Wael sultan وائل سلطان

04/12/2025

عمرك جربت الصمت أثناء الكلام، والسكون في قلب الحركة؟ 🫢🌀

إنك تكون بتقول عكس اللي جواك، وبتتحرك حسب المتوقع منك...
أعتقد إن مفيش إنسان ما مرّش بالتجربة دي...

لما بتتولد، بتتحاصر ما بين حاجتين كبار:
مفروضات وتوقعات. ⚖️

المفروضات كتير...
اسمك، أهلك، دينك، بلدك، مستواك الاجتماعي، سماتك الجسدية، وغيرها...
شوية حاجات مش من اختيارك، بتاخدها كلها دفعة واحدة، وممكن يكون صعب جدًا تغيّرها. 🎭

لكن الجزء الأصعب هو التوقعات...
فرض ما يجب أن تكون عليه،
فرض إنك تفكر إزاي، وتحس بإيه، ولازم تعمل إيه لِيّا.

هو بيتقال إنك تعمل لنفسك،
بس هو لِيّا أنا كأبوك وأمك...

يعني لازم تنجح لمصلحتك،
بس الحقيقة: علشان أنا ما حسّش بالعار. 😔

لازم تتصرف بشكل معين علشان الناس تقبلك،
بس الحقيقة: علشان يقولوا إني عرفت أربي. 👨‍👩‍👦

تلتزم بالدين زي ما حفرضه عليك علشان تدخل الجنة،
بس الحقيقة: علشان ما اتحاسبش عليك. 🕌

تلتزم بالكبت العاطفي، والبعد عن أي علاقات لمصلحتك،
لكن الحقيقة: علشان ما يجيش من وراك مشاكل، وما تجيبليش العار... 😶‍🌫️

من الآخر: الغي تجربتك في الحياة، اللي ربنا كفلها ليك، لمصلحتك...
لكن الواقع: إنها تهدئة لقلقي، ومخاوفي، ومشاكلي غير المحلولة. 🧠💭

أنا مش بقول إن الأب والأم ما بيحبوش أولادهم...
لكن هو ده المعنى الحقيقي للحب المشروط،
المغلف باللوم، والذنب، والرفض. 💔

وهنا، ولإنك مش عارف تغيّر حاجة من المتوقع منك،
تبدأ تكره المفروض عليك...
نفسك، جسمك، ظروفك... 🙍‍♂️🪞🌪️

افتكر إني قلت "تكره"، مش "تحسّن" ولا "تغيّر".

وتبدأ هنا مرحلة رفض ذاتك، وخناقتك معاها...
لإنك مش عارف ترفض أو تغيّر واقعك،
ولا علاقتك مع الناس اللي انت مسكون بحبهم من غير شروط...

وهم دايمًا يا إما مش موجودين بكاملهم المستقر الآمن ليك،
يا إما علاقتهم بيك مشروطة... ⚠️

ورغم إنك بتكبر في سنك، وإمكانياتك، واستقلالك...
لكن جواك لسه ما كبرش،
لسه جواك طفل منتظر منهم الاعتراف، والحب، والأمان. 🧒🤍🫂

وهنا بيحصل اللي قلته ليك فوق:
ساكت وأنت بتتكلم، ساكن وأنت بتتحرك... 🧍‍♂️🗣️

لإنك خلاص اتعودت تقول المنتظر، والمتوقع، والمقبول منك...
بتقول اللي يديك مكان وقبول، حتى لو مشروط، وسط جماعتك...
مش اللي أنت حاسّه، ولا اللي محتاج تقوله...

وبتتحرك، وبتشتغل، وبتِرتبط بنفس الطريقة...
المتوقع منك، مش اللي أنت محتاجه...

في الواقع، إنت بقيت تخاف من احتياجك... 😨
عايش، مش حي. 🫥

والبداية؟
إنك تجرب تسمع اللي جواك، وتقبله...
ما تحسّش بالخزي، ولا تنكره... 🎧💭

ساعتها بس، حتحس بالحياة. 🌱
ساعة ما يكون جواك زي براّك...

وقتها، حتدوق طعم الونس، حتى وسط الصمت،
لإنك أخيرًا بقيت مع اللي جواك، مش ضدّه...
بقيت إنت، مش نسخة شبهك...
لكن ما تعرفهاش. 🫶🌌

03/12/2025

03/12/2025

🕯️ هل يمكن أن يكون الإدمان صرخة استغاثة لا يسمعها أحد؟
في عالمٍ الأرواحُ فيه لا تموت…
بل تجوع.
جوعًا لا يسده مخدر، ولا يرويه سلوك.
🌱 يسعد ونس الحياة أن تدعوكم للغوص في أعماق
"عالم الأشباح الجائعة"...
رحلة فهم تتجاوز السطح.

👁️‍🗨️ ما وراء السلوك…
خلال آلاف الساعات من العمل مع مرضى الإدمان في العيادات الخارجية ومراكز التأهيل، وعلى مدار 16 عامًا، كنت دائمًا مؤمنًا أن هناك ما هو أعمق من "السلوك المدمر" أو "تشوهات التفكير".
كنت أرى بوضوح:

الألم
الصدمة
نقص الاحتياجات الأساسية
ولهذا، كانت الأدوات التقليدية غير كافية لتحقيق تعافٍ حقيقي أو جودة حياة مستقرة بدون تعاطٍ أو سلوكيات إدمانية.

📘 عن الكتاب: In The Realm of Hungry Ghosts – د. غابور ماتيه
هذا الكتاب لم يكن مجرد مرجع، بل تأكيد لما كنت أشعر به لسنوات...
إنه تذكير عميق بأن المدمن لا يبحث فقط عن "المخدر"،
بل عن:
الراحة، الأمان، والهروب المؤقت من المعاناة.

🔍 ليه الكتاب مهم ؟
لأنه يكشف حقائق جوهرية تغيّر نظرتنا للإدمان:
🔹 الإدمان ليس “السلوك”… بل محاولة لتهدئة ألم داخلي عميق
🔹 الشخص لا يبحث عن المادة… بل عن إحساس مؤقت بالأمان
🔹 الطفولة المبكرة والصدمات تُشكّل “الدماغ الإدماني”
🔹 العار هو الوقود الذي يدفع المُتعافي للانتكاسة
🔹 كل أنواع الإدمان تقع على نفس الطيف — تختلف فقط الأدوات
🔹 العلاقة العلاجية القائمة على التعاطف (Compassionate Inquiry) هي المفتاح
🔹 “الجوع العاطفي” هو جوهر عالم الأشباح الجائعة
🔹 حتى المعالج نفسه… غالبًا ما يكون جريحًا يتعافى مع الآخرين
🔹 الشفاء الحقيقي يبدأ من "إعادة الاتصال"… لا من مجرد منع السلوك

📚 مجموعة قراءة متعمقة – Reading Group
ندعوكم لمساحة آمنة من القراءة والمشاركة بين الأقران…
مساحة هدفها "إعادة الاتصال" بالمعاني المفقودة، وتبادل الخبرات، وفهم الإنسان خلف السلوك.
سنستكشف معًا:
💠 أن جوهر الإدمان هو "فراغ عاطفي" مؤلم
💠 أن الشفاء لا يبدأ فقط بمنع السلوك، بل بـ التعاطف الجذري مع الذات
💠 أن تجارب الطفولة شكلت أدمغتنا وأثّرت على قابلية الإدمان

⏳ تفاصيل اللقاء:
🧠 على مدار 15 أسبوعًا
📖 نقرأ ما بين السطور
💬 نناقش بعمق
🤝 ونتعلم سويا

👤 ميسر اللقاء: وائل سلطان
معالج نفسي إكلينيكي، مؤسس ومدير فني لونس الحياة للاستشارات والتأهيل النفسي و التدريب
متخصص في علاج الإدمان بخبرة تتجاوز 16 عامًا في جميع مراحل التعافي.
يعتمد على مدارس علاجية متكاملة تشمل:
CBT – Schema Therapy – العلاج الجمعي - علاج الصدمة من خلال تقنيات somatic experience
يؤمن بأن جوهر التعافي لا يقتصر على التوقف عن التعاطي،
بل هو استعادة للحياة، بكل معناها واتصالها وأصالتها.

📬 دعوة للانضمام
إذا كنت:
🔹 طبيبًا نفسيًا
🔹 أخصائيًا نفسيًا
🔹 معالجًا أو مهتمًا بفهم أعمق للإدمان والصدمة
فأنت مدعو للانضمام لهذه الرحلة…
📘 كتاب Gabor Maté
من الكتب القليلة التي غيّرت فهم العالم للإدمان.
هذه المجموعة ليست برنامجًا علاجيًا، ولا تدريبًا أكاديميًا…
بل دائرة قراءة وتأمل وتحليل عميق، تنقلك من القراءة إلى الفهم الحقيقي.

🧘‍♀️ العدد محدود
لضمان جودة التجربة وعمق النقاش.
📩 سجل اسمك عبر الرابط
للانضمام إلى مجموعة الواتساب الخاصة بالمجموعة.
https://docs.google.com/forms/d/e/1FAIpQLSeEK6YRmHUXrqvnO7X8dHTwmcF-KOcZbVipThXXnhwMRgH-JQ/viewform?usp=publish-editor

03/12/2025

" إعادة نشر بمناسبة اللي بيحدث مؤخرا في المدارس ، ربنا يداوي جروح الأولاد و يظهر العدالة و يحمى أولادنا "

👂 حد ضايقك النهاردة؟
عن الأطفال…
عن الخوف اللي ساكت،
واللي ممكن يتكلم لو سمع السؤال الصح.

ما زال أكتر شيء يدهشني مش اللي بيحصل،
لكن دهشة الناس منه! 😧

سواء في مسلسل زي "لام شمسية"
أو في قضية مخيفة زي "طفل دمنهور"،
الناس دايمًا بتسأل باستغراب:

"إزاي ده حصل؟ هو ده ممكن يحصل أصلًا؟"

والإجابة:
📌 حصل، وبيحصل، وحيحصل طول ما إحنا مش عارفين السبب.

ليه؟
حقولك…

🚫 الإنكار مش حماية
خلينا نتفق مبدئياً على حاجة:
أكتر وجع ممكن يهز إنسان؟
مش وجعه هو…
لكن وجع وأذى أولاده 💔

الإنسان لا يحتمل إطلاقًا أي أذى يصيب طفله،
حتى لو مجرد مغص 🤒
ما بالك لو إعتداء جنسـ ي ...

وعلشان كده بيتهيأ له إنه لازم و يقدر يمنع أي أذى عنه…
لدرجة الإنكار الكامل 😶
إنه ممكن يحصل شيء غير عادي أو بشع.

وكل شيء يتم إنكاره واستبعاده
هو عامل خطر مضاعف في حد ذاته...

وده يدخلنا على سؤال:

إزاي نمنع ده؟

وهنا خلينا نتفق على حاجة تانية:

🙏 لا مانع من أقدار الله إلا الله .
إحنا فقط بنقوم بدورنا في حدود ما نعلم…
وبعدها بنستودعهم عند ربنا، حتى وهما بين إيدينا 🤲

🧪 دي مش مزايدة… دي تجربة
اللي جاي مش اتهام لأي حد،
ولا مزايدة…
هي مجرد تجربتي الشخصية 👨‍👦

اسأل ابنك صح، علشان يفهم الأمور صح.

من يوم ما ابني دخل المدرسة،
أنا وأمه اتعودنا أول ما يرجع نسأله:

📌 حد ضايقك؟
📌 يومك كان كويس؟
📌 إيه أكتر حاجة كانت حلوة النهاردة و إيه أكتر حاجة وحشة ؟
📌 عارف إنه لو حصلّك أي حاجة مع أي حد، أنا معاك وفي ضهرك؟ 🛡️

وبعدها ممكن نسأله:

📚 أخدت إيه النهاردة؟
✏️ عملت إيه في الامتحان؟

وغيرها من الأسئلة اللي للأسف،
بيوت كتير متعرفش غيرها…

⚖️ أولويته ولا أولوياتنا؟
الطفل مش دايمًا بيفهم إن "أمانه وسلامته" هي الأولوية 🚸
لكن اللي واصل له إن درجاته وإنجازه والمتوقع منه…
هما الأولوية الأولى 📈

الطفل حرفيًا — ومش بتكلم عن طفل دمنهور تحديدًا —
ممكن يبقى خايف من رد فعل أهله على درجاته،
أكتر ما هو سامح لنفسه يخاف ويشتكي من شيء حصله 😔

🚸 التربية مش بس تقول "عيب"

أنا مش بشاور على الـ private area أو مناطقه الحساسة
وأقوله: "هنا عيب ومحدش يقرب".

أنا بقوله:
📣 لو حد قرب من هنا، قولي على طول، ومتخافش.
📣 لو حد قرب، اشتكي، متخافش.
📣 لو مين في المدرسة ضايقك — من أصغر حد لأكبر حد — قولي، ومتخافش.

أنا مش بربي بلطجي أو متكبر…
أنا بربي طفل يعرف إن أمانه وسلامته هي رقم واحد عندي،
وإني أمانة وضهره مهما حصل، وقدّام أي حد 💪

🧩 الدعم مش بالكلام بس
أنا رُحت لإبني المدرسة في مشكلات
ممكن تكون فعلاً بسيطة بالنسبة ليا…
لكن كبيرة في عالمه 🧒

بس الرسالة هنا:

أنا معاك، ومفيش شيء بسيط مادام يهمك.

ولما بيحكي عن مشكلة،
مش دايمًا أول رد:
❗ "إنت أكيد غلطان"

ولو غلطان في جزء،
ده مش معناه إني أشيله القضية كلها.

لإني مش بكسل أدخل في مشكلة أو مواجهة من أجله.
لإني لو أنا ما عملتش ده…
مين اللي حيعمله؟ 🙋‍♂️

😟 إحنا اللي بنخاف الأول
إحنا بنخاف على ألمهم فـ بننكره…
وبنخاف من العيب فـ بنسكت…
وبنخاف على شكلنا فـ بنسكت تاني…
وعلى مستقبله فـ مش بنفكر غير في الدراسة والمدرسة 📘

بنخاف من المدرسة نفسها …
اللي عملت تحري عن جدودنا لحد الجد الرابع علشان تقبل ابننا،
فمش بنحب ندخل في مواجهات معاها
ونخاف من تهديدهم…

مع إن أي مدرسة هي اللي لازم تخاف،
لإن معاها أمانة… وأمانة كبيرة كمان 🎒

بنخاف بنخاف بنخاف…

إزاي أطمن طفل خايف، وأنا خايف؟ 😢

🔁 النهاية… البداية من تاني
اللي حصل مع طفل دمنهور مع أهله،
بيحصل كتير… من زمان.

أطفال بيخافوا على أهلهم،
أو بيخافوا منهم…
أكتر ما بيخافوا على نفسهم 💬

لما جرّبوا يحكوا،
لقوا إن أهم سؤال بيدوَّر عليه:

📝 "درجاتك كام؟
جبت حاجتك كلها من الديسك؟
جاهز لدروسك وتمارينك؟
صلّيت في المدرسة؟"

مش:
👂 "حد ضايقك النهاردة؟"

✅ الخلاصة:
السؤال ده، رغم بساطته…
ممكن يبقى الفرق بين طفل ساكت وهو خايف،
وطفل آمن…
لأنه مستعد بشجاعة اتعلمها منك،
يِجاوب السؤال الأهم في يومه،
ويمكن في حياته:

حد ضايقك النهاردة؟ ❤️

ربنا يداوي روح الطفل و يشفي صدر أهله و ينتقم من المجرمين ...
آمين ...

02/12/2025

🔴 فوضى...
عايشين في فوضى كاملة.

📍 المشهد الأول: من تعليق إلى كارثة
دكتور نفسي نزل إعلان، بيعلن فيه عن نفسه وشغله، حاطط صورته.
تبدأ التعليقات… لا نستطيع أن نقول غير إنها فجة، لا تتعلق بمحتوى البوست، بترقى لمستوى التحرش.
وعلى الرغم من إن الموضوع أصلا أوفر، لكن لأ، ما ينفعش نقف هنا... لازم نعلي على الموقف أكثر ...
شخص ما أخد سكرين شوت من تعليق واحدة على الدكتور وبعته لخطيبها...
وآخر أخد تعليق واحدة تانية وبعته لجوزها...
ده فسخ خطوبته، والتاني طلق مراته.
وعلني كمان... على الفيسبوك.

🔍 ترصّد وانهيار
هو إيه ده؟
الشخص اللي عنده من الفضول والوقت إنه يتتبع كومنت، ويدخل صفحة صاحبته، ويوصل لجوزها أو خطيبها ويبعت له...
إيه التركيبة المريضة دي؟
مستحيل ده يكون شخص سوي أو طبيعي أو لا يغادر سجادة الصلاة.
"مدير أخلاق" السوشيال ميديا، بتصرفه الشاذ، مستحيل يكون شخص سوي.

🧭 وجهة نظر شخصية: المذنب الحقيقي
الست اللي عندي استعداد أصدق إنها مش راضية عن جوازها أو جوزها...
لكن عندي مشكلة كبيرة لما تسبب إهانة وجرح علني بتصرف غير مسؤول،
بتعليق جارح ومهين زي: "مش عارفة يا دكتور هاعيش مع اللي معايا إزاي بعد الصورة دي".
صعب يكون ده تصرف من شخص سوي فعلًا.
هتقولي طيب إنت زعلان من اللي بلغ جوزها ليه؟
لأنه ببساطة مش من شأنه، ولا دي من طرق الإصلاح، إن كان يريد إصلاحًا.
ده تصرف انتقامي بيدل على شذوذ في الفكر والسلوك، ويمكن أصلًا سببه مشكلة غضب شخصية مع امرأة ما في حياته.

🩸 تصاعد البشاعة: من السوشيال ميديا إلى الجريمة
مؤخرًا، السوشيال ميديا بقت مليانة أخبار مؤلمة...
عن الاعتداءات – اللي لسه بنكتشفها – على أطفال المدارس الدولية.
عن مقتل آسيل بعد الاعتداء عليها.
عن جريمة قتل المراهق يوسف لزميله محمد...
وغيرها من البشاعات اللي بيتقال عنها إنها "حالات فردية"، وإنه لو طبقنا أقصى عقوبة حنحقق العدالة، ويرجع المجتمع لطبيعته وطيبته.
ده مش حقيقي إطلاقًا.

📚 نظرية النوافذ المحطمة
لأن المجرمين دول وغيرهم، ما همّ إلا إفراز مجتمع بدأت تتحلل فيه الروابط الأخلاقية والقيم.
حرب كبيرة من سنين على القيم والموروثات والرموز الدينية.
فيه تفكيك لبنية مجتمع كامل، من غير ما نقدّم بديل قيمي أو قدوة أخلاقية حقيقية.
أشهر كلمة مسمومة بتتقال: "مافيش صح وغلط مطلق".
حلالك وحرامك غير حلالي وحرامي… كلام مسموم، وأفكار مشؤومة، اتاخدت بسطحية من سياقات أعقد، لحد ما وصلنا للي إحنا فيه.
وده يخليني أفتكر نظرية اجتماعية قديمة جدًا، لكنها بتشرح اللي إحنا فيه بدقة...
Broken Windows Theory — نظرية النوافذ المحطمة
وضعها: James Q. Wilson & George L. Kelling

العام: 1982

نُشرت في: The Atlantic — مقال بعنوان "Broken Windows"

الفكرة الجوهرية:
إذا تُركت نافذة مكسورة بلا إصلاح، فالرسالة اللي بتوصل للناس هي:
"مافيش حد مهتم… ممكن نعمل فوضى أكتر".
وبالتالي:
الفوضى الصغيرة → تشجع على فوضى أكبر

السلوك المنحرف البسيط → يفتح المجال لجرائم أعنف

غياب الضبط الاجتماعي → يولّد إحساسًا إن المكان بلا رقابة

النتيجة:
البيئة الفوضوية بتنتج مجرمين أكثر جرأة.

⚙️ النظرية بتشتغل إزاي؟
الإشارات:
الناس بتلتقط إشارات من البيئة:
جرافيتي – نفايات – مشاجرات بسيطة – تجاوزات بدون عقاب.

كلها بتقول: "ده مكان متسيب".
تحطّم الانضباط الذاتي:
المجرم بيقل خوفه من العقاب، والمواطن بيقل تدخله أو تبليغه، والروابط الاجتماعية بتتدهور.

التصعيد السلوكي:
شتيمة → تحرش → ضرب → سرقة → اعتداء.

📊 هل هي نظرية مثبتة؟
نعم. فيه أدلة ميدانية كبيرة من:
نيويورك – لوس أنجلوس – شيكاغو – بالتيمور – مدن في هولندا وبريطانيا واليابان.
أهم دراسة:
بعد تطبيق شرطة “النوافذ المحطمة” في نيويورك (1994–2001):
انخفض القتل بنسبة 71%

انخفض الاغتصاب بنسبة 46%

انخفض السطو المسلح بنسبة 56%

انخفضت السرقات من المنازل بنسبة 65%

السبب؟
ضبط الجرائم البسيطة + وجود شرطي واضح + إزالة الفوضى البصرية.

🛠️ الخاتمة: العودة تبدأ من فوق
لو المجرمين دول واقفين في أدنى درجات السلم الأخلاقي...
فإحنا واقفين فوق، في قمة التسيب تجاه ما نظنه بسيط.
انحلال المعاني...
غياب التصديق عند الأجيال الجديدة في مفاهيم زي:
الاحترام – الحدود – الصدق – الفضيلة – القيم.
الكلمات دي بقت نكت، مش بتضحكهم حتى.
ويمكن لأن الأجيال الأكبر فقدت التصديق فيها أصلًا.
شوف الميديا والمسلسلات والأغاني والمهرجانات...
شوف بتقول إيه عن رجالنا ونسائنا وبلادنا.
لقد ابتعدنا كتير جدًا.
والرجوع مش سهل أبدًا.
محتاج مجهود كبير من الكل، ومحتاجين نغير حاجات كتير.
علشان وإحنا بنبص باحتقار وغضب على اللي تحت...
ما ننساش إننا لسه واقفين فوق، ومحتاجين نصلّح نوافذنا المحطمة...
قبل ما نلاقي نفسنا من غير شباك أصلًا، نخاف عليه.

29/11/2025

🎭 في السيكودراما والعلاج النفسي
نعيد إحياء الماضي و الذكريات لنجد الشفاء…
لكن في العلاقات المؤذية في الحياة ، نتبادل الأدوار لنكرر الجراح.

❓عايز تعرف إجابة السؤال اللي كل اللي حواليك بيسألوه…
وإنت نفسك مش عارف تجاوبه؟
ليه رغم كل الأذى والقهر اللي شوفته مع المؤذي… مش قادر تمشي؟
ليه واقف مكانك حتى لو الثمن هو نهايتك النفسية؟ و ربما أكثر

⚠️ الحقيقة إن الإجابة مش بسيطة.
علشان تفهمها لازم تشوف ديناميكية التفاعل المعقد بينك وبين المؤذي عبر الزمن…
ولا زم تفهم إزاي انك اتغيّرت تدريجيًا… لحد ما بقيت شخص غير الشخص اللي كنت تعرفه.
ودي الجملة اللي بسمعها دائمًا في أول جلسة:
“أنا بقيت مش عارف نفسي.”
والجملة دي حقيقية جدًا.

🪞 لفهمها، لازم تعرف إن الاتنين — النرجسي والضحية — مجروحين نفس الجرح…
لكن كل واحد بطريقته.
هم وجهان لعملة واحدة.

🧠 حوضحلك …
فيه نظرية مهمة جدًّا اسمها نظرية العلاقة بالموضوع | Object Relations عند عالم نفس شهير هو دونالد وينيكوت.
“الموضوع” هنا يعني الآخر الأساسي في طفولتنا — غالبًا الأم أو الأب.
النظرية ببساطة بتقول إن نفسية الإنسان بتتشكل من خلال علاقاته الأولى،
وإن الصور الداخلية اللي بيخزنها عن هؤلاء الأشخاص
هي اللي بتحدد بعد كده إزاي بيشوف نفسه، ويفهم الآخرين، ويدخل علاقات عاطفية أو اجتماعية.

🎭 وهنا تبدأ مسرحية تبادل الصور الداخلية.
المؤذي محتاج يخلق جو نفسي معين داخل الضحية أو الشريك
علشان يقدر “يصنع” المشهد اللي يناسب نموذجه الداخلي اللي اتربى عليه
فيعيد تشكيل الشريك من خلال آلية اسمها:
🔄 التماثل الإسقاطي | Projective Identification
يعني:
“أدفعك لا شعوريًا إنك تبقى الصورة اللي جوّايا…
وبعدين أتعامل معاك كإنك فعلًا كده.”

🎬 كيف يجعل عقلك خشبة مسرحه الداخلي؟

🔹 1) الإسقاط الأولي
“أنت مثالي” أو “أنت مش كفاية”
النرجسي يبدأ العلاقة بـ Idealization أو Devaluation
قبل ما يعرفك أصلًا…
لإنه بيشوفك من خلال اللي جوّاه، مش من خلالك.

🔹 2) الضغط السلوكي علشان تبقى زي صورته
وده أخطر جزء:
يغمرك بالحب أولا
و بعدين يقولك “انت بارد” ← ثم ينسحب بشدة ← تجري وراه ← يبقى شكلك “لزّقة / و محتاجه”.

يقول لك “أنت مش كفاية” ← يقارنك بالناس ← تبذل أكتر ← تتحول لشخص إرضائي وتنزل صورتك في عينه

يقولك “أنت حسّاس” ← يعمل تصرف قاسي ← تتوجع ← يقول “شوفت؟ أنا قولت إنك حساس ”

هو بيشكّلك… حرفيًا.

🔹 3) تكوين الذات الزائفة
هنا حقيقتك تتراجع…
وتظهر ذات زائفة غرضها الوحيد “المحافظة على العلاقة”.
علاماتها:

إرضاء زائد
تبرير الإيذاء والسلوك
تحمّل ما لا يطاق
صورتك الذاتية تنخفض
إحساس إنك “مراقَب من جوّاك”

زي ما وصف وينيكوت:
“الطفل اللي بيخبي ذاته الحقيقية خوفًا من فقدان الأم.”

🔹 4) الاستجابة لمشاعر المؤذي بدلًا منه
هنا يبدأ التماهي الحقيقي:
أنت:
تقلق بدلًا عنه

تخاف بدلًا منه

تشعر بالذنب نيابة عنه

تحاول إرضاءه

تتوقع انفجار غضبه

تعيش في Hypervigilance يقظة و انتباه طول الوقت

تحل مشاكله

وتشيل حمله النفسي كله

كأنه ساكن جواك…
وبيخلّي مشاعره تتحرك على لسانك وإحساسك.

🔹 5) التكرار القهري — إعادة تمثيل الطفولة
النرجسي يعيد معك تمثيل علاقة أمه بيه:
(أم غائبة أو ناقدة أو مستعملة له)
وإنت — بدون وعي — بتاخد دور الطفل اللي بيحاول يكسب حب الأم بأي شكل.
فتصبح:
الطفل المُرضي
المنقذ
الحامل للمشاعر
الباحث عن الرضا

🔥 وهنا يظهر جواب السؤال:
ليه مش قادر تمشي؟
لأن التماهي بيخليك تحس إنك:
مسؤول عنه
فاهمه زي ما محدش فاهمه
شايف الطفل المجروح اللي جواه
قادر تنقذه
مش عايز “تقتله نفسيًا” بالرحيل
شايف فيه كل اللي كنت تتمنى حد يشوفه فيك زمان
ولإنك شايل مشاعره بدلًا منه…
بتشعر بـ:
عاره

وخوفه

وذنبِه…

فبتفقد القدرة على المغادرة.

🔹 ليه التماهي بينجح مع ناس معينة؟
لأنه يعمل أكثر مع:
أصحاب الذات الزائفة القوية اللي خبوا نفسهم الحقيقية زمان علشان يقدرروا يستمروا

الـ Givers – Empaths المعطائين شديدي التعاطف

ضحايا العلاقات الصادمة (Trauma Bond)

من عاشوا طفولة بلا احتواء أو دعم

و يبحثون عن القبول بأي ثمن…
ويجدون في النرجسي شيئًا من ذواتهم يريدون “إصلاحه”.

🔥في النهاية… هل هناك نجاة؟
الإجابة نعم.
وأول خطوة في النجاة:
وعي بذلتك و بالعلاقة

فصل مشاعرك عنه

رد الإسقطات لصاحبها ، كل واحد يشيل شيلته

حماية حدودك

استعادة ذاتك الحقيقية

معالجة جروح طفولتك… بدل ما تعالجها في علاقة مؤذية

وعودة حياتك إلى مركزها الطبيعي

🎯 لأن:
حياتك لا تستحق أن تضيع في إعادة تمثيل جرح قديم.
لإن حياتك في إنك تكون كاتب النص و السيناريو ...
مش مجرد ممثل في حدوتة لا تخصك ...
لإنها حياة واحدة ...

27/11/2025

26/11/2025

( my hard way )

دروس لا أخترت أتعلمها...
و لا اخترت الطريقة اللي أتعلمها بيها...
عموما أنا اتعلمت من غلطي أكتر من الصح بكتير...

١- يدفعك الناس دفعا لأخذ القرارت نيابة عنهم ، متعملش كدة لإنك حتحاسب على القرار الغلط ، و محدش حيشكرك على الصح ، ساعدهم و لا تقرر عنهم .

٢- يدفعك بعض الناس دفعا ، للتخلي عن مبادئك ، قيمك ، رحمتك ،اعتزلهم و انت نفسك ، قبل ما يعتزلوك وانت مجرد من كل شيئ ، يعتزلوك و انت مسخ مشوه منك .

٣- يدفعك الناس دفعا ، بعيدا عن أحلامك وحقك فيي الإختلاف و انت بتتبعهم حفاظا على أمان وجودهم ، صدقني لو الدنيا كلها جنبك و انت خسران نفسك ، فإنت وحيد.

٤- الخطأ هو الضريبة المدفوعة و انت بترسم طريقك الخاص ، لإن المقابل إنك عايش بمعايير صحيحة في حياة غلط ، ببساطة لإنها مش حياتك .

٥- لا تتوقع من الناس أكتر من مكانهم وقدرتهم الحقيقية على العطاء ، لإن حجم زيادة التوقع بيزيد من تخليك عن مسوولية حياتك ، و المسؤولية هي سلاحك و أداتك الأهم في الدنيا .

٦- الناجح و القوي كلامه صح حتى لو كان غلط و يتلقى الإبتسامات و هو مكروه ، اتعلم ازاي تكون قادر على فرض موقفك ، لإن حق بدون قوة ، مهان .

٧- مشيت جوة الحيط كتير علشان خوفوني من مشي الشارع ، الدنيا قفلت عليا الحيطة و الحياة ، الشارع مش مخيف ، الشارع هو النور والهوا والحرية ، الشارع حياة ، و الحيطة موت بالحياة.

٨- محدش حيسيب حياته علشان يقيم و يخلق حياتك ، اتعلم تستفيد من المصادر المتاحة حواليك و إبدأ ، والناقص حتقابله في السكة و انت ماشي ، متنتظرش الأمور المثالية علشان تبدأ ، حتقف للأبد .

٩- طول ما انت بتستعين بناس علشان تحمي نفسك من ناس حتعيش خايف ، استعن بالله يقرب منك عباده المخلصين و يصرف عنك شر من كان قلبه سوء.

١٠ - الونس جنة الدنيا ، و هو من الحاجات القليلة التي لا يمكن شراءها أبدا ، و عمرك ما حتدوق طعمه، الا لو قلبك سليم ، فلما تلاقي نفسك حاسس الونس ، اعرف إنك في معية الله ، و انه رزقك ده لإنك تستاهل ، صدق بقى إنك تستاهل بقرار منك ، و الا حتفضل الحياة عبء كبير ، و نحن لم نخلق من أجل ذلك .

25/11/2025

البعد..
مش في قلة الإهتمام أو الوجود...
أو حتى الإستماع...
تبدأ تحس إنك بعيد...
لما تبدأ قلة الكلام...
لما يبدأ السكوت...
لإن القرب إنك تعرف تتكلم عن نفسك...
وجعك و ألمك و همك...
و إنك تشارك فرحتك و حتى حلمك قبل الواقع مع اللي قدامك...
فلما ييجي اليوم اللي تلاقي نفسك فيه بتسمع بس...
إعرف انه مبقاش مساحة آمان و ونس ليك...
و إنك بقيت بعيد...
و إن الفراق مسألة وقت ...
حتى و انت لسة قاعد جنبه...
لإنك من جواك...
بقيت بعيد...
و معاه وحيد...
و هنا السؤال...
ده حصل امتى؟
و ده حصل ليه؟

24/11/2025

� يقال أن زراعة بعض اللافندر العطري والنعناع…

كفيلة تمامًا بطرد البعوض بعيدًا عن مكانك…
الزيوت العطرية النفّاذة، ذات الرائحة الجميلة المهدئة للأعصاب لنا كبشر…
هي أكثر ما يدفع تلك الحشرة المؤذية للابتعاد…

🦟 البعوض…

من أكثر الحشرات المزعجة للإنسان…
وعلى قدر هشاشة جسمها وضعفها الشديد…
إلا أن قدر الضرر المرتبط بها كبير جدًا…

لإنها على ضعفها قادرة تزعج نومك بصوت طنين أجنحتها 😣…
وتؤلم جلدك وتجعله في حالة من التهيّج 🩹 لأنها بثت فيه مواد مثيرة للتحسس والأذى…
كما أنها قادرة على نقل أمراض قاتلة زي الملاريا ☠️…

وده كله بعد أن تمتص دمك 🩸…
ضعف واهن وأذى بالغ…

وده يدخلنا على أكثر سؤال بشوفه في الكومنتات أو رسائل الصفحة…

❓ كيف نستطيع النجاة من الشخصيات المؤذية الموجودة حولنا…

اللي بتستنفذ طاقتنا ⚡ وبتفسد علينا حياتنا…
اللي بيمرضونا فعلًا جسديًا ونفسيًا بحياتنا معاهم…
زي البعوض بالظبط…

💡 والحقيقة أنا بحب مبدأ الوقاية خير من العلاج…

خلينا نفكر بطريقة…
إيه الصفات والسمات اللي تخلي أي مؤذي يهرب ويبعد عنك؟
إيه السمات اللي تخليكي غير جذّابة ليه أو غير مستهدفة منه؟

✨ الصفات اللي بتطرد المؤذيين:

1⃣- إن يكون عندك شخصية وصوت…
المؤذيين بينفروا من اللي عارفين هما عايزين إيه، وليهم رأي وحضور.

2⃣- عندك قبول وحب لصورتك الذاتية 💖
لإن هدفهم اللي كارهين نفسهم، واللي صورتهم متدنية في عيون أنفسهم،
وعلشان كدة سلاح الإعجاب والإطراء المبالغ والمشروط في نفس الوقت مش حيأثر فيكي.

3⃣- عندك ناس تلجئي إليهم 👥
طول ما انتي عايشة وسط ناس ممكن تكلميهم وتشتكي ليهم، حيخاف ويبعد،
لإنه زي الذئب 🐺 لا يأكل إلا من الغنم الشاردة…
المؤذي عايز واحدة مفيش في حياتها غيره.

4⃣- عندك كرامة حقيقية مش إدعاء 🛑
أول ما يفعله المؤذي بعد ضمان قبولك ليه، هو اختبار المساحة،
عن طريق إنه بيجرب يتطاول ويغلط ويجرب مساحة السماح عندك،
رفضك القاطع للإهانة يمنع المحاولة أساسًا…
افتكري إني قولت تطاول وإهانة، وليس خلاف وصدام…

5⃣- أقل قدر من الخزي والذنب 🧬
وجود الخزي والذنب المرضي بيضعفوا جهاز المناعة النفسي،
ويخلّوه سهل الاختراق وعنده قابلية عالية للتعلّق…

6⃣- عارفة حدودك وبتعرفي تقولي “لا” 🚷
النقطة دي طاردة جدًا للمؤذيين،
لإنها مساحة مقفولة بالنسبة ليهم…
هما لا بيعرفوا ولا بيطيقوا يتعاملوا مع إنسان عنده حدود وبيعرف يقول “لأ”.

7⃣- ممتلئة بالحب 💕
لإنهم بيحبوا جدًا يصطادوا اللي عندهم جفاف وجفاء عاطفي،
ويغرقوهم بالحب (love bombing 💣)…
امتلائك بالحب من أهلك وأصحابك وحبك لنفسك،
يخليكي مش عرضة للتسوّل العاطفي…
وده الطُعم اللي المؤذي بيرميه لضحاياه.

8⃣- عندك هدف 🎯
لإنه مش حيكون هدفك الأساسي.
الإنسان اللي عنده هدف، هو غير قابل للتمحور حول آخر أيا كان…
اللي عنده هدف، يحب يعيش مع آخر، مش علشان آخر.

9⃣- واثقة في نفسك ومش مغرورة ✅
الـ gas lighting، أو التشويش، لا يصلح إلا مع فاقدي الثقة في أنفسهم…
المترددين تجاه صحة آرائهم، هم أهداف يسهل التأثير عليها…

🔟- متصالحة مع الماضي ✌️
المؤذيين بيعرفوا يفتحوا جراح قديمة عشان يسيطروا…
سلامك مع ماضيك بيخليهم بلا أدوات.

🧘‍♀️ الوقاية خير من العلاج…

اصرف بعوض البشر عنك مسبقًا…
خير من أن تعالج آثارهم…

لإن على ضعفهم وهشاشتهم…
إلا إنهم مزعجين ومؤذيين جدًا 💔…

النقاط دي تصلح للوقاية…
وكمان تصلح للعلاج…
والنجاة لحياة تستحق أن تعاش…
لإنها حياة واحدة 🕊️…

21/11/2025

معذور…
دايما شايف إنه معذور…
في أي تصرف مخادع، تلاعبي، أو حتى عدائي و مؤذي بيعمله…
علشان يحافظ بيه على مكتسبات حياته…
معذور… 😔

و الحقيقة إن أي إنسان ممكن يطلق عليه ألقاب زي مؤذي، نرجسي، أو سيكوباتي…
و مع بعض تشابهات طباعهم و إختلافها…
هم نتاج بيئة تربوية شديدة السوء و الإيذاء… 🧠💔

بعضهم تعرض لإهمال و تجاهل و إذلال عاطفي و مشاعري كبير جدا…
و البعض الآخر تعرض لإيذاء بدني وحشي و غير آدمي…
تخويف و إرهاب و حبس في الظلام أو حرمان من الطعام…
إذلال و إحراج متعمد أمام الأقارب و الأقران… 😢

أو تخيل إن بعضهم اتربى على التدليل الفاسد…
اللي علمهم انهم فوق البشر و ان جميع طلباتهم أيا كانت مجابة و لو على حساب أي فرد…
أو خليط من كل هذه الرسائل… 🎭

حياة مفزعة و ثقيلة و محزنة لأي طفل… 👶
مؤلم جدا إن طفل يتعرض لما تم تعرض هؤلاء إليه… 💔
مش بقولك معذور 😞😞

و لكن…
ده مش مبرر…
مش مبرر للإنتقام الغير مبرر المنزوع من أي إطار أخلاقي أو إنساني ضد ضحاياهم… ❌

دايما بقول إن المؤذي محروم…
غاضب و مغلول و مملوء بسواد الإنتقام…
قرر يوجهه لأكتر ناس حبوه و بذلوا جهد من أجله…
ينتقم من أكثر الناس عطاء ليه…
جنون ينخر في الروح و النفس و العقل…
و لكن يظل غير مبرر… 🖤🔥

الا لو قرر يتخلى عن صفة واحدة…
يتخلى عن انه يكون إنسان…
لإن الإنسان الحقيقي لو جاع في يوم من الأيام…
حيحس و يتألم للجوعى و المساكين….
مش حيرضى يشوف حد جعان بدون ما يعطف عليه و يساعده… 🤝🍞

و لكن اللي قرر يتخلى عن صفة الإنسانية…
حيستمتع و يتلذذ و هو يذيق الناس ألم الجوع و مرارة الحرمان… 😈

دايما الإختيار موجود…
تخلي ألمك رحمة للناس…
أو سم و وبال على حياة الآخرين… ⚖️

يبقى شخص لا تبدأ الحياة الا بعد غيابه…
فلو كان قدرك إنك تلتقي بأحد هؤلاء…
و جالك فرصة تنجو بنفسك و اخترت البقاء…
اعرف…
إنك مش معذور… 🚪❗