https://www.facebook.com/374323562439916/

SEHAT KOR, Dubai (2026)

23/12/2025

هوږه رښتيا هم ګټوره ده خو په يوازې ځان فشار او شکر يا کومه بله ناروغي نسي کنټرولولای ځکه چې دغومره ډېر شيان هم نو نسته پکې.

که دغه ناروغۍ لرئ نو دوا يې هم پر وخت کاروئ او ډايټ او نور احتياطي تدابير هم له پامه مه غورځوئ.

SEHAT KOR

#شکر #فشار #هوږه #مغالطه #کنټرول

04/12/2025

له دې لوګي لوګي ماحول سره به څه کوو؟ 🤔

يوۀ مرګري ته مې يې د سينې د يوه شديد ناروغ له‌پاره د کابل د دريو معتبرو دولتي روغتونونو په ICU‌ګانو کې د خالي بېډ پوښتنه / واسطه وکړله خو جای ورته پيدا نسو.

راته وويل سو چې د وزير او معين په سويه واسطې کېږي چې مريض يې بستر کړو خو ډېر کله هغوی هم ځواب کړو.

دا ځکه چې يو خو زياتره ICU ايله لس بستره لري چې هغه به چا چا ته رسوي او بل د کابل هوا له مازيګره روسته د تنفس کولو نه وي.

له عامې روغتيا وزارت او نورو نړيوالو روغتيايي بنسټونو مو هيله دا ده چې يو خو په ټولو تخصصي روغتونونو کې ICU جوړې او اکمال کړي خير که په شروع کې لس بستره هم وي.

او دا کوم يې چې لري د دغو بسترونه خو دې لږ تر لږه شل شل خو سي.

رښتيا دا د روغتيا د پروموشن ډيپارټمنټ، د وقايې رياست، د ساري ناروغيو د کنټرول اداره، د چاپېريال ساتنې اداره او د ښاروالۍ، ناحيو او حوضو اړوند صحي او قانون نافذونکي چارواکي دې په موثره توګه لاس په کار سي او د هوا د پاکوالي له‌پاره دې ګټور ګامونه واخلي.

دا منو چې ساړۀ ډېر دي او ډېری خلک د يخنۍ د زور کمولو له‌پاره معياري شيان يا نه لري يا نه کاروي.

مګر دومره خو دې وکړي چې پلستيک، ربړونه، ټايرونه، ټوکر، څپياکې، موبلايل او نور بلا بتر بخاريو ته وا‌نه‌چوي بلکې لرګی او ګاز وسوزوي يا هم که بل آپشن نه وي نو د ډبرو سکاره البته ډېر او د اوږده وخت له‌پاره‌ نۀ.

تر ټولو کم زيانه البته صحت ته؛ برقي منقل، بخارۍ، هيټر او AC دي خو دا نو بيا يونټونه هم سم په خوند اړوي چې بيا يې بېل پرې کول هم د کمزوري اقتصاد کار نه دی.

اوس څوک دا روستۍ خبر؛ هغه د "چرا کېک و کُلچه نميخوره!؟" غوندې وانه‌خلي! 🫣

خير دی چې وس مو يې نه وي نو کمپلې او بړستنې زنده باد.

وختي لا په کوټو ننوزئ، جايونه اچوئ، د چايو او اوداسۀ اوبۀ هم چې کوټه کې ګرمې کړئ او خونه مو په لږ ډبل فرش، ګرمو توشکو، روجايي، ځل يا سندلۍ پټه وي نو هم مو شپه ښه خوندوره سبا کېږي.

ساړۀ به مو و‌نه‌وزني خو دا د غير معياري ضرري شَيونو سوَن مو که و‌نه‌وزني نو داسې مو مريضوي چې آن مرګ ته مو رسولای سي.

د الرجي، نفس تنګي، ساه بندي، شکر او زړۀ ناروغانو؛ ماشومانو او د ډېر عمر د مشرانو مو ډېر ډېر خيال ساتئ.

SEHAT KOR

#ژمی #ساړه #ککړتيا #چاپېريال #مرض #مخنيوی

16/11/2025

🗣❌ ️🤧✔️ 🫂❌ ️😷✅️

10/11/2025

سکرين ټايم

ويل کېږي چې نن سبا ډېری بالغ انسانان په اوسط ډول د ورځې له 4 نه تر 6 ساعتونو پورې سکرين ته ګوري او خبر هم نه وي چې دومره وخت را نه پر موبايل، ټېبلېټ، لېپ ټاپ، تلويزيون، وېډيو ګېم او اشتهاري سکرين لګېدلی.

دا دومره ډېر سکرين ته کتل تر ټولو مخکې سترګې اغېزمنوي او د سوخت، وچوالي او د ديد د پيکه کېدو سبب يې کېږي.

بل سکرين ته به يا ناست يئ يا پراته؛ چې له ډېرې ناستې او ملاستې په غير محسوسه توګه د غاړې، وليو، ملا او ورنونو درد پيدا کېږي.

د سکرين ځل بل کېدل او رڼا؛ په ځانګړې توګه "شنه رڼا" د خوب د هارمون يانې ميلاټونين کچه را کموي چې له کبله يې خوب ګډوډيږي او د ګنګسيت، ستړيا او سستۍ لامل هم کېږي.

"له رواني اړخه هم د انسان په مزاج، اعصابو او "ځان باور منفي تاثير کوي ځکه چې څه چې پر سکرين وينئ نو له هغو سره در‌نه د اديبانو په اصطلاح په ناخودآګاه کې د ځان او خپلو امکاناتو پرتلنه کېږي چې هيڅ بې هيڅه مو نا ارامه، خپه او پرېشانه کوي.

اوس نو که له دغو جسماني، ذهني او رواني ستونزو نه په امان پاته کېده غواړئ بايد چې له خوبه نيم ساعت مخکې هر رقم سکرين بند کړئ او له خوبه چې دا څنګه راجېګږئ نو ډايرېک د موبايل سکرين مه روښانوئ.

نور نو که د ورځې په اوږدو کې د سکرين ډېر او مسلسل استعمال در له غاړې وي نو هر 20 دقيقې روسته، د 20 ثانيو له پاره، شاوخوا 20 فوټه لرې کوم شي ته ګورئ.

دا کار د سترګو عضلې اراموي، رطوبت يې ساتي او د نظر د کمزوري کېدو مخه نيسي.

بل که د موبايل سکرين وي، که د لېپ ټاپ يا بل هر شي نو بايد چې د سترګو له سطحې پورته و نه اوسي يانې داسې نه وي چې سکرين ته يا ناست يئ يا ملاست يئ او هغه ستاسو له سترګو جېګ وي.

سکرين ته ځای پر ځای مه کېنئ يا پرېوزئ، بلکې وخت په وخت ورنه جيګېږئ او لږ لږ ګرځئ بيا يې بېرته راخلئ.

او بله دا چې د سکرين ګېر چاپېره ماحول، هغه که کوټه وي، که دفتر يا دوکان او بل هر ځای، بايد چې مناسبه رڼا ولري ځکه چې يوازې د سکرين رڼا به مو سترګې نه اخلي.

او دا د سکرين پر مخ چې هر څوک يا هر شی وينئ نو د ځان جوړونې او ظرفيت لوړونې پيغام ترې اخلئ او مثبت هوډ کوئ چې زه به هم دغسې يا د دغسې امکاناتو څښتن کېږم بيا به نو له مايوسۍ او بې مانا ټېنشن نه بچ يئ.

لنډه او روستۍ يې دا چې دا په شروع کې ياد سوي ټول شيان د نن زمانې ضرورت دی او خلاصی ورنه نسته نو د دې له‌پاره چې له زيانونو يې خوندي يئ نو په اعتدال يې کاروئ چې بدن او روان مو روغ او سلامت پاتې سي.

SEHAT KOR

#ټيکنالوجي #سکرين #وخت #اعتدال #روغتيا

09/11/2025

د طب پوهنځي فارغانو ته پرانستی ليک 😍

چې څنګه فارغېږئ نو له سيتاژه مخکې به اول خپل وضعيت جج کړئ چې دنده در له غاړې کېدونکې ده؟ که تخصص، ماسټري، فېلوشېپ، ډيپلومه، کوم پروسيجر يا لنډ مهاله ټرېنېنګ مو په وس برابر دی؟ بله دا چې په داخل او که خارج کې؟

که اول آپشن مو دنده وي بيا نو سيتاژ کې زيات وخت همغې څانګې ته ورکړئ چې غواړئ دنده پکې ولرئ.

د مثال په توګه غواړئ چې يو چېرې داخله OPD وکړئ نو دا چې داخله ستاژ عموما 10 اونۍ وي نو تاسې په رسمي يا غير رسمي توګه کم تر کمه 24 لا آن 30 اونۍ وخت داخلې ته ورکړئ.

کوم روغتون کې چې سيتاژ کوئ نو هغو سره رسماً د داخله
روټيشن د وخت غځولو يا د نورو سايکلونو تر څنګ په داخله کې يو لا دوه ساعته اضافه تېرولو خبره وکړئ يا هم په ښار کې له کوم شناخته داخله ډاکټر سره کېنئ.

نو په دې سره به بيا په دنده کې د داخله کېسونو په "ټرياژ" ، "ريفر" ، تشخيص او تداوي کې له پرېشاني سره نه وئ مخ.

نور نو هم د سيتاژ په وخت کې او هم د دندې پر مهال د کلينيکي مضمونونو تر څنګ پاراکلينيک هم ضرورو مطالعه کوئ ځکه چې يو خو به مو "بېس" نه خرابېږي بل به همزمان د نورو زده کړو بېلابېلو ازموينو ته په وخت چمتو وئ او په اسانۍ به له دندې نه نورو لوړو زده کړو او ټرېنېنګونو ته شِفټ کېږئ.

او که له اوله مو د دندې پر ځای زده کړو ته نېت وي بيا د سيتاژ پر مهال د ورځې څلور پينځه ساعته وخت د خپلې خوښې څانګې د مربوطه امتحان چمتوالي ته وقف کړئ.

که د سيتاژ تر څنګ په پابندۍ سره خپله "سيلف سټډي" نسئ تنظيمولای بيا نو د آمادګۍ له‌پاره په يو "چېنل" کې د پاتې کېدو په موخه يو چېرې کوم کلاس جواين کړئ خو مقصد سيتاژ او مربوطه آمادګي په عين وخت کې جاري وساتئ چې پر وخت تخصص، ماسټري يا کوم بل طبي پروګرام ته شامل سئ.

او که بېرون ځئ نو د طبي شورا تر امتحان مخکې مخکې مو بايد خپل اسناد په مربوطه ادارو کې طی مراحل او تيار په فايل کې اچولي وي.

د طبي شورا امتحان مو چې څنګه پاس کړ بيا نو عاجل د طبي شورا کارت جوړ کړئ ځکه چې نور سفري ريکوايرمېنټس لکه Good Standing Letter، د جرمې سابقې د تصديق سند، صحي معاينات، بېنک سټېټمېنټ او د ضرورت له مخې نکاح خط يا مجرد خط او نور لازم اسناد خو به هم جوړوئ کنه!

دا چې په خارج کې د دندو او زده کړو "داسې ښه" لاين څنګه جوړيږي؟ نو په دې اړه به هم ضرور مالومات درکړو.

SEHAT KOR

#طب #ډاکټر #کېرير #دنده #زده‌کړې #انتخاب

02/11/2025

که ناراحتي او ذهني بوج سره مخ يئ نو يو وار مو په خوړو هم نظر واچوئ چې څه او څه خورئ!؟

ځکه چې د همدغو غير صحي خوراکونو له امله کولمې دماغو ته داسې سیګنالونه لېږدوي چې هغه بيا د اظطراب، پرېشاني او ناخوښه احساس سبب ګرځي.

SEHAT KOR

#خوراک #صحت #هاضمه #دماغ

27/10/2025

سبزيانې خوړل کوم تاوان هم لري؟ 🤔

هو؛ ولې نه! د ډېرو ګټو تر څنګ ځينې زيانونه هم لري چې يو پکې د د ويټامين B12 کمی دی.

هغه خلک چې ورځنی خوراک يې تل سبزيانې وي او د حيواني سرچينو خواړه لکه غوښه، ماهيان، سمندري خواړه، چرګان، هګۍ، شيدې او نور لبنيات ډېر نه استفاده کوي نو د ويټامين B12 په کمي اخته کېږي.

په هندوستان کې تازه څېړنه سوې چې د 17750 تنو له جملې هغه 65 ٪ خلک چې د ويټامين B12 کمی يې درلود لامل يې په معمول خوراک کې صرف د سبزيانو استعمال و.

د دغه ويټامين د کمبود له کبله لاسونه او پښې خارخښت، بې حسي او يو رقم عجيبه احساس لري.

پلي تګ کې د توازن ساتل بې تولې کېږي. کمزورتيا او ستړيا به احساسوئ.

د موډ بدلون، غوسه کېدل، احساساتي کېدنه او د تمرکز کمی يې نورې ستونزې دي.

يو رنګې کمخوني، د ژبې پړسوب او د پوستکي زېړوالی هم پيدا کوي.

او تر ټولو عمده مشکل چې ترې پيدا کېږي هغه د فکر کولو او په يو څشي د زر نه پوهېدو ستونزه او آن د حافظي له لاسه ورکول دي.

دغه پاس يادې سوې ستونزې يو ناڅاپه نه پيدا کېږي بلکې ورو ورو د وخت په تېرېدو سره يوه يوه را ښکاره کېږي.

نو که کله مو ورته کومه کمزوري يانې د ويټامين B12 د کمي علامه ليدله او احساسوله نو سمدستي د مربوطه ډاکټر په مشوره د دغه ويټامين معاينه او تداوي پکار دي.

د وينې د متخصص يا هيماتولوژېست، د داخله ناروغيو او د تغذيې د متخصص کلينيک د دغې ستونزې د حل يانې تشخيص، تداوي او لازمو غذايي مشورو درکولو غوره ادرسونه دي.

SEHAT KOR

#سبزيانې #ناروغي #څېړنه #تشخيص #خوراک

26/10/2025

طب که بېرون؟ 🤔

پاکستان کې معالجوي او د غاښونو طب ته د ور کاميابېدو امتحان ته MDCAT وايي؛ لکه زموږ کانکور کال په کال اخيستل کېږي.

د پښتونخوا يوه کارډيالوجېسټ يانې د زړه ډاکټر په دغه ازموینه کې پاتې سويو زده کوونکيو ته ليکلي:

" په MDCAT کې ناکامه سوي دې سمدستي دوبۍ او ماليزیا ته د تګ ترتيب جوړ کړي. پينځه کاله روسته به يې ډاکټران ملګري د تنخوا د زياتېدلو لپاره په سړکونو دولت ته ژاړي. مګر د دوبۍ او ماليزيا والا به خپل کورونه لري، ودونه به يې کړي وي او د کلي په حُجره کې به يې د حاجي صاحب حيثيت هم خپل کړی وي او په ورځنيو چارو کې به يې خلک خبره هم نه نظر انداز کوي."

ډاکټر Orakzai زیاتوي: " که طب ته کامیاب سوئ نو مبارک مو سه که نه نو پور وکړئ خو دوبۍ، ماليزيا، اېټاليې او کاناډا ته تګ يوه شپه هم مه ځنډوئ!"

اخر کې وایي: " ګپ نه لګوم، سنجيده مشوره ده."

اوس نو چې څوک له MD / MBBS يا سټوماټولوژي / BDS نه روسته د تخصص، ماسټري يا کم تر کمه د يو فېلوشېپ يا کوم پروسيجر د زده کړې نېت يا وس نلري نو هماغه شروع کې دې دا پاس مشوره سنجيده واخلي.

ځکه چې د افغانستان د روغتيايي چاپېريال معاش / عايد هم د يو MD يا سټوماټولوګ لپاره تر شل زرو افغانيو ډېر نه دی.

که ستاسو توقع تر دې ډېره وي نو يو څو کاله به نور هم زحمت باسئ چې بيا هم هومره "شی" په لاس نه درځي لکه بېرون يې چې يو عادي نرس اخلي. 😊

SEHAT KOR

#طب #معاش #بهر #پيسې #کور #خرچې

19/10/2025

چې خندا يې درنه اخیستې وي، هغه ځای او هغه کس ته بېرته مه ور ګرزه.

SEHAT KOR

06/10/2025

د واده څلوېښت اصول

1. يوه ورځ هم چوپه مه تېروئ.
2. په ښه توګه غوږ نيسئ.
3. "مينه درسره لرم" هم کله کله ګردانوئ.
4. په ګډه خاندئ.
5. په غوسه مه ويدېږئ.
6. په ادب بحث کوئ.
7. بښنه له زړۀ غواړئ.
8. زر بښنه هم کوئ نو.
9. له نيوکو ډېره ستاينه کوئ.
10. اړتياوې ښکاره بيان کړئ.
11. ګوتې خوږول مه هېروئ.
12. مهربان او مينه ناک اوسئ.
13. نيزدېوالی ته لومړيتوب ورکړئ.
14. لاسته راوړنې لمانځئ.
15. د يو بل د ارامښت سبب جوړېږئ.
16. داسې مينه کوئ لکه اول وار.
17. خبرې مه پټوئ.
18. کارونو کې مرسته کوئ.
19. له توانه پورته مسولېت مه تر غاړې کوئ.
20. د يو بل د عادتونو درناوی پکار دی.
21. خوښو روایاتو ته وده ورکړئ.
22. کورنی چاپېريال ارام ساتئ.
23. د شخصي ودې مخه مه نيسئ.
24. د یو بل د خوب او خيال ملاتړ کوئ.
25. د يو بل په اړه فکرمن اوسئ.
26. انفراديت هم ساتئ.
27. صحت ته مو پام سره کوئ.
28. پلان او سپما په شریکه کوئ.
29. پيسې په اېمانداري مصرفوئ.
30. يو بل مه تورنوئ.
31. سختيو سره ګډه مبارزه کوئ.
32. ننګ له ننګونو سره وکړئ؛ یو بل سره نه.
33. يو بل سره ضرور کومک وکړئ.
34. يو تر بله ژمن اوسئ.
35. تل يو ځای د پرمختګ هڅه کوئ.
36. د يو بل د کورنیو درناوی کوئ.
37. د وړو وړو خوشاليو هم قدر کوئ.
38. په وعده درېږئ.
39. بل چا سره مو د "واده" پرتلنه مه کوئ.
40. هره ورځ مينه کوئ.

SEHAT KOR

#واده #ګډ‌ژوند #مينه #خوشالي #اصول

24/09/2025

طبابت کې پیسې سته خو...

زموږ ټولنه کې يوه بله خبر چې مشهوره ده هغه دا ده چې سپينه چپن يې پر تن وي نو پيسه‌دار به وي.

په داسې حال کې چې سپينه چپن يوه پروفيسر هم په تن کړې وي او نرس هم.

نو د دوی معاش يا آمدن کله سره برابرېدای سي؟ پروفيسر د نرس د عمر هومره تعليم او تجربه لري او نرس خوار ها بله ورځ فارغ وي نو نن بيا څرنګې يو دم مالداره سي؟

خبر دا ده چې څوک هم طب شروع کوي؛ هغه که نرسنګ دی، که قابله‌ګي، که پروتېز، که طبي ټکنالوجي، که فارميسي، که سټوماټولوجي او يا هم معالجوي طب نو په دغه يوه طبي څانګه کې هم پرته له تخصص، ماسټري، او دوکتورا نه هومره پيسې نسته څومره چې خلک او تاسې سوچ کوئ.

که نور هيڅ شی هم نه کوئ نو په خپله رشته کې بايد کم تر کمه دوه درې ټرينېنګز واخلئ. فېلوشېپ يا هم کومه ډيپلومه ضرور وکړئ.

بيا کولای سئ چې په ځان ډاډه واوسئ او يو چېرې په دولتي تشکيلاتو يا انجيوز او موسساتو کې د لږ ښه بست غوښتنه وکړئ يا هم په خپل شخصي سېټ آپ کې د ښې پوهې او اضافه تجربې پر مټ ښه مريضان پيدا کړئ.

مثال کې MD ډاکټر واخلئ. چې تازه يې ستاژ خلاص کړی او د طبي شورا امتحان پاس کړی وي نو که چېرې دنده پيدا کړي هم نو معاش به يې له شلو زرو افغانيو ډېر نه وي.

هغه بېله خبر ده چې يو څو MD ډاکټران به موسسو کې پينځه شپږ سوه ډالر اخلي يا به چېرې د کوم لېنک په ذريعه کوم ځای آمر، معاون او ريس وي.

دغه ځايونه استثنايي او ډېر کم دي. زه عمومي خبر کوم. په صورت عموم سره تازه فارغ لا هم دوه درې کاله تجربه لرونکی MD له شلو دا نهايي تر دېرسو زرو زيات معاش نسي تر لاسه کولای.

که شخصي کتنځی جوړوي يا چا سره په فيس او فيصدي کيني نو هلته هم مريض پيدا کول دومره آسانه نه دي. ځکه چې اکثر خلک متخصصانو ته ورځي يا که MD ته راسي هم نو اکثر کېسونه يې تر سويې پورته وي. ځکه چې زياتره مرضونه تخصصي او مجرب خدمات غواړي. بيا هم مریض له ګوتو وزي. 😊

نو ښه لاره دا ده چې له ستاژ بشپړولو روسته کم تر کمه په يوه خاصه برخه کې يو شپږ میاشتنی، لا يو کلن او دوه کلن ټرېنېنګ او ډيپلوم واخيستل سي.

پاتې سو ماسټري، تخصص، فوق تخصص او دوکتورا هغه خو بېخي زبردست کار دی خو زښت زيات وخت او لګښت غواړي. بايد چې ذهني او مالي سپورټ ورته ولرئ.

نور نو که څوک طب تر يوه معين حده پورې وايي او بيا د ښه عايد تمه لري نو دا نن سبا ممکنه نه ده. دغه خپله توانایي دې چېرته په کومه بله رشته ولګوي چې يوه اندازه ښه او عاجل عايد ترې په لاس راځي.

لنډه او اوږده يې دا چې په تشه نرسنګ، سټوماټولوجي او MD ډګري هومره پيسې نسئ پيداکولای چې څومره يې په اړه افراطي او بې بنياده سوچ موجود دی.

لا به نور درس او ټرېنېنګ ته زړه ښه کوئ یا له سره طب مه وايئ چې ځان پکې د تخصص او يو مهارت کچې ته نسئ رسولای.

ځکه چې زموږ ټولنه له ډاکټره د پیسو تمه لري او ته چې لا هغه حد او سرحد ته نه يې رسېدلی چې ښې پيسې وګټې بیا نو کېنه د دوی ګيلو، مانو او طعنو ته.

خپله به هم په سټرېس کې يئ؛ کورنۍ به هم تمه در نه لري او تاسې به په داسې حالت کې يئ چې لوری به در نه ورک وي.

تر هغې ښه دا ده چې د طب له شروع کولو مخکې خپل ذهني، بدني، رواني او مالي قوت او امکانات یو وار ښه وسنجوئ.

دا اندازه ولګوئ چې له پوهنتون او ستاژه روسته تر کومه حده تلای سم؟ لنډ مهالی ټرېنېنګ، فېلوشېپ، ډيپلومه، ماسټري، دوکتورا، تخصص، او که فوق تخصص؟ بيا بسم کړئ!

او که حالات او امکانات له اولنۍ طبي ډګري روسته د دغو شيونو اجازه نه درکوي بیا يې له سره وايئ مه. ولې ځان ته کار ګورئ!؟

SEHAT KOR

#طب #تخصص #ماسټري #دوکتورا #پيسې

23/09/2025

سرطاني غوټه

يو شی چې بايد ښه پوره عام سي هغه لازم معاينات کول او يقيني تشخيص ته ځان رسول دي.

دلته يو ځای کې يو مريض ته د يو کتلې (غوټې) عمليات سوی او بيا يې نمونه اخيستل سوې د بايوپسې له‌پاره.

ترې مخکې نه تلويزيوني معاينه سوې، نه کومه اېکسرې سوې او نه کوم ايم ار ای يا سي ټي سکېن.

غوټه خو د فزيکي معاينې پر اساس عمليات باندې لرې سوې خو دا چې تشخيص نه و سوی؛ چې دا اوس کوم رقم غوټه ده؟ سرطاني خو به نه وي؟

څه وخت پس مريض ته بېرته همالته غوټه پيدا سوې نو بيا يې بل عمليات کړی او تر هغو يې هغه د غوښې د نمونې يانې بايوپسي نتيجه هم راغلې او ناروغ سرطان ختلی.

اوس ورته ايله کېموتيراپي يا په عامه اصطلاح د سرطان واکسين شروع شوی.

د دغه ناروغ دا غوټه که لږ سنجيده اخستل سوي وای. له عمليات او نمونې مخکې ورته دا پورتني معاينات او ځينې نورې د وينې معاينې ورکړل سوي وای نو هم به دوه ځلې عمليات ته نه مجبورېده او هم به کېمو ورته په وخت شروع سوي وای.

د مولايانو په اصطلاح فلهذا؛ مريض ته دې مکمل لازم معاينات ورکړل سي، وړې دانې يا غوټې ته دې هم په کمه سترګه نه ګوري. د فزيکې معاينې تر څنګ دې په لابراتواري او راډيولوژيکو معايناتو هم يو وار تسلي وسي.

نور نو دا چې يا زموږ مريضان په وس کې کمزوري دي او ډاکټر يې په غربت زړه بدوي او يا ترې د بې پروايي او تر يو حده د بې تجربه ګۍ له وجې مشکل ميس او نه تشخيصيږي نو پر دې يوازې آفسوس کولای سو.

باقي دې خدای پاک ټول وطنداران اول خو له آفته وساتي او د ناجوړي په صورت کې ورته ډېر وس او پر وخت د تصميم نيولو شعور غواړم.

مرض د ګپ شی نه دی، بيا سرطان! سرطان خو ډېر زر بنده له اده بوده اچوي. هم مريض او پايواز او هم مربوطه ډاکټر بايد سنجيده واوسي او پر وخت تشخيص او درملنه وسي.

SEHAT KOR

#غوټه #عمليات #معاينات #سرطان

#تشخيص #درملنه #ناروغ #ډاکټر #نتيجه

SEHAT KOR

23/12/2025

04/12/2025

16/11/2025

10/11/2025

09/11/2025

02/11/2025

27/10/2025

26/10/2025

19/10/2025

06/10/2025

24/09/2025

23/09/2025

Address

Website

Alerts

Shortcuts

Share

Category