29/03/2014
ليه الناس الكبيرة في السن بتلبس نظارة للقراية؟
وليه لما بتكون النظارة مش معاهم بيبعدوا الحاجة اللي بيقروها بعيد عن عينهم ؟
عشان نعرف ليه لازم الاول نعرف حاجات اساسيه:-
__________________________________---
1-اولا اي منظر انا بشوفه جاي من علي بعد 6 متر او اكتر بتكون الاشعه متوازيه وبتدخل العين من غير ما تحتاج اي مجهود من عدسة العين عشان تكسر الاشعه
2-الاشعه اللي جايه من علي بعد اقل من 6 متر (يعنى مثلا بتقرا او بتذاكر )دى بتكون اشعه متفرقه والعين بتحتاج مجهود كبيير من العدسة عشان تكسر الاشعه دى
طيب في السن الكبير اكيد طبعا كل حاجة بتضعف وعشان عضلات العين دى اكتر حاجة بنستخدمها طول حياتنا حتكون اول العضلات اللي بتضعف مع كبر السن
طب ايه بقي اللي بيحصل ؟؟
لما يجى شخص كبير في السن يشوف الحاجه من علي بعد مش حيلاقي مشاكل لاننا زى ما قولنا الاشعه بتكون متوازيه ومش محتاجه مجهود من عضلات العين لكسر الاشعه
لكن لما بيقرا كتاب او اي حاجة علي بعد اقل من 6 متر حتكون عضلات العين ضعيفه ومش حتقدر تكسر الاشعه عشان كده بيشوف الحاجه مزغلله
وبيضطر يبعد الحاجة اللي بيقراها عن عينه طب ليه ؟(كانه بيضحك علي عينه ويخلي الاشعه اللي داخله تيجى من علي بعد اكبر عشان تدخل كانها متوازيه وما تحتاجش عضلات العين )
نظارة القرايه بقي بتشتغل بدل العضلات اللي ضعفت دى وبتعمل هي شغل عدسة العين وبتكسر الاشعه اللي جايه من علي بعد اقل من 6 متر
بتكون نظارة القرايه عدستها محدبة يعنى زى عدسه العين الطبيعيه عشان تقوم بنفس شغله
