12/02/2026
مانيش نطيب في مرقة خضرة ....
علاه باطبيبة ديما تحكينا على المنتجات اللجنبية وتنصحي بيهم في روتينات اغلب البنات ....
علاه ماتشجعيش المنتج المحلي .... ياخي كاين ريتينول وكاين نياسيناميد ...
اولا هي انا مانعرفش كامل ماركات منتجات العناية الجزائرية وصدقوني راهم ياااسر ،
ثانيا اكيد نشجع المنتج بالصح اذا صح يستاهل ،كنت قبل نصحت بغسول venus ، وبواقي شمس ماركة جزائرية تاع starpille
بالصح نقلكم حاجة ومن حقكم تعرفوها
من يوم لقيت بلي كاين منتجات فيها اخطاء تاع تراكيب عرفت بلي مزلنا بعاد .... وحبست اني نحوس على المنتج الجزائري ، او نقرا عليه
راح تقولولي اكي نتي تخدمي في منتج محلي هه راكي تناقضي في روحك ،،،
تشفاو عليا 🩷 بلي ديما نقلكم كاين مواد فعالة ماكمش راح تلقاوها في منتجاتي ،،، لانو تصنيعها يحتاج علم كبير وآلات متطورة ،،،
واش فايدة نقلك هاو سيروم اسيد ازيلاييك ،ونبيعولك ، وراني شبه متاكدة بعد مدة يولي مش فعال ،،، هو هك صعيب ،
المشكل لي لقيتو مرة، ماركة جزائرية وتبيع منتجات غاليين ....
للاسف حاطين منتجات اصلا ماتمشيش مع بعض ،والمزج بيناتهم يولد مادة مضرة للبشرة ،، تخيلو ، ضرك كي تشوفي هاذ الخطا ، راح تعرفي لي يطور التركيبة راه يجيب فيهم من فايسبوك ، والا بايمشي برودوي تاعو ، يخلط الفا اربوتين مع فيتامين ش ويزيد شوي اسيد ، نتي كي تشوفي هم تقولي واو هذا يبيض في يوم ....
يالصح حنا مستحيل تكون عدنا الاقنية لي تخلينا ندمجو هاذو مع بعض ، يعني راح نخلطوهم كيما نخلطو الخضرة تاع المرقة ...
علاه حكيت هاذ الشي ليوم ،وانا نحظر طلبية زبونة عندها مشكل جلد الاوزة ، ايا طبعا عارفين بلي افضل شي لهاذ المشكل هو اليوريا ،،، انا اغتنمت الفرصة ، وقلتلهم يمدولي واش كاين منتجات فيعا يوريا 10 % واكثر ...
طبعا كاين ماركات معتمدتهم ، ولكن نحب نزيد نشوف الجديد ...
لقيت منتج محلي .. . ماعليش فيه نفس النسبة تاع اليوريا حاحة مليحة ،،،
المشكل التركيبة ناقصة اليوريا باه تكون ثابتة في منتج لازملها تكون نع مكونات اخرى solution tampon للاسف التركيبة مافيهاش
يعني هاذ المادة كي تلحق عليها السخانة راح تتحلل تفقد الفعالية ، وممكن تهيج البشرة ...
، علاه مرة قتلكم الجمال راه علم قبل كلش ،
تحكمي تركيبة تقولي ايه نايح فيها مواد فعالة يعني هايلة ،
بالصح الموضوع ماهوش مرقة خضرة ...
