04/06/2019
السادة زائرى شرم الشيخ الكرام
بمناسبة اجازات العيد و الصيف يرجى اتباع التعليمات التالية:-
1- ياريت ما تمشيش فى نص الشارع, الرصيف عندنا حلو و مش مكسر اما الاسفلت معمول علشان العربيات تمشى عليه
2- رجاء عدم القاء المخلفات فى الشارع و خاصة ازايز المياه و الكانزات اللى بتطير من العربيات
3- انا معاك انك فى اجازة و بتفسح العيال وماشى بالسيارة على السلانسية بس ياريت تعرف انى اللى بيديلك نور او كلاكس بيبقى مستعجل و انه مش فى اجازة و عنده ارتباطات شغل علشان كده رجاء عدم السير بالسيارات بسرعة بطيئة فى شمال الطريق خليك فى اقصى اليمين
4- ياريت تحافظ على محتويات الغرفة اللى انت قاعد فيها متكسرش حاجة وياريت مفيش حاجة تنقص منها
5- احب اوضح لحضرتك ان مش كل البنات الاجانب عاهرات و لا كل البنات الاجانب جاية تجرب المصرى العظيم , فبلاش الافكار الشيطانية اللى فى دماغك دى
6- العاملين فى الفنادق دول ولاد ناس و فى منهم ناس مؤهلات عليا و يمكن متعلم تعليم كويس جدا بس ظروفه خليته يشتغل فى الفندق فبلاش تتعامل معاهم على انهم خدامين عندك و بكلمة حلوة منك هايديلك كل اللى انت عايزه حتى لو كانت صعبة عليه فبلاش تتعالى عليه
7- اماكن الانتظار فى شرم محدودة جدا فبلاش تركن العربية ركنة تاخد معاها مكان عربيتين تلاتة علشان غيرك يعرف يركن عربيته
8- بلاش تفاصل مع الناس الغلابة فى الجنيه و الخمسة جنيه و بعدها تروح تدفع بقشيش بالعشرات او المئات لواحد دخله الشهرى اكتر منك
9- ياريت توفر فى استهلاك المياة و الكهرباء فى الفندق و بلاش تسيب التكييف شغال 6 ساعات علشان لما ترجع من البحر تلاقى الغرفة باردة, انت ممكن تيجى على نفسك و تستحمل خمس دقايق و هتلاقى الغرفة تلاجة
10 - البحر و حمام السباحة لهم لبس مخصص للسباحة فبلاش تنزل المياه بملابس غير مخصصة للسباحة
11- الشعاب المرجانية اللي في البحر دى مش حجارة تقعد تكسر فيها
دى كنوز الهية ربنا وهبها لنا لا تقدر بثمن منها بيقعد مئات أو آلاف أو ملايين السنين عشان تنموا من جديد وبلاش إطعام الأسماك و رمي المخلفات في البحر دي حاجات بتدمر الحياة البحرية و ممكن لو استمرت السلبيات دي بالاكيد هتضر السياحة لإن أغلبية السائحين اللي بيجوا شرم بيبقوا جايين مخصوص علشان يتفرج على الشعاب المرجانية والاسماك الملونة ودى تعتبر ادوات جاذبة للسياحة زيها زى الاهرامات والمعابد الفرعونية فياريت الناس تفهم إن ربنا خلقنا عشان نعمر الأرض مش عشان نخربها !
الكلام ده مش لكل الناس طبعا لان بالطبع فى ناس محترمة و مش محتاجة حد يقولها تتعامل ازاى
وعيد سعيد و اجازة سعيدة على الجميع وكل سنة وانتم طيبين
وده فضلا وليس أمرا
" مصري بيحب اخواته وضيوف بلده "
