22/11/2025
🔴🔴🔴🌍🌍🌍🔴⚫ :Amakuru yiriwe aravugwa
Birumvikana imitwe irashushe. Umuntu wa mbere ameze nk’uwikoreye isi ni Voledymr Zelensky. Asigaranye imisi itanu ngo abe yemeye gusinya ingingo 28 ziri mu masezerano yo guhagarika intambara
Abanyamerika babishizemwo inzigo. Bamaze kuvuga y’uko Zelensky yanse gusinya aya masezerano ibintu bizomukomerana. Washington ivuga y’uko Kiev izosanga iriko isinya amasezerano mabi kurusha ayo izoba yanse gusinya ubu
Nk’aho ivyo bidakwiye, Washington yamaze kubwira ibihugu vyo muri OTAN ko iriko irashirako Ukraine igitutu kugira ngo isinye amasezerano ngo bitabaye ivyo Ukraine izoca imenya uko yitwara mu nkurikizi zizokurikira
Mu kubishikako,JD Vance icegera c’umukuru w’igihugu yarafashe atora uwahoze ari umugenzi wiwe kw’ishure Daniel Driscoll ngo abe ari we asubirira Keith Kellog yahora ari intumwa idasanzwe mu bibazo vya Ukraine n’uburusiya. Kellog ntiyigeze yumvikana na Trump kuko yamwagiriza gufasha Ukraine bidafashe. None Driscoll ni igisiga nka Vance niwe ariko arahanga n’abanya Ukraine. Mwamaze gusoma ivyo yakoreye aba diplomates b’iburaya muri iyi ndwi
JD Vance avuga kandi ko umuntu yibaza ko Uburusiya buzotsindwa ko n’uko hatanzwe ibihano hamwe n’imfashanyo z a gisirikare ngo uwo ariko ararota
Tukivuga abanyaburaya,ubu tuvugana imitwe yashushe bariko barandika gushasha amasezerano yo guhagarika intambara. Bimwe biriko bibera muri Suisse aho délégation ya Ukraine yamaze gushika ngo irabe ko hari ivyohinduka mu masezerano. Ibindi biriko bibera muri Africa y’epfo ahariko habera inama ya G20. Abayitabiriye barimwo Emmanuel Macron, Ursula Von De Leyen n’abandi ntibaza gusinzira, bategerezwa kuraba ico bokiza imbere yo ku wakane n’ubwo babona ko ico kiringo ari guhutagiza Ukraine ngo ntisinye amasezerano mazima
Mu burusiya baratuje, udusagara two muri Donesky tuguma tugwa kamwe ku kandi. Kirill Dimitriev niwe yavuze y’uko abariko baranegura ingingo 28 ziri mu masezerano mashasha biyobagiza ko ari amasezerano ashobora gukiza igihugu ca Ukraine kimerewe nabi
Yamara muri Ukraine aya masezerano ashobora gutera ibibazo gushika no ku ntambara hagati y’abenegihugu ubwabo. Nta kindi gihe abanyagihugu bo muri Ukraine babayeho batabona ivyo barimwo nk’iki gihe barimwo
Mu nama nshingamateka bamaze kwanka ko batosinya amasezerano, ibirimwo si Zelensky akwiye kubisinya kuko amategeko ntabimurekurira. Ngo biri mu mabango y’abashingamateka
Ku rundi ruhande, hari abiyita abakunzi b’igihugu badashobora kwemera gutanga igihugu batabonye ko Uburusiya butsinzwe. None Zelensky aza kugira gute ko igihugu kiriko kirafatwa ku muvuduko munini mu gihe abatoroka igisirikare biyongereye incuro zine hanyuma abategetsi bari kubaha moral bakaba bagirizwa ibiturire ?
