11/08/2025
Cərrahi əməliyyatın böyüyü, kiçiyi, sadəsi və ya mürəkkəbi olmaz. Çünki istənilən əməliyyat gedişatında mürəkkəbləşə, uzana və çətinləşə bilər.
Xüsusilə, icrasının uzun çəkəcəyi əvvəlcədən məlum olan, anatomik olaraq cərrah üçün çətin nahiyədə yerləşən və həyati əhəmiyyət daşıyan orqanlarda əməliyyat planlaşdırılarkən, pasiyentlər xəstəxana seçimini çox diqqətlə etməlidirlər. Çünki belə “mürəkkəb” əməliyyatlardan sonra fəsad riski daha yüksək olur və həm cərrah, həm də əməliyyat aparılan xəstəxana bu risklərə tam hazır olmalıdır.
Hazır olmaq — xəstəxananın sadəcə böyük binaya sahib olması demək deyil. Əsas məsələ lazımi tibbi mərkəzlərin, şöbələrin və ixtisaslı mütəxəssislərin mövcudluğudur.
Məsələn:
- Əməliyyat zamanı və ya sonrasında qanaxma yaranarsa, onu dərhal dayandırmaq mümkün olacaqmı?
- Cərrah ehtiyac duyarsa, ürək-damar cərrahlarını və invaziv radioloqları yardıma çağıra biləcəkmi?
- Bəzi hallarda əməliyyatdan sonra müəyyən dərmanların yalnız reanimasiya şəraitində, ciddi nəzarətlə vurulması tələb olunur — xəstəxananın bu səviyyədə reanimasiya imkanı varmı?
Bu amillər əməliyyatdan sonrakı mərhələ üçün həyati əhəmiyyət kəsb edir. Ona görə də, əməliyyat qərarı verərkən, həkim seçimi edərkən əməliyyatın hansı xəstəxana icra olunacağına da əhəmiyyət verməyinizi tövsiyyə edirəm.
