29/04/2026
Samiti i VII-të Kombëtar Mjekësor Shqiptar, me temë “Gruaja në fokus: sfida dhe shpresë përballë sëmundjeve tumorale”, i zhvilluar më 25 prill 2026 në Plaza Hotel Tirana, përmbylli me sukses punimet e tij, duke shënuar një pjesëmarrje të gjerë të profesionistëve të fushës së mjekësisë.
Seksioni I solli në qendër të diskutimit sfidat aktuale në diagnostikimin dhe trajtimin e patologjive onkologjike tek gratë. U trajtuan tema me rëndësi të veçantë, si diagnostikimi i vonuar i kancerit të pankreasit, roli i kirurgjisë laparoskopike në situata komplekse si abdomeni akut gjatë shtatzënisë, si dhe qasjet kirurgjikale në trajtimin e kancerit gastrik tek gratë, duke ofruar një perspektivë të integruar si në nivel ndërkombëtar ashtu edhe në kontekstin shqiptar. Diskutimet theksuan gjithashtu rolin e imunohistokimisë në identifikimin e mundësive për terapi të targetuar në kancerin e gjirit TNBC, si dhe rëndësinë e menaxhimit anestezik në kirurgjinë onkologjike, duke reflektuar nevojën për një qasje multidisiplinare.
Ndërsa , Seksioni II u fokusua në çështje thelbësore të onkologjisë tek gratë, duke trajtuar rritjen e incidencës së kancerit kolorektal, tashmë i konsideruar si një “epidemi e heshtur”. U diskutuan sfidat në diagnostikimin e hershëm dhe menaxhimin klinik, përfshirë aspektet praktike si kolostomia, si dhe rëndësia e vaksinimit dhe depistimit për HPV si një nga ndërhyrjet më efektive në Shëndetin Publik. Vëmendje e veçantë iu kushtua ruajtjes së fertilitetit në onkologjinë gjinekologjike dhe përdorimit të teknologjive të avancuara si PET-CT në vendimmarrjen terapeutike, duke nënvizuar dimensionin human dhe rëndësinë e kujdesit empatik ndaj pacienteve.
Gjithashtu, edhe Seksioni III trajtoi një spektër të gjerë problematikash që lidhen me avancimin dhe komplikacionet e sëmundjeve tumorale tek gratë. U diskutua kanceri pulmonar, me fokus të veçantë tek gratë duhanpirëse, si dhe përhapja e metastazave kockore nga kanceri i gjirit, duke integruar të dhëna mbi epidemiologjinë, patofiziologjinë dhe strategjitë bashkëkohore të trajtimit. U analizuan sfidat e kancerit të gjirit në moshat e reja, aspektet psikoemocionale, si dhe roli i teknologjive të avancuara si radiokirurgjia në trajtimin e metastazave cerebrale.
Diskutimet përfshinë edhe qasjet moderne në rindërtimin e gjirit dhe rëndësinë jetike të diagnostikimit të hershëm në kancerin e lëkurës.
Samiti i VII-të Kombëtar Mjekësor Shqiptar kishte një rëndësi të veçantë për profesionistët e shëndetësisë, pasi shërbeu si një platformë e integruar për shkëmbimin e njohurive bashkëkohore, përvojave klinike dhe inovacioneve në fushën e onkologjisë. Ai mundësoi diskutimin e sfidave reale në praktikën mjekësore, duke nxitur një qasje multidisiplinare dhe bashkëpunim më të ngushtë ndërmjet specialiteteve të ndryshme.
Përmes prezantimeve shkencore dhe debateve profesionale, pjesëmarrësit u njohën me zhvillimet më të fundit në diagnostikim, trajtim dhe teknologji mjekësore, duke përmirësuar kështu kapacitetet e tyre klinike dhe vendimmarrjen terapeutike.
Njëkohësisht, Samiti theksoi rëndësinë e kujdesit të personalizuar dhe dimensionit human në trajtimin e pacienteve, duke e bërë atë një aktivitet me vlerë të drejtpërdrejtë për rritjen e cilësisë së shërbimeve shëndetësore.
"Diskutimet ndërmjet lektorëve u karakterizuan nga një nivel i lartë profesional duke shkëmbyer përvoja dhe praktika klinike bashkëkohore në fushën e kirurgjisë". Në përfundim të tij u shpërndanë edhe certifikatat për të gjithë pjesëmarrësit.
Falenderojmë përzemërsisht grupin organizator të AMEA-s, për këtë event shkencor mjekësor të një niveli evropian, mirënjohje kryelektorëve kontribues, audiencës dhe pjesëmarrësve në finalizimin e një eventi me standard ndërkombëtar dhe vlerë të padiskutuar në procesin e edukimit mjekësor në Shqipëri!
📌 Shoqata AMEA – Albanian Medical Education Association mbetet e angazhuar në organizimin e eventeve të nivelit të lartë shkencor dhe akademik mjekësor, në funksion të zhvillimit profesional në fushën e kirurgjisë dhe mjekësisë bashkëkohore në Shqipëri e më gjerë.
Ju mirëpresim në Samitin e radhës!
"Investimi në Shkencë dhe Edukim mjekësor është investimi i së ardhmes" – Dr. Shk. Lida Shosha!
Join us on: Facebook | Instagram | LinkedIn
̈si
