Mərkəzi Gömrük Hospitalı / Central Customs Hospital, Kazim Kazimzade Str. 118, Baku (2025)

09/11/2025

9 Noyabr - Azərbaycanda Dövlət Bayrağı Günüdür

Bayraq millətimizin, dövlətimizin şərəf və ləyaqətinin ifadəsidir. Azərbaycan xalqının bayrağa xüsusi münasibəti tarix boyu özünü göstərib, bayraq xalqımızın milli mövcudluq nişanəsi sayılıb. Bu gün hər bir azərbaycanlı Dövlət Bayrağına böyük hörmət və ehtiramla yanaşır.

Azərbaycanda üçrəngli dövlət bayrağı ilk dəfə 1918-ci il noyabr ayının 9-da Azərbaycan Xalq Cümhuriyyəti hökumətinin qərarı ilə qəbul edilmişdir. Bu bayraq ikinci dəfə Ümummilli liderimiz Heydər Əliyevin uzaqgörənliyi sayəsində 1990-cı il noyabrın 17-də dövlət bayrağı kimi qəbul edilmişdir.

Bu gün böyük təntənə ilə qeyd etdiyimiz Dövlət Bayrağı Günü Prezident İlham Əliyevin 2009-cu il 17 noyabr tarixli “Azərbaycan Respublikasının Dövlət Bayrağı Gününün təsis edilməsi haqqında” Sərəncamı ilə təsis edilib.

Prezident İlham Əliyev hər zaman dövlət rəmzlərinə yüksək dəyər verir. Üçrəngli bayrağımızın müstəqil Azərbaycanın simvolu, xalqımızın qürur mənbəyi olduğunu vurğulayan Prezident İlham Əliyev deyir: “Bizim bayrağımız qürur mənbəyimizdir. Bizim bayrağımız canımızdır, ürəyimizdir”.

Hazırda üçrəngli dövlət bayrağımız Müzəffər Ali Baş Komandanımız, prezident İlham Əliyevin rəhbərliyi ilə rəşadətli ordumuzun düşmən üzərində möhtəşəm qələbələri, şəhidlərimizin qanı bahasına qaldırılaraq, işğaldan azad olunan ərazilərimizdə qürurla dalğalanır, milli birliyimizi təcəssüm etdirir.

Azərbaycanın Dövlət bayrağı milli suverenliyin simvolu kimi ölkəmizin bütün vətəndaşları üçün müqəddəs dövlətçilik rəmzlərindən biridir. Azərbaycan Xalq Cümhuriyyətinin yadigarı olan bu bayraq bizim milli-mənəvi dəyərlərə və ümumbəşəri ideallara sadiqliyimizi nümayiş etdirir.

Dövlət Bayrağı Günü münasibətilə Sizi ürəkdən təbrik edir, müstəqil və azad dövlətimizin hər bir vətəndaşına doğma Vətənimizin parlaq gələcəyi naminə gördükləri işlərdə uğurlar arzulayırıq!

📞 (012) 404-08-08
🏨 Bakı, K.Kazımzadə, 118

08/11/2025

8 Noyabr – Zəfər Günüdür

Zəfər Günü - uzun illərdən bəri Ermənistanın işğalı altında olan tarixi torpaqlarımızın azad olunması, ölkəmizin ərazi bütövlüyünün və tarixi ədalətin bərpa edilməsi, çoxəsirlik dövlətçilik tariximizin ən şərəfli səhifələrindən biridir.

Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında Azərbaycan Ordusu Ermənistanın ardıcıl təxribatlarının və yeni işğal planlarının qarşısını almaq, işğal altında olan torpaqlarımızı azad etmək məqsədilə 2020-ci il sentyabrın 27-dən etibarən başladığı zəfər yürüşündə inanılmaz uğurlar əldə etmişdir.

44 gün sürən hərbi əməliyyatlar nəticəsində rəşadətli Azərbaycan Ordusu tərəfindən Cəbrayıl, Füzuli, Zəngilan, Qubadlı şəhərləri, Zəngilan rayonunun Mincivan, Ağbənd, Bartaz qəsəbələri, Xocavənd rayonunun Hadrut qəsəbəsini və bir çox kəndləri, Tərtər rayonunun Suqovuşan kəndi, Xocalı və Laçın rayonlarının bir neçə kəndləri daxil olmaqla, ümumilikdə, 300-dən çox yaşayış məntəqəsi, o cümlədən Ağdərə, Murovdağ və Zəngilan istiqamətlərində mühüm strateji yüksəkliklər işğaldan azad edilmişdir.

2020-ci il noyabrın 8-də isə Azərbaycan xalqı üçün böyük əhəmiyyət kəsb edən və rəmzi məna daşıyan Şuşa şəhəri işğaldan azad edildi. Həmin gün - Şuşanın işğaldan azad edildiyi gün bütün Azərbaycan xalqı üçün Zəfər günü kimi yadda qaldı.
Müasir texnologiyalara yiyələnən, son nəsil silahlara sahib olan Azərbaycan Ordusu tarixi, əzəli torpaqlarımızı işğaldan azad edərək, Böyük Zəfərimizi xalqımızın tarixinə həkk etdi. Biz bu möhtəşəm qələbəni Ali Baş Komandan Ilham Əliyevin qətiyyəti, siyasi iradəsi, müzəffər Ordumuzun şücaəti, qəhrəmanlığı, qorxmaz, cəsur əsgərlərimizin canı, müqəddəs, ölməz şəhidlərimizin qanı, xalqımızın birliyi hesabına qazandıq.

30 illik münaqişəni 44 günə sona çatdıran bu qısa müharibə dünya hərb tarixinə misli görünməmiş savaş kimi düşdü. 44 günlük qəhrəmanlıq savaşımız tarix boyu şanlı qürur mənbəyimiz olaraq qalacaqdır.

Sizi 8 Noyabr – Zəfər Günü münasibətilə təbrik edir, doğma Azərbaycanımızın tərəqqisi naminə gördüyünüz işlərdə uğurlar arzulayırıq!

07/11/2025

Dövlət Gömrük Komitəsinin Tibbi Xidmət İdarəsinin nümayəndə heyəti İkinci Şəhidlər Xiyabanını ziyarət edib

8 Noyabr – Zəfər Günü ərəfəsində Dövlət Gömrük Komitəsinin Tibbi Xidmət İdarəsinin və Mərkəzi Gömrük Hospitalının nümayəndə heyəti İkinci Şəhidlər Xiyabanını ziyarət edərək Vətən uğrunda canlarından keçən, şəhidlik zirvəsinə ucalan qəhrəmanlarımızın xatirəsini ehtiramla yad ediblər.

Ziyarət zamanı Dövlət Gömrük Komitəsinin Tibbi Xidmət İdarəsinin rəisi, t.ü.f.d., Əməkdar həkim Ceyhun Məmmədov, rəis müavinləri t.ü.f.d., dosent İsmayıl Əfəndiyev və Şahlar Mirqasım, Mərkəzi Gömrük Hospitalının rəisi–baş həkimi, t.e.d. Bəxtiyar Musayev, Dövlət Gömrük Komitəsinin Tibbi Xidmət İdarəsinin və Mərkəzi Gömrük Hospitalının qaziləri və əməkdaşları şəhid gömrükçü Ülvi Hacıyevin, şəhid həkim Turqay Xəlilzadənin, eləcə də Vətən uğrunda canından keçmiş digər şəhidlərin məzarlarını ziyarət edərək, üzərinə gül dəstələri düzüb, onların əziz xatirəsini dərin ehtiramla yad ediblər.

Şəhidlərin xatirəsi hər zaman uca tutulacaq, onların adları xalqımızın qəlbində əbədi yaşayacaq.

📞 (012) 404-08-08
🏨 Bakı, K.Kazımzadə, 118

07/11/2025

Dövlət Gömrük Komitəsinin Tibbi Xidmət İdarəsi qripə qarşı mövsümi peyvəndlənmə kampaniyasını davam etdirir

Azərbaycan Respublikası Dövlət Gömrük Komitəsinin Tibbi Xidmət İdarəsi ənənəvi olaraq gömrük əməkdaşları arasında qripə qarşı mövsümü peyvəndlənmə kampaniyasını uğurla davam etdirir. 7 noyabr 2025-ci il tarixində Hava Nəqliyyatında Baş Gömrük İdarəsinin əməkdaşları arasında peyvəndlənmə tədbiri həyata keçirilib.

Tədbir Dövlət Gömrük Komitəsinin Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev və Hava Nəqliyyatında Baş Gömrük İdarəsinin rəis müavini Rahib Məmmədovun nəzarəti ilə Mərkəzi Gömrük Hospitalının səyyar tibbi briqadası tərəfindən aparılıb.

Peyvəndləmədən öncə Mərkəzi Gömrük Hospitalının təcili yardım həkimi Fatimə Əhmədova gömrük əməkdaşlarını müvafiq tibbi müayinədən keçirib, daha sonra gömrükçü əməkdaşlar Avropa istehsalı olan yüksək keyfiyyətli “Vaksi Qrip Tetra” vaksini ilə peyvənd olunublar.

Vaksinasiya kampaniyasının məqsədi gömrük əməkdaşlarının sağlamlığının qorunması, infeksion xəstəliklərin qarşısının alınması və mövsümi respirator viruslara qarşı immunitetin gücləndirilməsidir. Tibbi Xidmət İdarəsi tərəfindən həyata keçirilən bu profilaktik tədbirlər digər gömrük orqanlarında da davam etdiriləcək.

📞 (012) 404-08-08
🏨 Bakı, K.Kazımzadə, 118

06/11/2025

Mərkəzi Gömrük Hospitalının Cərrahiyyə və Orqan Transplantasiyası şöbəsinin transplantoloqu, t.ü.f.d., Səhiyyə əlaçısı, Azərbaycanda səhiyyə tarixində ilk dəfə meyit donorundan qaraciyər və böyrək köçürməsi əməliyyatını icra edən Dr. Mircəlal Kazımi “Dib TV”də yayımlanan verilişdə iştirak edərək “Meyit donorundan qaraciyər və böyrək transplantasiyası” mövzusunda ətraflı məlumat verib.

06/11/2025

“Həkimlərimizi tanıyın!” rubrikamızda Sizə Uşaq Cərrahiyyəsi şöbəsinin rəisi, uşaqlara mehribanlıqla yanaşan qayğıkeş, yüksəkixtisaslı uzman uşaq cərrahı Vüsal Cəfərovu təqdim edirik.

DR.VÜSAL CƏFƏROV Mərkəzi Gömrük Hospitalının Uşaq Cərrahiyyəsi şöbəsində uşaqlarda anadangəlmə inkişaf qüsurları, ağciyərlərin kistik xəstəlikləri, sidik cinsiyyət sistemi xəstəlikləri; həzm sistemi anomaliyaları; qida borusu atreziyası, traxeya ezofagialfistula, 12barmaq bağırsaq və bağırsağın digər hissələrinin atreziyası, diafraqma yırtıqları, anusun atreziyası, Hirşprung xəstəliyi, mekonial keçməməzlik, yenidoğulmuşlarda nekrotizian enterokolit, malrotasiya və volvlus-bağırsaq burulması, pilor darlığı, uşaqlarda qasıq yırtığı, hisroseli, qaraciyər və dalağın kistik xəstəlikləri; uşaqlarda təcili vəziyyətlər, bağırsaq keçməməzliyi, appendisit, yad cisim udulması, yad cisim aspirasiyası, xaya və yumurtalıq burulmaları, boğulmuş qasıq yırtıqları və uşaqlarda travmaların müalicəsi və cərrahi müdaxilələri ilə məşğul olur. Həkim barədə daha ətraflı məlumat almaq üçün bu linkə daxil ola bilərsiniz: https://customshospital.az/vusal-ceferov/.

Vüsal həkim 2009-cu ildə Azərbaycan Tibb Universitetinin Pediatriya fakültəsini bitirdikdən sonra 2011-2016-cı illərdə İstanbul Universiteti Cərrahpaşa Tibb Fakültəsinin Uşaq Cərrahiyyəsi və Uşaq Urologiyası bölməsində uzmanlıq təhsili alıb. O, 2014-cü ildən etibarən Mərkəzi Gömrük Hospitalınsa uşaq cərrahı və uşaq uroloqu kimi, 2022-ci ildən isə Uşaq Cərrahiyyəsi şöbəsinin rəisi, uşaq cərrahı kimi fəaliyyət göstərir.

Dr.Vüsal Cəfərov daim müxtəlif mötəbər beynəlxalq və yerli konfrans, seminar və toplantılarda iştirak edir, müasir tibbin yeniliklərini izləyir və öz təcrübəsində tətbiq edir. O, 2016-cı ildə Şimali Kipr Türk Cümhuriyyətində Beynəlxalq Uşaq Cərrahiyyəsi və Uşaq Urologiyası konqresində, 2018-ci ildə Türkiyənin İzmir şəhərində 36-cı Beynəlxalq Uşaq Cərrahiyyəsi konqresində, 2019-cu ildə Qətərin Doha şəhərində VI Ümumdünya Uşaq Cərrahiyyəsi konqresində, 2021-ci ildə Türkiyənin İstanbul şəhərində Türkiyə Torakal Cərrahlar Cəmiyyətinin təşkilatçılığı ilə “Uşaqlarda döş qəfəsi deformasiyalarının cərrahi və qeyri-cərrahi – vakuum üsulu ilə müalicəsi” mövzusunda beynəlxalq konfransında və 2022-ci ildə Çexiya Respublikasının Praqa şəhərində Dünya Uşaq Cərrahları Assosiasiyasının təşkilatşılığı ilə keçirilən VII Dünya Uşaq Cərrahiyyəsi konqresində iştirak edib. Dr.Vüsal Cəfərov 2023-cü ildə Azərbaycan Respublikası Gömrük işini aparan Icra Hakimiyyəti Orqanının Fəxri Fərmanı ilə təltif olunub.

Həmçinin, Vüsal Cəfərovun “Xayanın xayalıqdan kənar yerləşməsi” elmi məqaləsi 12 oktyabr 2019-cu il tarixində “Elsevier” nəşriyyat evinə daxil olan nüfuzlu “Journal of Pediatric Surgery Case Report” jurnalının online versiyasında ingilis dilində işıqlanıb. Dr.Vüsal Cəfərov Türk Təbiblər Birliyinin, Türkiyə Uçaq Cərrahiyyəsi Dərnəyinin və Türk Hipospadiya Dərnəyinin üzvüdür. Vüsal Cəfərovun qəbuluna yazılmaq üçün əlaqə nömrəsi: (012) 404-08-08.

05/11/2025

Mərkəzi Gömrük Hospitalında "Konstitusiya və Suverenlik İli"nə həsr olunmuş tədbir keçirilib

5 noyabr 2025-ci il tarixində Mərkəzi Gömrük Hospitalında “Konstitusiya və Suverenlik İli”nə həsr olunmuş tədbir keçirilib. Tədbirdə Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev, Mərkəzi Gömrük Hospitalının rəis müavini Nahidə Mahmudova, Dövlət Gömrük Komitəsi Tibbi Xidmət İdarəsinin və Mərkəzi Gömrük Hospitalının əməkdaşları və həkim-rezidentlər iştirak ediblər.

Azərbaycan Respublikasının Dövlət Himninin səsləndirilməsi ilə başlayan tədbirdə Ümummilli Lider Heydər Əliyevin və ölkəmizin ərazi bütövlüyü və suverenliyi uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

Açılış nitqi ilə çıxış edən Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev bildirib ki, müasir müstəqil Azərbaycanın hüquqi, demokratik və dünyəvi dövlət kimi formalaşması Ümummilli Lider Heydər Əliyevin uzaqgörən siyasəti və əvəzsiz xidmətləri nəticəsində mümkün olub. Onun rəhbərliyi ilə hazırlanaraq 1995-ci il noyabrın 12-də ümumxalq referendumu yolu ilə qəbul edilən Azərbaycan Respublikasının Konstitusiyası ölkəmizin siyasi, iqtisadi və hüquqi inkişafının əsas bünövrəsini formalaşdırıb.

Rəis müavini İsmayıl Əfəndiyev çıxışında vurğulayıb ki, qəbul edilən Konstitusiya humanizm, ədalət və demokratiya prinsiplərinə əsaslanaraq vətəndaşların hüquq və azadlıqlarının təmin olunmasına, dövlət idarəçiliyinin təkmilləşdirilməsinə və milli-mənəvi dəyərlərin qorunmasına mühüm töhfə verib.

Daha sonra Dövlət Gömrük Komitəsi Tibbi Xidmət İdarəsinin Hüquq şöbəsinin inspektoru Səmra Qasımova çıxış edərək Azərbaycan Respublikasının Konstitusiyasının tarixi əhəmiyyəti, formalaşma mərhələləri və müasir dövrdə dövlət idarəçiliyində oynadığı rol barədə məruzə təqdim edib.

Tədbir çərçivəsində iştirakçılar arasında müzakirələr aparılıb, Konstitusiyanın əhəmiyyəti, onun cəmiyyət həyatında və dövlət idarəçiliyində rolu barədə fikirlər səsləndirilib.

05/11/2025

Mərkəzi Gömrük Hospitalının Travmatologiya və Ortopediya şöbəsinin ikinci kurs həkim-rezidenti Ruslan Nəsibov peşəkar inkişafına və təcrübə qazanmasına yaradılan şəraitə və xüsusi qayğıya görə Azərbaycan Respublikası Dövlət Gömrük Komitəsi Tibbi Xidmət İdarəsinin rəisi, t.ü.f.d., Əməkdar həkim Ceyhun Məmmədova, Mərkəzi Gömrük Hospitalının rəisi-Baş həkim, t.e.d. Bəxtiyar Musayevə, Mərkəzi Gömrük Hospitalının Travmatologiya şöbəsinin rəisi, t.ü.f.d., travmatoloq-ortoped Dr. Ramin Rzayevə və travmatoloq-ortopedi Dr. Müseyib Əhmədova təşəkkürünü bildirib. Süjeti diqqətinizə təqdim edirik.

05/11/2025

Mərkəzi Gömrük Hospitalının Poliklinika şöbəsinin terapevti Nazilə Xəlilbəyova və əczaçısı Sevinc Qurbanova AZTV-nin “Səhər” proqramına “D vitamini həkim məsləhəti ilə qəbul edilməlidir” mövzusunda ətraflı müsahibə veriblər. Süjeti diqqətinizə təqdim edirik.

04/11/2025

Mərkəzi Gömrük Hospitalının həkim-oftalmoloqu, t.ü.f.d. Dr.Aynurə Əliyeva “Göz sağlamlığının qorunması” mövzusunda ətraflı məlumat verib. Aynurə həkimin çıxışını Sizə təqdim edirik.

03/11/2025

Mərkəzi Gömrük Hospitalının Cərrahiyyə və Orqan Transplantasiyası şöbəsinin transplantoloqu, t.ü.f.d., Səhiyyə əlaçısı Mircəlal Kazımi İTV-nin “Xəbər” proqramına “Azərbaycanda orqan donorluğuna maraq artır” mövzusunda müsahibə verib.

01/11/2025

Mərkəzi Gömrük Hospitalının əməkdaşları “Medinex 2025” sərgisini ziyarət ediblər

30 oktyabr - 1 noyabr 2025-ci il tarixlərində “Baku Expo Mərkəzi”ndə keçirilən 27-ci Azərbaycan Beynəlxalq Tibb İnnovasiyaları Sərgisi – “Medinex 2025” ölkənin aparıcı səhiyyə müəssisələrini, tibbi texnologiya və xidmət sahəsində fəaliyyət göstərən qurumları bir araya gətirib. Dövlət Gömrük Komitəsi Tibbi Xidmət İdarəsinin Mərkəzi Hospitalının əməkdaşları da sərgini ziyarət edərək, tibbi sahədə tətbiq olunan ən son yeniliklər, müasir avadanlıqlar və innovativ diaqnostika həlləri ilə tanış olublar.

Ziyarət zamanı hospitalın müxtəlif şöbələrinin mütəxəssisləri beynəlxalq və yerli istehsalçıların təqdim etdiyi tibbi cihaz, laborator sistemlər, rəqəmsal texnologiyalar və tibb təhsili istiqamətindəki innovativ layihələrlə yaxından maraqlanıblar.

Qeyd edək ki, “Medinex” sərgisi Azərbaycan Respublikasının Səhiyyə Nazirliyinin, İcbari Tibbi Sığorta üzrə Dövlət Agentliyinin, Tibbi Ərazi Bölmələrini İdarəetmə Birliyinin dəstəyi ilə təşkil olunur və ölkənin səhiyyə sektorunda ən mühüm peşəkar platformalardan biri hesab edilir.

Mərkəzi Gömrük Hospitalı / Central Customs Hospital

09/11/2025

08/11/2025

07/11/2025

07/11/2025

06/11/2025

06/11/2025

05/11/2025

05/11/2025

05/11/2025

04/11/2025

03/11/2025

01/11/2025

Address

Telephone

Website

Alerts

Contact The Practice

Shortcuts

Share

Category

Mərkəzi Gömrük Hospitalı