Dr. Muhammad Magdy Baby Clinic

07/12/2025

ناقص ده اللي يحصل فعلا 🥺🫣

07/12/2025

النصائح القويه للوقايه من الانفلونزا الموسميه 🤒🤧

**هوي البيت وافتحي الشبابيك وبلاش الجو الفيروسي اللي عايشين فيه ده ⛅️

**غسل اليدين علي الاقل لمدة ١٥ ثانيه بصفة دوريه ع مدار اليوم..

**ابعدي كل الالعاب القطنيه عن اولادك ( الفيروسات عايشه ومتقوقعه فيها كمان)

**استخدمي مطهرات في غسيل ارضيات البيت

**طعمي اولادك مصل الانفلونزا الموسميه وسيبك من اللي يقولك ولادي لما اخدوا تعبوا واصلهم يتعودوا عليه ..اللي زي دول بدأوا ينقرضوا😡

**زمان كان تطعيم الانفلونزا البكتيري خارجي ..لكن حاليا اصبح اجباري في وزارة الصحه والطفل بياخده عند شهرين واربعه وستة اشهر 👌

**علمي ابنك لما يعطس او يكح يعمل ايه كسلوك صحيح

**التدخين السلبي ..مصيييبه ف البيت 🚬

**افصلي الطفل اللي تعبان عن اخواته بلاش موضوع ندفي بعضينا ده

**الفواكه والخضروات:

-الجوافه والبرتقال والليمون والكيوي ..🍋مليانين فيتامين c

-الموز ..🍌ماغنيسيوم بالهبل

-الطماطم🍅..فيها(ليكوبين) ودي حضرتك ماده مضاده للاكسده وبتساعد علي تقوية المناعه ..

**السوايل الدافيه زي اليانسون والنعناع والتليو وياسلام ع شوربة الفراخ وياسلامين تلاته علي عسل النحل🐝

**فيتامين c نقط للاطفال الرضع ٥ نقط مره ف اليوم

**بنزود جرعة فيتامين د في الشتا لاخر توصيات من الاكاديميه الامريكيه لطب الاطفال

**بلاش التجماعات الحزبيه في البيت ‍‍‍
خلي العيال تلعب وتتنطط..تعرفوا !؟؟
ان الاطفال مع اللعب جسمهم بيفرز مواد طبيعيه اسمها (اندروفين) ودا بيساعد علي تقويه المناعه وبالاخص في الشتا...👍

**وطبعا بعد اللعب والشقاوه هيناموا نوم كافي وجسمهم هيستريح وبالتالي هيساعد في تقوية المناعه

**خارجين من البيت .☔️.طب تعرفي ان فيروس الانفلونزا بيتعرف علي الحراره المختلفه يبقي لازم نشرب ميه او نغسل وش الطفل قبل مايخرج ..

**الطفل الرضيع اهم حاجه ليه هي الرضاعه..🍼اه والله الرضاعه..مفيش بعدها مناعه...ومتنسيش نقط محلول الملح للانف

** افضل الطرق لاذابة البلغم عند الاطفال هي شرب الميه،، تخيلي!!

**الشور 🚿 مفيش مشكله منه بس نحافظ علي درجة الحراره ..مش ياخد شور ويطلع البلكونه حضرتك ...وافضل وقت قبل النوم

** مش عيب اننا نلبس ماسك طبي 😷 لو تعبانين ،، بتفرق في عدم نقل العدوي بنسبة كبير جداً

ربنا يحمي اولادنا ❤️❤️

الوقاية خير من العلاج ✌️

07/12/2025

● يا دكتور الواد عيان وإحنا لسا كشفين عليه بس دا لسه سخن مولع ......

● الجمله دى بسمعها تقريبا يوميا فى العياده من أمهات كتير .

● مع حدوث ارتفاع بدرجة حرارة الطفل تقلق الام كثيرا وتسارع باعطاء الطفل خوافض حرارة .

● وممكن تروح تكشف على الطفل و الدكتور يكتب للطفل علاج سواء مضاد حيوى او اى صنف آخر .

● تانى يوم الام تلاقى الطفل لسه سخن فتبقى متشككه فى الدواء و تحس ان العلاج مش عامل حاجة و تجري على دكتور تانى .

■■ وتحية كبيرة لكل دكتور محترم مش بيستعجل فى تغيير العلاج طالما ينفع مع الطفل و مش بيكلف الأم علاج جديد على الفاضى ■■

اولا:
☆ متستعجليش فى القلق من السخونية خصوصا لو الحرارة مش عاليه قوى والطفل بيرضع و بياكل و بينام كويس ..

ثانيا:
☆ يجب العلم بأن اى ارتفاع فى درجة الحرارة ممكن يكون فيروسى و يستمر من (48 -72 ) ساعة و بدون مضاد حيوى يتحسن.

☆ علشان أتأكد إن سبب السخونه فيروسى ومش محتاج مضاد انى ألاقى الطفل بيفوق كويس و يفرفش بعد اعطاء خافض الحرارة و كانه مكنش تعبان.

● يعنى نعالج الاعراض مثل الرشح و الخنفرة و نعطى خافض حرارة بانتظام ممكن يتحسن الطفل بعد 3 ايام ولو متحسنش يبقى نكشف عليه

● اهم حاجه عند الام ان الطفل يكون جسمه مش سخن علشان كده لازم نهتم جدا بان الحرارة ما ترفعش

■■عشان كده لازم نعرف ازاى نتعامل مع الحرارة

و ترتيب الخوافض كالآتى ...
▪نبدأ بسيتال او باراسيتامول .
ممكن الجرعة كل 4-6 ساعات و دا ممكن الام تستخدمه عادى من نفسها ...

▪لو مفيش استجابه و الحرارة مش بتنزل ممكن ندى بروفين
(و يفضل مش قبل 6 اشهر ...بس ممكن نديه للطفل لو الحرارة مش بتنزل مع سيتال )

▪و لو الحرارة عاليه جامد ممكن ندى بروفين و سيتال بالتبادل كل 4 ساعات .
((بروفين مرة و سيتال مرة ))

▪ الدولفين: مش قبل سنه
و يستخدم للضرورة القصوى لو الخوافض التانيه مش بتنزل الحراة .
(لبوس دولفين 12.5 على الاقل لطفل وزنه 12 كيلو بغض النظر عن عمرة و يبقى لبوسه كل 12 ساعة )

طيب .....
■ لو الطفل تعبان جامد
■و حالته العامه مش مظبوطه
■و كشفتى عند الدكتور ..
■وهنفترض ان العلاج مظبوط .
■وان الدكتور تشخيصه صح
■و نوع العلاج صح (يمشى مع التعب ) ..

●●ايه الاسباب اللى ممكن تكون موجوده و تعوق التحسن على العلاج ؟؟؟..●●

اولا :
▪ هل تم حل المضاد الحيوى مظبوط .

☆يجب التأكد اولا من النوع اللى الصيدلى صرفه .
هل هو نفس اللى الدكتور كاتبه ؟الاسم و التركيز 250 ...500 مثلا .

☆ المضاد اللى جاى معاه الميه بتاعته جوه العلبة منزودش عنها .

☆ولو الصيدلى صرف لنا ميه ..لازم نخللى بالنا من غلطه كتير بيقع فيه ...ازاى نحل المضاد بالميه صح دون ذياده او نقصان مع مرعاه الذوبان الكامل للبودر بتاع المضاد.
《نحط ميه لغاية العلامة اللى فى الزجاجه .
و نرج شويه بس و نرجع بعد ما البودرة دابت نزود ميه بالراحة لغاية العلامه تانى !!》

ثانيا :
● هل تم حساب جرعة الدواء على حسب الوزن ؟؟
لان فيه دكاترة مش بتوزن و مش بتحسب و ساعات الدكتور بيبقى حاسب و عامل الصح و الأم تدى الجرعة بالملعقة
《لازم بالمللى و نقيس بمكيال او سرنجه 》

● ندى الجرعة بالساعة يعنى كل 6 او 8 ساعات مثلا و خصوصا المضاد الحيوى يعنى مفيش حاجه اسمها 3 مرات او مرتين لازم بالساعة فى المضاد الحيوى بالذات
( و ممكن ندى الجرعة بدرى شويه .. عن الميعاد ...لكن مش متأخر ).يعنى لو الدوا كل 12 ساعة و ميعاده الساعة 6 و اتاخد 5 عادى ...لكن ميبقاش 7
و لو غيرنا و بدرنا الميعاد فى جرعة امشى على الميعاد الجديد يعنى يبقى 5 صباحا و 5 مساءا ...

ثالثا :

● يفضل ايضا اعطاء خافض الحرارة قبل المضاد علشان تكون الحرارة نازله ... يعنى الطفل يكون واخد خافض و الحرارة منحفضة لتقليل فرصة ترجيع الدوا .

رابعا :
● لو الطفل رجع المضاد الحيوى فى خلال ربع ساعة من أخذه يبقى مستفدش منه و يحتاج الى تكرار الجرعة و لو اتكرر الترجيع يبقى الحقن مطلوبه بعد الرجوع للطبيب ..

خامسا : الحقن ...

● فيه حقن مش بينفع تتقسم ...يعنى الطفل ياخد جرعة و نرمى الباقى علشان بيفقد الفعاليه

( المشهور فى اللى مش بيتقسم ....فلوموكس ... سالبين ...يونيكتام ...يوناسين ..امبسللين )..

● في حقن لازم تتشال فى الثلاجه و المفروض لو الدكتور كتب حاجه بتتقسم بيقولك تشيليها فى التلاجه و لا لأ ...

●في حقن ممكن يتخلط عليها مخدر (ليدوكايين ) مش من نفسنا نقول للصيدلى حط مخدر على الحقن ....
( و المشهور اللى ينفع بمخدر مواد فعالة مثل سيفترياكسون ..سيفوتاكس ..سالبين ..سيفيبيم ..سيفوبيرازون ...سيفتازيديم )
سادسا :
■ اى ميكروب بياخد من( 48 - 72 ساعة ) علشان يموت و الحرارة تنزل بعدها ...

■ فطبيعى لو العلاج مظبوط و الجرعة تمام و بيتاخد فى ميعاده بالمللى و الطفل مش بيرجع ان اى حرارة تخف بعد مرور 48 الى 72 ساعة ...

■يعنى الطفل لو كاشف يوم السبت مساءا .. من الطبيعى و المقبول ان الحراة تفضل لغاية يوم الاتنين او الثلاثاء مساءا ...

و بعد كده لو الحرارة منزلتش يبقى نروح للدكتور يعدل فى العلاج او ممكن يكون جد حاجه جديده فى الطفل ...

■ اهم شى حضرتك ان تكونى عندك صبر على الدكتور وعلى الطفل ...

《 والله هو الشافى المعافى 》
لمزيد من البوستات الخاصه بكل ما يتعلق بالاطفال تابعونا
على الصفحة
د محمد مجدي

06/12/2025

06/12/2025

١٠ نصايح ع السريع!

١. نزلة البرد بتبدأ بخنفره فى الأنف ، بداية رشح بسيط ، زكام ، كحة خفيفة ،، كل ده اصلاً علاجه سوايل دافية وشوية راحة وخلاص ،، الفكرة بأه امتا أبدأ اقلق ولازم اكشف ؟؟ ،، لو لقيتى العلامات دى⚡️⚡️

" كحة بتصحى من النوم ، كحة طوال النهار ، كحة تتعارض مع الرضاعه لو بيبي ، او مع المجهود -بترَقّد الطفل- لو كبير ،، نهجان ،، تزييق صدر ،، حرارة عالية -فوق ٣٨،٥- باستمرار "

٢. الحرارة العالية -فوق ٣٨،٥- تحت سن الشهرين مفيهاش هزار ، ولا بتتعالج في البيت ، ولازم كشف ،، معظم اسبابها التهابات مجرى البول ، او أذن وسطى ، أو لا قدّر الله - التهابات مخ ،، مننساش ان فى امراض فيروسية زى الحمى الوردية Roseola بيسخن ل ٤٠ !

٣. هتلاقوا بعض الأطفال اليومين دول فجأة يرجّعوا بشكل متكرر ،، ركزى كده ،، هتلاقى الترجيع فيه بلغم - ركزى اكتر هتلاقى ابنك عنده رشح خفيف او عطس ،، خلى بالك دى مش نزلة معوية وتقعدى تدى انتينال وموتيليوم ،، لأ ده بلغم نازل عالمعده مهيج الترجيع - يعنى علاجه علاج البرد نقفل الحنفية من فوق ،، مش من تحت.

٤. أرجوكم ، أستسمحكم ،، بلاش مضاد من نفسك ،، ولا من جارتك ،، ولا من تيته ،، ولا من الصيدلى ،، و بلاش يا دكاترة نكتب مضادات أصلاً بدون داعى ،، ولا عشان فيه حرارة ،، الحرارة مش معناها مضاد حيوى ! احنا وصلنا لأطفال بياخدوا إبَر مضاد أسبوع كامل وميخفّوش ! الميكروبات "التافهة" بقت بتشرب قهوة مع البنسلين خلاص ناقص تقوله "بالحضن يا جدع ليك شوقه يا راجل"!!😂

٥. "شوفى بأه يا ست ماما !
اللى أوله شرط آخره نور ،، هتاكلى كويس وتتغذى وانتى بترضعينى ... هنيمك وازقططك و اريحك واتخن واكلبظ وابطّل زنّ ،،، هتعمليلي فيها لاعبة باليه وتخسى وتعيشى عالماء والهواء هخسّ وازنّ واقلّ ادبى عليكى ومنيمكيش 😁
انتى وظيفتك هنا ترضعينى وتشبعينى مش جايه تعرضى أزياء حضرتك 😡" ..

"مذكرات رضيع بجح"...

٦. العلامات العشر الأكثر خطورة على صحة حديث الولادة!

١. عدم القدرة على المصّ والرضاعه.
٢. عدم زيادة الوزن.
٣. الصفراء المتزايدة ابتداءاً من اليوم الأول.
٤.الحرارة.
٥.الترجيع المستمر المؤثر على الوزن.
٦.الإمساك المزمن.
٧. النوم المستمرّ بدون فوقان أو عدم النوم ٢-٣ ساعات متواصلة أول شهر.
٨. الكحة الشديدة المؤثرة على الرضاعه.
٩. "الشرقان" المستمر أثناء الرضاعه.
١٠. "ارتخاء" الجسم دائماً أو "تصلبه" دائماً.

٧. مش كل طفل يشتكى من وجع "رجله" يبقى "روماتيزم"! ،، لازم نفرق كويس جداً بين وجع "العظم " ووجع "المفصل" ،، بالمناسبة من أسباب وجع العظم المتكرر فى الأطفال نقص ڤيتامين د والله..!

٨. ابنك بيجيله صداع بعد كده بطنه توجعه بعد كده يرجّع بعد كده يهدى أو ينام ،،
نصيحة متقلقش ده مش خطير ومتلفّش كتير واحكى الموضوع لدكتورك بالتتابع ده وقولّه مش يمكن صداع نصفى فى البطن يا دكتور ؟؟
كل شهر بشوف حالة تقريباً ،، وعلاجها ادوية الصداع النصفى بعد رسم المخ للاطمئنان 👍

٩. طعمى ابنك الانفلونزا ، والمكورات ، والروتا ، والجديرى ، والسحائى ،، فربما ليس بخير 😥

١٠. لا مُهدّئ أفضل من النوم ، ولا مُغذى أفضل من لبن الأم ، ولا مُخفض أأمن من السيتال ، ولا مُهضّم أفضل من منع المواد الحافظه ، ولا مضاد أقوى من التغذية ، والتطعيم خيرٌ من المرض ،، والوقاية خيرٌ من العلاج ،
والحافظ هو الله ..
حصنى أطفالك ب "أعوذ بكلمات الله التامة من كل شيطانٍ وهامّه ، ومن كل عينٍ لامّه "...

06/12/2025

لما تسيبي ابنك مع مامتك 😅😅

06/12/2025

دكتور انا ابني عنده نقص مناعة 🤔🙄... غير أخواته خالص
ازاى ياستى 🤔🤔
طول الشتا تعبان وكل شوية أدوار برد ومضادات حيوية والكحة والرشح مش بيسيبوه😣😣 برغم كل الأدوية اللي بياخدها .. لدرجة اني ما بقتش عارفة أوديه الحضانة... اتصرف ازاي؟
بصي بقى ياستى أدوار البرد المتكررة ليست دليل على نقص المناعة.. واستمرارية الرشح والعطس وأحيانا وجود حكة في الأنف خاصة مع تغيير الفصول وفي فصل الشتاء من علامات حساسية الأنف وتحتاج إلى متخصص لوضع خطة علاج مناسبة لطبيعة وظروف كل طفل.
أما نقص المناعة فله دلالات مختلفة وامراضه أكثر ثقلا من مجرد أدوار برد..
على سبيل المثال:
✅التهاب رئوي مرتين أو أكثر سنويا،
✅نزلات معوية شديدة ومتكررة،
✅حدوث تسمم في الدم،
✅التهابات صديدية متكررة في الأذن الوسطى،
✅نقص بالغ في الوزن....... وغيرها من الاعراض.
وعند حدوث أي حاجة من الأعراض اللي مكتوب جنبها علامة صح لازم تكشف بأسرع ما يمكن عند دكتور أطفال متخصص .
وبنكرر
بلاش تاخدى تشخيص من حد من النت أو تاخدى روشتة اتكتبت لغير المريض أو تحاول تاخد تشخيص من طبيب بدون مايشوف المريض..
انت بتضر المريض قريبك قبل أي حد
وربنا يحفظ أطفالنا من كل مكروه

06/12/2025

اخر updates للجمعيه الدوليه لل ماميز
أن مواليد الالفينات يطلق عليهم الماميز
انما مواليد التسعينات و الثمانينات يطلق عليهم أمهات عاديين 🤣🫣

04/12/2025

- حضرتك النهاردة بتتأخر جداً يا دكتور في الكشف، للدرجة دي الحالات صعبة؟
- لا ابداً مش موضوع صعوبة، بس علي ما قلعنا الطفل ٣ كلسونات و ٥ فانلات و ٢ هايكول و ٣ سالوبيت . 🤣🫣

04/12/2025

ماهو أنا كدكتور مش هجاهد عشان أوسع لطفلك الشعب الهوائية فى فترة تغيير الفصول دى عشان حضرتك تملاهاله دخان
متقوليش بشرب سجاير فالبلكونة بتدخل من البلكونة مليان دخان في هدومك وشعرك ويجرى عليك المسكين اللى عنده حساسية يستنشق كل دة
ده لو كنت حتطلع الأيام الجاية البلكونة من الأساس فالشتا
والجو دة
مش معقول مش قادر تتحمل مسؤليتك كأب وتبطل السجاير ولا بقت عندك أهم من طفلك
وفر فلوسك اللى بتصرفها على الكشف والعلاج
كل دة وانا ماجبتش سيرة صحتك انت حر فيها

د محمد مجدي

03/12/2025

لما تقعد تراجع مع الأب و الأم نظام الاكل اللي شرحته قبل كده لطفل ٤-٥ شهور من خضار مسلوق او رز مسلوق
و الاب عاوز يقولك أن الجده أكلته محشي كرنب و ممبار عشان أنا قلت الرز مسموح 😞🫣

03/12/2025

الأمهات الفترة ديه تعيش حاله من الخوف و الهلع حرفيا
بسبب بوستات الفيس بوك و السوشيال ميديا
ابتدت بالخوف من التطعيمات سواء الاساسيه أو الاضافيه
و من الدور اللي ماشي من ميكروبات اللي بتأثر على الجهاز التنفسي بتاعه كل سنة
و بعد كده انتشرت بوستات التح..رش في المدارس و الخوف على اطفالنا
حتى التمارين الرياضيه خاصه بعد حادثه حمام السباحه الأخيرة
مفيش حاجه في أيدينا غير أننا نعمل بالاسباب
سواء بالمحافظة على صحه ولادنا بالتغذيه و التوعيه و الوقايه خير من العلاج و اللي حس أنه تعبان يريح في البيت
عشان عدد الأطفال المصابين ميزدوش
و انتا ندعي لولادنا أن ربنا يحفظهم من كل سوء لانه هو الحافظ في الأساس