14/09/2025
فرق كبير بين ملاحظة اللي بيحصل جواك وبين مراقبة نفسك ومحاولة التحكم في اللي جواك .....
يعني ايه الكلام ده .... ؟
يعني لما تلاحظ مثلا ان نفسك مخنوق وضربات قلبك زيادة ومضطرب بتدور علي طول حتهدي نفسك ازاي ...
تعمل تمارين تنفس
تتكلم مع حد يهديك
تحاول تبين انك تمام ومش خايف ولا حاجة
تمسك الموبايل
تتعلم مهارات الثقة بالنفس
تدخن
تشرب
تسحل نفسك في الشغل
تروح تعمل ثيرابي عشان تهدي
وسواء كان السلوك يبان صحي أو غير صحي فهو في الغالب بيحاول التخلص من الإحساس بأي شكل .....
إيه رأيك بقي إنك ممكن تستغني عن معظم الحاجات دي وتهدي بطريقة أبسط من كدة بكتير .....
وهي انك متعملش حاجة خالص .....
زي ما بقولك كدة
تدي نفسك مساحة تحس بالخوف
توقف اي محاولات للتخلص منه او التحكم فيه
وفي معظم الاوقات الخوف حيهدي ويمر
طب ازاي أدي نفسي مساحة أحس بالخوف
تحاول ترخي عضلاتك المشدودة في الوقت ده وخاصة عضلات الوجه والأكتاف وتسيب نَفَسك يتكتم من غير ما تنظمه دقيقة او دقيقتين
تدي براح للخوف
تخليه يبقي موجود
من غير صراع
تحس بيه في جسمك
غالبا حيهدي
لو مهديش فانت مازال معاك الأساليب اللي انت متعود عليها طول حياتك تقدر تستخدمها
بس في الحالة دي انت محتاج مساعدة
محتاج علاج
تستكشف فيه ايه اللي لغبط علاقتك بخوفك بالشكل ده وخلاك رافضه
ايه اللي خلاك تقاومه معظم الوقت لحد ما يفرض نفسه عليك
وتبني تجارب جديدة فيها مساحات من السماح للخوف انه يكون موجود من غير مقاومة
وده حيفتحلك ابواب في نفسك مختلفة تماما كانت مقفولة من زمان
بتعيد اكتشاف نفسك
عن قرب
بتفتح الباب الوحيد لإحتياجاتك وهو المشاعر
اللي بيرفض مشاعره او بيقاومها مش بيقدر يستوعب إحتياجاته ويلبيها حتي لو هو فاهم عقليا احتياجاته
المشاعر بتتحس في الجسم مش بتتفهم ....
ولما تحس مشاعرك في جسمك من غير مقاومة بتقدر ترفع الحصار عن إحتياجاتك عشان تخرج للحياة .....
