04/09/2020
۱۲ لاملونه چې ځوانې دانې مو نه ښه کيږي
ډاکټر عبدالولي اعتماد ( د پوستي او ښکلا متخصص)
ډیر خلک په دې انديښمن دي چې د ځوانی دانو د درملنې سره سره د دوی ځوانې دانې ښه شوي نه دي. که تاسو هم یو له هغو کسانو څخه یاست نو لاندې مطلب ولولی، تر څو په هغو لاملونو باندی پوه شی چې ستاسو ځوانې دانې، ولي نه ښه کیږي؛ او د حل لارې یې څه ده.
۱. کیدلای شي تاسې د ځوانې دانې ضد درمل په مناسبه توګه نه وي استعمال کړي.
ډیری خلک په خپل آند او فکر درمل استعمالوي او یا هم په هغو ډاکترانو باندي چې په پوستکي کې تخصص نه لري، د ځوانې دانو درملنه کوی چې داسي درملنه پوره اغېزمنه نه وي.
۲. ډیری خلک په دې آند دي چې کله ځوانې دانې پر مخ را وځي نو یو څو وخت وروسته بیرته لمنځه ځي نو ځکه ژر د هغې پر درملنه باندي غور نه کوي، او یا هم د درملنې لپاره لیوالتیا نه ښیې اویا هم د کمي اندازې درمل د استعمال څخه وروسته زړه توري سي او د درمل استعمال ته ادامه نه ورکوي. شاید تاسو هم په دې آند وی، او خپل درمل په سمه ټوګه نه استعمالوی. ښه به دا وي چې د ځوانې دانې درملنه مو وکړی او درمل په سمه توګه استعمال کړی. سمه ده چې ځوانې دانې راخیژی او بیرته ورک کیږی، خو داغ يې د تل لپاره پاتې کيږي، نو د ځوانې دانې د داغونو د مخنوی لپاره باید د ځوانې دانو درملنه وکړی.
۳. ممکن چې د ځوانې دانو درمل ته مو په سمه توګه ادامه نه وی ورکړي:
کله چې د تاسو د مخ ځوانې دانې کمي سي خپل درمل قطع کوی؛ او داسی فکر کوی چې ځوانې دانې مو مکملي ښې شوي دي، خو داسي نه ده، ځوانې دانې مو په مکمل ډول سره لمنځه نه دي تللي خو یوازې کنترول شوي دي او تاسې اړ يې چې خپل درمل په سمه ټوګه استعمال کړی، او کله چې ځوانې دانې مو په پوره توګه ښې سي؛ نو بیا تاسو ته د ځوانې دانو د مخنيوی لپاره داسی درمل درکول کیږي چی د ځوانې دانو د دوهم ځل د راوتلو څخه مخنیوی کوي.
۴. تاسي خپلو خواړو ته پاملرنه نه کوي:
ټول د پوستکي متخصصین په دې آند دي چی خواړه د ځوانې دانو لامل نه کیږي، او که تاسو د ځینو خوړو څخه ډډه هم وکړی، بیا هم ځوانې دانې راخيژی، خو څېړنو دا ښودلې ده چې یو شمېر خواړه ځوانې دانې لا هم ډیر وي، چې دا رنګه خواړه ډیری یې ډیر کالوري لرونکي او خواږه خواړه دي. که چیري تاسو په دې پوه شوي، چې داسی خاص خواړه ستاسو د ځوانې دانو د زیاتوالی لامل ګرځي له هغه څخه ډډه وکړی.
۵. بل لامل چې ستاسې ځوانې دانې نه ښې کيږی هغه د مخ په پرېمنځلو کې زیاتوالی او کموالی دی، تاسو باید پوه شی چې ډیر او لږ پرېمنځل د مخ کیدلای سي چې ځوانې دانې ډیرې کړي. نو تاسې باید د ورځې دوه ځلې په یو مناسب صابون سره خپل مخ پريمنځۍ.
۶. په نامنظمه توګه د وېښتانو پرېمنځل کېدلای شي چې د ځوانې دانو د نه ښه کیدنې یو بل لامل وي، باید تاسي په یاد ولری، هغه کسان چې ځوانې دانې لري زیاتره د غوړ مخ او وېښتانو درلودونکي وي، او د وېښتانو نه پرېمنځل د وېښتانو د لا غوړیدو لامل ګرځي چې د همدې وېښتانو لګېدل پر مخ باندي او د سر د غوړو راټیټېدل پر مخ باندي د ځوانې دانې د ډیرېدو لامل ګرځي.
۷. ممکن تاسي د وېښتانو غوړ استعمالوی او یا هم د غوړو آرايشي کریمونو څخه کار اخلی چې دا په خپل وار سره ستاسې ځوانې دانې زیاتوي، تاسو باید يو ورځ په منځ کې خپل وېښتان پريمنځۍ او د نه غوړ لرونکي آرايشي توکو څخه کار واخلی.
۸. د نامناسب صابون استعمال هم کولای شې چې د ځوانې دانې د ډیرېدو لامل سي:
يو شمیر کسان د ماشومانو صابون استعمالوي، په داسی حال کې چې ځوانې دانې په غوړو پوستکيو کې راخيژي چې د ماشومانو صابون نسي کولای چې د پوستکي د غوړو د کمیدو لامل سي نو ځکه د ځوانې دانو د ډیرېدو لامل ګرځي. له بلي خوا یو شمېر تیز صابونونه هم د ځوانې دانې د ډیرېدو لامل ګرځېدلای سي. نو د مناسب صابونونو څخه برخمن سی، چې د غوړ او د ځوانې دانو درلودونکي پوستکي لپاره یو مناسب صابون وي، او پوستکی نه خرابوي، د پوستکي د غوړ لپاره هم ګټور دی او د ځوانې دانې په کنټرول کې هم اغیزمن شمېرل کیږي.
۹. تاسو ډیره اندېښنه کوی، چې خپله اندېښنه او خپګان د ځوانې دانو د ډیرېدو یو لامل دی: اندېښنه او خپګان د کورتیزون په نوم د هورمون د ډیرېدو لامل ګرځي چې د دې هورمون د زیاتیدو په پایله کې د پوستکي غوړ او ځوانې دانو ډیر وي. نو پر خپل ځان باندي باور ډیر کړی، ورزش ته هم لاسرسی پیدا کړی او ورسره خپګان له ځانه لري او د ځوانې دانو نه مخنیوی وکړی.
۱۰. یو بله ستونزه دا هم ده چې تاسې د درملنې د ژر نتیجې په تمه یاست، خو له بده مرغه چي ځوانې دانې اوږد مهاله درملنه ته اړتیا لري. تاسې بايد خپل درمل په سمه توګه استعمال کړی، او صبر وکړی ترڅو ځوانې دانې مو ورو ورو مخ په ښه کېدو سي.
۱۱. په ځوانې دانو کې لاس وهل یو بل بد عادت دی:
په ځوانې دانو کې لاس وهل او یا شکول له يوې خوا د ځوانې دانو د داغونو د رامنځته کېدو لامل ګرځي او له بلې خوا چې د شکول شویو ځوانې دانو ترڅنګ د نوې ځوانې دانو د راختلو سبب کرځي.
۱۲. په ډیرو حالتو کې په خاصه توګه په ځوانو ښځو کې د هورمونی او ولادی ستونزي وي چې په داسی حالتو کې د ځوانې دانو د درمل په استعمال سره پرته له دې چې د هورمونونو او ولادي ستونزو درملنه وسي، ځوانې دانې نه ښه کیږی، چې يو له دې ستونزو څخه د تخمدان کیستونه دي چې په ځوانو ښځو کې د ځوانې دانو د ډیرېدو، پر مخ باندي د اضافی وېښتانو پیدا کېدل، او د سر د وېښتانو تویېدلو لامل هم کېدلای شي. نو په داسي حالاتو کې هم باید ځوانې دانې او هم د هورمونو او ولادې ستونزو درملنه وسي.
