https://www.instagram.com/jithinlohi

Jithin Lohi RN, Niagara Falls, ON (2026)

03/10/2026

കേരളത്തിലെ നഴ്സിംഗ് സമരം നീട്ടിക്കൊണ്ട് പോവുന്നത് KPHA യുടെ പിടിവാശി മൂലമാണ്. സമ്പൂർണ സമരം ആരോഗ്യമേഖലയിൽ ഉണ്ടായിട്ടും KPHA യോ അവരുടെ അംഗങ്ങളായ ഹോസ്പിറ്റലുകളോ രണ്ട് ദിവസങ്ങൾക്ക് ശേഷവും ഒരു ചർച്ചയ്ക്ക് പോലും യു എൻ എ യെ വിളിച്ചിട്ടില്ല എന്നത് വലിയ ഗൂഢാലോചന സംശയിക്കേണ്ടി ഇരിക്കുന്നു.

KPHA കളിക്കുന്നത് ജനങ്ങളുടെ ജീവൻ വച്ചാണ്. മാന്യമായി ചർച്ചകൾ നടത്താതെ ഈ സമരം യു എൻ എ അവസാനിപ്പിക്കും എന്ന് KPHA യോ, അവരുടെ വിഡ്ഢിത്തങ്ങൾ കേട്ട് ചർച്ചകൾക്ക് തയ്യാറാവാതെ ഇരിക്കുന്ന മാനേജ്മെന്റുകളോ കരുതേണ്ട.

സമരത്തിൽ നിന്നും ഒരട്ടി ഞങ്ങൾ പിന്നോട് പോവില്ല.

ജിതിൻ ലോഹി
യു എൻ എ.

03/09/2026

ഇതാ കോഴിക്കോട് ബേബി മെമ്മോറിയൽ മുതലാളിയുടെ ഗുണ്ടായിസം...

വൻകിട കോർപ്പറേറ്റ് ആശുപത്രികൾക്ക് കേരളത്തിലെ ആരോഗ്യമേഖല തീറെഴുതി കൊടുക്കുമ്പോൾ സ്വന്തം ജീവനക്കാരോട് ഇവർ കാണിക്കുന്ന ധാർഷ്ട്യം, ഗുണ്ടായിസം നിങ്ങൾ കാണുക.

1333 രൂപ ദിവസ വേതനം ആവശ്യപ്പെട്ടതാണോ നഴ്സുമാരെ ആക്രമിക്കാൻ ഡോ.അലക്സാണ്ടരും മാനേജ്മെൻറ് അധികാരികളും ശ്രമിക്കുന്നത്.

BMH - KKR ഗ്രൂപ്പേ,

നിങ്ങളെ ഭയപ്പെട്ട് ഓടിയൊളിക്കുന്നതല്ല ഇവിടുത്തെ യൗവ്വനങ്ങൾ...

ചികിത്സാ ബിൽ കിട്ടുമ്പോൾ തലയിൽ കൈ വെച്ച് പോകുന്ന സാധാരണക്കാർ അതിലെ നഴ്സിംഗ് ചാർജ്ജ് പോലും ഭീമമായ തുക ഈടാക്കി ചൂഷണം ചെയ്യുന്നത് രോഗികളെയും, അതോടൊപ്പം രാപ്പകൽ കണ്ണ് ചിമ്മാതെ തൊഴിലെടുക്കുന്ന നഴ്സുമാരടക്കമുളള ജീവനക്കാരെയുമാണ്.

ഈ സമരം വൻകിട കോർപ്പറേറ്റുകൾക്കെതിരെയാണ് ഇപ്പോൾ നടക്കുന്നത്. ചെറിയ ആശുപത്രികൾ പോലും 1333 രൂപ അംഗീകരിച്ച് സമരം പിൻവലിക്കപ്പെടുമ്പോൾ കോർപ്പറേറ്റ് കുത്തകകൾ പിടിവാശി തുടരുകയാണ്.

നിങ്ങളെ ആര് ഭയപ്പെട്ടാലും തല കുനിക്കാൻ തയ്യാറാകാത്ത ഒരു തലമുറ അതിജീവന പോരാട്ടം നടത്തുക തന്നെ ചെയ്യും.

03/06/2026

പ്രൈവറ്റ് ഹോസ്പിറ്റൽ നഴ്സുമാർ എന്തുകൊണ്ട് സർക്കാരിനെതിരെ സമരം ചെയ്യുന്നു ?
എന്തുകൊണ്ട് പ്രതിപക്ഷ പാർട്ടികളുടെ പിന്തുണ സ്വീകരിക്കുന്നു. വീഡിയോ കണ്ടു പൊതുസമൂഹത്തിന്റെ അറിവിലേക്ക് ഇതു ഷെയർ ചെയ്യാൻ താൽപര്യപ്പെടുന്നു.

ജിതിൻ ലോഹി
യു എൻ എ.

02/24/2026

ഇനി മാർച്ച് 4 ന് തിരുവനന്തപുരം സെക്രട്ടറിയേറ്റ് നടയിൽ കാണാം.

കേരള ചരിത്രത്തിൽ മറ്റൊരു സ്വതന്ത്ര സംഘടനയ്ക്കും നാളിതുവരെ കഴിയാത്ത പോർമുഖമാണ് യു എൻ എ ഒരുക്കുന്നത്. കാസർഗോഡ് മുതൽ തിരുവനന്തപുരം വരെയുള്ള നഴ്സുമാർ ഈ സമരത്തിൽ അണിചേരും. തടുക്കാൻ കഴിയുമെങ്കിൽ കാണട്ടെ.

ഈ സമരം അവസാനിപ്പിക്കാൻ സർക്കാരിന് മുന്നിൽ ഒരേയൊരു ഫോർമുല മാത്രമാണ് ഉള്ളത്, യു എൻ എ യുടെ 40000 രൂപ ശമ്പളമെന്ന മിനിമം ഡിമാൻഡുകൾ അംഗീകരിക്കുക.

കഴിഞ്ഞ ഏഴുവർഷമായി നഴ്സുമാരെ പറഞ്ഞു പറ്റിക്കുന്നു. നിപ്പ വന്നു, കോവിഡ് മഹാമാരി വന്നു, പക്ഷേ ‘മാലാഖ’ പട്ടം അല്ലാതെ ഒരു ആനുകൂല്യങ്ങളും നഴ്സുമാർക്ക് നൽകിയിട്ടില്ല.

തൃശൂരിൽ ഫെബ്രുവരി 21 ന് തിരി കൊളുത്തിയ സമരാവേശം മാർച്ച് 4 ന് തിരുവനന്തപുരത്ത് ആളിക്കത്തിക്കാൻ തന്നെയാണ് യു എൻ എ യുടെ തീരുമാനം.

ജിതിൻ ലോഹി.
United Nurses Association.

02/23/2026

എന്റെ ഏറ്റവും പ്രിയപ്പെട്ടൻ ജാസ്മിൻഷാ, ആളുകൾ ക്രൂശിക്കുംതോറും പതിന്മടങ്ങ് ശക്തിയോടെ നഴ്സുമാരെ സംരക്ഷിക്കാൻ പടച്ചട്ടയുമായി മുന്നിൽ നിന്നും നയിക്കുന്ന യഥാർത്ഥ നേതാവ്.

യു എൻ എ തുടങ്ങിയ 2011 മുതൽ ജാസിയോടൊപ്പം സംഘടന സഹപ്രവർത്തകനായും, സുഹൃത്തായും, സഹോദരനായും തുടങ്ങിയ യാത്രയാണ്, എന്നും നിന്നോടൊപ്പം അടിയുറച്ചു ഉണ്ടാവും, പോരാടുക പ്രിയ സുഹൃത്തെ.

02/23/2026

ഈ ആർത്തിരമ്പി വരുന്നത് യു എൻ എ യുടെ കീഴിൽ ശമ്പളപരിഷ്കരണത്തിനായി ഒത്തുകൂടിയ നഴ്സുമാരാണ്.

02/22/2026

Those who tried to suppress the organization and its leaders, including Jasminsha, with false cases and propaganda, open your eyes and see. Like the roaring Arabian Sea, the nursing community in white is rising. Yes, they are marching under the pure white flag of UNA to demand all their rights and to win them.

Stop us if you can.

With just 10% of nurses mobilized, this is UNA’s final warning to capitalist and political leadership. Nurses must receive at least 40,000 rupees as basic salary. Until that is achieved, the fire we have ignited will only spread further.

Jai UNA.

Jithin Lohi
International General Secretary
United Nurses Association

01/04/2026

അഭിനന്ദനങ്ങൾ സൗദി യുഎൻഎ....
ബിന്ദു ഉടൻ നാട്ടിലെത്തും...

എന്നും നഴ്സുമാർക്ക് വേണ്ടി ശക്തമായി നിലകൊള്ളുന്ന പ്രസ്ഥാനമാണ് യുഎൻഎ, സംഘടനയുടെ കരുത്തുറ്റ ഘടകങ്ങളിൽ ഒന്നാണ് സൗദി അറേബ്യ. സൗദിയിലെ ഏത് നഴ്സിന്‌ പ്രശ്നം ഉണ്ടായാലും ശക്തമായ ഇടപെടലും പ്രശ്ന പരിഹാരമായും യുഎൻഎ സൗദി ഉണ്ടാകും. ഇത്തവണ സൗദിയിലെ നഴ്സുമാർ ഒറ്റക്കെട്ടായി നിന്നത് സഹപ്രവർത്തക ബിന്ദുവിന് വേണ്ടിയായിരുന്നു. സൗദിയിലെ ഒരു നിയമകുരുക്കിൽപ്പെട്ടതിനെ തുടർന്ന് ബിന്ദുവിന് 30000 (7 ലക്ഷം രൂപയോളം) സൗദി റിയാൽ അടക്കേണ്ടതായി വരുന്നു. ഭർത്താവ് മരണപ്പെട്ടിട്ട് നാട്ടിൽ വരാൻ കഴിയാതെ പ്രശ്നത്തിൽ അകപ്പെട്ട ബിന്ദുവിൻ്റെ പ്രശ്നം യുഎൻഎ സൗദി അറേബ്യ ഘടകം ഏറ്റെടുക്കുന്നു. ഒരു നഴ്സിനോട് 60 റിയാൽ വീതം സഹായിക്കാൻ സംഘടനയുടെ വാട്ട്സ്ആപ്പ് ഗ്രൂപ്പുകളിലൂടെ നേതൃത്യം ആഹ്വാനം ചെയ്യുന്നു.പ്രവർത്തകർ ഇരുമൈ മറന്ന് സഹായഹസ്തവുമായി മുന്നോട്ട് വന്നതോടെ മണിക്കൂറുകൾക്കുള്ളിൽ പൂർണ്ണമായും പണമടച്ച് തീർക്കുന്നു. ട്രാവൽ ബാൻ തീരുന്നതോടെ അടുത്ത 2 ദിവസത്തിനകം ബിന്ദുവിന് നാട്ടിലെത്താൻ സാധിക്കും.

ഒരു സഹപ്രവർത്തകക്ക് പ്രശ്നം ഉണ്ടായപ്പോൾ സഹായിക്കാൻ തയ്യാറായ മുഴുവൻ പേരെയും, ക്രിയാത്മകമായ ഇടപെടൽ നടത്തിയ സൗദി യുഎൻഎ നേതൃത്വത്തെയും യുഎൻഎ കുടുംബത്തിന് വേണ്ടി അഭിനന്ദിക്കുന്നു.

സൗദി നേഴ്സുമാർ ശ്രദ്ധിക്കുക...

Ministry of Justice- MOJ / NAJIZ പ്ലാറ്റ്ഫോമിൽ നിന്നും വരുന്ന arabic sms മെസ്സേജുകൾ ഒരു കാരണവശാലും അവഗണിക്കരുത്.

സാമ്പത്തികമോ അല്ലെങ്കിൽ പേഷ്യന്റ് കംപ്ലൈന്റ്റുമായോ ബന്ധപ്പെട്ട കേസുകളിൽ ഉൾപ്പെടുമ്പോഴാണ് ഈ തരത്തിലുള്ള മെസ്സേജ് NAJIZ ൽ നിന്നും വരുന്നത്.

ഇത്തരത്തിലുള്ള sms വന്നാൽ യുഎൻഎ സൗദി ഘടകവുമായി ബന്ധപ്പെടുക.
നിങ്ങൾക്ക് കൃത്യമായ ഗൈഡൻസ് ലഭിക്കും

01/03/2026

മിനിമം വേതനം എന്ന് കൂടും? വാഗ്ദാനങ്ങളിൽ കണ്ണ് മഞ്ഞളിക്കാതെ യാഥാർത്ഥ്യം മനസ്സിലാക്കൂ.

ഡിസംബർ 27ന് മാനേജ്മെൻ്റ്റുകൾ ബഹിഷ്ക്കരിക്കുകയും യുഎൻഎ ഒഴികെയുള്ള (2023 ഇത് രൂപീകരിച്ചപ്പോഴേ പ്രഹസനം ആണെന്ന് ആരോപിച്ചും മാനേജ്മെൻറുകളെ സഹായിക്കാൻ മാത്രമുള്ളതാണ് എന്ന നിലപാട് കൊണ്ട് യുഎൻഎ യോഗങ്ങളിൽ പങ്കെടുക്കാറില്ല)ട്രേഡ് യൂണിയൻ പ്രതിനിധികൾ മാത്രം പങ്കെടുത്ത യോഗത്തിലാണ് ഒരു മാസത്തിനുള്ളിൽ മിനിമം വേതനം സംബന്ധിച്ച് കരട് വിജ്ഞാപനം ഇറക്കാൻ തീരുമാനിച്ചത്.പല മീഡിയകളും, വ്യക്തികളും ആഘോഷിക്കുന്നത് കണ്ടു നഴ്സുമാർക്ക് ഉടൻ പുതിയ ശമ്പളമെന്നും 60% വർദ്ധനവ് എന്നും. വസ്തുതകൾ നമുക്കൊന്ന് പരിശോധിക്കാം.

2013 ലെ മിനിമം വേതനത്തിൻ്റെ അടിസ്ഥാനത്തിലാണ് ശമ്പളം 60% വർദ്ധിപ്പിക്കാനുള്ള കരട് വിജ്ഞാപനം ഇറക്കാൻ പോകുന്നത് എന്നാണ് അറിയുന്നത്. അവസാനമായി ആരോഗ്യമേഖലയിൽ ശമ്പളം പരിഷ്ക്കരണം നടന്നത് 2018 ഏപ്രിൽ 23നാണ്.

2013 ലെ അടിസ്ഥാന ശമ്പളം എന്നത് 7750 രൂപയാണ്, 2018 ലേത് 20000 രൂപയും .2018ലെ മിനിമം വേതനം ഇപ്പോഴും പ്രാബല്യത്തിൽ ഉള്ളപ്പോൾ എന്ത് കൊണ്ടാണ് 2013ലെ അടിസ്ഥാനമാക്കുന്നത്. 2018ലെ മിനിമം വേതനം ഒരു ഘട്ടത്തിൽ റദ്ദാക്കിയതാണ് ന്യായം പറയുന്നതെങ്കിൽ അത് റദ്ദാക്കിയ ഹൈക്കോടതി 3 മാസത്തിനുള്ളിൽ പുതിയ ശമ്പള പരിഷ്ക്കരണം നടത്താൻ കൂടി പറഞ്ഞിരുന്നു. 6 മാസത്തിനുള്ളിൽ തന്നെ ഹൈക്കോടതി ഡിവിഷൻ ബെഞ്ച് റദ്ദാക്കിയ നടപടി തളളിക്കളഞ്ഞിരുന്നു. ഇപ്പോൾ പ്രാബല്യത്തിൽ ഉള്ള 2018 മിനിമം വേജസിൻ്റെ 60% വർദ്ധനവ് നടപ്പിൽ വരുത്താൻ എന്താണ് പ്രയാസം?

ഒരു മാസത്തിനുള്ളിൽ കരട് വിജ്ഞാപനം ഇറങ്ങിയാൽ ആക്ഷേപങ്ങൾ അറിയിക്കാൻ വീണ്ടും 60 ദിവസത്തെ സാവകാശം നൽകണം.അതായത് ജനുവരി 27നകം കരട് ഇറക്കിയാൽ ആക്ഷേപങ്ങൾ കേൾക്കാൻ മാത്രം മാർച്ച് അവസാനം വരെ കാത്തിരിക്കണം. ഇനി ആക്ഷേപങ്ങൾ കേൾക്കാൻ വീണ്ടും ഏറ്റവും ചുരുങ്ങിയത് 1-2 മാസത്തെ സമയം വേണം. ഇതിനിടയിൽ നിയമസഭാ ഇലക്ഷൻ വിജ്ഞാപനം ഇറങ്ങുമെന്ന് ഉറപ്പാണ്.അതോടെ മിനിമം വേജസ് നടപടിക്രമങ്ങൾ അനന്തമായി നീളും. ഭരണമാറ്റം ഉണ്ടായാൽ 2026 ൽ ശമ്പള പരിഷ്ക്കരണം ഉണ്ടാകില്ല.

ഇതിനോടകം തന്നെ 3 വർഷത്തോളം ചർച്ച ചെയ്ത തുച്ഛമായ വേതന വർദ്ധനവ് അംഗീകരിക്കില്ല എന്ന മാനേജ്മെൻ്റ് നിലപാട് ഈ മിനിമം വേതനത്തെയും കോടതി നടപടികളിലേക്ക് വലിച്ചിഴക്കും.

സംഘടിതമായി ശകതമായ യൂണിയൻ സംവിധാനങ്ങൾ ഉളളിടത്ത് ഇടക്കാലാശ്വാസങ്ങൾ നേടിയെടുത്ത് മുന്നോട്ട് പോകാം എന്നല്ലാതെ ഇപ്പോൾ കാണുന്നതെല്ലാം ഇലക്ഷൻ സ്റ്റണ്ട് മാത്രമാണ്.

അല്ലാ എന്ന് വിശ്വസിക്കണമെങ്കിൽ ബഹിഷ്ക്കരിച്ച മാനേജ്മെൻ്റുകൾക്ക് വില നൽകാതെ സുപ്രീം കോടതി നിർദ്ദേശപ്രകാരമുളള തുല്യ ജോലിക്ക് തുല്യവേതനമെന്ന പ്രഖ്യാപന പ്രകാരവും, കേന്ദ്ര സർക്കാർ നിർദ്ദേശപ്രകാരമുള്ള ജഗദീഷ് പ്രസാദ് കമ്മറ്റി റിപ്പോർട്ട് സർക്കാർ ഗസറ്റ് വിജ്ഞാപനമായി ഇറക്കാൻ ധൈര്യം കാണിക്കണം. അതിന് മാനേജ്മെൻ്റുകളുമായി അവിശുദ്ധ ബന്ധം ഇല്ലാതിരിക്കണം എന്ന് മാത്രം.

അങ്ങിനെ വന്നാൽ തൊഴിൽ വകുപ്പിനെ അഭിനന്ദിക്കാൻ ഞങ്ങൾ തയ്യാറാണ്. എന്ത് പോരാട്ടം നടത്തിയും ഞങ്ങളുടെ പ്രവർത്തകർ അത് നേടിയെടുത്തിരിക്കും.

3 വർഷം ചർച്ച നടത്തിയിട്ട് എന്ത് ഗുണമാണ് തൊഴിലാളികൾക്ക് ഉണ്ടാക്കി കൊടുക്കാൻ സാധിച്ചത് എന്ന് ചർച്ചകളിൽ പങ്കാളികളായവർ ഒക്കെ ഒന്ന് ഇരുത്തി ചിന്തിക്കുന്നത് നല്ലതാണ്.

ഇനിയും സംഘടിക്കാതെ നിൽക്കുന്നവരെ,

നിങ്ങൾക്ക് വേണ്ടി സംസാരിക്കാൻ ആരും ഉണ്ടാകില്ല. ജാതി-മത ശക്തികളും, കോർപ്പറേറ്റ് ഭീമന്മാരും അടക്കിവാഴുന്ന ആരോഗ്യമേഖലയിൽ നീതി ലഭിക്കണമെങ്കിൽ നിങ്ങൾ തീയായി മാറണം.

ജീവനക്കാർക്ക് 7 വർഷമായി ഒരു രൂപാ പോലും നിയമപരമായി സർക്കാർ വർദ്ധിപ്പിക്കാത്ത ,ഓരോ വർഷവും ചികിത്സാഫീസ് തോന്നിയ നിരക്കിൽ വർദ്ധിപ്പിക്കുന്ന, ശതകോടികൾ ഇൻവെസ്റ്റ് നടത്തിക്കൊണ്ടിരിക്കുന്ന ആരോഗ്യമേഖലയിൽ നേഴ്സുമാർ അടക്കമുള്ള മുഴുവൻ ജീവനക്കാരെ തെരുവിലേക്ക് ഇറങ്ങി മുഷ്ടി ചുരുട്ടാതെ നിങ്ങളുടെ കുടുംബ ജീവിതം മെച്ചെപ്പെടുത്താൻ കഴിയുമെന്ന് എനിക്ക് തോന്നുന്നില്ല.

നിശബ്ദമായി ഇരിക്കാതെ, മുഷ്ടിചുരുട്ടൂ, നിങ്ങളെ നയിക്കാൻ യുഎൻഎ ഉണ്ടാകും.

12/08/2024

https://youtu.be/Ce8XArf4-1k?feature=shared

11/26/2024

കേരള നഴ്സിംഗ് കൗൺസിൽ

കേരളത്തിലെ നഴ്സുമാരുടെ ക്ഷേമത്തിനും ഉന്നമനത്തിനുമായി രൂപീകരിച്ചിരിക്കുന്ന ഒരു സ്റ്ററാറ്റൂട്ടറി ബോഡിയാണ് കേരള ആരോഗ്യ വകുപ്പിന് കീഴിൽ വരുന്ന കേരള നഴ്സസ് ആൻ്റ് മിഡ് വൈവ്സ് കൗൺസിൽ

എന്നാൽ എത്രത്തോളം ആ കൗൺസിൽ നഴ്സുമാടെ ക്ഷേമം നോക്കുന്നുണ്ട് എന്നുള്ളതിൽ ഒരു പു:നർവിചിന്തനം നടത്തേണ്ടിയിരിക്കുന്നു. നഴ്സുമാരുടെ ക്ഷേമത്തേക്കാൾ ഉപരി കൗൺസിലിൽ ഇലക്ഷനിൽ ജയിക്കാതെ ഓട് പൊളിച്ച് കയറി കൂടിയ ചിലരുടെ ക്ഷേമത്തിനാണ് എന്ന് പറയുന്നതാവും കൂടുതൽ ശരി

യു. എൻ. എ എടുത്ത വിവരാവകാശങ്ങളിൽ തെളിയുന്നത് ഈ മേൽപറഞ്ഞ വ്യക്തികൾ ഒരു വർഷം തന്നെ 8 ലക്ഷത്തോളം രൂപ TA,DA, ഓണറേറിയം ഇനത്തിൽ എഴുതി എടുത്തു എന്നാണ്. അങ്ങനെ അഞ്ചു വർഷങ്ങൾ .പൂർണ്ണ വിവരങ്ങൾ രണ്ട് ദിവസത്തിനുള്ളിൽ പുറത്ത് വിടാം.

ഈ കുറിപ്പ് എഴുതുന്നത്. 2019 സെപ്തംബറിൽ അധികാരത്തിൽ വന്ന ഈ കൗൺസിലിൻ്റെ അധികാരം 2024 സെപ്തംബറിൽ അവസാനിച്ചു.

കാലാവധി കഴിയുന്നതിന് മൂന്ന് മാസം മുന്നേ ഇലക്ഷൻ നടപടികൾ തുടങ്ങണം എന്നിരിക്കെ യാതൊരു വിധത്തിലുള്ള നടപടി ക്രമങ്ങളും ഓട് പൊളിച്ച് കൗൺസിലിലെത്തിയ മഹത് വ്യക്തികൾ ചെയ്തില്ല

ഇതിനെതിരെ UNA കോടതിയെ സമീപിക്കുകയും, ഡിസംബർ 3 ന് മുന്നേ ഇലക്ഷൻ നടപടികൾ പൂർത്തീകരിക്കുകയും വേണമെന്ന് ഹൈക്കോടതി ഉത്തരവിട്ടു.

ഇനി ഒരാഴ്ച്ച മാത്രമാണ് ഈ ഡിസംബർ 3 ലേക്ക് ഉള്ളത് എന്നിട്ടും ഇലക്ഷൻ പ്രകിയകൾ ഒന്നും തന്നെ ഓട് പൊളിച്ച് എത്തിയ വ്യക്തി ആരംഭിച്ചിട്ടില്ല മാത്രമല്ല ഇലക്ഷൻ ഇനി നടത്തില്ല എന്ന് വീമ്പിളക്കി നാടു മുഴുവൻ ചുറ്റി നടക്കുകയാണ്.

ഇതിൽ നിന്നെല്ലാം മനസ്സിലാക്കാം , അവിടെ ഇവർ നടത്തുന്നത് കൊള്ളയാണെന്ന്. അഴിമതിയുടെ കൂത്തരങ്ങാണ് എന്നുള്ളത്. UNA പ്രതിരോധിക്കുന്നുണ്ടെങ്കിലും അധികാരം മൂലം മത്ത് പിടിച്ച ഓടു പൊളിച്ചു വന്ന മഹത് വ്യക്തി ആളുകളെ പറഞ്ഞ് പറ്റിക്കുകയാണ് .

ഇത് വലിയ കുറ്റകരമായ അനാസ്ഥയാണ്. ഈ കൊള്ളകൾ വരും ദിവസങ്ങളിൽ പൊതുജന സമക്ഷം എത്തിക്കും. ഉപജാപക സംഘത്തിൻ്റെ കരാള ഹസ്തങ്ങളിലാണ് ഇപ്പോൾ KNMC

ജാഗരൂഗരാവുക പ്രതികരിക്കുക

കേരള നഴ്സിംഗ് കൗൺസിലിൽ നിന്ന് നിങ്ങൾക്കുണ്ടായ അനുഭവങ്ങൾ താഴെ കുറിക്കുമല്ലോ .

കേരള നഴ്സിംഗ് കൗൺസിലിൻ്റെ പേര് പറഞ്ഞ് ഏതെങ്കിലും ഏജൻ്റുമാർ നിങ്ങളെ കമ്പളിപ്പിച്ചിട്ടുണ്ടെങ്കിൽ അതു കൂടി മെൻഷൻ ചെയ്യുമല്ലോ...

പുതിയൊരു പോരാട്ടത്തിന് തുടക്കം കുറിക്കുകയാണ്.

Together we are strong
Jai UNA.

Jithin Lohi RN

03/10/2026

03/09/2026

03/06/2026

02/24/2026

02/23/2026

02/23/2026

02/22/2026

01/04/2026

01/03/2026

12/08/2024

11/26/2024

Address

Telephone

Website

Alerts

Contact The Practice

Shortcuts

Share