10/10/2021
YOANE 14:15-21
Tata akotinda *Molimo *Mosantu
15 “Soki bolingaka ngai,
bokotosa mibeko na ngai.
16 Bongo nakosenga Tata,
pe ye akopesa bino Mosalisi mosusu,
po ázala na bino seko.
17 Ye nde *Molimo,
oyo ayebisaka makambo nyonso Nzambe azali kolakisa.
Bato ya mokili bakoki kozwa ye té,
po bamoni ye té,
pe bayebi ye té.
Kasi bino boyebi ye,
po azalaka na bino,
pe azali na kati ya mitema na bino.
18 “Nakotika bino lokola bana etike té;
nakozonga epai na bino.
19 Etikali moke,
bato ya mokili bakomona ngai lisusu té.
Kasi bino bokomona ngai,
po ngai nazali na bomoi,
bino pe bokozala na bomoi.
20 Soki tango wana ekoki,
bokoyeba ’tè ngai nazali na Tata na ngai,
bino bozali na ngai,
pe ngai nazali na bino.
21 “Moto oyo ayebi mibeko na ngai pe atosaka yango,
ye nde moto alingi ngai.
Tata na ngai akolinga moto oyo alingaka ngai;
ngai pe nakolinga ye,
pe nakomimonisa epai na ye.
Ezaya 19:20-22
20 Yango ekozala elembo oyo ekolakisa ’tè Yawe ya nguya nyonso azali na kati ya Ejipte. Tango ba-Ejipsien bakosenga Yawe álongola bango na maboko ya bato oyo bazali konyokola bango, Yawe akotindela bango mobikisi oyo akokotela bango pe akobikisa bango. 21 Bongo Yawe akomilakisa na ba-Ejipsien. Bango bakoyeba ye pe bakokumisa ye na makabo pe na *mabonza, bakopesa ye bilaka pe bakokokisa yango. 22 Tango Yawe akosilisa kobeta ba-Ejipsien, akobikisa bango: bango moko bakozongela ye; ye akondima mabondeli na bango pe akosilisa maladi na bango.
