16/12/2024
المية الزيادة في الجسم
كتير مننا بيعاني من وزن زايد، بس أوقات الزيادة دي مش دهون، بتكون مية محبوسة في الجسم، وده بيخلي الشكل منفوخ ومزعج جدًا.
طيب ليه ده بيحصل؟‼
الجسم بيحبس المية لما:
1. مبتشربش مية كفاية: الجسم ذكي، لو حس إنك مش بتشرب مية كفاية، بيخاف يحصل جفاف فبيبدأ يحبس المية اللي عنده.
2. بتاكل حاجات مليانة ملح أو صوديوم: حتى لو بتشرب مية كتير، الأكل المالح أو اللي فيه صوديوم عالي بيحبس المية في جسمك بنفس الطريقة.
طيب الحل إيه؟
اشرب مية كتير جدًا، لأن ده مش بس هيمنع احتباس المية، كمان هيساعدك تحرق الدهون وتنزل الوزن.
قلل من المخللات، المعلبات، والأكل المحفوظ، وابعد عن الأكلات اللي فيها ملح كتير. الصوديوم مش بس بيحبس المية، كمان بيفتح النفس على الأكل، وإحنا مش ناقصين!
استخدم ملح low sodium، ده متوفر ومفيد جدًا، وبيستخدمه كمان مرضى الضغط، ومش غلط يكون في البيت كله.
كمان ممكن تشرب حاجات تنزل المية الزيادة وتغسل الجسم والكلى، زي:
شاي أخضر
ليمون
جنزبيل
قهوة
مشروب الكرفس والبقدونس
احسبها صح، وخليك واعي بأكلك وشربك!
