21/10/2025
TANIYAQ VƏ UNUTMAYAQ!
Tibbi elmlər üzrə fəlsəfə doktoru, ginekoloq-cərrah Gülməmmədova Çinarə Vaqif qızı.
Gülməmmədova Çinarə Vaqif qızı 10 sentyabr 1975-ci ildə Zərdab rayonunda dünyaya göz açmışdır. Orta təhsilini 1982–1992-ci illərdə Bakı şəhəri 7 saylı məktəbdə almış, elm və biliyə olan həvəsi onu ali təhsil yollarına aparmışdır.
1993–1999-cu illərdə N.Nərimanov adına Azərbaycan Dövlət Tibb Universitetinin Müalicə-profilaktika fakültəsində oxumuş, daha sonra 1999–2001-ci illərdə Akademik M.Topçubaşov adına Kliniki Cərrahiyyə Elmi-Tədqiqat İnstitutunda həkim-cərrah ixtisası üzrə internaturanı uğurla başa vurmuşdur.
Elmin və peşəsinin dərinliklərinə daha dərindən nüfuz etmək arzusu ilə 2004–2006-cı illərdə Rusiyanın məşhur İ.M.Seçenov adına Moskva Dövlət Tibb Akademiyasında Mama-ginekoloq ixtisası üzrə klinik ordinatura təhsili almışdır.
Peşəkar fəaliyyəti boyu bir çox məsul vəzifələrdə çalışmışdır: 2008–2012-ci illərdə N.Tusi adına klinikada mama-ginekoloq, 2012–2016-cı illərdə isə Ə.Əliyev adına ADHTİ-nin “Mamalıq və ginekologiya” kafedrasında baş laborant olmuş, 2016-cı ildən isə həmin kafedrada assistent vəzifəsində fəaliyyət göstərmişdir.
Çinarə həkimin elmi məqalələri ABŞ, Ukrayna, Rusiya və Gürcüstanın nüfuzlu tibb jurnallarında dərc edilmiş, müxtəlif ölkələrdə keçirilən beynəlxalq elmi konfrans, simpozium və konqreslərdə məruzələrlə çıxış etmişdir.
2017-ci ildə Prezident yanında Ali Attestasiya Komissiyasının qərarı ilə “Mamalıq və ginekologiya” ixtisası üzrə fəlsəfə doktoru elmi dərəcəsinə layiq görülmüşdür. Onun dissertasiya işi “Birincili və ikincili sonsuzluqların səbəbləri, risk amilləri və riskin dərəcəsinin regional xüsusiyyətləri” mövzusuna həsr olunmuşdur.
Ginekologiya sahəsində 23 elmi məqalə və dissertasiyanın müəllifi olan Çinarə həkim, sonsuzluğun müalicəsi və bütün növ ginekoloji əməliyyatların icrasında peşəkarlığı ilə seçilir.
Hazırda o, M.Ə.Mirqasımov adına Respublika Klinik Xəstəxanasında ginekoloq-cərrah kimi müqəddəs həkimlik missiyasını davam etdirir. Çinarə həkim ailəlidir, iki övlad anasıdır.
