06/10/2025
بخصوص تكرار اساءه فهم الناس للوضع داخل المستشفيات الجامعيه
وجب علي الأطباء(باعتبارهم اول حاجه الناس بتخبط فيهم وبتظن إن ف ايدهم مصباح علاء الدين وأنهم المفروض يصلحوا كل مشكله موجوده) أننا نعمل اللي ف أيدينا وهو تكرار الإيضاح والشرح عسي ربنا يبدل حالنا وأحوال الناس للأفضل والناس تدرك المشكله الاساسيه وتبطل تعامل اطباء اقسام الطوارئ علي أنهم المسئولين ديما
وان تكون نفس المنصه اللي الناس بتاخدها كوسيلة ادانه للأطباء انها تكون منصه توضيح وشرح لبعض الأجزاء الغايبه عن حدود وعي الناس
مستشفى طب الطوارئ بجامعه طنطا
او مستشفى الطوارئ او اللي جنب الفرنساوي او اللي قدام الشامله... كلها مسميات للمستشفى اللي بتستقبل حالات الطوارئ داخل طنطا
الناس محتاجه تفهم انها مش مستشفى خاصه او عياده.. وانها مستشفى بتخدم الناس كلها طول الوقت سابقا او حاليا ايام التلات والاربع والخميس وأول ايام الجمع من الشهر لحد يوم ١٥ ف الشهر
الاولويه الاساسيه ف المستشفى هو خطوره الحاله.. يعني مهما كان وضع حضرتك المادي او العلمي او الاجتماعي ف ده ابدا مش اولويه.. الاولويه الوحيده هو هل حالتك خطره ولا لا.. وده مش استهانه باوضاع الناس والله.. لكن الغالبيه مش مستوعبه الاعداد اللي بتتدافع ع المستشفى في أيام العمل مع وجود قصر ف المستلزمات بشكل واضح
كل حد من الناس وأقاربها بيكون ملهوف ع الحاله اللي معاه وعاوز الموجود من الطقم الطبي يعيرها اهتمام.. بس للاسف الناس بتشوف حالتها بس لكن الدكاتره بيبصوا للحالات بميزان مختلف عن ميزان العاطفه وهو ميزان مين أخطر من مين.. او يتعامل مع مين الاول ويؤجل مين.. ناهيك بقى عن أن اغلب القرارات ف المستشفى مش بتكون ف ايد الدكاتره اللي بتقابلهم.. بالعكس اغلب القرارات بتكون من دكتور تاني اعلى رتبه من الدكتور الي بتقابله.. ف الدكتور اللي بيقابلك لما بيقولك هننتظر الرد او هنحجزك لما يتحدد او هتدخل عمليات لما المرور يجي هو بيصدقك الحديث مش قاصد يطفشك او يهملك او يكون متباطئ معاك
ف رجاء شخصي باسم كل الأطباء ف المستشفى :
١.متروحش مستشفى الطوارئ غير ف الاحتياج الشديد وعدم وجود بديل زي العيادات الخاصه.. أما ف حاله الرغبه ف الكشف غير الطارئ ف برجاء التوجه للعيادات الشامله بالجامعه يوميا ماعدا الجمعه من الساعه ٨ ص ل الساعه ١ ظهرا
٢.بلاش ابدا يكون التعامل وحش مع أي حد بيقدم لحضرتك خدمه داخل المستشفى و التعامل بنيه انهم مهملين وان كان ده لا ينفي الإهمال او التقصير احيانا
٣. الطبيب او الطبيبه اللي بيقابلوا حضرتك هم بشر مش ملايكه ف عندهم قدر من التحمل مختلف بينهم وبيكون كل واحد منهم مستمر عمله ف الجامعه بشكل متواصل لا يقل عن ٣٠ ساعه.. ف رجاء احترام كونهم أفراد بشريه لها قدر من الاستيعاب النفسي والجسماني ف رجاءا الالتزام باللي بيطلبوه منكم إلا لو حصل تقصير منهم ف ممكن وقتها التصعيد بسؤال طبيب تاني أو طبيب اكبر او تبليغ نقطه الشرطه او مدير المستشفى دون التعدي ع حد منهم
٤. ف اوقات معينه بيتم فيها تغيير الدكاتره والاستلام والتسلم وده بيشمل الساعات ٨ ص و ٤ عصرا و٨ مساءا و ١٢ مساءا باختلاف التخصصات.. خلال الساعات المذكوره ممكن حضرتك تلاقي الطبيب اللي معاك اتبدل بحد تاني بس بيكونوا بلغوا بعض ف متقلقش من ده واسمع كلام الدكتور الجديد ووافيه بالمعلومات اللي يطلبها
٥. احنا مبننفيش التقصير مننا او من زمايلنا لكن قدر المستطاع بلاش التصعيد السئ للموقف.. لو حد ما ساعدش حضرتك اطلب من حد تاني وهتلاقي اكيد اللي يساعدك
٦.الدكتور لما بيطلب من حضرتك اشعه او تحليل وحضرتك مش شايف ليهم لازمه ف هو مش غرضه يكلفك او يشغلك او يمشيك.. هو بيطلب ده لانه بيكون شايف شئ معين عاوز يثبت وجوده او ينفيه بغض النظر عن معلومات الشعب اللي مصدرها النت الجميل
٧. لما الدكتور يطلب منك اشعه او تحليل ويطلعوا كويسين احمد ربنا ف غيرك بيطلعوا سيئين.. والدكتور مش بيكون جاهل لو طلب تحليل وطلع كويس.. هو بيطلب ده لاستبعاد مشكله معينه وحصر الاسباب
٨. بالله عليكم الناس اللي مهمله ف أهلها بالشهور وأحيانا سنين وجايب الحاله ف وضع سئ ومش صابر ع اللي موجودين وقت الخدمه الطبيه... حضرتك المتسبب الأول ف المشكله باهمالك... ف بلاش الحميه اللي بتظهر فجأه عند الاهالي تحت مسمي(عاوز ابص عليه بصه يا دكتور... يا دكتور انا ابن عمته وجاي م السفر سيبني اشوفه.. يا دكتور اعملوله اللازم وننقله اي مكان....) انت بس اسمع كلام الدكتور و هو هيوجهك ولما يطلب مرافق واحد مع الحاله ياريت نسمع الكلام عشان سرعه الخدمه
٩.العنف والزعيق عمره ما بيجيب نتيجه او بيزود الاهتمام لان ببساطه هتلاقي الدكتور ساب الحاله ف انت الخسران لأنك اللي ف احتياج له.. وده مش انعدام ضمير ولكن محدش هيقبل الاهانه
١٠. قدر المستطاع زمايلنا الدكاتره تراعي ضميرها وتستخدم الامكانيات المتاحه للتخفيف ع الناس وتعامل الناس كويس لأن اللي جايلك جايلك ف اسوء حال ليه ف بلاش تبقي انت والمرض عليه
١١. بلاش تصنيف الناس ب ده يستاهل او ده مدمن او او او.. الناس ف الوضع ده سواسيه ميفرقش بينهم غير وضعهم المرضى
١٢. بلاش ك طبيب تخالف ضميرك او تستحل حرمه الحاله اللي قدامك ومتترددش ابدا ف طلب مساعده من زميلك عشان انجاز الأمر وبلاش تظلم اي حاله "وعنت الوجوه للحي القيوم وقد خاب من حمل ظلما"
١٤. حط قدام عينك انك هتتحاسب ع اي شئ هتعمله وبلاش تزود ع الحاله ف شئ او تقصر معاها.. هتدور بينا الدايره وهنكون ف وقت احنا المرضى.. ف اعمل ديما لليوم ده... أحسن حتى يحسن الله إليك
١٥. مستشفي الفرنساوي أو الجراحات او اي مكان يحمل مسمي مستشفيات جامعه طنطا لا يتم التوجه إليها الا لو تحمل قسم استقبال طوارئ ..ما دون ذلك حضرتك بتظلم المريض اللي معاك لو توجهت لمكان غير مجهز لاستقبال حالات الطوارئ ..الأمر مش مكان أو سرير وخلاص ..ولكنه بيحتاج لجاهزيه مسبقه حضرتك غير مدرك أبعادها لان حضرتك مش طبيب ..ف لا يصح التوجه إلي أحدي هذه المستشفيات مباشرة
عسى الكلام ده يفرق مع الناس ويساعدهم.... دمتم سالمين ❤️❤️
Patch Habib
