15/10/2025
🔹1-لي ولادهم يروحو صايمين للمدرسة اعطيه على الأقل نص كاس حليب ساخن ميكسي فيه 2 تمرات ينفعه بزاف وماتنسايش تنقيله العمش من عينيه صباح لله🥱.
🔸2-مانحبسوش الرضاعة الطبيعية خاطر البيبي يبكي بزاف أو يرجع بزاف أو عنده غازات بزاف 🤌
🔹3-إذا يرقد فمه محلول كي الڨاراج وتسمعي الشخير نتاعه من الكولوار .. أكيد عنده لحميات الأنف شوفي طبيبك إذا ينحيهم.
🔸4-إذا تعيطيله ما يجاوبكش أو فات 3 سنوات مايتكلمش مليح أو مين تهدري معه يبقى يركز مع شفتيك أو يتخلع بزاف إذا جاه واحد خلف ظهره ...هذي علامات أن ولدك مايسمعش🦻
🔹5-نصيحتي إذا راك قادر، دير تحاليل دم مرة كل سنتين للإطمئنان على صحة ابنك خاصة لو ضعيف شهية.
🔸6-الدوخة و القيء داخل السيارة أو الحافلة ليس مرض ، فيه عامل وراثي ، فقط لازم نمدو للطفل دواء الغثيان و بعض الفيتامينات قبل السفر .
🔹7- بوشوكة مانمدوش عليه مضاد حيوي راح يضعف المناعة تاعه و يزيد يأثر عليه المرض أكثر.
🔸8-إذا الحمى طلعتله بزاف و شفتيه فشلان ديريله الشميعات ماتخليهش تقولي باش يشوفه الطبيب هكذا مريض ! والله مانكذبك مدام ماتخافيش.
🔹9-ماتوكليش ولدك بالزربة وهو مقلق لأن الهضم لن يتم بشكل جيد و تسببله مشاكل ليسطوما تنخلع خاصة إذا بركوكس بالتعمير مشي صحي للأطفال آخر الدراسات تقول البركوكس بالتعمير خاصة إذا كان حار مفيد جدا لأطباء الأطفال دوهلهم للعيادة يعاونهم في التشخيص 😋.
🔸10-هذيك المرأة لي تضل تنتقد في الأمهات وتفَهّم فيهم طريقة الحياة والتربية.. هي بروحها مش فاهمة واش تدير في حياتها تخرج من الدار باش تشري عباية 🥻 يعجبها خاتم 💍 وفي الأخير تشري صاك 👜 🤦.
راني ننڨرش بزاف هذا ليامات الله يجيب الخير 😅
كتبه
