22/09/2025
🔹1-القراية راهي جاية أرجوكم حبسو الطبيعة تاع ااطفل ينوض الصباح يشرب نص كاس حليب ويروح للمدرسة! مستحيل يقدر يركز ، زيدوله خبر توست مع الجبن أو أو فاكهة(موز،تفاح تمر) زبدة فول سوداني ..
🔸2-إذا طاح الطفل على راسه ما تحطوهش مباشرة مقابل التلفاز باش يسكت، الشاشات تزيد تأزم المضاعفات إن وجدت .
🔹3-المحفظة مالازمش تكون هابطة بزاف تحت ظهر الطفل و الكتب خلوها ملاصقة للظهر لأن تعب عضلات الظهر و الرقبة ممكن تسببله صداع في رأسه.
🔸4- الرضيع قبل 6 أشهر ممكن يفطن من النوم لبضعة ثواني يبكي شوية و يعاود يرقد وحده، خليه, هذي سموها مرحلة النوم النشط لأنك إذا حاولتي تسكتيه راح يفطن وبصحتك ليلة بيضاء بعدها 🙂.
🔹5- إذا ولدك عنده كحة و بلغم ماتتقلقش على الدوا ديرله نصف كاس ماء دافئ +ملعقة عسل حر +نصف ليمون واعطه صباح و عشية(أطفال فوق سنة).
🔸6-ماتمديش لولدك الياوورت لي فيه الفواكه مقطعة من الأفضل قطعي بنفسك فواكه طازجة و حطيها في ياوورت طبيعي.
🔹7-السباحة مفيدة لأصحاب حساسية الصدر لكن الكلور يضر أصحاب حساسية الأنف.
🔸8- ماتتجاهلوش تشوهات الأعضاء التناسلية للطفل مافيهاش حشمة هذي ، عضوه صغير أو كيس الخصيتين غير واضح لازم فحص في أقرب وقت.
🔹9-دايما نقول ماتتجاهلوش فقر الدم عند الطفل ممكن يكون سبب رئيسي في غبائه و تراجعه في الدراسة.
🔸10-أذكر أيام كنت نخدم في المستشفى استقبلت مولود جديد عنده تشوه استسقاء الدماغ الطفل راسه كبير بزاف مسكين و حالته صعبة ، فلما جاني الأب و فهمته حالة إبنه قال لي بالحرف الواحد "ماعندي ما ندير به لوكان غي يموت" شفت فيه لقيته أصلع وراسه كبير قد الدلاعة قلت له في خاطري راك مليح أنت أمك رضات بيك... والله يهدي ما خلق.
