Inner glow coaching with Eman Zaghloul

24/12/2025

اتعلمت مؤخرًا الامتنان لتفاصيل يومي الصغيرة
اللي متعبة بالنسبة لكتير من الأمهات 🤍

فنجان قهوة في وسط دوشة البيت
بيت كله حياة وشقاوة ابني
روتين بيت بيتكرر أحيانًا

حاجات بسيطة…
بس لما تبصلها بعين امتنان
بتشحنك وتطبطب عليك 🌿

اتبرمجنا من الميديا
ومن صور الحياة “اللامعة”
وافتكرنا إن دي هي الحياة المثالية

إن البيت حاجة ثانوية
وإن تحقيق الذات دايمًا برّه
وإن السعادة مرتبطة بإنجاز
أو شهادة
أو تصفيق وشهرة 👏

والبرمجة دي خلت ستات كتير
يحسّوا إن اللي اختارت بيتها أقل
وإن اللي حطته أولوية ضعيفة
وإن الاستقرار معناه اعتمادية

وده عكس فطرة الأنثى
وعكس سيكولوجية المرأة تمامًا

النتيجة؟
عدم رضا
واستصغار للذات
وجري دايم
ونجاحات تأثيرها لحظي

مع إن الحقيقة البسيطة هي:
البيت مش عائق
البيت هو الأساس
وبداية كل تمكين حقيقي ✨

أسرة مستقرة
أطفال أسوياء نفسيًا
وعلاقة فيها مودة ورحمة

ده مش انسحاب من الحياة
ده عمارة أرض… وخلافة 🤍

اللهم علّمنا نرضى
ونشوف العظمة في البساطة
ونحب أدوارنا
ونسعى ورا رسالتنا 💖

د/ إيمان زغلول

⁩

16/12/2025

٣ أيام ريتريت في المعمورة… 🌊
وأنا بجد مش نفس الشخص اللي بدأه 🤍

الأيام دي عملت في نفسيتي حاجة كنت محتاجاها
من غير ما أكون عارفة قد إيه.
علّمتني كتير، فكتني، فضّت كوبايتي،
وشحنتني من جوه… ✨
وجت في وقتها فعلًا 🤍

الغريب إني بدأته وأنا جوايا تخوّف.
كنت دايمًا معتقدة إن الانبساط قرار عقلي 🧠
وإن السعادة بتيجي من التفكير
والشغل على نفسي فقط
مش من عوامل خارجية.

مكنتش مؤمنة قوي بدور المكان 📍
والجو 🌥️
والصحبة 🤍
ولا حتى الناس اللي شبهك…
أو المختلفين عنك.

بس الحقيقة؟

الناس المختلفة عني علّمتني 📚
واللي شبهي دعموا 🤍
والمكان كان ملجأ لينا كلنا 🫂
والجو كان رسالة 💌

آخر يوم…

الدنيا شتّت على البحر 🌧️🌊
وأنا واقفة في المطر
ورجلي لامسة ماية البحر الساقعة ❄️
حلم قديم بيتحقق ✨

لحظة حسّيتها طبطبة صريحة من ربنا على قلبي 🤲
كأن ربنا بيقولي:
«أنا شايفك…
شايف مجهودك ومحاولاتك» 🤍

بقالي كتير قوي ما حسّتش طعم السعادة الـ البيور دي 🕊️
اللي من غير قلق،
من غير تفكير،
من غير مقاومة.

دلوقتي التأثير واضح.
حاساه في قلبي ❤️
في روحي 🌿
في هدوئي 🌸
وفي نظرتي لنفسي وللي حواليا.

الحمد لله… 🙏
على التجربة،
وعلى التوقيت،
وعلى الطبطبة 🤍🌧️✨

وشكرًا شكرًا من هنا
للريتريت الجاي 🤍
لصاحبة الفضل بعد ربنا
Asmaa Youssif 🌿

10/12/2025

10/12/2025

كل ست وكل أم مرت بسنة مليانة دروس…
ودرس واحد بس ممكن يغيّر شكل سنة كاملة وسنين قدام لو وقفتي مع نفسك بالأمان والوضوح اللي تستحقيه.
إرجعي شوفي إيه اللي السنة علمتهةلك… وابدئي منها مش من الصفر.
السنة الجديدة محتاجة منك خطوة واعية… مش مجهود زيادة. 💛

لو عايزة خطوات تساعدك تخطّطي لسنة أهدى وأوضح…
اتركي تعليقك هنا للمزيد من التفاصيل. ✨

#الأمهات

09/12/2025

في لحظات كتير بنعدّي بيها ونحس إن الدنيا تقيلة… بس الحقيقة؟
جوا كل ست وكل أم نسخة أقوى وأهدى بكتير من اللي ظاهر عليها.
وده اللي دايمًا بختار أكون فيه معاكي…
إنّي أسندك لحد ما تلاقي النسخة دي وتكمّلي بيها للسنة الجديدة. 💛

قبل ما تبدأي تخطيط 2025…
خدي دقيقة كده مع نفسك:
إيه أهم درس علمتِك السنة اللي فاتت؟
وإيه الحاجة اللي جا وقت إنها تروح… والحاجة اللي تستاهل تكمل معاكِ؟

التغيير مش خطة طويلة… التغيير بيبدأ بلحظة صدق مع نفسك، وبأمان تحسيه قبل أي خطوة.

لو عايزة خطوات بسيطة وعملية تساعدك تبني سنة أوضح وأخف…
سيبي تعليق هنا وهبعت لك التفاصيل. ✨

#الأمهات

15/11/2025

أنا طول عمري كنت ببدأ حاجات ومكمّلهاش…
مش عشان هي صعبة، لكن عشان كنت بخاف.
بخاف من إن التوقعات اللي في دماغي ماتتحققش، وبمجرّد ما يحصل أول إحباط… أوقّف.
كأنّي بقول لنفسي: “هو أنا ليه أكمل ماهو مفيش حاجة هتتغير؟”

لكن المرادي… لأ.
قررت أواجه خوفي وأبدأ وأكمّل، حتى لو الطريق ماكانش كامل أو مثالي.
فمثلا
دلوقتي عملت قناة على تليجرام، وبرغم إن التفاعل فيها بسيط جدًا…
قررت أني أنشر باستمرار بغض النظر عن التفاعل والعدد والنتيجة

وفجأة لقيت حاجة بتتغيّر جوايا:
بقيت أغلط أقل…
مبقتش اخاف اوي ....
وبطّلت أستخبى…
ومابقتش اهتم بالـ perfectionism زي الأول.
بقيت مؤمنة إن الاستمرار أهم من الكمال، وإن لو حتى شخص واحد بس وصلّه الكلام واستفاد منه…
يبقى أنا كده بأدي رسالتي المهنية بصدق.

وفِي رحلتي وبعد ما عرفت رسالتي في الحياة، وفلسفتي التدريبية، وقيمي الحاكمة، ونقط قوتي وشغفي…
اتعلمت إن الخطوات الصغيرة اللي بنكمل فيها… أهم ألف مرة من النطة الكبيرة اللي مش هتحصل أصلًا.

فلو أنتِ/أنت شايفين البوست ده…
متستنوش الظروف المناسبة .
ابدأوا… وكملوا… والباقي هييجي مع الوقت. ✨
ومتنسوش ان ربنا قال (وان ليس للانسان إلا ما سعى )

14/11/2025

في الفترة الأخيرة بدأت أكون واعية أكتر لنفسي…
وبقيت ألاحظ إن أبسط تفاصيل يومي ممكن تبقى مصدر سعادة حقيقية، لو بس قررت أبصّ لها من زاوية مختلفة.

اتعلمت إن اليوم اللي بيعدي مش بيرجع،
وإنّي مش لازم أستنى الوقت المثالي علشان أعمل حاجة بحبها…
أوقات بنسرق لنفسنا دقيقة، لكنها بتغيّر مزاج يوم كامل 💛

بقيت أحاول ألوّن الروتين على مزاجي:
وقت التمرين… أسمع وردي أو أقرأ صفحة كتاب.
وقت المطبخ… أذكار، أو حلقة بحبها.
وقت مذاكرة الولاد… بخليه quality time قد ما أقدر، على قد ما أعصابي تستحمل 🤭💛
وباختصار… أي حاجة تقيلة عليّ، بحط لها “Frame” جديد يخليها أخف وألطف.

بس سؤالي ليكي…
إمتى آخر مرة حسّيتي إنك ذكية كفاية إنك عرفتي تقلّبي وقت تقيل لوقت بيريّح قلبك؟
وإزاي قدرتي تغيّري نظرتك ليه؟ ✨

10/11/2025

💭 لما تحسي بانجذاب غريب لشخص

أو تشوفين حد دايمًا يكرر نفس أخطاؤه في العلاقات…
خدي بالك 👇

مفيش انجذاب بيحصل صدفة.
كل إحساس بالراحة أو الانبهار بشخص،
هو انعكاس لشيء جواه… مش للشخص نفسه

ذاكرته القديمة ولّدت إحساس مألوف،
هو متعود عليه من تجاربه الأولى.

🧠 العقل الباطن يختار من “كتالوج المشاعر القديمة” كنوع من الحماية.
يمكن نبرة صوت، أو طريقة احتواء،
تشبه شخص قديم… يمكن كان بيطمنه، أو يمكن كان بيأذيه.

فـ يحس بالألفة… بس الحقيقة؟
دي مش ألفة حقيقية.
دي صدى الماضي.

⸻

💫 وده اللي بنسميه “الانجذاب اللاواعي” أو “الانجذاب التعويضي”

أوقات الشخص ينجذب للي قدامه مش لأنه مناسب،
لكن لأنه بيعوض نقص جواه.

مثلاً 👇
• بنت طول عمرها مش بتاخد اهتمام كفاية،
فتنجذب لراجل يديها اهتمام زائد…
بس بعد شوية، يتحول الاهتمام لسيطرة.
• راجل عاش يحاول يرضي أمه الصعبة،
ينجذب لست قوية…
يحس معاها بالأمان، بس يعيش نفس الصراع القديم.

⸻

♻️ والظاهرة دي اسمها “قهر التكرار” – Repetition Compulsion

العقل بيحاول يعيد التجربة القديمة علشان “يصلحها”،
لكن اللي بيحصل فعليًا… إنه بيعيد نفس الوجع في شكل جديد.

نفس النمط، نفس المشاعر، نفس النهاية… بس بوش مختلف.

⸻

❤️ وعلشان كده مهم تفهمي

مش دايمًا هو بيحبك “لشخصك”،
أحيانًا بيحب رمزك —
شايف فيك صورة من ماضيه، مش حقيقتك.

ولما “الإسقاط” يخلص،
بيختفي الشغف كأنه ما كانش موجود أصلًا.

⸻

🧠 ونصيحتي ليكِ كـ لايف كوتش ومعالجة شعورية

قبل أي ارتباط، اسأليه ببساطة:

“أنا شبه مين كنت تعرفها قبلي؟”

ولو طلع في شبه كبير من أمه أو من قصة قديمة…
خديها مش كخطر، لكن كـ إشارة وعي.

لأن الوعي هو أول خطوة للحب الناضج،
والاختيار الصح 💛

05/11/2025

في لحظات كتير بنحس إننا تعبنا من نفسنا…
من الصوت اللي جوا دماغنا دايمًا بيحاسبنا
"كان لازم تتصرفي أحسن … كان لازم تكوني أقوى." 💭

بس يمكن الحقيقة إنك مش محتاجة تتصرفي أحسن،
يمكن محتاجة تتصرفي كإنسانة… وتتقبلي نفسك بس. 🤍

—

عشان كده فكرت اعمل مساحة هادية لكده…
مش جروب، ولا محتوى تقيل، ولا كورس
ولا حد هيقولك “اعملي وماتعمليش”.

هناك هنرجع لنفسنا نرجع نكتب مشاعرنا ونتواصل مع أفكارنا
هننظم دنيتنا ودماغنا من جوّا بدل ما نفضل بنجلد نفسنا و مطحونين في ضغط الحياة لوحدنا من غير دعم 🌿

—

كل يوم:
🎧 رسالة صوتية صغيرة
🤲 رسالة دعم وتفهٌم
🕊️ نصيحة من القلب

ولو دا يهمك الفترة دي …
وحسيتي انك من جواكي قولتي “آه… أنا محتاجة ده”
تعالي… من غير ما تثبتي حاجة.
ومن غير اي شروط غير نية الإستفادة
فقط لنفسك. وقلبك💛

👇 رابط القناة:
https://t.me/+_A0EfWayy-5lZTU8

تعالي نبدأ من أول السطر…
وبهدوء. ✨