so. So het ek myself nou weer vanaand knuppeldik geëet by die CAD – heerlik!
Net soos wat die CAD se afsluiting en ons Kersete ou staatmakers is, net so is ons Here ook ‘n ewige Staatmaker. Hy verander nie! En net soos wat Hy 2 000 jaar gelede die apostels laat verstaan het van Sy vergifnis aan die kruis en die werk wat Hy daar vir ons gedoen het, net so is daardie vergifnis vandag nog van krag, en tot in alle ewigheid. Hy het juis die sondige wêreld oorwin, en dit is nog steeds oorwin, sodat ek en jy vandag ook vry kan leef, sonder sonde. Net soos wat Hy vir Sy dissipels verseker het dat Hy gekom het om aan hulle lewe en oorvloed te gee, net so het ons vandag nog toegang tot daardie lewe in oorvloed. En net soos Sy dissipels Hom persoonlik geken het, so kan ek en jy Hom vandag nog persoonlik ken. As jy in God glo, het jy lewe. Gister, vandag en tot in ewigheid.
My Here, U verander nie. U genade verander nie. U liefde verander nie. Dankie dat U die ewige Konstante Mag in ons soms baie deurmekaar lewens is! Amen.

Enjoy the videos and music you love, upload original content, and share it all with friends, family, and the world on YouTube.

04/12/2025

https://youtu.be/Nt2UOTakgn8?si=ungN03gO9VIyyT_P – Yes, I Love you with the Love of the Lord
Lees 1 Joh 4.
Gisteraand het ek sekerlik die slegste vleispastei hier op die aarde ... nee, in die HEELAL ... geëet. Ek het wildspasteie by ‘n baie bekende mark gekoop en dit gisteraand met groot entoesiasme vir ons gebak, maar oe-ê-ê!!! Hondsleg! My tande het in my kakebeen opgetrek net om nie aan die vleis te kon raak nie, en my tong het agter my mangels gaan wegkruip. Met elke happie het ek probeer om myself te oortuig dat dit sal beter smaak – ek sal daarvan hou ... Nope. Did not happen. Vanaand vat ek toe nou baie versigtig ‘n kans met die volstruis fillet wat ek ook by die pastei ou gekoop het. Ek besluit egter om nie sy raad te volg nie, maar eerder my eie ding met hierdie oor-groot hoender se vleisie te doen. FANTASMAGORIES! Perfek gemarineer. Perfek medium/rou – meer na die rou kant toe. So sag soos vars gebakte brood se binnekant. Heerlik! Nou is my liefde vir wildsvleis weer in ere herstel ...
Hoe lyk jou liefde vir mense? Ek het gisteraand minder liefdevolle gedagtes oor die pastei-man gehad as wat ek seker moes! Hoe gou vee jy iemand se nommer van jou foon af, of blokkeer jy sommer alle oproepe en boodskappe? Hoe vinnig oordeel jy en besluit sommer dat jy nie van iemand gaan hou nie, sommer so in die eerste paar sinne – of is dit net ek? Ek het gisteraand hoog en laag gesweer om ‘n wildsvleis geheel-onthouer te word, gebaseer op een slegte pasteitjie. As die Here so met ons moes maak, het Hy lankal niemand van ons meer liefgehad nie! Maar dis juis die ding – HY IS LIEFDE. Dis Sy wese, dis Sy karakter, Hy kan nie anders as dit wees nie. En as ek en jy Christus in ons het, is dit ook hoe ons moet wees. Is jy liefde? Of is jy net liefde as alles reg smaak en na jou sin gedoen is?
My Here, leer ons om mense met U liefde lief te hê. Amen.

Enjoy the videos and music you love, upload original content, and share it all with friends, family, and the world on YouTube.

03/12/2025

https://youtu.be/axVvWinXV1o?si=kdzH06-8WGt5gDCu – Worthy of Glory
Lees 1 Joh 3.
Ek kyk ‘n mooi Kersfees fliek van ‘n meisie wat ‘n hartoorplanting gehad het, en toe begin haar hele lewe net uitmekaar val. So tussen al haar chaos deur ontmoet sy hierdie vreemde man wat haar help om weer rigting te vind en haar voete te vind – net om uit te vind dat hy nie meer bestaan nie, dis sy hart wat in haar oorgeplant is. ‘n Lekker gevoel fliek wat my in trane gehad het, my kwaad gehad het, my laat lag het, ek het selfs ‘n paar keer die fliek gestop, want ek kon sien die ding gaan nie eindig soos ek wil hê nie ... maar aan die einde het ek ‘n groot les geleer. Wie of wat in jou is, definieer jou.
Johannes laat ons so ‘n bietjie ernstig introspeksie doen oor wie werklik in ons is. Gaan evalueer jou optrede, jou gedagtes, jou motiewe wanneer jy dinge doen, jou houding teenoor ander mense – dit alles gee vir jou ‘n indikasie van wie in jou lewe is. Word jy deur jou begeerte na aardse besittings gedryf en beheer, of is jou liefde vir jou medemens veel belangriker? Is jou eie begeertes in beheer, of soek jy eerder die wil van God op? Gee jy jouself oor aan jou eie natuur, of leef jy met alles in God se natuur? Hier is die goeie nuus: Hy het jou vrygespreek van jou aardse natuur en jou gees vrygestel om in Hom te wees! Jy hoef nie deur jou mens-natuur beheer te word nie, want daar is ‘n God-natuur in jou – Sy Heilige Gees. Hieraan weet ons wat in ons binneste is, soos in Johannes se eie woorde: “Wie Sy gebooie gehoorsaam, bly in God en God in hom. Hiéraan weet ons dat Hy in ons bly: Hy het ons Sy Gees gegee.”
My Here, ek bring al die lof en eer en aanbidding aan U, my God, want U het my vrygespreek van my sondige natuur, die ou mens begrawe en my deur U Gees ‘n nuwe natuur en ‘n nuwe hart gegee. Dankie, Jesus! Amen.

Song of Worship

02/12/2025

https://youtu.be/8dR0whTY-ck?si=5q6fgx2sjPF6KhiU – Worthy is the Lamb
Lees 1 Joh 2.
‘n Vriendin en kollega van my het vir my ‘n stringetjie krale gemaak waarmee mens kan speel wanneer jy dalk so ‘n bietjie fidgety raak - die krale herinner my baie aan die rosary van die Katolieke. Ek is nie van nature ‘n fidgety persoon nie, maar ek vind myself deesdae dikwels met die stringetjie krale in my hand, besig om ver en diep dinge te d**k, en sommer net my gedagtes agtermekaar te kry. Waar die Katolieke gebede opsê terwyl hulle deur die rosary werk, sing ek goedjies soos ”I want a hippopotamus for Christmas” en “Mistletoe and Wine”, en heel gou verdwyn my begeerte om ‘n paar koppe teen die mure vas te plak en hulle met wit verf te bespuit! Super kalmerend, Bianca, dankie!
Ek het niks teen Katolieke nie en ek het niks teen rosaries nie, verstaan my asseblief baie mooi; inteendeel, ek vind die simboliek van die rosary asemrowend mooi en insiggewend. Maar ek het nie ‘n stringetjie krale nodig om my te leer om met my Here te praat, of om my op koers te bring nie. Daarvoor het ons die Heilige Gees wat in ons woon, ons leer, ons lei en ons help om in die Seun te bly. Dit is die Waarheid wat ek en jy het om aan vas te hou – die Waarheid van die Seun van God wat aan die kruis gesterf het, in die Doderyk neergedaal het, die dood en hel oorwin het, en nou aan die regterhand van die Vader sit, waar Hy gedurig besig is om vir ons in te tree. Die Waarheid waarin ons lewe is dat Hy deur Sy kruisdood ons regverdig verklaar het – en al wat ons hoef te doen, is om Hom te gehoorsaam en in Hom te bly. Nie eens Bianca se krale kan die vrede in my hart bring wat hierdie wonderlike Waarheid gee nie! Dankie, Jesus!
My Here, help ons om nie op dwaal weë gestuur te word en ons hoop en vrede in ander dinge te vind nie. Ons Hoop en ons Vrede, ons Waarheid, ons Geregtigheid, Here, is alles net in U. Dankie vir die prys wat U betaal het sodat ons regverdig kan lewe in U Waarheid. Amen.

"You are worthy, our Lord and God, to receive glory and honor and power, for you created all things, and by your will they were created and have their being....

01/12/2025

https://youtu.be/PgU011sr3G4?si=7qAmmr9cwmT-Bs1n – Worship the Lord
Lees 1 Joh 1.
Mense, ek is nou nie iemand wat vloek of lelik praat nie, maar eish, terwyl ek besig is om ‘n ou uitjie te kap vir heerlike spaghetti bolognaise, slaan daar skielik ‘n donderslag en ‘n weerlig straal hier in my kombuis in. Met uie, tamaties, sampioene, pietersielie en ‘n vlymskerp mes wat rondomtalies deur die lug doen soos wafferse sirkus narre, uiter ek ‘n woord of twee wat daardie donderslag soos die dans van die sugar plum fairy laat klink. Nadat ek uiteindelik al die kosse van die vensters af en uit my hare gevee het, en die mes met moeite weer uit die plafon gepluk het, staan ek verwonderd in my kombuis oor die groot woorde wat ek gepraat het – het nie eens geweet ek ken hulle nie! Sal maar vanaand onder ‘n skuilnaampie moet gaan bid ...
Ons almal maak foute, ek seker nog meer as almal (nou klink ek amper soos ou Paulus!). Jy kan jouself nie heeldag kasty oor die foute nie – dinge gebeur en die menslike natuur spring soms soos wafferse pop corn uit jou mond. Vanaand het ek weer so ‘n mooi les geleer – sê opreg sorry en beweeg aan! God is getrou en regverdig om jou alles te vergewe – hou op om heeltyd by daai dooie perd te bly staan. Staan eerder in die teenwoordigheid van God en aanbid Hom, die Een wat vir jou omgee, wat jou verstaan, wat jou wil leer en jou wil lei. Jy kan vanaand kies om te sit en sulk oor elke verkeerde dingetjie wat jy dalk gedoen of gesê het, of jy kan jou verheug in die wonders van ‘n God wat vergeef en wat jou lief het. Kies maar self!
My Here, vergewe my die reaksie in my groot skrik, asseblief! En dankie dat ek weet U het my reeds vergewe. Daarom kan ek vanaand ook nie anders as om U te aanbid nie, Here, want U is net eenvoudig amazing. Ek het U so lief, Here. Amen.

Provided to YouTube by TuneCoreWorship the Lord · VinesongLet Your Living Water Flow "Live"℗ 2011 VMMusicReleased on: 2011-03-06Auto-generated by YouTube.

30/11/2025

https://youtu.be/cZ038iIZmnY?si=_W5nGkDl1RLxYDw0 – Wonderful, Wonderful, Jesus is to me
Lees 2 Pet 2-3.
Kersfees tyd is Kersfees movies tyd by my. Ek kry gewoonlik nie kans om juis baie TV te kyk nie – druk maar altyd so ietsie in wanneer ek die kans kry. Maar ek het besluit om hierdie jaar, vandat ek begin met my kersversierings, elke dag ‘n lekker Kersfees fliek te kyk – maak nie saak hoe breindood dit is nie! So kyk ek vanaand na ‘n fliek genaamd “Sugarplummed”. En ek sien hoe subtiel word ons in egosentriese lewens ingetrek en vergeet ons die ware boodskap van die Christusfees seisoen.
Ons kan so maklik weggelok word van die Waarheid af. Dit is altyd makliker om net op jou eie lewe en dinge te fokus en alles rondom jou bestaan te probeer inrig. Dan kom mense met hul mooi stories en jou fokus skuif weg van die Waarheid af, want dis nie wat jy nou wil hoor nie, en voor jy jouself kan kry, is jy vasgevang in ‘n web van valse godsdiens en gemoed-strelende woorde. Petrus waarsku ons om juis ekstra waaksaam te wees, want ons wéét dat hierdie dinge gaan gebeur. Daarom bemoedig hy ons om in hierdie tye ons oë en geloof onwrikbaar op God te hou, maak nie saak wat rondom ons gebeur nie. Vanaand is my boodskap vir jou: hou op om jouself te meet met ander se oë. Hou op om te luister na boodskappe wat net jou oor streel, maar nie jou hart en jou gees roer nie. Fokus met alles in jou weer op die Here, jou wonderbare Raadsman, Sterke God, Ewige Vader en Vredevors.
My Here, soms word ek ook moedeloos en lyk my probleme groter as wat my geloof kan sien. Maar dan kom U met so ‘n eenvoudige fliek om net weer vir my te sê: “Hou jou oë op My, My kind.” My Vader, help my om elke dan net meer en meer toe te neem in U genade en in U kennis, sodat ek deur alle omstandighede kan sing: “Wonderful, wonderful, Jesus is to me!” Amen.

Praise song.Music: Pentecostal Family Church;

29/11/2025

https://youtu.be/K5MYW_l4gRs?si=xt6XSrNAhCxmR6a0 – Witter as die Sneeu
Lees 2 Pet 1.
Kersfees-mal ek verlustig my altyd oor hierdie tyd in heerlike, sappige, stropende Kersfees-movies, met ‘n lekker romantiese streep in, iewers dalk so bietjie humor of twee, en ... baie sneeu! ‘n Kersfees fliek is net eenvoudig nie ‘n Kersfees fliek as daar nie iewers sneeu is en die held en heldin iewers ysskaats of dalk hot chocolate drink terwyl hulle (teen hul sin, natuurlik) saam na ‘n geskikte kersboom soek nie. Maar so let ek op – die sneeu in die flieks is altyd so silwerskoon! Niks modder nie, niks olie en allerhande ander vullis nie. Pragtige, suiwer wit sneeu – yip, as ek dít sien, dan weet ek sommer hierdie gaan ‘n lekker fliek wees!
Petrus probeer ook so iets aan ons oordra – om so wit soos TV sneeu te wees! In sy tweede brief begin hy sommer om ons aan te moedig om heilig te lewe en om te leef in die skoonheid waarin Jesus Christus ons geplaas het toe Hy aan die kruis vir ons gesterf het. Met daardie een daad het Hy ons selfs witter as die TV sneeu gewas! Nou moedig Petrus ons aan om alles in ons vermoëns te doen om ons “sneeu” suiwer te hou – geloof; deugsaamheid; kennis; selfbeheersing; volharding; Godsvrug; liefde onder mekaar; liefde vir alle mense. Hoe meer jy jouself hierin beywer, hoe dieper beweeg jy in die heerlikheid en kennis van Jesus Christus in – dan is jou lewe nie meer TV-wit sneeu nie, maar bloed-gewaste wit sneeu! So, vra jouself af: bou jy jou geloof deur reg te lewe, kennis van God op te doen, jou eie begeertes te onderdruk in selfbeheersing, te volhard op die pad wat God jou stuur, om Gal 5:22 en 23 uit te leef, en om waarlik lief te wees vir almal rondom jou en alle mense? Eish ...
My Here, U het gesterf sodat ek witter as sneeu gewas kon word. Help my om hierdie sneeu-lewe uit te leef deur my geloof te verryk in U. Help my om te leef soos wat Petrus hier vir ons beskryf, asseblief. Amen.

Witter as die sneeu - Dudley Mans

28/11/2025

https://youtu.be/bHbZGR1P7bU?si=UuHePlfEiikQ-RRe – Without Him I could do Nothing
Lees 1 Pet 4-5.
Die reën jaag ons vandag in ‘n vliegtuigloods in, en in plaas van om ‘n mooi parade buite te hou, word ons soos sardientjies in die blik gebou ingedruk om van die reën te ontsnap. In daardie blik weergalm elke geluidjie van die beton mure en staal deure af en dis die verpersoonliking van Asterix en Obelix se sanger, Cacofonix, se naam – eish! Ek staan toe maar op en gaan sê vir die slim manne om dalk net die vliegtuigloods se groot staal deure oop te maak sodat dit nie so eggo nie – nie een van die siele het eens daaraan ged**k nie! Daar is my vriend se parade toe ‘n sukses, ons almal kon alles mooi hoor, en niemand het nat gereën nie – ai tog, wat sou die spul manne sonder ‘n vrou se insig gedoen het!
Ons vind ‘n pragtige belofte in vandag se Skrif – werp al jou bekommernis op die Here; Hy sorg vir jou. Dalk voel dit vandag nie so vir jou nie. Dalk sien jy net hoe Hy vir ander sorg, maar jy bly heeltyd swaarkry. Miskien is jy al vir jare getrou, en sien jy net nie die uitkoms of die deurbraak nie. En jy is dalk gereed om net oor te gee – pasop, die vyand loop rond soos ‘n brullende leeu en hy soek jou juis op jou swakste tyd! Hou net vas aan hierdie woorde – God sal voorsien. Dalk nie soos jy wil nie; dalk nie soos jy hoop nie; dalk ook nie met wát jy hoop nie. Maar Hy sal voorsien – moenie die vyand toelaat om jou te verslind nie. En moenie die Here los nie, want without Him, you can do nothing. Hou net vas!
My Here, sonder U kan ons nie bestaan nie. Ek het nie antwoorde vir al die vrae nie; ek kan ook nie altyd verstaan hoekom deurbrake nie kom nie. Maar ek weet een ding: sonder U is ek heeltemal verlore. Here, help almal wat hierdie stuk lees om net vas te hou, al voel dit asof U hulle dalk gelos het. U belofte staan vas – U sorg vir ons. Amen.

Redeemed Quartet Presents the Official Music Video for "Without Him". To change things up a bit, we turned Josh Koble, our bass singer, loose on the lead voc...

27/11/2025

https://youtu.be/-lNm94oQFHg?si=yVBYEPpSCvELX5PN – With my Hands Lifted up
Lees 1 Pet 3.
Eish, ek is ‘n verlore saak. Om een of ander duistere rede geniet ek dit deesdae om Survivor te kyk. REALLY???!!! Dis só nie ek nie! Na ete ontspan ek vanaand so bietjie voor die TV en kyk nog ‘n episode – die twee spelers moet vuur maak en die een kom mooi reg, maar dan begin die vuur doodgaan en die persoon begin moed verloor. En sowaar, die ander persoon wat nog nie eens ‘n vonkie het nie, moedig hierdie een aan om net te volhard! Yep, vir so iemand haal ek my hoed af en salueer ek diep in my hart. En die laaste 5 spelers het soveel respek vir mekaar betoon – ek kan actually nou nie wag om die laaste episode oor die naweek te kyk nie!
Petrus maan ons dat in ons harte moet daar net heilige eerbied wees vir Christus die Here. Wees altyd gereed om 'n antwoord te gee aan elkeen wat van julle 'n verduideliking eis oor die hoop wat in julle lewe. Die mooiste manier waarop ek en jy hierdie hoop kan uitleef en vir ander kan wys, is juis om openlik ons hande op te lug vir God en Hom te aanbid, waar ons ookal gaan. Om nie mekaar af te kraak of te beledig nie, maar eerder aan te moedig, selfs al beteken dit dat jy dalk die spel gaan verloor. Eerbied vir ons Here moet veel groter wees as ons drang vir onsself om vooruit te gaan, net soos wat dit onder hierdie spelers was. Ons fokus moet wees om God te verhef sodat meer mense na Hom kan draai, maak nie saak watse prys dit dalk van jou en my vra nie. En om in alles dankbaar te wees voor die Here, want dan gaan die wêreld rondom ons ook leer om dankbaar te wees.
My Here, soms voel ek ook maar klein en nietig en moedeloos soos daardie speler in Survivor. Maar in plaas van om my hande in wanhoop op te gooi, gooi ek hulle op in lof en eer tot U, want U is my hoop. Help my om U as hoop ook aan almal rondom my oor te dra. Amen.

Enjoy the videos and music you love, upload original content, and share it all with friends, family, and the world on YouTube.

26/11/2025

https://youtu.be/hUctrllXVys?si=L1GyBFJrXUNjOHbU – With my Hands I will Praise Him
Lees 1 Pet 2.
Ons neem in hierdie week afskeid van nog ‘n kollega wat op pensioen gaan, en gisteraand, daar in die bosse, het ons so ‘n vinnige surprise party vir hom gehou. Toe al die emosies uiteindelik onder beheer is, en my ou vriend en kollega weer sinvolle sinne bymekaar kon sit, begin hy elke een van ons te bedank vir ons inspraak in sy lewe. Toe hy by my kom, eindig dit in ‘n lekker omhelsing en ‘n klapsoen – sommer so voor sy vrou en twee kinders! – maar dit was vir my seker die grootste eer wat Sipiwo aan my kon bewys. Woorde sal nooit soveel kan beteken soos daardie spontane gebaar van my ou vriend nie. Eish, ek gaan sy groot skaduwee in my kantoor deur baie mis ...
‘n Groot les wat ek uit Sipiwo se lewe geleer het, vind ons ook in hierdie hoofstuk: nederige onderwerping aan gesag oor jou, al stem jy nie altyd saam nie, al voel dit nie altyd so lekker nie. Hy was skielik vry na 1994, maar hy het nooit sy posisie of sy gesag misbruik nie – alles was net om goed te doen vir die organisasie en die mense rondom hom. Net soos Jesus Christus, en net soos wat Hy dit ook van ons verwag. Moenie terug beledig nie; moenie wraak met wraak vergeld nie; moenie met groter kwaad dreig nie. Laat toe dat God se Gees deur jou werk en los alles oor in die hande van die Here, die Een wat eendag die oordeel sal trek. Hierdie geveg is lankal aan die kruis oorwin! So, steek jou hande in die lug op – nie om te baklei nie, maar om God te eer. Verhef jou stem – nie om te beledig nie, maar om God te prys. En sit jou voete neer waar Hy geloop het en baan so ‘n weg van liefde deur hierdie lewe.
My Here, Sipiwo het my ‘n groot druk en ‘n klapsoen gegee as bewys van sy liefde en respek vir my. U het U lewe gegee as bewys van U liefde vir ons. Hier is ek, Here, met my lewe, my hande, my voete, my stem – ek gee dit alles in ‘n lofoffer net aan U, my Here en my God. Amen.

Enjoy the videos and music you love, upload original content, and share it all with friends, family, and the world on YouTube.

25/11/2025

https://youtu.be/AlOkCTLn4mQ?si=nvZ6sX8L2DJTw2fH – Wie sal ons Skei van Sy Liefde?
Lees 1 Pet 1.
Ons sit die afgelope paar dae hier in die bosse weggesluit, weggesteek van alle beskawing, en doen ernstige beraadslaging en beplanning. Jy sien en hoor geen ander verkeer nie – net paddas wat kwaak en krieke wat tjier-tjier asof hulle jare laas geolie is. Selfs die donderstorms hier is erger as in die stad, want daar is niks wat dit keer of afweer nie – dis in your face loud en woes en die reëndruppels lyk of elke een ten minste 1 liter water in het. Vroegoggend gaan stap ek so bietjie in die veld, net om my gedagte bymekaar te kry vir die dag, en dan besef jy hoe geïsoleer jy hier is – geen sein op jou foon nie, geen ander huise of mense in sig nie, net bosse en jy en jou gedagtes. En nie eens die vooruitsig van die vergaderings wat voor die deur is kan daardie vrede en rustigheid van jou af wegvat nie!
God het dit beskik om ons af te sonder vir Hom. Toegevou in Sy liefde, vul Hy ons met Sy Gees en isoleer Hy ons gees van die invloed van die wêreld. Sy bloed het Hy oor ons uitgestort – met meer krag as 1 liter water per druppel! – sodat ons vir ewig in hierdie geïsoleerde vrede van Hom kan wees. Niks kan hierdie heerlikheid, hierdie kalmte, hierdie stilte wat ons in Hom beleef, deurmekaar krap nie. Nie eens die vooruitsigte van die toekoms, probleme of siekte, kan deur Sy liefdeskokon rondom ons dring nie. Hier in die bosse het ek weer geleer hoe heerlik dit is om afgesonder te wees – afgesonder deur my Here sodat ek net aan Hom behoort en aan Hom gehoorsaam is. En niks sal my ooit van hierdie liefde van Hom af kan skei nie. Dit is die hoop wat ek en jy in die Here het – ‘n ewige liefde!
My Here, dankie dat U my in die bosse moes invat om te kon beleef hoe heerlik dit is om vir U afgesonder te wees. Dankie vir U liefde, U bloed, U Gees, wat my so afsonder dat die wêreld my nie kan beetkry nie. U is my Hoop; U is my alles. Amen.

Provided to YouTube by CDBabyWie Sal Ons Skei Van Sy Liefde · Clemens MansKruiskyk Pinkster Lof En Aanbidding℗ 2021 KruiskykReleased on: 2021-05-24Auto-gener...

24/11/2025

https://youtu.be/74FL9iscyVA?si=UIgcekxPLp6Dfk-3 – Wie is Hy wat op die Water Loop?
Lees Jak 5.
‘n Lekker-sit toilet is regtig ‘n wonderlike ding. Party toilette kan mos net nie lekker sit nie – daai vierkantiges maak dat jy nie seker is watter deel van jou anatomie waar moet inpas nie. Daar is ook die tipe waarvan die deksel so ‘n goeie liniaal lengte van die bak af is, en jy kan nie agteroor sit nie – jy balanseer jouself so op die randjie om die ding te doen. En my worst nightmare – daai toilet wat so gemaak is dat jy nie teen die muur kan leun nie, want dan spoel jy die simpel ding skielik hier onder jou. Maar dan is daar die lekker-sit toilet. Dis daardie een waar jy na ‘n groot knyp sommer net lekker kan gaan sit en ontspan, agteroor leun met jou kop teen die muur, ‘n glasige uitdrukking in jou oë en jy voel sommer hoe die dag se sorge met gemak uit jou liggaam vloei. ‘n Lekker-sit toilet het groot krag!
Net so is die vurige gebed van ‘n regverdige ook ‘n kragtige instrument. Ons onderskat die krag van gebed! Ons hardloop soos malkop-driebeen-hoendertjies die wêreld vol op soek na antwoorde en oplossings, en heel dikwels is dit so eenvoudig soos ‘n gebed en ‘n gesprek met die Man wat op die water geloop het. Ons het al die bewyse in Sy Woord van hoe groot God se krag is, en dan gaan soek ons die ongemaklike sitplekkies wat te vierkantig is vir ons ronde boudjies om op te pas. Hou op om jouself mal te jaag na antwoorde en jou dood te kommer oor dinge – bid sonder ophou. En as jy nie kan bid nie, of jy voel te moeg om te bid, kry iemand om vir jou te bid. Gebed is jou manier van net jou hand uitstrek na God – en Hy sal daar wees om jou aan te raak. Dan sal jy ook voel hoe die sorge en kommer sommer uit jou liggaam vloei!
My Here, ons is so gou om antwoorde op allerhande plekke en in allerhande dinge te gaan soek, maar intussen is ons antwoorde net ‘n gebed ver. Dankie, Here, dat ek weet U is altyd daar vir ons. Ek kan in my moeilikste en maklikste tye altyd op U skoot kom sit en gesels, saam met U in geloof op die water wandel, my hand uitstrek na U en U aanraak – U is altyd daar. Ek het U so lief, my Here! Amen.

Die koortjies wat ek uplaai op my kanaal is van diffrents soorte musiek sangers Pinkster Koortjies Vir almal om te Luister God seun

Tabitha Outreach

05/12/2025

04/12/2025

03/12/2025

02/12/2025

01/12/2025

30/11/2025

29/11/2025

28/11/2025

27/11/2025

26/11/2025

25/11/2025

24/11/2025

Address

Website

Alerts

Shortcuts

Share

Category