Dr GA Christiaan, gynaecoloog

24/10/2025

Bonochi un I tur,

Mi ke share algun kos ku boso!

https://www.facebook.com/share/p/1DUsFbGC3H/

Kalor eksesivo, kambio temperamental drastiko, dolonan riba kurpa inesplikabel, subida di peso inesplikabel anto bo ta riba dieet , etc etc. Ken ta sa ku ora bo subi 40 bo ta hanja ku tantu difikultat ku pa hopi hende muhe tin ku sinja re-enkontra nan mes mental i fisikamente

MENOPAUZE. Kompaña nos e biaha aki pa konose e fase di transishon ku 100% di nos hende muhe tin ku pasa den dje anto kompronde kon pa nos tin ku move bai dilanti pa tin un bon bibá alabes saludabel.

Nos lo bai LIVE Djawebs awo 9:00 di anochi riba e paginanan di facebook DI TUR UN POKO anto SENTRO MEDIKO RONDEKLIP, invitadonan spesial lo ta Dr. Giovanni Christiaan, Ginekologo/ obstretiko huntu ku Martha Atienzo neurosikologo, pa un charla intensivo pa juda nos hende muhenan kompronde nan kurpa miho.

05/10/2025

Bontardi un I tur. Felis diadumingu i un siman benidero.

Manera mi a skibi biaja pasa, kada dama ta pasa e climacterio i menopauze differente. Door di esei no ta un strategia tin pa trata tur pashent. Kada persona por reakshona kompletamente differente riba mes tratamentu.

Mi a skibi ku mi manera pa guia pashentnan ta kuminsa ku adapta nan manera di biba. Hopi kos por wordu remedia of alivia SIN remedi. Mester hasi un bon entrevista i control medico prome pa sa kua molester ta esnan principal i si tin otro factornan ku ta duna e molesternan. Kada dama tin otro molester I ta reakshona otro riba kambionan I tratamentu.

Ora nos edad ta subi (homber I muhe) ta bai tin differente kambionan hormonal I nos ta perde massa muscular. Esei ta un proseso natural. Na 50 aña bo tin menos massa muscular ku ora bo tin 25 aña. Door di esei bo metabolismo tambe ta bira menos, esta....ku edad bo ta bai kima menos caloria pa dia, door ku bo tin menos massa muscular. Majoria hende tambe ta move menos ora nan tin mas edad. E 2 kosnan ei ta resulta ku bo ta kima menos caloria i komiendo mes tantu, bo peso ta kuminsa subi. Door di e mes motibunan aki ta bira mas difisil pa baha peso una bez e peso ta haltu.

Mi no ta kere den dieet streng, mi ta kere den adapta bo manera di biba. Majoria hende ku tin sobrepeso sa dikon nan peso ta subi. Tin ta kome irregular, kosnan ku hopi sauce, kantidadnan grandi, ta snooep hopi, ta bebe hopi limonada ku hopi suku of ta kome kosnan hasa den hopi vet. Eseinan ta e prome kosnan ku mester kambia.

Door di e kambionan hormonal serka hende muhe den menopauze, nan figura tambe ta kambia I e vet ta bin mas na barika. Nan figura ta kambia di pera, bira appel. E hopi vet na e barika ta subi risico pa problemanan cardiovascular!

Un di mi prome consejonan ta....kuminsa GYM of train ku resistensia. Asina e musculonan ta wordu stimula pa keda of pa krese. Mihor ahinda ta pa kuminsa train ku peso PROME ku e menopauze. Mas massa muscular, mihor ta controla e peso! Train ku peso ta bon pa e wesunan tambe I huntu ku bon nutrishon, ta redusi e risico pa Osteoporosis. Training mester ta por lo menos 3 biaha pa siman. Massa muscular ta wordu mantene of ta aumenta ku un dieta riku na proteina. E kurpa ta huza proteina pa mantene i aumenta e massa muscular.

Pues un di e prome consejonan ta train ku peso/resistensia 3 biaha pa siman minimo pa limita e subida di peso. Preferibel kuminsa prome ku e menopauze. Tambe esei ta redusi risico pa Osteoporosis (wesu delega I bros) den menopauze. Mester baha man na arros, pan blanku, pasta, batata I pone mas proteina I berdura den e dieta. Mas webu (blanku di webu), piska, galinja I karni kora (menos vet, mihor!)

Alcohol i suku ta hasi symptomanan di menopauze peor, esta e sodamentu marduga I den frieuw I batimentu di kurason.

Mi ta spera ku e teksto aki ta un poko informativo i ku e logra consientisa ku training i dieta balansa por preveni hopi kos prome I durante menopauze.

Te sigiente biaha.

Saludos,

GC

02/09/2025

Bondia un I tur,

Despues di basta ratu mi ta skibi algu atrobe. E aña aki mi ta poniendo hopi enfasis peri-menopause I menopause. Menopause ta algu ku tur hende muhe ta bai hanja. Peri-menopause ta e periodo prome ku esei. Na Hulandes nan ta jama esei overgang, esei ta literalmente e fase kaminda e kurpa ta hasiendo su transishon di fertil pa NO fertil. E overgang pa menopause. E periodo ei por dura años I kada dama ta pasa e differente. Menopause ta ora e regla keda sin bini pa 12 luna of mas. TUR bloeding despues TA un motibu pa un consulta. Mas lihe possibel, pa exclui ku por ta algu maligno ta okashona e bloeding.

Durante e peri-menopause e produkshon di hormonanan reproductivo ta bira menos I esei ta duna hopi kambio na e kurpa di hende mjhe. E regla por keda lunas sin bin, e por bin i keda sin bai pa semanas. Tin hopi symptoma ku e damanan por experiencia. Majoria hende ta pensa riba batimentu di kurason, sodamentu den airco of marduga. Pero tin HOPI mas molester ku hopi hende no ta realisa.

Mi ta purba pone un paar di nan aki.

Sodamentu den frieuw
Sodamentu den sonjo/marduga
Batimentu di kurason
Perdida di memoria (Brain fog)
Dolornan di kabes
Subimentu di peso
Kambio di figura door di mas vet na barika
Perdida di libido
Menos lubrikashon durante s*x
Kimamentu/resekedad vaginal
Problemanan pa drumi
Dolornan di spier I musculonan
Osteoporosis
Perdida di kabei
Kueru seku
Unjanan por kibra mas lihe
Depreshon/atakenan di Paniko
Kambio di beis inespera
Incontinensia
Kambio di holor di kurpa
Dolor den pechunan
Problema ku baimentu di af

E lista ta largu I mi tin sigur ku mi lo a lubida un paar. E ta mas pa illustra ku tin hopi molester ku porta majoria hende I hasta dokter no ta realisa ku ta menopause.

Mi manera pa guia pashentnan ta kuminsa ku adapta nan manera di biba. Hopi kos por wordu remedia of alivia SIN remedi. Mester hasi un bon entrevista i control medico prome pa sa kua molester ta esnan principal. Kada dama tin otro molester I ta reakshona otro riba kambionan I tratamentu.

Mi lo sigi riba e topico aki e proximo temporada.

Saludos,

G.A. Christiaan

08/03/2024

Bondia un I tur,

Mi ke desea tur hende muhe un felis dia di Hende Muhe.

Hende muhe ta forma e basis di humanidad, di un famia I di un relashon. Un mama su "trabou" ta 24 ora, 7 dia pa siman. Prome persona un yu ta jama ora algu pasanan ta "mama", aunke e tata ta banda di nan. Un yu muhe ta caring I manera un amigu a jega di bisami....e yu muhe ta majoria biaha esun ku ta kuida e majornan ora nan bira grandi. Dimes ku tin hopi homber tambe ta hasi tur e kosnan aki, pero majoria biaha ta e yu muhe, aunke e ta kasa, biba, soltera. Somehow nan por saka tempu semper pa kuida I hasi kos pa e mayornan I nan yunan.

Felis dia na tur hende muhe!!

Saludos,

GC

11/08/2023

Bondia,

Felis diabierne I weekend pa boso tur. Mi ta spera ku tur kos a bai bon ku e vakantie I prome dia di skol.

Ahinda tin problema ku personal di sala di operashon den CMC I ta solamente operashonnan essencial ta wordu hasi. Eseinan ta operashonnan pa cancer of ku por forma un peliger pa bida. Caesarea tambe ta bai door.

Lastimamente ta na ultimo momentu mi ta tende di CMC ku mi por opera e dialuna. Dialuna awor atrobe mi no por opera I asina mi tin espacio pa wak pashent ku mester un sita lihe serka un gynecologo. Esnan ku ke un sita pa dialuna awor, por bel of app na 7384292. Mi lo laganan duna un orario pa mi por waknan dialuna.

No ta konosi kon largu e situashon aki ta bai dura, manera e ta pinta e ta bai dura in ratu mas.

Felis weekend I saludos,

GC

19/05/2023

Bonochi un i tur,

Felis weekend. Manera boso sa, operashonnan no emergente of sin peliger ta wordu cansela door di CMC pa motibu ku tin tiki personal di sala di operashon. No ta sigur te ki dia e situashon aki ta bai dura, pero e ta frustrante pa pashent i dokter. Despues ku CMC a habri ta bastante personal di sala di operashon a bai traha otro kaminda. Notablemente mas ku tempu di St. Elisabeth Hospital.

Mi operashonnan pa dialuna awor a bolbe wordu cansela awetardi i asina e pashentnan tin di warda mas i e lista di espera ta bai bira mas largu. Mirando ku mi no por opera, mi a bolbe habri un dia di consulta na oficina. E ta hopi riba man i pa esei no tin masha hende ku por wordu planea di awe pa dialuna.

Loke si ta possibel ta pa esnan ku mester di un sita lihe, por regel un verwijsbrief via nan dokter di kas i bel na 7384292. Nos lo duna nan un sita e dialuna mes. Asina pashentnan ta hanja chance di wordu juda lihe i mi dia lo no bai perdi i keda bashi.

Mi ta spera di a informa boso sufisiente.

Saludos,

GC

12/05/2023

Bondia un I tur,

Awe 12 di mei ta e dia internashonal di enfermero/a. Mi ke bisa danki na tur enfermero/a ku tur dia ta duna lo maximo di nan mes pa salubridad di nos pueblo. Nan ta hasi esaki tin biaha ku hasta peliger pa nan mes bida. Sin enfermero/a, hospital ni salubrious publiko NO por existi..

Un tremendo danki di mi parti!

09/05/2023

Bondia bondia un I tur,

Bon siman ahinda. Door di tiki personal di sala di operashon, CMC ta canselando operashonnan no emergente pa redusí e kantidad di salanan riba un dia. Pa medio di esaki tin dialuna dimi ku tin espacio pa hasi consulta en bez di operashon. Si tin persona ku mester di sita lihe, dialuna 15 mei benidero mi ta bai hasi consulta paso mi no por opera e dia ei.

Por traha sita riba 7384292. Por manda whatsapp tambe riba e number ei pa un sita i nos ta purba kontesta den 24ora.

Saludos,

GC

08/03/2023

Bondia bondia un i tur.

Basta dia a pasa. Awe ta un bon fecha pa kuminsa skibi riba mi wall atrobe.
Awe 8 di maart 2023 ta dia internashonal di hende muhe. Mi kier a duna tur hende muhe un pabien riba e/nan dia di awe. Mi ta spera ku awe I sobra di aña lo ta speshal!

Felis dia pa boso.

GC

27/01/2022

Bondia bondia,

Felis diaweps pa boso. Manera mi ta mira, mi operashonnan planea pa dialuna 31 di januari tambe a wordu canselá door di CMC.

Mi a bolbe disidi di habri un dia di consulta riba dialuna 31 awor. Esnan ku ke un sita lihe, por app na 7384292 pa un sita pa dialuna awor ku Dios ke.

CMC tin un komishon ku ta wak e lista di operashonnan planea i operashonnan ku no por wordu canselá so nan ta laga sigi. Tur sobra operashonnan ku NO ta emergente, cancer of ku lo por bira un problema na korto termino ta wordu canselá. E operashonnan ta wordu canselá door di e komishon i NO door di e specialista ku a planea e operashon. E specialista mes ta via e-mail of door di mira ku e pashentnan a wordu canselá ta sa ku su operashonnan no ta bai sigi.

Mi ta spera ku pronto nos lo por sigi ku e operashonnan electivo.

Saludos I felis dia.

GC

21/01/2022

Bondia bondia,

Felis diabierne pa un i tur.

Meskos ku e siman aki, pa dialuna otro siman, operashonnan a wordu canselá door di CMC. Mi a bolbe disidi di habri un dia di consulta riba dialuna benidero. Si tin ku ke un sita poko lihé, por app na 7384292 pa un sita dialuna awor ku Dios ke.

Saludos I bon weekend.

GC