04/03/2026
Ով եմ ես, ով ես դու. արևմտամետ-հայաստանակենտրո՞ն, թե՝ ռուսամեռ-երախտամոռ
Հիմա շատ մոդայիկ պատասխան է դարձել` «ոչ արևմտամետ եմ, ոչ` ռուսամետ, այլ հայամետ եմ, հայաստանակենտրոն»: Այսպես ուզում են իբր «քողարկվել ու արդարանալ»։
Բայց եթե մեր ինքնիշխանության և պետականության պահպանման ու ամրապնդման նպատակով արևմտյան բախտորոշ աջակցությունը, ռուս֊թուրքական աքցանից դուրս բերելու և պատերազմը դադարեցնելու, տարածքային ամբողջականությունը պահպանելու ամերիկյան և եվրոպական ջանքերը նկատելու, գիտակցելու և երախտագետ լինելու ունակությունդ չես կորցրել, ուրեմն արևմտամետ ես։ Այլ կերպ ասած, հայամետ և հայաստանակենտրոն համարվելու համար նախևառաջ պետք է արևմտամետ լինես։
Իսկ եթե այսօր, այս ամենից հետո շարունակում ես ռուսամետ լինել, ուրեմն` հակահայ ես, հայատյաց, սեփական ինքնիշխանության և պետականության թշնամի...
Եվս մեկ ճշգրտում` ոչ թե ռուսամետ ես, այլ` ռուսամեռ, ռուսաքոծ ես, Սոլովյով֊Զախարովա֊Կիրիենկո֊Կոպիրկին շարքի սպասարկուներից ես, խաղաղության, ժողովրդավարության, ինքնիշխանության թշնամի ես, քո երկրի ու տան գերեզմանափորն ես կամ անուղղելի գործակալ կամ անբուժելի հոգեխանգարված... ով ուզում ես եղիր, որերորդ նախագահը, Կտրիճը թե Գարեգինը, Տաշիրը թե Տապանը, ինչպես ուզում ես կոչվիր ու ներկայացիր` Ուժեղ և կուշտ, Բարգավաճ և Մայր...
Եվս մեկ մոդայիկ թեզ֊արդարացում`
ռուսամետությունը քողարկելու համար. խոսել չինական, իրանական և ռսահաճո այլ ներդրումներից, կապիտալից, ատոմակայանից... կարելի է նաև չինամետ, իրանամետ հանդես գալ։
Սպառվեց և փլուզվեց ռուսական ծառայությունների և վերջիններիս տեղական ծառաների կողմից շրջանառվող դարավոր թեզը` եթե ոչ ռուսը, ուրեմն` թուրքը, եթե ոչ՝ ծայրագավառ, ուրեմն՝ վիլայեթ։ ԱՄՆ֊ի մեկը մյուսին հաջորդող գործնական քայլերը փլուզեցին այս ողորմելի կարծրատիպը, Հայաստանի քաղաքացին համոզվում է, որ ԱՄՆ հետևողականորեն ամրապնդվում է տարածաշրջանում, ինքն է թելադրում խաղի կանոնները, վերացնում դրան խոչընդոտող բոլոր արգելքները: Հայաստանի քաղաքացին, եթե իհարկե հիվանդ֊ռուսամեռ չէ, ինչո՞ւ պետք է ընդունի գուբերնիա կամ վիլայեթ, ռուս կամ թուրք երկընտրանքը…
Ամփոփում.
Ինձ համար մեծագույն հարված, իմ հեղինակության հանդեպ անարգանք ու ամոթ կհամարեմ իմ ընկերների, մշակութային֊հասարակական֊բժշկական շրջանակների ներկայացուցիչների, հետևորդների խարխափումը կործանարար այս շրջապտույտի մեջ՝ քվեարկելով պատերազմի, կորուստների, աղքատության և կործանման տանող ճանապարհի օգտին։
Մի ականապատեք պետականությունը և հստակ կողմնորոշվեք դեպի ինքնիշխանությունը, խաղաղությունը, զարգացումը, տնտեսական թռիչքի հնարավորությունը, տարածաշրջանային գործոն դառնալու նպատակը։
Ժամանակին, տարածությանը, Աստծո նախախնամությանը դեմ գնալ հնարավոր չէ, մի՞թե այդքան մազոխիստներ կան, որ ընտրեն խաղաղության փոխարեն պատերազմի, կյանքի փոխարեն` մահվան, առաջավորի փոխարեն` հետամնացին, հզոր և հավատարիմի փոխարեն, թույլին ու դավաճանողին։
Ընտրեք ուղին, ճանապարհը, նոր միայն վերջում՝ անձը, դեմքերը, կուսակցությունը:
Ովքեր այս ճանապարհի ընտրությունը հստակ կատարել են, սակայն նույնքան հստակ և վերջնականապես մերժում են գործող իշխանությանը և հրաժարվում են ընտրական գործընթացներին մասնակցությունից, ապա այս դեպքում լավագույն և տրամաբանական ընտրությունը Արամ Սարգսյանն ու «Հանրապետություն» կուսակցությունն են։
Եթե Եվրոպական միությունը խորապես մտահոգված է մեր պետականությանը սպառնացող հիբրիդային պատերազմի վտանգով, ապա ժողովրդավարական աշխարհի հավանությանն ու աջակցությանը կարժանանան ՀՀ իշխանությունների ինքնիշխանությանը, պետականությանը, խաղաղությանը և ժողովրդավարությանը սպառնացող վտանգները կանխելու ջանքերը: Մարտի 1-ին և հոկտեմբերի 27-ին առնչվող, դրսից ֆինանսավորվող և այլ երկրների քաղաքացի հանդիսացող անձանց ու խմբերի մասնակցությունը կասեցնել օրենքի ողջ ուժով:
