https://www.facebook.com/115406722221829/

Dr/ Sarah Hossam - د/ ساره حسام

Home
Egypt
Asyut
Dr/ Sarah Hossam - د/ ساره حسام

Contact information, map and directions, contact form, opening hours, services, ratings, photos, videos and announcements from Dr/ Sarah Hossam - د/ ساره حسام, Nutritionist, later, Asyut.

🩷💚هنفهم مع بعض أهمية تخصص التغذية
العلاجية الطبى فى الوقاية و كجزء من علاج الأمراض المختلفة🩷💚
مش بس دورها فى علاج السمنة والنحافة🧐
لوعجبك بوست أتمنى
شير/لايك/كومنت عشان يوصلك بوستات الصفحة
وتوصل لغيرك ويستفيد
وكمان تشجعنى 🩷💚
01280100111

30/11/2025

ليه الشتاء فرصة ذهبية لرفع معدّل الحرق؟ 🔥❄️

الدراسات بتقول إن الجسم في الجو البارد بيشتغل بطريقة مختلفة تمامًا… !

✔️ الحرق ممكن يعلى لمرتين أو 3 بسبب إن العضلات المركزية بتشتغل أقوى لإنتاج الحرارة.
✔️ العضلات الطرفية في الدراع والرجل كمان بتبدأ تستهلك طاقة أكتر رغم إنها مش جزء من نظام إنتاج الحرارة أساسًا.
✔️ الخلايا الدهنية البُنّية — اللي بتعتبر “محارق دهون طبيعية” — نشاطها بيعلى، وعددها ممكن يزيد كمان!
✔️ الجسم بيعمل Shift لبناء العضلات وده معناه حرق دهون أكتر، واستخدام أعلى للجلوكوز والجلايكوجين يوصل لـ 80%.
✔️ وكمان بيحصـل انخفاض في الالتهاب… الجسم تلقائيًا يزوّد مضادات الالتهاب ويقلّل المواد اللي تشعل الالتهاب.

❄️ طب هل ده معناه إننا هنخس وإحنا قاعدين؟
للأسف… لأ.

لكن:
لو التزامك بالنظام مظبوط، ومعاه شوية رياضة—حتى لو بسيطة—هتستغل المزايا دي كلها…
وساعتها نتائج الشتاء فعلاً بتكون مبهرة.

ها..مين فيكم مستعد لبرد الشتاء🤍❄️

#التغذيةالعلاجيةوقايةوعلاج

21/11/2025

فطار الجمعة💚🩷
جمعة مباركة♥️

#التغذيةالعلاجيةوقايةوعلاج

15/11/2025

❄️ أخباركم إيه؟
بدأنا ندخل في مود الشتا… الزهق، البرد، واللي يخلي كل شوية نقوم نعمل مشروب سخن “نفوق بيه ونِدفى”. المشكلة؟
إن أغلب الناس بتشرب حاجات كتير جدًا طول اليوم…
وكل مرة: “معلقة واحدة بس يا دكتورة!”
بس تعالوا نحسبها…
لو بتشرب/ي 5–6 مرات في اليوم، معلقة سكر واحدة في كل مشروب = رقم كبير جدًا بيتراكم ويبوّظ النظام من غير ما ناخد بالنا.

☕✨ علشان كده… خليني أقولّكم على استراتيجية بسيطة جدًا
أنا شخصيًا بطبّقها وبنصح بيها الحالات:

🎯 ركّزوا على الهدف من المشروب… مش الطعم!

إحنا بنشرب: قهوة – شاي – قهوة بلبن – نسكافيه…
وأغلب الوقت الهدف منهم بيكون:
🔸 نفوق ونركز
🔸 وندّفى من البرد
مش إننا نستمتع بطعم “حلو زي البونبوني”.

فـ جرّبوا كده:
أول ما تشرب مشروبك وتحس إنك فُقت واتدفّيت…
خلاص، الهدف اتحقق!
الزيادة اللي بعد كده بتكون للطعْم… ومع الطعم بتيجي معلقة السكر اللي مفيش داعي لها.

ومع تكرار اليوم كله؟
الكمية دي بتعمل فرق مهول في السكر والسعرات
#التغذيةالعلاجيةوقايةوعلاج

12/11/2025

🧠 ٤ حاجات بتدمّر مجهودك في خسارة الوزن!
وبيحصلوا أغلب الوقت لما مستوى الكورتيزون يعلى في جسمك ⬆️

الكورتيزون مش دايمًا بيزيد بسبب ضغط الشغل أو المشاكل بس،
أحيانًا كمان بيزيد لما تكون مضغوط علشان تخس بسرعة،
وحاطط لنفسك أهداف صعبة في وقت قصير 😅

💥 أولًا:
الكورتيزون بيأثر على الغدة الدرقية،
ودي مسؤولة عن معدل الحرق في الجسم،
فلما تتلخبط، الحرق بيقل والوزن يثبت.

💥 تانيًا:
بيغيّر نوع الدهون اللي جسمك بيكوّنها!
بيزوّد الدهون البيضا اللي بتتخزن بسهولة حوالين البطن،
وبيقلّل الدهون البُنيّة اللي كانت بتحرق بسرعة 🔥

💥 تالتًا:
بيقلل إفراز الدوبامين —
الهرمون اللي بيخلينا نحس بالراحة والمكافأة،
فتبدأ تلجأ للأكل الدهني أو السكريات علشان مزاجك يتحسّن 🍫🍟

💥 رابعًا:
الكورتيزون العالي بيحط جسمك في “وضع بقاء”،
يعني يفضّل يخزّن طاقة بدل ما يحرقها 🔄

✨ النتيجة:
حتى لو أكلك مضبوط، التوتر الزائد بيقف ضدك!
علشان كده أوقات كتير الحل مش في الدايت الجديد…
الحل في إنك تخف توترك وتدي جسمك فرصة يتنفس. 🌿

---

> “احكيلنا في الكومنتات أكتر حاجة بتزود توترك وقت الدايت”
ولو انى مابحبش كلمة دايت🫣

#التغذيةالعلاجيةوقايةوعلاج

05/11/2025

الأورام السرطانية..وخط الدفاع الخفى!!

#التغذيةالعلاجيةوقايةوعلاج

04/11/2025

السعرات… مش دايمًا محور المشكلة!!

"شيبسي ٢٥٪ دهون أقل"…
جملة بنسمعها وبتحبّب ناس كتير يشتروا النوع ده.
لكن الحقيقة؟ فيه أنواع أكل القليل منها بيجرّ الكثير 😂

ومن أوضح الأمثلة: كل أنواع الشيبسي.
وحتى لو دهون أقل… ما زال بالنسبالي:

«كومبو الإدمان»
✅ ملح كتير
✅ دهون—even لو أقل
✅ مونو صوديوم جلوتامات
✅ منكهات مكثّفة

المكونات دي كلّها بتشتغل على مسار في المخ اسمه:
Food Reward Pathway
المسؤول عن الأكل العاطفي.

وعشان كده أول ما تشم ريحته… تحس إنك عايز تهجم عليه!
مش مجرد سعرات… هو فعلًا بيربطك بالأكلة دي جدًا.

ممكن أول يوم تاخد كمية قليلة…
والتاني…
لكن بالتدريج هتلاقي نفسك مش قادر تسحب نفسك،
والكمية بتزيد يوم بعد يوم.
وفعلا هتتسحب جوا دائرة الإدمان

طب نعمل إيه؟
لو هنتكلم عن الكمية المناسبة ومن غير ما "نولّع الدنيا":
الشيبسي في النهاية نوع من النشويات.
فهيتعامَل زي المكرونة والرز:
✅ حصة محسوبة… مش مفتوحة.

إحكوا مغامراتكم مع الشيبسى 😂
وهل حسيتوا وانتوا بتقروا انكم فعلا "مدمنين"شيبسى؟😂
#التغذيةالعلاجيةوقايةوعلاج

29/10/2025

خل التفاح..سحر فى عالم نزول الوزن ونسف الدهون
الكلام ده ايه مدى صحته؟!
شوفوا الفيديو وهتعرفوا كتير🍿
بس نصيحة إسمعوا الفيديو للآخر..كل جزء فيه فعلا معلومة هتكملنا الصورة💚🩷
خل التفاح بين الواقع والخيال😂
وإحكولى بقى عن تجربتكم معاه..مين بيستخدمه؟!ويستخدمه ليه؟! وإيه اللى لاحظه؟

#التغذيةالعلاجيةوقايةوعلاج #

للحجز والإستعلام 01280100111
د/ساره حسام/عيادات تيوليب/أسيوط

19/10/2025

👀 حد خد باله من النقطة دي قبل كده؟

في الوقت اللي ناس كتير كانت بتدور فيه على جلسات "الراديو فريكونسي" علشان تشد اللغد،
أو بتسأل على إجراءات تجميلية تقول إنها "هتنهي المشكلة دي نهائيًا"،
كان في أطباء بيدوروا على علاقة تانية خالص…
📍العلاقة بين محيط الرقبة – اللي بنسميه مجازًا "اللغد" – وبين بعض الأمراض المزمنة المهمة جدًا.

تخيلوا إن الدراسات بتقول إن محيط الرقبة ممكن يكون أدق في التنبؤ ببعض الأمراض من مقاس الخصر أو البطن!

📊 كل ما زاد محيط الرقبة، زادت احتمالية الإصابة بأمراض زي:

تكيّسات المبايض

الكبد الدهني

مقاومة الإنسولين

السكر من النوع التاني

أمراض القلب والشرايين

📏 الدراسات اللي اتعملت على الشعب المصري وضّحت إن:

عند السيدات: لو محيط الرقبة زاد عن 37.25 سم بيبدأ يكون مؤشر خطر.

عند الرجال: لو زاد عن 40.25 سم بيحمل نفس الخطورة تقريبًا.

وطبعًا الأرقام دي بتختلف من بلد للتانية حسب طبيعة الجسم ونمط الحياة،
لكنها بتديّنا فكرة إن الموضوع أكبر من مجرد "شكل" أو "مشكلة تجميلية".

"اللغد" أحيانًا بيكون إشارة من جسمنا بيقولنا فيها إن في خلل داخلي محتاج يتعالج من الجذور.

💡 الحل الحقيقي مش في الجلسات ولا الحقن،
الحل في إننا نبدأ من جوه: من نظامنا الغذائي، من النوم، من التوازن الهرموني.
لما الجسم يتظبط من جوه… الشكل بيتظبط لوحده 💚

📌 شاركوا البوست مع أي حد بيشتكي من اللغد أو دايمًا بيدور على حلول تجميلية…
يمكن تكون دي أول مرة يفكر يشوف السبب الحقيقي ورا المشكلة.

💬 وقولولي في الكومنتات…
كنتوا متخيلين إن اللغد ممكن يكون له علاقة بالأمراض دي؟

#التغذيةالعلاجيةوقايةوعلاج

14/10/2025

تخيل إنك بقالك سنين بتستخدم بدائل السكر لأنك شايفها "صحية" ومفيهاش سعرات!
لكن الحقيقة إن العلم دلوقتي بيقول إن كل بدائل السكر – بلا استثناء – مش بريئة!

بدائل السكر بتأثر على البكتيريا النافعة في القولون، وده مع الوقت بيأثر على صحة الجهاز الهضمي،
وبيزود احتمالية مقاومة الإنسولين، وبالتالي ممكن يفتح الباب لظهور سكر نوع تاني، ودهون كبد، ومشاكل دهون الدم والقلب.

لكن المفاجأة الأكبر؟ 😮
إنها كمان بتأثر على دواء الميتفورمين نفسه!
الدواء اللي هو حجر الأساس في علاج حالات "ما قبل السكر" وسكر النوع التاني.

الأبحاث بتوضح إن بدائل السكر ممكن تعطل عمل الميتفورمين عن طريق تأثيرها على مادة اسمها GDF-15بتُفرز من الكبد والأمعاء والكُلى،
وده بيخلي استجابة الجسم للدواء أقل.

يعني ببساطة…
بدائل السكر مش بداية صحة، بالعكس!
الالتزام بالنسبة العالمية من السكر الطبيعي (حوالي 5-10% من إجمالي السعرات اليومية)

آمن جدًا ومش هيعملك أي ضرر لو التزمت بيه.

أحكولى عن تجربتكم مع بدائل السكر
وهل فعلا حسيتوا بإنعكاسها السئ على الجسم والصحة؟
#التغذيةالعلاجيةوقايةوعلاج

10/10/2025

🧠💭
ياترى لما بنلعب رياضة، بنقدر فعلًا نخرج أي طاقة سلبية حاسين بيها؟

الطاقة السلبية، التوتر، الضيق، الإرهاق العام…
وأوقات كده نحس بوجع في الجسم ومش عارفين هو جاي منين بالظبط 🤷‍♀️

الحاجات دي أوقات بيكون وراها خلل بسيط في بعض الهرمونات
أو مادة كيميائية في الجسم اسمها الإندورفينز (Endorphins)
🎈اللي كمان بتحفّز إفراز الدوبامين في المخ — وده المسؤول عن شعورنا بالرضا والسعادة 💫

وطبعًا الرياضة بتظبط كل ده، خصوصًا لما تكون عالية الشدة 🏃‍♀️🔥
يعني الرياضة اللي ضربات قلبنا فيها بتزيد شوية:
💃 كلاس زومبا بريتم عالي
⚽ ماتش كورة بنجري فيه بجد
🏋️‍♀️ أو حتى تمرين مقاومة بالأوزان

كل ده بيحفّز إفراز الإندورفينز،
فـبتتحسن الحالة النفسية، وبننام أحسن، وبنحس بطاقة إيجابية أكتر 🌿✨

ونصيحة مني ❤️
جرب كل يوم 10 دقايق بس في البيت — كارديو أو أي رياضة عالية الشدة
هتتفاجئ إزاي الموضوع هيفرق في نفسيتك جدًا

وهتلاحظ إنك بقيتِ مرتبطة بالوقت ده نفسيًا،
كل ما تفتكر الـ10 دقايق دول تحس إن مخك اتفتح عينيك بتنور 👀💡
زي بالظبط لما تفتكر قطعة شوكولاتة 🍫 أو بيتزا بالجبنة السايحة 🍕

لأن الاتنين بيشتغلوا على نفس الحاجة!
نفس نظام المكافأة في المخ… نفس الدوبامين 😍

يعني لو عندك مشكلة الأكل العاطفي،
الرياضة دي ممكن تكون واحدة من أحسن الطرق تساعدك تتغلب عليها

وبس كده🩷💚🌸

قولولى تجربتكم مع الرياضة فى الموضوع ده
#التغذيةالعلاجيةوقايةوعلاج

07/10/2025

🩺 بعد عملية المرارة... نعمل إيه علشان نحافظ على صحتنا ونتجنب المشاكل؟

في البداية، بعد العملية ممكن نخس شوية، وده لأن الجسم مش بيهضم أو يمتص الدهون زي الأول، فمش بيستفيد منها كويس.

لكن بعد كده، الجسم ممكن يدخل في شوية لخبطة، ولو ماخدناش بالنا، ممكن نكون معرضين لحاجات زي:

🚨 زيادة الوزن والكبد الدهني

بعد العملية، الدهون ممكن تبدأ تتراكم في الكبد، وده بيخلّي شكل الجسم يتغيّر ودهون البطن تزيد.

الدهون دي كمان بتأثر على الهرمونات وبتزود مقاومة الإنسولين.

والمشكلة إن مقاومة الإنسولين بتفتح الباب لتكوين دهون أكتر وتخزينها في الجسم بسهولة.

🧬 نقص فيتامينات مهمة

بعد العملية، بيكون في صعوبة في امتصاص بعض الفيتامينات اللي بتذوب في الدهون، زي:

فيتامين D

فيتامين E

فيتامين K

فيتامين A

نقص الفيتامينات دي مش بس بيأثر على الصحة العامة، لكن كمان ممكن يكون ليه علاقة بالسمنة، وضعف المناعة، وزيادة الالتهابات في الجسم.

🍔 الشهية بعد العملية

واحدة من الحاجات اللي بتحصل بعد استئصال المرارة، إن الشهية ممكن تتفتح شوية، لأن الجسم مش بقى يحس بالتعب زي زمان مع الأكلات الدسمة، فده ممكن يخلي الواحد ياكل كميات أكبر من غير ما يحس.

💚 وأهم حاجة:

ما نقلقش. كل اللي قلناه ده قابل للتجنب أو العلاج بسهولة، لو اهتمينا بأكلنا وصحتنا ومشيّنا على تعليمات الدكتور.
يعني إحنا مش معرضين لمشاكل أكتر من غيرنا… إحنا بس محتاجين نكون أذكى شوية في تعاملنا مع جسمنا بعد العملية.
عشان كدة المتابعة مع دكتور التغذية العلاجية مهمة جدا بعد العملية خصوصا أول كام شهر
🩷💚
#التغذيةالعلاجيةوقايةوعلاج

05/10/2025

🧠💡 هل نقص فيتامين "د" يعرقل نزول الوزن؟

سؤال مهم، وعشان نعرف نجاوب عليه لازم نحكي فى كان حاجة، من خلال شوية معلومات مثبتة
علميًا 👇

1️⃣ نقص فيتامين د بيأثر على مستقبلات الإنسولين

يعني إيه؟
فيتامين د بيلعب دور في تكوين مستقبلات الإنسولين على الخلايا. كل ما كان فيتامين د قليل، كل ما عدد المستقبلات دي بيقل.

وده بيعمل حاجتين مهمين جدًا:

بيقلل قدرة الجسم على استخدام الطاقة بكفاءة.

بيزود مقاومة الإنسولين، وده معناه إن الجسم يبقى مائل لتخزين الدهون بدل ما يحرقها.

2️⃣ زيادة في عوامل الأكسدة 🔥

لما فيتامين د يقل، بيزيد معاه الإجهاد التأكسدي (oxidative stress)، وده بيأثر كمان على مستقبلات الإنسولين وبيزود من مقاومة الإنسولين.

وده معناه صعوبة أكتر في خسارة الوزن بسبب اضطراب توازن استخدام السكر والدهون كمصدر طاقة.

3️⃣ تأثير على تكوين الخلايا الدهنية

فيتامين د له دور في تنظيم نضوج الخلايا الدهنية.

لما يكون ناقص، الخلايا اللي لسه غير ناضجة ممكن تتحول لخلايا دهنية مكتملة → وبالتالي يزيد عدد الخلايا اللي بتخزن الدهون في الجسم.

وده بيبان أكتر في فترات النمو (زي الطفولة والمراهقة)، أو في حالات خاصة زي الليبيديما.

4️⃣ فيتامين د والدهون المخزنة 🚫

فيتامين د كمان بيأثر على إنزيم مهم اسمه LPL – Lipase، والإنزيم ده مسؤوله عن تخزين الدهون جوه الخلايا الدهنية.

لو فيتامين د مضبوط → الإنزيم ده بيشتغل باعتدال.
لكن لو ناقص → الإنزيم ده يشتغل أكتر من اللازم → فتزيد كمية الدهون المخزنة، خصوصًا في البطن والدهون الحشوية (اللي حوالين الأعضاء).

مش باقول إن فيتامين د هو الساحر اللى بينزل الوزن...لكن نقصه بيكون ليه دور فى مشكلة زيادة الوزن أو ثباته أو حتى أحيانا الصعوبة فى التخلص من الدهون

قبل ما ندور على إيه بي على الحرق فى الجروبات!!!!⬅️⬅️نروح للدكتور نعرف إيه اللى ناقص من جسمنا مسببلنا مشاكل صحية ومشكلة مع الوزن ومقاومة الإنسولين!!

#التغذيةالعلاجيةوقايةوعلاج

Address

Later
Asyut

Telephone

+201280100111

Website

facebook.com

Alerts

Be the first to know and let us send you an email when Dr/ Sarah Hossam - د/ ساره حسام posts news and promotions. Your email address will not be used for any other purpose, and you can unsubscribe at any time.

Contact The Practice

Send a message to Dr/ Sarah Hossam - د/ ساره حسام:

Shortcuts

Want your practice to be the top-listed Clinic in Asyut?